Pehē a Rose: “Moua au he gagao magafaoa ne mamahi lahi tumau e tino. Ti matematekelea lahi e tuaga he moui haaku.” Taha he tau tupetupe lahi mahaki haana ha kua nakai maeke he falu mogo ke manamanatu ke he tau mena ne fakaako e ia he Tohi Tapu mo e tau mena fakaagaaga. Ka e lagomatai lahi a ia he tau kupu ha Iesu ne fakamau he Mataio 19:26: “Maeke e tau mena oti ke he Atua.” Iloa e Rose na fai puhala foki ke fakaako e Tohi Tapu. Ha kua mamahi lahi e tino haana ti teitei he falu magaaho ke nakai maeke ke totou, ne kamata a ia ke fanogonogo ke he tau tapakiaga he Tohi Tapu mo e tau tohi faka-Tohi Tapu. * “Ka nakai fai puhala pihia,” he talahau e ia, “ailoa e au ko e fakatumau fēfē e au e tuaga fakaagaaga haaku.”

Ka momoko a Rose he nakai maeke ke taute e tau gahua ne fa mahani ki ai, kua moua e ia e mafanatia he tau kupu ne fakamau ia 2 Korinito 8:12: “Ha ko e mena ka ha i ai e loto fakamakai, ti talia fakamitaki e tagata, kua fakalata ke he tau mena ha ha ia ia, ka e nakai fakalata ke he tau mena nakai ha ha ia ia.” Fakamanatu he tau kupu ia ki a Rose kua fiafia e Atua ke he tau gahua haana ne taute ha kua eketaha fakalahi a ia ke taute e tau mena kua maeke a ia he tuaga haana.

Ko Delphine ne totoku i mua, ne liu manatu: “He mole e mate he tama fifine haaku ne 18 e tau he moui, ne maanu lahi mahaki au ti manatu kua nakai fahia au ke moui. To hiki e tau mena oti.” Ka e lahi e fakamafanaaga ne moua e ia he tau kupu he Salamo 94:19, ne tala age he tagata tohia ke he Atua: “Ko e tau manamanatu loga he haku a loto kua fiafia ai au ha ko e fakamafanaaga mai ia koe.” Pehē a ia, “Ne liogi au ki a Iehova ke lagomatai au ke kumi e tau mena ke taute ke fahia au ke fakatotoka he maanu.”

Ne eketaha a ia ke taute e tau gahua foaki noa kua aoga. Fai magaaho he mole, ne fakatatai e ia a ia ke he tau moa vali fakatino he tama tote​—na maeke agaia e tau moa mapakipaki ke fakaaoga mo valivali. Pihia foki, pete kua maanu ne iloa e ia na maeke agaia a ia ke lagomatai e falu. Liu a ia manatu: “Ne ofo au ka fakaaoga e tau matapatu fakaakoaga mo e tau puhala he Tohi Tapu ke fakamafana aki e tau tagata fakaako haaku, ko e puhala ha Iehova a ia ke fakatotoka mo e fakamafana aki au.” Tohi hifo e ia e tau tagata he Tohi Tapu ne fai magaaho foki he momoko lahi. “Nakai kehe ai,” he mailoga e ia, “ko e tau tagata liogi a lautolu oti.” Iloa foki e ia “to nakai moua ha tali ka nakai veveu e Tohi Tapu.”

He fakaako e Tohi Tapu ne iloa e Delphine e taha mena foki​—ke hagaaki ke he vahā i mua ka e nakai ke he tau mena kua mole. Ko e amaamanakiaga ne talahau he Gahua 24:15 ne fakamafanatia a ia: “Ke liu foki tutu mai a lautolu kua mamate, ko lautolu ne tututonu katoa mo lautolu ne hepehepe.” Iloa mooli fēfē e ia to fakaliu tu mai e Iehova e tama fifine haana? Tali ni e Delphine: “Kitia e au e tama fifine haaku he vahā i mua. Fitā e fakatoka e ‘aho’ ke taute mena tokoua a maua, na tuga kua haia he kalena he Matua haaku. Kitia maaliali e au a maua he katene tuga ni he kitia mo e fakaalofa hofihofi au ki a ia he aho ne fanau ai.”