Ko e tomatomaaga he Tohi Tapu: “Kia noa ha mutolu a mahani mo e velevelekoloa; kia fakamamate [po ke, manako fakalatalata] a mutolu ke he tau mena ha ia mutolu.”​—Heperu 13:5.

Kua tapoohi he lalolagi a tautolu mogonei aki e loga lahi mahaki he tau koloa mo e tau gahua. Ka e pehē e Tohi Tapu kua maeke a tautolu ke “fakamamate [po ke, manako fakalatalata] a mutolu ke he tau mena ha ia mutolu.” Puhala fe?

Kalo kehe he “loto lahi ke he tau tupe. “Kua fakateaga he tau tagata e malolō tino, magafaoa, tau fakafetuiaga kapitiga, tau mahani mitaki, mo e tuaga lilifu foki ha lautolu, ha ko e “loto lahi ke he tau tupe.” (1 Timoteo 6:10) Nakai aoga mooli e mena nei! He mogo fakamui, ko e tagata ne manako lahi ke he tau koloa “to nakai makona ai.”​—Fakamatalaaga 5:10.

Tokiofa e tau tagata, nakai ko e tau koloa. Kua aoga mooli e tau koloa he tino. Ka e nakai maeke e tau koloa ke fakaalofa po ke loto fakaaue ki a tautolu; ko e tau tagata ni ne maeke ke taute pihia. He moua e “kapitiga [mooli]” kua lafi ai ke he manako fakalatalata ha tautolu he moui.​—Tau Fakatai 17:17.

Ko e tomatomaaga he Tohi Tapu: “Ko e loto fiafia kua eke mo vai lakau aoga haia.”​—Tau Fakatai 17:22.

Tuga e “vai lakau aoga,” maeke e fiafia ke lagomatai a tautolu ke fakauka ka gagao. Ka e moua fēfē e tautolu e fiafia he magaaho ka gagao?

Kia loto fakaaue. Ka manamanatu hokoia ni ke he tau lekua ha tautolu, to kelea e “tau aho oti.” (Tau Fakatai 15:15) Ka “kia mahani foki a mutolu ke fakaaue,” he talahau he Tohi Tapu. (Kolose 3:15) Fakaako ke loto fakaaue ke he tau mena mitaki he moui, pete foki ka ikiiki. Ko e tōaga laā fulufuluola, havilivili mitaki, mamali he fakahele​—ko e tau mena nei ka fiafia ai e moui ha tautolu.

Taute e tau mena ke lata mo e falu. Pete ka nakai malolō a tautolu, “kua mua e monuina hana ke foaki atu, ke he monuina hana ke talia mai.” (Gahua 20:35) Ka loto fakaaue e falu ke he tau gahua ha tautolu, logona e tautolu e mafanatia he fiafia, ti nakai manamanatu lahi ke he tau lekua ha tautolu. Maeke a tautolu ke mitaki e tau momoui ha tautolu he lagomatai e falu ke mitaki e tau momoui ha lautolu.

Ko e tomatomaaga he Tohi Tapu: “Kia mailoga ai e mutolu e tau mena kehekehe [po ke, tau mena ne mua atu e aoga].”​—Filipi 1:10.

Ko e tau hoa mau ne tote e magaaho ne taute mena tokoua kua fakahagahaga kelea e fakafetuiaga ha laua. Kua pulotu ma e tau taane mo e tau hoana ke tuku fakamua e fakamauaga ha laua​—ko e taha he tau mena ne mua atu e aoga he moui.

Taute mena tokoua. He nakai tutuli e tau mena ke fiafia fakatagata hokoia ni, fakatoka ke taute mena tokoua. “Kua mua he mitaki e tokoua ke he tokotaha,” he talahau he Tohi Tapu. (Fakamatalaaga 4:9) Maeke tokoua a mua ke kaitunu, faofao, okioki, po ke taute e matafeua.

Fakakite e fakaalofa haau. Fakamafana he Tohi Tapu ke he taane mo e hoana ke fefakaalofaaki mo e fefakalilifuaki. (Efeso 5:28, 33) Ko e mamali mafanatia, kuku fakaalofa, po ke mena fakaalofa tote kua aoga lahi ke fakamalolō e fakamauaga. Kua lata ni e tau hoa mau ke fakakaupā e fakafetuiaga he mahani fakataane mo e fifine ki a laua ni.​—Heperu 13:4.