KO E AMAAMANAKIAGA OFOOFOGIA MOOLI! Kua mavehe e Tufuga ha tautolu ke foaki mai e moui tukulagi ki a tautolu he lalolagi nei. Ka e tokologa ne uka ke talitonu ke he mena ia. ‘Na lata e tau tagata oti ke mamate,’ he talahau e lautolu. ‘Ko e vala pauaki a ia he holoaga he moui mo e mate.’ Logona hifo e falu na maeke ke moui tukulagi, ka e nakai ke he lalolagi nei. Pehē a lautolu kua maeke ni ke moui tukulagi ka mate a koe ti hake ke he lagi. Fēfē e manatu haau?

Ato talahau e manatu haau, manamanatu la ke he tali he Tohi Tapu ke he tau hūhū tolu nei: Fakakite fēfē he puhala ne tufugatia e tagata ke he leva haana kua lata ke moui? Ko e heigoa e finagalo fakamua he Atua ma e lalolagi mo e tau tagata? Hoko mai fēfē e mate ke he magafaoa he tagata?

He tau mena momoui oti ne tufugatia he Atua he lalolagi, kua kehe pauaki e tau tagata. He puhala fe? Fakakite mai he Tohi Tapu ko e tau tagata hokoia ni ne tufuga ke he “fakatai” he Atua mo e ke “tuga” a ia. (Kenese 1:26, 27) Ko e heigoa e kakano he mena ia? Kakano kua foaki ke he tau tagata e tau aga mo e tau mahani ne tatai mo e Atua, tuga e fakaalofa mo e fakafili tonu.

Lafi ki ai, kua foaki ke he tau tagata e lotomatala ke manamanatu mo e fakakakano, ti iloa foki e tau mahani mitaki mo e tau tuaga fakaagaaga. Kakano haia kua maeke ia tautolu ke nava ke he mitaki ue atu he lagi mo e lalolagi katoatoa mo e ofoofogia he tau tufugatia, pihia foki ke he tau fakatino, tau leo kofe, mo e tau poeme. Ka e mua atu, kua logona pauaki he tagata e lata ke tapuaki ke he Tufuga. Ko e tau aga pihia kua fakakite e kehe lahi mahaki he tau tagata mo e tau mena momoui oti ne toe he lalolagi.

Ko e mena ia, manamanatu la: To tuku age nakai he Atua ke he tau tagata e tau aga ofoofogia pihia, mo e nakai fai fakakaupāaga ke feaki mo e fakaholo ki mua ai, ane mai finagalo a ia ke gahoa ni e tau tau ka momoui a tautolu? Ko e tala mooli, na foaki he Atua ke he tau tagata e tau aga mo e tau mahani pauaki nei ke maeke a tautolu ke momoui fiafia tukulagi he lalolagi nei.

Ka e pehē e falu ko e mena nakai finagalo e Atua ke momoui tukulagi e tau tagata ke he lalolagi. Pehē a lautolu kua tufuga e lalolagi mo kaina fakakū ke kamatamata ko e tau tagata fēfē he magafaoa he tagata kua lata ke ō ke he lagi mo e momoui tukulagi mo e Atua. Ka mooli e mena ia, kua fakalago kia mogoia ke he Atua e tau mahani kelea oti kana ne tutupu he lalolagi? Kua nakai tatai e mena ia mo e tuaga pauaki he Atua. Pehē e Tohi Tapu hagaao ke he Atua: “Ha kua tonu hana tau puhala oti ni? ko e Atua kua fakamoli, Nakai ha ha ia ia ha mahani  kelea, ko e mahani tututonu mo e mahani hakohako ni a ia.”​—Teutaronome 32:4.

Fakakite fakamaaliali he Tohi Tapu e finagalo fakamua he Atua ma e lalolagi ke he tau kupu nei: “Ko e lagi, ko e lagi ni, ha Iehova ia; ka kua tuku mai e ia e lalolagi ke he fanau he tau tagata.” (Salamo 115:16) Ē, ne tufugatia he Atua e lalolagi mo kaina fulufuluola mo e tukulagi ma e tau tagata, ti fakapuke e ia aki e tau mena oti ne kua lata ke moua e tautolu e moui fai kakano mo e nakai fai fakaotiaga.​—Kenese 2:8, 9.

“Ko e lagi, ko e lagi ni, ha Iehova ia; ka kua tuku mai e ia e lalolagi ke he fanau he tau tagata.”​—Salamo 115:16

Fakamahino mai foki he Tohi Tapu e finagalo he Atua ma e tau tagata. Poaki e ia ke he hoa fakamua ke “fakapuke foki e lalolagi, mo e kautu ki ai; kia pule foki ke he . . . tau mena momoui oti kua totolo ke he kelekele.” (Kenese 1:28) Ko e kotofaaga mitaki ha ia ke leveki mo e fakalaulahi e kaina Parataiso ha laua ke kaputia e lalolagi katoa! Mooli ai, ko e amaamanakiaga ma Atamu mo Eva mo e tau fanau ha laua ke momoui tukulagi he lalolagi, nakai ko e palepale ki luga he lagi.

Ko e ha mogoia ne mamate a tautolu? Fakakite he Tohi Tapu ko e taha he tau mena momoui fakaagaaga he Atua, kua iloa fakamui ko e totoko ko Satani ko e Tiapolo, ne lali ke tauhele e tau fakaholoaga he Atua i Etena. Ke he puhala fe?

Ne fakaohooho e Satani e tau matua uluaki ha tautolu ko Atamu mo Eva ke kau mo ia ke totoko e Atua. Magaaho ne pehē a Satani kua fai mena mitaki e Atua ne nakai age ki a laua​—ko e tonuhia ke fifili ni e laua e tau mena hako mo e hepe​—ne talia e laua a Satani ti fuluhi kehe mai he Atua. Ko e fua? Fai magaaho he mole, ne mamate a laua tuga ne hataki he Atua. Kua galo e laua e amaamanakiaga ke momoui tukulagi he Parataiso he lalolagi.​—Kenese 2:17; 3:1-6; 5:5.

Ko e totokoaga ha Atamu mo Eva kua lauia e tau tagata oti ke hoko mai ke he mogonei. Pehē e Kupu he Atua: “He hoko mai ai e hala ke he lalolagi ke he tagata tokotaha [Atamu], ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” (Roma 5:12) Mamate a tautolu ha ko e agahala mo e mate ne moua mai he tau matua fakamua ha tautolu, nakai ha ko e falu ‘fakatokaaga’ pauaki he Atua ne uka ke maama.

Ko e totokoaga i Etena ne nakai taofi e finagalo fakamua he Atua ma e tau tagata mo e lalolagi. Ko e fakaalofa mo e fakafili tonu mitaki katoatoa he Atua kua omoomoi a ia ke foaki e puhala ke fakatokanoa aki a tautolu mai he līlīaga he agahala mo e mate ne moua e tautolu. Fakamaama he aposetolo ko Paulo: “Ha ko e mate ko e palepale ia he hala; ka ko e moui tukulagi ko e mena foaki noa mai he Atua haia, ke he Iki ha tautolu ko Keriso lesu.” (Roma 6:23) Ha ko e fakaalofa, ko e Atua “kua ta mai ai hana Tama fuataha [Iesu Keriso], kia nakai mate taha ne tua kia ia, ka kia moua e ia e moui tukulagi.” (Ioane 3:16) He foaki fakamakai e Iesu haana moui mo poa lukutoto, ne liuaki mai e ia e tau mena oti kana ne fakagalo e Atamu. *

Nakai leva, to fakamooli e maveheaga he Atua ke he parataiso he lalolagi. Maeke a koe ke moua e tau mena mitaki nei anoiha ka omaoma a koe ke he tomatomaaga ha Iesu: “Kia huhū atu a mutolu ke he gutuhala pukilu; ha ko e mena pulahi e gutuhala, ti laulahi foki e hala ke pu atu ke he malaia, kua tokologa foki a lautolu kua huhū atu ki ai. Ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua.” (Mataio 7:13, 14) Ē, ko e vahā anoiha haau kua haia ni he tau lima haau. Ko e heigoa haau ka taute?