Kelea kia ke manako pihia? Nakai! Tala mai e Tohi Tapu ki a tautolu kua tuku he Atua e manako ia ke he tau loto ha tautolu. (Fakamatalaaga 3:11) Pehē foki e Tohi Tapu “ko e Atua ko e fakaalofa.” (1 Ioane 4:8) Fai kakano nakai ka tufuga he Atua fakaalofa e manako ia he tau loto ha tautolu ke momoui tukulagi ti nakai fakamooli?

Maaliali ai, nakai fai tagata ne manako ke mate. Fakamaama he Tohi Tapu ko e “fi” kelea lahi mahaki e mate. (1 Korinito 15:26) Ma e falu kua mamate tuai; ma e falu kua leva to mamate. Ka e to mamate e tau tagata oti. Ma e tokologa, nakai ko e mena mitaki ke manamanatu ki ai, ti fakamatakutaku foki. To utakehe nakai e fī nei? Maeke mooli nakai e mena ia?

Ofo nakai a koe he iloa ne nakai ko e finagalo he Atua ke mamate e tau tagata? Talahau he Tohi Tapu he Kenese e fakamooliaga ko e finagalo he Atua ma e tau tagata ke momoui tukulagi he lalolagi. Ne tufuga fakamitaki he Atua e lalolagi ke maeke e tau tagata ke nonofo ai. Ti tufugatia e Ia e tagata taane fakamua ko Atamu, mo e tuku a ia he kaina parataiso i Etena. Mole ia, “ti kitekite e Atua ke he tau mena oti ne eke e ia, kitiala, kua mitaki lahi ni.”​—Kenese 1:26, 31.

Kua mitaki katoatoa a Atamu he tufuga he Atua ke he fakatai Haana. (Teutaronome 32:4) Ko e hoana foki ha Atamu ko Eva ne nakai fai kelea, ti mitaki katoatoa e manamanatuaga mo e tino. Pehē  a Iehova ki a laua: “Kia fanau a mo e fakatokologa, kia fakapuke foki e lalolagi, mo e kautu ki ai; kia pule foki ke he tau ika he tahi, mo e tau manu lele he pulagi, katoa mo e tau mena momoui oti kua totolo ke he kelekele.”​—Kenese 1:28.

To fai magaaho ke fakapuke e lalolagi ke he tau fanau ha laua. To fanafanau a Eva, mo e to fanafanau foki e tau fanau ia ato puke e lalolagi tuga ne finagalo e Atua ki ai. (Isaia 45:18) Lata nakai ke manamanatu to foaki e Iehova e amaamanakiaga ia ki a Atamu mo Eva ka momoui loloa ni a laua ke kitia e tau fanau mo e tau mokopuna ha laua, mo e nakai iloa e fakahikuaga?

Manamanatu foki ke he poakiaga ke pule ke he tau manu. Ne tala age ki a Atamu ke fakahigoa e tau manu, ti fai magaaho foki e matagahua nei. (Kenese 2:19) Ke pule ki a lautolu to lata a Atamu ke iloa mo e maama e puhala ke leveki aki e tau manu. Kua lata foki ke lahi e magaaho ma e mena ia.

Ti ko e poakiaga he Atua ke fakapuke e lalolagi mo e pule ke he tau manu kua fakakite na tufugatia e hoa fakamua ke leva e momoui. Ti leva mooli e moui ha Atamu.

Fakakite mai he Tohi Tapu na leva e momoui he tau tagata he vahā fakamua ki a tautolu he vahā nei. Pehē ai: “Ti ko e katoatoa he tau aho ne moui ai a Atamu, ko e hiva e teau ia he tau tau, ti tolugofulu e tau tau.” Ti totoku foki tokoono e tagata ne molea e 900 tau he momoui! Ko lautolu ia ko Setu, Enosa, Kainano, Iareto, Metusela, mo Noa. Momoui oti a lautolu ato hoko e Fakapuke he vahā ha Noa, ti moui a Noa ke he 600 tau ato hoko e Fakapuke. (Kenese 5:5-27; 7:6; 9:29) Maeke fēfē ke loa pihia e moui?

Ne momoui e tau tagata taane ia tata atu ke he magaaho ne mitaki katoatoa e tau tagata. Liga ko e matapatu kakano a ia ne momoui loloa a lautolu. Ka e matutaki fēfē e mitaki katoatoa mo e moui loa? Ti kautū fēfē ke he mate? Ke moua e tau tali, lata fakamua a tautolu ke maama e kakano ne fuakau a tautolu ti mamate.