He vala fakamua ne hagaao a tautolu ke he tala tuai ki a Croesus ne fakavai he tagata ne iloa e tau fakakiteaga i Delphi, ti kaumahala a ia he patuiki ha Peresia. Ka e ha ha he Tohi Tapu e perofetaaga ofoofogia hagaao ke he patuiki ha Peresia ne kua fakamooli katoatoa.

Kavi ke he 200 e tau fakamua atu​—leva ato fanau e patuiki—​ko e perofeta Heperu ko Isaia ne talahau e higoa ha Kuresa ti fakamaama e puhala ka fakakaumahala e ia e maaga malolō ko Papelonia.

Isaia 44:24, 27, 28: “Kua talahau mai pehe a Iehova . . . Kua pehe atu a ia ke he tau mena hokulo, Kia pakupaku ā; to fakamaha foki e au hau a tau vailele. Kua pehe atu a ia kia Kuresa, ko e haku a leveki mamoe a ia; to fakahoko ai e ia e tau mena oti kua loto au ki ai; kua pehe atu foki a ia ki Ierusalema, to ati ai ni a koe; kua pehe atu foki a ia ke he faituga, To eke ai ni hau a tau fakaveaga.”

Talahau e Herodotus, ko e tagata fakamau tala tuai Heleni, ko e kautau ha Kuresa ne hiki e puhala ne tafe e vai he Vailele ko Eufirate ne tafe he maaga ko Papelonia. Ko e puhala nei ha Kuresa ati maeke e tau kautau haana ke huhū atu ke he maaga he hala he vailele. He mole e fakakaumahala e maaga, ne fakatokanoa e Kuresa e tau Iutaia ne fakapaea i Papelonia ti fakaatā a lautolu ke liliu mo e liu ati hake a Ierusalema ne kua moumou he 70 e tau fakamua atu.

Isaia 45:1: “Kua vagahau mai pehe a Iehova kia ia ne fakauku ai e ia, ko Kuresa, ne taofi ai e au hana lima matau, kia fakatokolalo ai e tau motu oti ki mua hana, to vevete foki e au e tau tokupu he tau patuiki; ke hafagi ki mua hana e tau puhala lau ua; to nakai pa foki e tau gutuhala.”

Ne huhū atu e tau Peresia ke he maaga he tau gutuhala lau ua lalahi he kaupā he maaga ne nakai pāpā. Ane mai iloa he tau Papelonia e fakaholoaga ha Kuresa, liga pāpā e lautolu e tau gutuhala oti he faahi he vailele. Ka kua tokanoa ai ti kaumahala e maaga.

Ko e taha ni anei he tau perofetaaga ofoofogia loga he Tohi Tapu ne kua fakamooli katoatoa. * Nakai tuga e tau fuafuaaga he tau tagata ne fa matutaki ke he tau atua fakavai ha lautolu, ko e tau perofetaaga he Tohi Tapu kua puna mai ia Ia ne pehē: “Kua talahau ai tali mai he kamataaga e tau  mena fakamui; tali mai ne aho mua foki e tau mena nakaila eke.”​—Isaia 46:10.

Ko e Atua mooli ni ne higoa ko Iehova kua maeke ke talahau pihia. Ko e higoa ia kua kakano “To Fakamooli Ai a Ia ke he Mena Ia.” Kua fakakite na maeke a ia ke iloa mo e fakatokatoka e tau mena tutupu anoiha ke felauaki mo e finagalo haana. Ti mauokafua a tautolu to fakamooli oti e ia e tau maveheaga haana.

Manako nakai a koe ke iloa e tau perofetaaga he Tohi Tapu ke he vahā ha tautolu? Kavi ke he 2,000 e tau kua mole, ne talahau tuai he Tohi Tapu ko e “tau aho uka” to hohoko mai he “tau aho fakamui.” Tau aho fakamui he heigoa? Nakai he lalolagi po ke tau tagata ka ko e tau tuaga uka, mamahi, mo e matematekelea ne lauia e tau tagata ke he loga e tau tau. To kumikumi a tautolu ke he falu perofetaaga ne fakamailoga e “tau aho uka.”

2 Timoteo 3:1-5: “Ko e tau aho fakamui to . . . ofaofa he tau tagata a lautolu ni, to velevele koloa, to hula noa, to fakatokoluga, to vagahau kelea, to faliuliu ke he tau matua, to nakai fakaaue, to mahani kelea, To nakai fai fakaalofa to nakai fia loto mafola, to tauamuamu, to nakai taofi e tau manako he tino, to mahani favale, nakai loto ke he mitaki, To afo tagata, to mahani fakahanoa, to fakatokoluga, to manako lahi ke he tau mena ke fiafia ki ai, ka e manako tote ke he Atua; To ha i ai ia lautolu e gati he mahani Atua, ka kua tiaki e lautolu e malolo ne toka ai.”

Talia nakai e koe kua tupu lahi e tau mahani pihia ke he tau tagata he vahā nei? Mailoga nakai e koe kua ha ha mo tautolu e tau tagata ne ofaofa ne lautolu a lautolu, manako lahi ke he tau koloa, mo e fakaohooho he fakatokoluga? Kitia nakai e koe kua manako lahi e tau tagata ka e nakai makai ke fakafeofanaki? Kua kitia mooli e koe e tupu lahi he faliuliu ke he tau matua mo e tokologa ne manako lahi ke he tau mena fakafiafia ka e manako tote ke he Atua. Ti kua holo ki mua e kelea he tau aho takitaha.

Mataio 24:6, 7: “To logona e mutolu e tau tau mo e tau ogo tau; . . . to laga e taha motu ke he taha motu, ko e taha kautu ke he taha kautu.”

Falu fuafuaaga ko e numera katoa ne mamate he tau felakutaki mo e latau tali mai he 1914 kua molea e 100 miliona, ko e numera ia kua lahi atu ke he puke tagata he falu motu. Manamanatu la ke he tau hihina mata, momoko, mo e matematekelea ne moua mai e numera lahi mahaki ia. Kua mailoga nakai he tau motu ti fakaoti e felakutaki?

Mataio 24:7: “To ha ha i ai e tau hoge.”

Ko e World Food Programme ne pehē: “He lalolagi ne maeke a tautolu ke moua e tau mena kai ke fagai aki e tau tagata oti, kua 815 e miliona tagata​—taha mai he hiva​—ne momohe hoge agaia he tau pō takitaha. Ti loga atu​—taha mai he tolu​—ne matematekelea he nakai huhua mitaki e tau mena kai.” Fuafua ai he tau tau takitaha, ne liga tolu e miliona he tau fanau ne mamate he hoge.

Luka 21:11: “To ha i ai e tau mafuike lalahi.”

He tau tau takitaha, kavi ke he 50,000 he tau mafuike ne logona he tau tagata. Kavi ke he 100 ne malona lahi ai e tau fale, ti taha e mafuike lahi mahaki he tau tau takitaha. Talahau he taha fuafuaaga, mai he 1975 ke he 2000, ne 471,000 tagata ne mamate he tau mafuike.

Mataio 24:14: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”

Ko e Tau Fakamoli a Iehova ne molea e valu e miliona kua fakamatala mo e fakailoa e tala mitaki he Kautu he Atua ke he lalolagi katoa he kavi 240 e motu. Fakailoa e lautolu e tala mitaki he tau taone lalahi mo e tau maaga mamao, he tau uho vao mo e tau mouga. Talahau tuai he perofetaaga, ka oti e gahua nei ke he mena ne manako e Atua ki ai, to “hoko mai ai e fakaotiaga.” Ko e heigoa e kakano he mena ia? Kakano to fakaoti e pule he tagata mo e hoko mai e pule he Kautu he Atua. Ko e heigoa e tau maveheaga ka fakamooli i lalo hifo he Kautu he Atua? Totou atu foki ke iloa.