Tala Momoko ne Hagaao ke he Moui
MANAMANATU kua kitekite a koe he vitiō hagaao ke he tagata talahaua, liga ko e fifine mahuiga he tā leo kofe ne fiafia a koe ki ai. Kamata e vitiō aki e tau fakatino he vahā tote haana, tau fakaakoaga tā leo kofe haana, mo e fakamahani tumau haana. Ti kitia e koe a ia ne fai vala he tau konesete, fano fenoga ke he tau matakavi loga mo e mamao, ti talahaua ke he lalolagi katoa. Nakai leva, kitia e koe e tau fakatino he vahā fuakau haana, ti ko e fakaotiaga he vitiō—ne mate a ia.
Ko e vitiō nei ko e tala mooli ke he tagata kua mate mogonei. Ko e tagata tā leo kofe, saienetisi, tagata sipote, po ke ha tagata talahaua foki kua tatai ni e tala. Liga loga e mena ne kua taute he tagata, ka e manamanatu a koe to loga atu fēfē la e matagahua haana ane mai nakai lauia he fuakau ti mate?
Liga momoko he manamanatu ki ai, ka e to hoko e mena nei ki a tautolu oti. (Fakamatalaaga 9:5) Pete he lali fakalahi a tautolu, nakai maeke a tautolu ke kalo mai he fuakau mo e mate. Nakai koenaia, liga mamate a tautolu ha ko e pākia fakaofo po ke gagao. Fakamaama he Tohi Tapu, tatai a tautolu mo e aolū, po ke tōhau “kua fakakite mai ke he magaaho tote, ti galo ai ni.”—Iakopo 4:14.
Ke he falu, tuga kua fakauaua mo e fakateaga lahi e moui ti muitua e lautolu e puhala moui ke “kai mena a tautolu mo e inu, ha ko e mena mamate a tautolu a pogipogi.” (1 Korinito 15:32) Ka e talia nakai e koe, ko e moui pihia kua talia mooli e tuaga momoko he moui? To hoko ke he taha magaaho, mua atu ka lauia he tuaga mamahi lahi mahaki, to liga hūhū a koe, ‘Hanei ni kia e moui?’ Moua i fe e koe e tali?
Tokologa mogonei ne fuluhi ke he saiene. Ko e holo ki mua he saiene mo e tau vai fakaekekafo kua fakaloa e moui ha tautolu. Ti lali e tau saienetisi ke fakaloa atu foki e moui. Ko e heigoa ni e fua he tau laliaga ha lautolu, kua tumau agaia e tau hūhū: Ko e ha a tautolu ne fuakau ti mamate? Fai amaamanakiaga nakai to utakehe e fī ha tautolu ko e mate? Ko e tau vala tala ka mumui mai to fakatutala ke he tau matakupu nei mo e tali e hūhū, Hanei ni kia e moui?