“Ko e fanogonogo liogi na e, to o atu kia koe e tau tagata oti kana.”​—Salamo 65:2.

Falu tagata ne liogi ha kua moua e lautolu e logonaaga mitaki, pete he nakai talitonu a lautolu kua nakai fai tagata ne fanogonogo mooli. Ka ko e liogi ne nakai ni ko e fakatotokaaga ke lagomatai a tautolu ke fahia ke he tau lekua. Tala mai he Tohi Tapu ki a tautolu “kua tata mai a Iehova * kia lautolu oti kana ne ui atu kia ia, ko lautolu oti ne ui kia ia mo e fakamoli. . . . To fanogonogo a ia ke he ha lautolu a kalaga atu.”​—Salamo 145:18, 19.

Ko e mena ia, iloa tonu e tautolu kua logona e Iehova ko e Atua e tau liogi he tau tagata tapuaki haana. Talahau fakamitaki e ia: “Ti ui mai ai e mutolu kia au, to o foki a mutolu mo e liogi kia au, to fanogonogo foki au kia mutolu.”​—Ieremia 29:12.

“Kia fakamakamaka ke he liogi.”​—Roma 12:12.

He Tohi Tapu, fakamafana ki a tautolu ke liogi tumau mo e “nakai noa ke he tau ole mo e tau liogi oti.” Maaliali ai, manako a Iehova ko e Atua ki a tautolu ke liogi ki a ia.​—Mataio 26:41; Efeso 6:18.

Ko e ha ne manako e Atua ki a tautolu ke liogi ki a ia? Manamanatu: Manako e matua ke he tama haana ke pehē “Maeke nakai a koe ma Tete ke lagomatai au”? Ē, liga fitā he iloa he matua e tau manako po ke tau logonaaga he tama haana, ka e he logona e tau kupu ia, kua fakakite na falanaki mo e tata e tama haana ki a ia. Pihia foki ka liogi a tautolu ki a Iehova ko e Atua, kua fakakite e tautolu na falanaki mo e manako a tautolu ke tata ki a ia.​—Tau Fakatai 15:8; Iakopo 4:8.

“Kia tuku atu kia ia e tau mena oti kua fakaatukehe ai a mutolu, ha ko e mena kua manatu e ia a mutolu.”​—1 Peteru 5:7.

Manako e Atua ki a tautolu ke liogi ki a ia ha kua fakaalofa mo e leveki e ia a tautolu. Mailoga katoa e ia e tau tupetupe mo e tau fakaatukehe ha tautolu ti manako a ia ke lagomatai a tautolu.

He moui katoa he Patuiki ko Tavita, liogi a ia ki a Iehova ko e Atua ma e lagomatai ti tala age e tau manatu mo e tau logonaaga haana ki a Ia. (Salamo 23:1-6) Fēfē e logonaaga he Atua ki a Tavita? Ofania he Atua a Tavita ti fanogonogo ke he tau liogi loga haana. (Gahua 13:22) Pihia foki, fanogonogo e Atua ke he tau liogi ha tautolu ha kua leveki e ia a tautolu.

Ko e tau kupu a ia he tagata tohia he taha he tau salamo he Tohi Tapu. Iloa e ia na logona he Atua e tau liogi haana, ti lagomatai lahi he mena ia a ia. Logona hifo e ia e tata lahi ke he Atua ti moua e malolō ke fehagai mo e matematekelea mo e mamahi he moui.​—Salamo 116:1-9.

Ka iloa e tautolu kua logona he Atua e tau liogi ha tautolu, to fakamakamaka a tautolu ke liogi ki a ia. Manamanatu ke he tala ha Pedro ne nofo he faahi tokelau i Spain. Mate e tama taane haana ne 19 e tau he moui he pakia he peleōafi. Momoko a Pedro ka kua liligi e ia e loto haana ke he Atua ti liogi tumau ma e mafanatia mo e lalagoaga. Ko e heigoa e fua? “Tali e Iehova e tau liogi haaku puhala he mafanatia mo e lalagoaga ne moua he hoana haaku mo au mai he tau Kerisiano fakahele,” he ui e Pedro.

Pete he nakai liuaki mai he tau liogi ha Pedro e tama haana ke he moui ka e lagomatai lahi he tau liogi a ia mo e magafaoa haana. Ko e haana hoana ko María Carmen ne liu talahau: “Lagomatai he tau liogi au ke fahia ke he momoko haaku. Iloa e au kua maama e Iehova ko e Atua au ha ko e mena ka liogi au ki a ia kua logona hifo e au e mafola mo e totoka he loto.”

Ko e Tohi Tapu mo e tau tala he tau tagata ne fakakite fakamaali kua logona he Atua e tau liogi. Ka e fakakite foki kua nakai tali he Atua e tau liogi oti. Ko e ha ne tali he Atua e falu liogi ka e nakai tali e falu?