Ne fakamaama he aposetolo ko Paulo ko Iehova * ko e “Atua foki hana e tau fakamafanaaga oti, Ko ia kua fakamafana mai a [ta]utolu ke he ha [ta]utolu a tau matematekelea oti.” (2 Korinito 1:3, 4) Peehi mooli mai he Tohi Tapu, na maeke e tau tagata oti ke moua e lagomatai he Atua, mo e ai fai matematekelea ne lahi mahaki ne ai maeke ha tautolu a Matua he lagi ke fakamafana a tautolu.

Ka kua lata ia tautolu ke fai mena ka taute ke moua e fakamafanaaga mai he Atua. To maeke fēfē e ekekafo ke lagomatai a tautolu ka nakai fakalataha atu ke kitia e ekekafo? Ne hūhū e perofeta ko Amosa: “Ke o fakalataha kia e tokoua, kaeke kua nakai loto fakalataha a laua?” (Amosa 3:3) Ti kua lagomatai he tau Tohiaga Tapu a tautolu: “Kia fakatata atu a mutolu ke he Atua, ti fakatata mai ai a ia kia mutolu.”​—Iakopo 4:8.

Iloa fēfē e tautolu to fakatata mai e Atua ki a tautolu? Fakamua, ha kua talahau lagaloga e ia kua manako a ia ke lagomatai a tautolu. (Kikite e  puha he vala tala nei.) Mo e uaaki, ha kua iloa e tautolu e tau tala mooli he tau tagata ne fakamafana he Atua​—tau tagata he vahā ha tautolu mo e vahā fakamua.

Tuga e tau tagata tokologa he vahā nei ne lagomatai he Atua, ne iloa lahi he patuiki ko Tavita e matematekelea. Ne lagataha e olelalo a ia ki a Iehova, “Kia fanogonogo mai a koe ke he leo he haku a ole atu.” Tali nakai he Atua? E. Ne lafi e Tavita: “Ti moua ai e au e lagomatai, ko ia ne fiafia ai hoku loto.”​—Salamo 28:2, 7.

Ne finagalo a Iehova ke taute e Iesu e matagahua lahi ke foaki e fakamafanaaga. Lafi ke he tau gahua ne kotofa he Atua ki a Iesu, ne lata foki a ia “ke pipi e tau loto ne malipilipi” mo e “fakamafana ai a lautolu oti kua tagi.” (Isaia 61:1, 2) Tuga ni kua talahau mai tuai, ne fiafia mooli a Iesu ke he tau tagata “ne matematekelea mo e pehia he tau kavega.”​—Mataio 11:28-30.

Ne fakamafana e Iesu e tau tagata he foaki age e tau fakatonuaga pulotu, mahani totonu a ia he fehagai mo lautolu, mo e he falu tuaga ne fakamaulu e ia e tau gagao ha lautolu. He taha aho ne olelalo e tagata lepela ki a Iesu: “Kaeke kua finagalo a koe ki ai, kua maeke ni ia koe ke fakamea au.” Ne omoomoi a Iesu he fakaalofa hofihofi ti tali atu: “Mena loto au ki ai; kia mea a koe.” (Mareko 1:40, 41) Ti maulu e gagao he tagata lepela.

He vahā nei, kua nakai nofo e Tama he Atua he lalolagi ke fakamafana mai a tautolu takitokotaha. Ka ko e  haana Matua ko Iehova, “ko e Atua foki hana e tau fakamafanaaga oti,” kua matutaki ke lalago a lautolu ne kumi lagomatai. (2 Korinito 1:3) Manamanatu ke he fā e matapatu puhala kua fakaaoga he Atua ke fakamafana e tau tagata.

• Ko e Tohi Tapu. “Ko e tau mena oti ne tohi mai i tuai, ne tohi ia, ke fakaako ai a tautolu; kia moua ai e tautolu e amaamanaki ha ko e fakauka mo e fakamafanatia mai he tau Tohi.”​—Roma 15:4.

• Ko e Agaaga Tapu he Atua. Nakai leva e mate ha Iesu, ne mafola e fakapotopotoaga katoa he tau Kerisiano. Ko e ha? “Kua feoaki foki a lautolu mo e matakutaku ke he Iki, ti kua fakatokologa he lagomatai [fakamafana] mai he Agaga Tapu.” (Gahua 9:31) Na mua atu e malolō he agaaga tapu, ko e malolō gahuahua he Atua. Ti maeke e Atua ke fakaaoga ai ke fakamafana e tau tagata he ha tuaga ni.

• Ko e Liogi. “Aua neke fakaatukehe a mutolu ke he taha mena taha,” he tomatoma he Tohi Tapu ki a tautolu. Ka e pehē mai, “kia fakailoa atu ke he Atua e tau manako ha mutolu ke he tau mena oti kana ke he liogi, . . . Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu.”​—Filipi 4:6, 7.

• Ko e Tau Matakainaga Kerisiano kua maeke ke foaki e fakamafanaaga he ‘huaga haohao mitaki’ he tau kapitiga mooli. Ne fakamaama he aposetolo ko Paulo e tau kapitiga haana ne “eke foki a lautolu mo fakamafanatia” he tau magaaho ‘matematekelea mo e mamahi.’​—Kolose 4:11; 1 Tesalonia 3:7.

Ka e fakagahua fēfē e tau mena nei he manatu e koe. O mai a tautolu ke onoono fakalahi ke he tau mena ne tutupu ke he tau tagata ne fehagai mo e tau lekua ne talahau he kamataaga. Tuga a lautolu ia, to maeke ia koe ke iloa na fakamooli agaia he Atua e haana maveheaga mafanatia nei: “Tuga ne tagata ne fakamafana ai he hana matua fifine, to fakamafana pihia e au a mutolu.”​—Isaia 66:13.