Ko e Fakatataiaga Aoga Lahi Ka Taute e Koe

TĀ

MANATU nakai a koe ko e Kerisiano a koe? Ka pihia, ko koe taha he tau tagata ne molea e ua e piliona he lalolagi—kavi 1 mai he 3—ne pehē kua mumuitua ke he Keriso. He vahā nei, kua totou afe e tau lotu ne fakahigoa ko e tau Kerisiano, ka kua mavehevehe a lautolu he kehekehe e tau taofiaga mo e tau onoonoaga. Ti liga kua kehe mamao e tau taofiaga haau mai he falu ne totoku ko e tau Kerisiano. Aoga mooli nakai e tau taofiaga haau? Ē aoga, ka manako a koe ke muitua ke he puhala Kerisiano ne fakaako mai he Tohi Tapu.

Ko e tau tutaki fakamua atu ha Iesu Keriso ne fakahigoa ai ko e “tau Kerisiano.” (Gahua 11:26) Nakai fai higoa foki kua lata ke fakahigoa aki a lautolu, ha kua taha maka ni e tua faka-Kerisiano. Ne lototaha e tau Kerisiano he mumui ke he tau fakaakoaga mo e tau takitakiaga ha Iesu Keriso, ko Ia ne Fakatū e Lotu Kerisiano. Ka e kua e lotu haau? Talitonu nakai a koe kua fakaako he lotu haau e tau mena ne fakaako he Keriso mo e tau mena ne talitonu ki ai e tau tutaki fakamua atu he Keriso? Iloa mooli fēfē e tautolu? Taha maka ni e puhala—ke fakaaoga e Tohi Tapu tuga e kākau fuafua.

Manamanatu ke he mena nei: Ne fakalilifu lahi a Iesu Keriso ke he tau Tohiaga Tapu ha ko e Kupu he Atua. Nakai talia e ia e tau tagata ne fiofio e tau fakaakoaga he Tohi Tapu, ha kua tuku fakamua e lautolu e tau kupu toka tuai ne fakatū he tagata. (Mareko 7:9-13) Kua mitaki mogoia ma tautolu ke talahau, ko e tau tutaki mooli he Keriso to fakavē e tau taofiaga ha lautolu ke he Tohi Tapu. Ti lata mogoia e tau Kerisiano takitaha ke hūhū hifo ki a lautolu ni, ‘Tatai nakai e tau fakaakoaga he lotu haaku mo e Tohi Tapu?’ Ke tali e hūhū ia, lata nakai ia koe ke fakatatai e tau fakaakoaga he lotu haau mo e tau mena ne talahau mai he Tohi Tapu?

Pehē a Iesu kua lata e tapuakiaga ha tautolu ke he Atua ke fakavē ke he kupu mooli, ko e kupu mooli ia i loto he Tohi Tapu. (Ioane 4:24; 17:17) Ti pehē e aposetolo ko Paulo kua fakavē e fakamouiaga ha tautolu ke he hokotia ke “maama ke he kupu moli.” (1 Timoteo 2:4) Ti latatonu ha tautolu a tau taofiaga ke fakavē ke he kupu mooli i loto he Tohi Tapu. Ha kua lauia mooli e fakamouiaga ha tautolu!

TAU PUHALA KE FAKATATAI HA TAUTOLU A TAU TAOFIAGA MO E TOHI TAPU

Kua uiina e mautolu a koe ke totou ke he ono e hūhū he vala nei mo e manamanatu ke he tau tali he Tohi Tapu ke he tau hūhū ia. Totou e tau kupu Tohi Tapu ne tutū ai, ti manamanatu fakahokulo ke he tau tali. Ti hūhū ki a koe ni, ‘Tatai nakai e tau fakaakoaga he lotu haaku mo e tau talahauaga he Tohi Tapu?’

Ko e tau hūhū kukū nei ka lagomatai a koe ke taute e fakatataiaga aoga lahi. Makai nakai a koe ke fakatatai e falu fakaakoaga he lotu haau mo e tau talahauaga he Tohi Tapu? Kua fiafia e Tau Fakamoli a Iehova ke lagomatai a koe ke kumikumi ke he tau kupu mooli maaliali he Tohi Tapu. Ti ka manako a koe, ole ke he taha he Tau Fakamoli ma e fakaakoaga Tohi Tapu ne nakai totogi. Po ke maeke ia koe ke fano ke he ha mautolu a faahi kupega hila, jw.org.

1 HŪHŪ: Ko hai e Atua?

TALI: Ko Iehova, ko e Matua ha Iesu, ko ia e Atua tukulagi mo e ko e Tufuga malolō ue atu ne tufugatia e tau mena oti kana.

TALAHAU HE TOHI TAPU:

“Kua fakaaue atu a maua ke he Atua, ko e Matua he Iki ha tautolu ko Iesu Keriso, kua liogi nakai noa ma mutolu.”—Kolose 1:3.

“Ko e Iki [Iehova] na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti.”—Fakakiteaga 4:11.

Kikite foki Roma 10:13; 1 Timoteo 1:17.

2 HŪHŪ: Ko hai a Iesu Keriso?

TALI: Ko Iesu ko e Tama uluaki he Atua. Ne tufuga a Iesu, ti fai kamataaga a ia. Ko Iesu i lalo hifo he Atua mo e kua omaoma ke he Haana finagalo.

TALAHAU HE TOHI TAPU:

“Ha ko e mena mua haku a Matua ia au.”—Ioane 14:28.

“Ko ia [Iesu] foki ko e fakatai he Atua nakai kitia, ko e uluaki he tau mena oti kana kua eke.”—Kolose 1:15.

Kikite foki Mataio 26:39; 1 Korinito 15:28.

3 HŪHŪ: Ko e heigoa e agaaga tapu?

TALI: Ko e agaaga tapu ko e malolō ne fakaaoga he Atua ke taute e haana finagalo. Nakai ko e tagata. Maeke e tau tagata ke puke he agaaga tapu mo e moua e malolō mai i ai.

TALAHAU HE TOHI TAPU:

“Kua logona e Elisapeta e fakaalofa a Maria, ti hopohopo ai e tama ke he manava hana, kua fakapuke foki he Agaga Tapu a Elisapeta.”—Luka 1:41.

“To moua e mutolu e malolo, ka haele hifo e Agaga Tapu ki luga ia mutolu.”—Gahua 1:8.

Kikite foki Kenese 1:2; Gahua 2:1-4; 10:38.

4 HŪHŪ: Ko e heigoa e Kautu he Atua?

TALI: Ko e Kautu he Atua ko e fakatufono i luga he lagi. Ko Iesu e Patuiki he Kautu he Atua. Nakai leva to tamai he Kautu nei e finagalo he Atua ke he lalolagi katoa.

TALAHAU HE TOHI TAPU:

“Kua fakatagi foki he agelu ne tokofitu aki e pu, ti ha i ai ke he lagi e tau leo lalahi, kua pehe mai, Ko e tau kautu he lalolagi kua eke ma e Iki ha tautolu mo e hana Keriso, to eke foki a ia mo patuiki tukulagi tukumuitea.”—Fakakiteaga 11:15.

Kikite foki Tanielu 2:44; Mataio 6:9, 10.

5 HŪHŪ: Ō oti nakai e tau tagata mitaki ke he lagi?

TALI: Nakai. Ko e matakau he tau tagata tua fakamooli, ne fakahigoa ko e “fuifui mamoe gahoa,” ne fifili he Atua ke o atu ke he lagi. To pule a lautolu mo Iesu, ko e tau patuiki ke he tau tagata.

TALAHAU HE TOHI TAPU:

“Ua matakutaku a koe e fuifui mamoe gahoa na e; ha ko e mena finagalo ha mutolu a Matua ke foaki mai e kautu kia mutolu.”—Luka 12:32.

“Ka e eke a lautolu mo tau ekepoa he Atua mo Keriso, ti eke foki a lautolu mo tau patuiki fakalataha mo ia.”—Fakakiteaga 20:6.

Kikite foki Fakakiteaga 14:1, 3.

6 HŪHŪ: Ko e heigoa e finagalo he Atua ma e lalolagi mo e tau tagata?

TALI: I lalo hifo he Kautu he Atua, to eke e lalolagi mo parataiso ti moua he tau tagata ne tua fakamooli e malolō tino mitaki katoatoa, mafola tukulagi mo e moui nakai fai fakaotiaga.

TALAHAU HE TOHI TAPU:

“Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.”—Salamo 37:10, 11.

“To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”—Fakakiteaga 21:3, 4.

Kikite foki Salamo 37:29; 2 Peteru 3:13.