Fai fakamooliaga nakai he tau keli kelekele ne lalago e fakamauaga he Tohi Tapu? He 2014, ko e vala tala he mekasini Biblical Archaeology Review ne fakatutala ke he hūhū: “Tokofiha e tagata he Tohi Tapu Heperu ne fakamooli he keliaga kelekele?” Ko e tali ne moua: “Kavi ke he 50!” Taha tagata taane ne nakai putoia e higoa ke he vala tala ia ko Tatenai. Ko hai a ia? O mai la ke onoono ke he fakamauaga kū hagaao ki a ia i loto he Tohi Tapu.

Ko Ierusalema taha vala fakamua he Pule Atu Motu Peresia. Haia e maaga nei he matakavi ne fakahigoa he tau Peresia ko e Taha Faahi he Vailele, ke he faahi lalo he Eufirate. He mole e kautū e tau Peresia ki Papelonia, ne fakatoka mai e lautolu e tau Iutaia ne fakapaea ti poaki ke liu atihake e faituga ha Iehova i Ierusalema. (Esera 1:1-4) Ka e totoko he tau fī he tau Iutaia e matagahua ia ti fakaaoga ai mo tala fakavai ke tukumale e tau Iutaia kua totoko a lautolu ki Peresia. (Esera 4:4-16) Magahala ne pule a Tariu I (522-486 F.V.N.), ko e takitaki ha Peresia ne higoa ko Tatenai ne taki e kumikumiaga ke he matakupu ia. Fakahigoa he Tohi Tapu a ia “ko e iki ne pule ke he fahi mai nai he vailele.”​—Esera 5:3-7.

Loga e maka cuneiform ne tū ai e higoa a Tatenai ne moua ai he toka fakalataha mo e fakamauaga tuai he magafaoa. Ko e maka ne fakamatutaki e taha tagata he magafaoa nei ke he tagata Tohi Tapu ia ko e tohi he maveheaga ne fakamau he tau 20 aki ha Tariu I he 502 F.V.N. Fakakite a ia ne fakamooli e fakafuaaga ko e fekafekau ko “Tattannu, ko e iki ne pule he Taha Faahi he Vailele”​—ko e tagata ia ko Tatenai i loto he tohi a Esera he Tohi Tapu.

Ko e heigoa e matagahua he tagata nei? He 535 F.V.N., ne liu a Kuresa ne Mua fakatokatoka e pule haana ke he tau maaga, taha ne fakahigoa ko Papelonia mo e Taha Faahi he Vailele. Ne veveheua e maaga ia he mogo fakamui ti taha ne fakahigoa ko e Taha Faahi he Vailele. Putoia ai a Coele-Syria, Foinike, Samaria, mo Iuta ti liga pule ki ai mai i Tamaseko. Ne pule a Tatenai ke he magamotu nei kavi he 520 ke he 502 F.V.N.

He mole e fenoga a Tatenai ki Ierusalema ke kumikumi e tukumale he totokoaga, ne tala age a ia ki a Tariu kua moua he tau Iutaia e fakaatāaga mai ia Kuresa ke liu atihake e faituga ha Iehova. Kua fakamooli he tau kumikumiaga ke he tau fakamauaga tuai he patuiki e mena nei. (Esera 5:6, 7, 11-13; 6:1-3) Kua poaki ki a Tatenai ke ua fakatauhele, ti omaoma a ia.​—Esera 6:6, 7, 13.

Ke iloa mooli, ko “Tatenai ko e iki ne pule ke he fahi mai nai he vailele,” ne nakai uho lahi he fakamauaga tala tuai. Ka e mailoga ai, kua totoku a ia he tau Tohiaga Tapu mo e hako e matahigoa ne fakaaoga ki a ia. Ko e tala mooli ia ko e taha vala fakamooliaga ne liu foki e tau keliaga kelekele lalago e hakotika he fakamauaga tuai he Tohi Tapu.