Ne fanau au i Mulhouse, he faahi tokelau ki uta ha Falani, he maaga ne fai gahua ka e tote e totogi mo e talahaua he mahani favale. Manatu e au he vahā tote e tau magafaoa ne taufetoko vale he matakavi ia. He haaku magafaoa, ne ai fai fakalilifu ma e tau fifine ti lavea e tau tagata taane ke hūhū ke he tau manatu ha lautolu. Fakaako ki a au, ko e fifine kua lata ke nofo he peito, mo e ke leveki e tau tagata taane mo e tau fanau.

Ne nakai mukamuka e moui haaku he vahā tote. He hogofulu e tau haaku, ne mate e matua taane haaku he lahi e inu kava. Lima e tau he mole, taha he haaku a tau taokete ne taupega. He tau ia ni, ne kitia e au e taha tagata ne kelipopo he magaaho ne latau e magafaoa haaku, ti ofo lahi au. Fakaako he tau tagata he magafaoa haaku au ke fakaaoga e tau titipi mo e tau fana, mo e latau ka lata ai. Ha ko e tama fuata moui tupetupe, ne kamata au ke tātatau e tino haaku mo e inu kava.

He 16 e tau haaku he moui, ne inu e au kavi 10 ke he 15 e lupo pia he tau aho oti, ti nakai leva ne kamata au ke fakaaoga e tau tulaki kona. Ke totogi aki e tau aga kelea haaku, ne sela e au e tau lapatoa tuai mo e kaiha foki. He 17 e tau haaku he moui, ne fitā au he fai magaaho ne tuku he fale puipui. Ne 18 e fakahala haaku he katoa, ha ko e kaiha mo e mahani favale.

Holo ki mua e kelea haaku he hoko au ke he 20 maaga e tau tau he moui. Ne ula e au kavi ke 20 e ka mariuana he aho mo e fakaaoga e heroin mo e falu a vai kona ne nakai fakaatā. Lagaloga e teitei au ke mate he fakaaoga lahi e tau tulaki kona. Ne kamata au ke sela tulaki kona, ti uta tumau e au e tau titipi mo e tau fana. Taha e magaaho ne lali au ke fana e taha tagata, ka e uhoaki he lau e matapulu he ulu pipi lapatoa haana ti oga ke he vao! He 24 e tau haaku, ne mate e matua fifine haaku ti au atu e aga favale haaku. Matakutaku e tau tagata ō hui ti fehola ke he taha faahi he hala ka kitia au. He tau matahiku faahi tapu, ne fa nofo au he fale leoleo ha ko e latau, po ke he fale gagao ke tuitui e tau pakia haaku.

Ne fai hoana au he 28 e tau. Ti tuga he manatu e koe, nakai fakalilifu au ke he haaku a hoana. Ne vagahau kelea au mo e keli foki a ia. Nakai fai mena a maua ne taute tokoua ke tuga e hoa mau. Manatu au kua lahi ni ke age ki a ia e tau koloa fakamanaia tino ne kaiha e au. Ti fai mena ne tupu fakaofo. Ne kamata e hoana haaku ke fakaako e Tohi Tapu mo e Tau Fakamoli a Iehova. He oti e fakaakoaga fakamua haana, ti fakaoti e ula tapaka, ai talia e tau tupe ne kaiha e au mo e liuaki mai e tau koloa fakamanaia tino ne age e au. Ne ita lahi au. Totoko au ke he haana fakaakoaga Tohi Tapu ti puhi aki e tau ahua tapaka e haana a tau mata. Tau amuamu foki au ki a ia he tau tuuta kaina.

 Ne kona au he taha pō ti tugi e kaina ha mautolu. Ka e fakahao he hoana haaku au mo e tama fifine ha maua ne lima e tau, mai he afi. He magaaho ne galo e kona haaku, ne fuafua kelea lahi au. Ti logona hifo e au to nakai fakaai e Atua ke fakamagalo au. Manatu e au he taha magaaho e akoako ne talahau ko e tau tagata kelea ka ō ki hell. Pihia foki ni e taha ekekafo ne lagomatai e loto manamanatu haaku, ne pehē: “Ko e fakaotiaga na ia ma haau! Nakai fai fakahaoaga a koe.”

He mole e vela he fale, ti hiki a mautolu nonofo mo e tau matua he hoana haaku. Ne ahiahi mai e Tau Fakamoli ke he hoana haaku, ti hūhū au ki a lautolu, “Maeke nakai e Atua ke fakamagalo e tau agahala oti haaku?” Fakakite mai e lautolu ki a au i loto he Tohi Tapu e 1 Korinito 6:9-11. Tohi he tau kupu ia e tau mahani ne nakai talia he Atua, ka e lafi ki ai: “Ne pihia foki e falu ia mutolu.” Fakamafana mai he tau kupu ia ki a au na maeke ke hiki. Ti fakamafana foki he Tau Fakamoli au, na fakaalofa e Atua ki a au tuga ne fakakite mai he 1 Ioane 4:8. Ti mafanatia au, mo e ole ke he Tau Fakamoli ke lagaua e fakaako Tohi Tapu mo au he faahi tapu, mo e kamata au ke fakalataha ke he tau feleveiaaga Kerisiano ha lautolu. Liogi tumau au ki a Iehova.

He taha la ia e mahina, ne taute e au e fifiliaga ke tiaki e tau tulaki kona mo e inu kava. He magaaho ia ne logona e au tuga kua fai mena ne pā i loto he tino haaku! Lauia lahi au he tau miti kelea, mamahi e ulu, kokoho e tau alaga he tino mo e falu lauiaaga he oti e fakaaoga e tau tulaki kona. Ka e he mogo taha ia, ne logona e au a Iehova he totō e haaku lima mo e fakamalolō au. Tatai e logonaaga haaku mo e aposetolo ko Paulo. Hagaao ke he lagomatai ne foaki he Atua ki a ia, ne tohi e Paulo: “Kua maeke ia au e tau mena oti kana ke he fakamalolo mai a [“Iehova,” NW] kia au.” (Filipi 4:13) Fai magaaho he mole, ti maeke au ke fakaoti e ula tapaka.​—2 Korinito 7:1.

Ne maeke he Tohi Tapu ke lagomatai au ke leveki e moui haaku mo e haaku magafaoa. Kua hiki e aga haaku ke he haaku hoana. Kamata au ke fakakite e fakalilifu ki a ia he pehē “fakamolemole” mo e “fakaaue.” Ne kamata foki au ke fakakite e puhala leveki ko e matua taane, ke he ha maua a tama fifine. Taha e tau he fakaako e Tohi Tapu, ne tukulele e moui haaku ki a Iehova ti papatiso, he muitua ke he fakafifitakiaga he hoana haaku.

Talitonu au ko e tau matapatu fakaakoaga he Tohi Tapu ne fakahao e moui haaku. Ti pihia foki he kitia he tau magafaoa haaku ne nakai ko e Tau Fakamoli, na liga kua fitā e mate au he fakaaoga hehē e tau vai kona po ke mate he latau.

Ne hiki katoa e moui magafaoa haaku ha ko e tau fakaakoaga he Tohi Tapu ne fakakite mai e tau kotofaaga haaku ko e taane mo e matua taane. (Efeso 5:25; 6:4) Kamata a mautolu ke taute mena auloa ko e magafaoa. He magaaho nei, kua fiafia au ke lalago e hoana haaku ke he haana gahua fakamatala tumau he fonua, ka e nakai ke nofo ni he peito. Ti fiafia foki a ia ke lalago au he haaku a kotofaaga ko e motua he fakapotopotoaga.

Ko e fakaalofa hofihofi noa he Atua ko Iehova ne aamotia e moui haaku. Manako lahi au ke tutala ke he tau mahani haana ki a lautolu ne nakai fai fakatauaga, tuga ne kitia he falu au he magaaho fakamua. Iloa e au na malolō e Tohi Tapu ke lagomatai e ha tagata ke moua e moui meā mo e fai kakano. Nakai fakaako ni he Tohi Tapu au ke fakaalofa mo e fakalilifu e tau tagata taane mo e tau tagata fifine, ka e maeke foki ke moua e au e fakalilifu ki a au ni.