Ne tupu hake au he matakavi ko Puerto Limón, ko e maaga ne ha ha i ai e uaafo he faahi uta ha Costa Rica. Tokovalu e fanau he tau matua haaku ti ko au ke fituaki. Mate e matua taane he valu e tau haaku. Ti feaki tokotaha ni he matua fifine a mautolu.

Ko e taha vala tumau he moui haaku ko e pelē sofopolo. Ne fiafia au ki ai tali mai he vahā tote. He fuata mui, ne hū au he matakau tote ne pelē sofopolo. He pelē au mo e matakau tote he 20 tumā e tau, ne ole mai e tagata fifili ke pelē au he matakau lahi i Nicaragua. Ka kua leveki au he matua fifine haaku he magaaho ia ne nakai malolō lahi, ti ai fia nofo au i Nicaragua. Ne nakai talia e au e ole ia. Fai magaaho he mole ne uiina foki he taha tagata fifili au ke pelē ma e matakau sofopolo he motu ha Costa Rica, ne fifili mai he tau tagata pelē he tau matakau ikiiki. Mogoia ne talia e au e ole. Pelē au he matakau he motu he 1949 ke he 1952 ti pelē foki au i Cuba, Mexico, mo Nicaragua. Tū au he base ti mitaki e puhala pelē haaku mo e 17 foki e pelē ne nakai fai mena hepe ne taute e au. Fiafia lahi au ke logona e tau tagata kitekite ne hea tumau e higoa haaku!

Ka e momoko ai ne moui feuaki foki au. Pete na taha ni e kapitiga fifine haaku, ne fano fifine tumau au. Lahi foki e inu kava haaku. Taha aho ne kona au ti ofo he aho hake he mohega haaku, ka e nakai manatu e au ko e liu fēfē au ki kaina! Pelē foki au ke he tau pelē tupe he domino mo e lotto.

He moui pihia au, ne eke e matua fifine haaku mo taha he Tau Fakamoli a Iehova. Lali a ia ke fiafia au ke he tua haana, ka e nakai kautū a ia he magaaho fakamua ha kua manamanatu katoatoa au ke he sipote haaku. Ka haia au ne fakaako pelē he tau magaaho kai, ne nakai logona e au e hoge! Hagaaki ni au ke he pelē haaku. Fiafia lahi mahaki au ke he pelē sofopolo!

Ka e he 29 e tau haaku, ne matematekelea au he pakia lahi he lali ke hapo he polo he taha pelē. He malolō ai, ne fakaoti e pelē haaku he matakau lahi. Ka e matutaki au ke he tau fakatokaaga  pelē sofopolo ke fakaako e tau tagata pelē foou he matakau tote ne tata ke he kaina haaku.

He 1957, ne talia e au e uiina ke fina atu ke he fonoaga he Tau Fakamoli a Iehova ne taute he malē pelē ne fa pelē sofopolo au. He nofo au he toloaga, ne mailoga lahi e au e kehekehe he mahani fakalilifu he Tau Fakamoli ka fakatatai ke he ulāfia ne kitia e au he tau tagata he tau pelē sofopolo. Ko e tau mena ne kitia e au he fonoaga ia ne omoomoi au ke kamata fakaako e Tohi Tapu mo e Tau Fakamoli ti fano he tau feleveiaaga he fakapotopotoaga ha lautolu.

Ne nava au he tau fakaakoaga loga he Tohi Tapu kua iloa e au. Ma e fakatai, talahau tuai e Iesu he tau aho fakamui to fakamatala he tau tutaki haana e tala mitaki he Kautu he Atua ke he lalolagi katoa. (Mataio 24:14) Iloa foki e au kua nakai taute he tau Kerisiano e fekafekauaga ha lautolu ke moua tupe. Pehē a Iesu: “Kua moua noa e mutolu, kia foaki noa atu e mutolu.”​—Mataio 10:8.

He fakaako au ke he Tohi Tapu, ne fakatatai e au e tau talahauaga i loto ke he tau mena ne kitia e au he Tau Fakamoli a Iehova. Nava au ke he fakamakamaka ha lautolu ke fakapuloa e tala mitaki he Kautu he Atua ke he lalolagi katoa. Kitia e au e aga foaki ia lautolu ne kua poaki e Iesu ke fakakite he tau Kerisiano. Ti ko e mogo ne totou e au e Mareko 10:21 mo e kitia e uiina ha Iesu, “Mui mai kia au,” ne manako au ke eke mo Fakamoli.

Ka e fai magaaho to muitua mooli au ki ai. Ma e fakatai, loga e tau ne pelē e au e numera “lucky” haaku he tau faahi tapu takitaha ke he lotto he motu. Ka e fakaako e au mai he Tohi Tapu na vihiatia he Atua e tau tagata ne tapuaki ke he ‘atua ha Kato’ mo e tau tagata ne mahani lotokai. (Isaia 65:11; Kolose 3:5) Ti fifili au ke fakaoti e pelē tupe. He Aho Tapu fakamua he mole e fakaoti e pelē lotto haaku, ne mua e numera “lucky” haaku! Vaiga he tau tagata au he nakai pelē he faahi tapu ia ti fakaohooho fakalahi e lautolu au ke liu pelē foki, ka e nakai pelē au. Nakai liu foki au pelē tupe.

Ne feleveia foki au mo e taha kamatamata ke he ‘aga foou’ he aho ia ne papatiso au he fonoaga he Tau Fakamoli a Iehova. (Efeso 4:24) He afiafi ia ne liu au ke he hotela ne nofo ai au, ko e kapitiga fifine fakamua haaku ne fakatali i fafo he gutuhala he poko haaku. “Ma Sammy,” he ui e ia ki a au. “Hau ke ō ke fiafia!” Ka e mafiti au ke tali, “Nakai!” Fakamanatu e au ki a ia kua muitua au mogonei ke he tau mahani he Tohi Tapu. (1 Korinito 6:18) “Fēfē?” he talahau e ia. Ti tokutoku fakateaga e ia e onoonoaga he Tohi Tapu ke he mahani feuaki mo e fakamakamaka ke matutaki e kapitiga ha maua. Ka e hū ni au ke he poko haaku ti loka e gutuhala. Mogonei, kua fiafia au ke talahau, tali mai he eke au mo Fakamoli he 1958 ne tapiki mauokafua au ke he tau hikihikiaga ne taute e au ke he puhala moui haaku.

Logona hifo e au liga maeke au ke tohi e pepa hagaao ke he tau mena mitaki ne moua e au he muitua ke he takitakiaga he Tohi Tapu! Falu mena ia kua moua e au mogonei ko e loga e kapitiga mooli, fai fakavēaga e moui, mo e fiafia mooli.

Fiafia agaia au ke he pelē sofopolo ka kua hiki tuai e tau tuaga haaku. He pelē sofopolo kua moua e au e talahaua mo e tau tupe, ka e nakai tumau e tau mena nei. Ka ko e haaku a fakafetuiaga mo e Atua mo e tau matakainaga ne fakalataha au ki ai to tumau tukulagi. Pehē e Tohi Tapu: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.” (1 Ioane 2:17) Mogonei kua mua atu e fakaalofa haaku ki a Iehova ko e Atua mo e haana tau tagata!