Ne kitia he tama fifine tote e tau ahua mai he tau siminī he fale gahua, ti lalahi fakahaga e tau ahua ke tuga e tau aolū. Kua manatu a ia ko e fale gahua ia ne talaga e tau aolū. Liga fakafekī e nakai maama mitaki pihia he tama tote. Ka ko e nakai maama e taha mena aoga lahi kua maeke ke lauia e tau momoui ha tautolu. Ma e fakatai, ka nakai totou fakamitaki e leipolo he vai ekekafo to liga tupu mai e tau mena hagahagakelea lahi.

Ka ko e nakai maama mitaki hagaao ke he tau mena fakaagaaga kua maeke ke mua atu e hagahagakelea. Ma e fakatai, ne nakai maama mitaki he falu tagata e tau fakaakoaga ha Iesu. (Ioane 6:48-68) He nakai eketaha ke iloa foki, kua fakaheu e lautolu e tau mena oti ne fakaako e Iesu. Ko e lekua mooli!

Totou nakai e koe e Tohi Tapu ke moua mai e takitakiaga? Mitaki ka pihia. Ka e liga maeke nakai ke nakai maama ia koe e tau mena haau ne totou? Tupu e mena ia ke he tau tagata tokologa. Manamanatu la ke he tolu e tuaga fa mahani ati nakai maama ai.

• Ko e falu tagata kua nakai maama e poakiaga he Tohi Tapu ke “matakutaku a ke he Atua [mooli].” Manatu a lautolu ko e matakutaku hopoate anei ke he Atua. (Fakamatalaaga 12:13) Ka e nakai manako e Atua ke he tau tagata ne tapuaki ki a ia ke pihia e logonaaga ki a ia. Pehē a ia: “Ua matakutaku a koe, ha kua fakalataha au mo koe; aua neke kitekite fano a koe, ha ko au ko e hau a Atua; kua fakamalolo e au a koe; ko e moli, kua lagomatai au kia koe.” (Isaia 41:10) Ke matakutaku ke he Atua kua kakano ke fakatapu mo e fakalilifu lahi ki a ia.

• Ko e falu tagata kua nakai hako e fakakakanoaga ke he tau kupu nei ne omoomoi he agaaga he Atua: “Ko e mena mo e hana ni a tau ke he tau mena oti . . . Ko e vaha ke fanau ai, mo e vaha ke mate ai.” Pehē a lautolu ne fitā e fifili tuai he Atua e magaaho tonu ka mamate e tau tagata takitaha. (Fakamatalaaga 3:1, 2) Ka ko e tau kupu tohi ia kua tutala hagaao ke he holoaga he moui mo e mailoga ai ko e fakahikuaga he tau tagata oti ko e mate. Fakaako foki he Kupu he Atua ko e tau fifiliaga ha tautolu kua lauia e moui loa ha tautolu. Ma e fakatai, totou e tautolu: “Ko e matakutaku kia Iehova kua fakatuleva ai e tau aho.” (Tau Fakatai 10:27; Salamo 90:10; Isaia 55:3) Ke he puhala fe? Ma e fakatai, ko e fakalilifu ke he Kupu he Atua ka omoomoi a tautolu ke kalo kehe he tau gahua ka lauia kelea tuga e konahia mo e mahani feuaki.—1 Korinito 6:9, 10.

• Ko e falu ne nakai manamanatu fakaagaaga ke he talahauaga he Tohi Tapu hagaao ke he lagi mo e lalolagi kua “taofi ma e afi,” ti pehē a lautolu to moumou he Atua e fua lalolagi nei. (2 Peteru 3:7) Ka kua mavehe mai e Atua to nakai fakaatā e ia ke moumou e fua lalolagi. Ko e Atua “ne fakave e lalolagi ki luga he hana tau fakave, kia nakai tuai gahuahua a ia tukulagi tukumuitea.” (Salamo 104:5; Isaia 45:18) Ko e fakatokaaga nei he tau tagata matahavala ka utakehe katoatoa ke tuga kua moumou he afi, ka e nakai ko e fua lalolagi. Ko e kupu lagi, kua hagaao ke he pulagi, lagi likoliko ne loga e fetū, po ke haeleaga he Atua. To nakai moumou e tau mena nei.

Tuga kua kitia e koe he tau fakataiaga i luga, kua nakai maama mitaki he tau tagata e tau kupu ne totou e lautolu i loto he Tohi Tapu. Ka ko e ha ne fakaatā he Atua ke pihia? Liga fakakakano he falu tagata: ‘Ane mai pulotu katoatoa mo e iloa he Atua e tau mena oti kana, kua lata a ia ke foaki ki a tautolu e tohi ne mukamuka ke totou mo e maama he tau tagata oti. Ko e ha ne nakai taute pihia e ia?’ Manamanatu la ke he tolu e kakano ati nakai maama mitaki he falu tagata e Tohi Tapu.

1. Kua tohia e Tohi Tapu ke maama he tau tagata ne fakatokolalo mo e makai ke fakaako. Pehē a Iesu ke he haana Matua: “Kua fakaaue au kia koe  ma Matua na e, ko e Iki he lagi mo e lalolagi, he ufiufi e koe e tau mena nai he tau tagata iloilo, mo e loto matala, ka kua fakakite atu ai ke he tau tama.” (Luka 10:21) Ne tohi e fekau i loto he Tohi Tapu ke maama ni e lautolu kua hako e tau fatuakiloto. Ko e tau tagata fakatokoluga—ko e aga mau he “tau tagata iloilo, mo e loto matala”—kua hihiga ke nakai maama mitaki e Tohi Tapu. Ka ko e tau tagata ne totou e Tohi Tapu mo e aga tuga he “tau tama”—fakatokolalo mo e makai ke fakaako—kua maama mitaki e lautolu e fekau he Atua. Kua pulotu mooli e puhala ne tohia he Atua e Tohi Tapu!

2. Ko e Tohi Tapu kua taute ma e tau tagata loto fakamooli ne manako ke he lagomatai he Atua ke maama ai. Fakakite e Iesu kua lata e tau tagata ke moua e lagomatai ke maama katoatoa e tau fakaakoaga haana. Moua fēfē e lautolu? Fakamaama e Iesu: “Ko e Lagomatai, ko e Agaga Tapu haia, ko ia ke fakafano mai he Matua ke he haku a higoa, to fakaako e ia a mutolu ke he tau mena oti kana.” (Ioane 14:26) Ti foaki mai he Atua e haana agaaga tapu—ko e malolō gahuahua haana—ke lagomatai e tau tagata ke maama e tau mena ha lautolu ne totou he Tohi Tapu. Ka kua nakai foaki age he Atua e agaaga haana ke he tau tagata ne nakai falanaki ki a ia ke lagomatai a lautolu, ti kua nakai maama mitaki e lautolu e Tohi Tapu. Omoomoi foki he agaaga tapu e tau Kerisiano lotomatala ke lagomatai e tau tagata hane kumi ke maama lahi e Tohi Tapu.—Gahua 8:26-35.

3. Ko e falu matakupu he Tohi Tapu kua maeke ni ke maama he tau tagata he magaaho pauaki. Ma e fakatai, ne poaki ke he perofeta ko Tanielu ke tohi hifo e fekau ma e vahā i mua. Tala age e agelu ki a ia: “Tanielu na e, kia puipui a e koe e tau kupu, mo e fakamau fakamailoga ai e koe e tohi, ato hoko ke he vaha ke fakahiku ai.” Loga e tau senetenari he mole, tokologa e tagata ne totou e tohi ha Tanielu i loto he Tohi Tapu ka e nakai maama mooli ai. Nakai maama foki e Tanielu e falu mena ne fakamau hifo e ia. Talahau e ia mo e fakatokolalo: “Ne logona foki e au, ka e nakai ni maama kia au.” He magaaho fakamui, ne maeke e tau tagata ke moua e maamaaga hako ke he perofetaaga he Atua ne fakamau e Tanielu, ka e he magaaho pauaki ni ne fifili he Atua. Fakamaama he agelu: “Kia fano a koe, ma Tanielu na e, ha kua puipui mo e fakamau fakamailoga ai e tau kupu ato hoko ke he vaha ke fakahiku ai.” Ko hai ka maama e fekau he Atua? “To nakai maama ai foki taha ia lautolu ko e tau tagata mahani kelea; ka e maama ai ni e tau tagata iloilo.” (Tanielu 12:4, 8-10) Ti kua nakai fakakite he Atua e kakano he falu talahauaga he Tohi Tapu ato hoko e magaaho tonu.

He tuaga ia, kua nakai maama mitaki foki kia he Tau Fakamoli a Iehova e Tohi Tapu? Ē. Ka e hoko ni ke he magaaho ne fakaatā he Atua ke fakamaama ai, ti fakamakai e Tau Fakamoli ke hiki e maamaaga ha lautolu. Ne talitonu a lautolu kua fifitaki e lautolu e tau aposetolo he Keriso, ne mahani fakatokolalo ke hiki ha lautolu a tau maamaaga he mogo ne fakahako e Iesu a lautolu.—Gahua 1:6, 7.

Ko e tau manatu fuluola he tama fifine tote hagaao ke he punaaga he tau aolū, ne liga ha kua tote e maamaaga. Ka ko e tau fakaakoaga he Tohi Tapu kua mua atu e aoga ki a koe. Kua aoga lahi mahaki e fekau he Tohi Tapu, ke lali e tagata ke maama ni e ia he totou tokotaha ai. Ko e mena ia kia kumi e lagomatai ke maama e tau mena haau kua totou. Kumi ki a lautolu ne fakaako e Tohi Tapu mo e mahani fakatokolalo, lautolu kua falanaki ke he agaaga tapu he Atua ke maama e Tohi Tapu, mo lautolu kua talitonu kua nonofo mooli a tautolu he magahala ne manako lahi e Atua ke maama e tautolu e Tohi Tapu. Kia nakai fakauaua ke tutala mo e Tau Fakamoli a Iehova po ke totou e tau kumikumiaga fakamatafeiga ha lautolu he faahi kupega hila he jw.org. Kua mavehe mai he Tohi Tapu: “Kaeke kua ui atu a koe ke he loto matala, . . . mo e moua ai e koe e iloilo ke he Atua.”—Tau Fakatai 2:3-5.