Kua nonofo oti foki a tautolu he hala he “afā” hagahaga kelea, ne fakahigoa e Iesu ko e ‘matematekelea lahi.’ (Mataio 24:21) Nakai maeke a tautolu ke fehola kehe mai he hala he matematekelea ia. Ka e maeke a tautolu ke taute e taha mena ke puipui a tautolu. Ko e heigoa e mena ia?

Foaki e Iesu Keriso e fakatonuaga nei he haana a Lauga he Mouga: “Kia kumikumi fakamua a mutolu ke he kautu he Atua mo e hana tututonu.” (Mataio 6:33) Taute fēfē e tautolu e mena ia?

Kumikumi fakamua e Kautu he Atua. Kakano e mena nei kua lata a tautolu ke onoono ke he Kautu he Atua ko e mena kua mua atu e aoga. (Mataio 6:25, 32, 33) Ko e ha kua lata a tautolu ke onoono pihia? Ha kua nakai maeke e tau tagata ke fakahako e tau lekua he tagata. Ko e Kautu he Atua ni ka maeke ke taute e matagahua lahi ia.

Kumikumi e tututonu haana. Lata a tautolu ke eketaha ke momoui fakatatau ke he tau matafakatufono mo e tau matapatu fakaakoaga tututonu he Atua. Ko e ha? Ha ko e mena ka fifili ni e tautolu e mena kua hako mo e hepe, to kelea e fakahikuaga. (Tau Fakatai 16:25) He taha faahi, ka momoui fakatatau a tautolu ke he tau tuaga he Atua, to fakafiafia e tautolu e Atua mo e holo mitaki e tau momoui ha tautolu.​—Isaia 48:17, 18.

Kia kumikumi fakamua e Kautu he Atua mo e haana tututonu. Hataki e Iesu to liga futia kehe e falu he manamanatu kua maeke a lautolu ke moua  e haohao mitaki ka loga e tupe. Falu kua liga fakaatā e tau fakaatukehe he moui ke fakatupetupe a lautolu ti hokotia ke nakai fai magaaho ke kumikumi e Kautu he Atua.​—Mataio 6:19-21, 25-32.

Pete ia, ne mavehe e Iesu ko lautolu kua lalago e Kautu he Atua to moua e lagomatai mogonei mo e to fiafia tukulagi ke he tau monuina anoiha.​—Mataio 6:33.

Pete ne kumikumi fakamua e tau tutaki ha Iesu he senetenari fakamua ke he Kautu he Atua mo e haana tututonu, nakai kitia e lautolu e fakaotiaga he tau mamahi mo e tau matematekelea oti he momoui a lautolu. Ka e moua e lautolu e puipuiaga. Puhala fe?

Ne momoui fakatatau a lautolu ke he tau tuaga tututonu he Atua, ti puipui ai he mena ia mai he tau lekua ne lauia e tau tagata ne fakaheu e talahauaga he Atua. Ko e tua malolō ha lautolu to hoko mai mooli e Kautu ne lagomatai a lautolu ke fehagai mo e tau lekua hagahaga kelea lahi. Ti foaki he Atua ki a lautolu e “lahi ue atu he malolo” ke maeke a lautolu ke fahia.​—2 Korinito 4:7-9.

Ko e tau Kerisiano he senetenari fakamua ne omaoma ke he poaki ha Iesu ke kumikumi fakamua e Kautu. Fakamatala e lautolu e tala mitaki he Kautu ke he tau kalakala oti he lalolagi. (Kolose 1:23) Fai tagata nakai ne taute e mena ia mogonei?

Ē! Ko e Tau Fakamoli a Iehova ne mailoga kua tote e magaaho ne toe ato fakaotioti he Kautu he Atua e fakatokaaga nei. Ti eketaha a lautolu ke fakamooli e talahauaga ha Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”​—Mataio 24:14.

To tali fēfē a koe ke he tala mitaki? Tomatoma e mautolu a koe ke fifitaki e tau tagata he senetenari fakamua ne nonofo he maaga a Maketonia ko Perea. He logona e lautolu e tala mitaki hagaao ke he Kautu mai he aposetolo ko Paulo, talia e lautolu e fekau haana mo e “loto makutu.” Ti kumikumi fakalahi a lautolu ke he tau Tohiaga Tapu ke fakakia e tau mena kua logona ti fakagahua e tau mena ne fakaako e lautolu.​—Gahua 17:11, 12.

Maeke a koe ke taute pihia. He kumikumi fakamua e Kautu he Atua mo e tututonu haana, to moua e koe e huaga mo e puipuiaga mogonei ti mafola mo e haohao mitaki tukulagi anoiha.