“Ha ko e aho ka kai ai e koe [e akau],” he tala age he Atua ki a Atamu, “to mate ai ni a koe.” (Kenese 2:17) Liga nakai hako e poakiaga ia ane mai tufuga pauaki a Atamu ke fuakau ti mate. Iloa e Atamu ka nakai kai e ia e fua he akau, to nakai mate a ia.

Nakai lata a Atamu mo Eva ke kai mai he akau ia ke momoui, ha kua puke e kaina he tau akau ne fua. (Kenese 2:9) Ane mai nakai kai he hoa fakamua nei e fua he akau, to fakakite e laua e omaoma ki a Ia ne foaki age e moui ki a laua. To fakakite foki kua mailoga e laua e tonuhia he Atua ke takitaki e tau puhala ha laua.

Ke maama e kakano ne mamate a Atamu mo Eva, lata a tautolu ke kumikumi ke he fakatutalaaga ne lauia oti a tautolu. Fakaaoga e Satani ko e Tiapolo e gata ke talahau e pikopiko kelea muitui. Pehē e tala he Tohi Tapu: “Ne mua he loto matala he gata ke he tau manu oti he kelekele ne eke e Iehova ko e Atua. Ne pehe mai a ia ke he fifine, Ko e moli kia kua pehe mai e Atua, aua neke kai e mua ke he tau akau oti he kaina?”​—Kenese 3:1.

Ti tali atu a Eva: “Mena kai e maua e tau fua he tau akau he kaina. Ka ko e fua he akau ha he vaha loto he kaina, ne pehe mai e Atua, Aua neke kai ai e maua, po ke pipiki a maua ki ai, neke mamate a maua.” Ti pehē mai e gata ke he fifine: “Nakai ni mamate a mua; Ha kua fioia he Atua ko e aho ka kai ai e mua, ti fakaala ai ha mua a tau mata; ti eke ai ni a mua ke tuga ne tau atua ke iloa ai e mitaki mo e kelea.” Ne talahau a Satani kua pikopiko a Iehova he taofi taha mena mitaki mai he tau matua fakamua ha tautolu.​—Kenese 3:2-5.

Talitonu a Eva ke he mena ne logona e ia. Ti onoono a ia ke he akau. Kua mitaki ni mo e fulufuluola! Ati totō ai e ia e fua he akau mo e kamata ke kai. Pehē e Tohi Tapu: “Ne āge foki ke he hana tane ne fakalataha mo ia, ti kai ai foki e ia.”​—Kenese 3:6.

Mamahi mooli e Atua ke kitia e tau fanau fakahele haana ne nakai omaoma pauaki ki a ia! Ko e heigoa ne taute e ia? Tala age a Iehova ki a Atamu: “Ato liu a koe ke he kelekele; ha ko e mena eke mai ai a koe; ha ko e efuefu ni a koe, to liu foki a koe ke he efuefu.” (Kenese 3:17-19) Ti “ko e katoatoa he tau aho ne moui ai a Atamu, ko e hiva e teau ia he tau tau, ti tolugofulu e tau tau; ti mate ai a ia.” (Kenese 5:5) Nakai hake a Atamu ke he lagi po ke matutaki ke moui he taha matakavi fakaagaaga. Nakai moui a ia fakamua ato tufuga e Iehova a ia mai he efuefu he kelekele. Ti ko e magaaho ne  mate a Atamu ne liu e tino haana ke he efuefu. Ne mate a ia. Ko e matematekelea mooli!

Ha ko e nakai omaoma pauaki ha Atamu mo Eva, ne galo ia laua e mitaki katoatoa mo e amaamanakiaga ke momoui tukulagi. Ne hiki e tau tino ha laua; nakai mitaki katoatoa mo e agahala. Ka e nakai ko laua ni ne lauia he agahala ha laua he nakai omaoma. Ne fakaholo age foki e laua e tuaga agahala ia ke he tau fanau ha laua. Pehē e Roma 5:12: “Tuga ni he hoko mai ai e hala ke he lalolagi ke he tagata tokotaha [Atamu], ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.”

Fakamaama he Tohi Tapu e agahala mo e mate ko e “ie ufiufi, ne ufia ai e tau motu oti, mo e ufiufi ne ufia ai e tau motu kehe oti kana.” (Isaia 25:7) Ko e ie ufiufi nei ne ufia e tau tagata tuga e matagi kona ne nakai maeke ke hao mai ai. Mooli, kua “mamate e tau tagata oti kia Atamu.” (1 Korinito 15:22) Ko e hūhū ne lagā mai ne talahau he aposetolo ko Paulo: “Ko hai kia ke laveaki au mai he tino he mate nai?” Maeke nakai he ha tagata?​—Roma 7:24.