“Ko e Tokogahoa” Kua Eke “mo Tokoafe”
“Ko e Tokogahoa” Kua Eke “mo Tokoafe”
“Ko e tokogahoa to eke ia mo tokoafe, mo e maga fakateaga to eke ia mo motu malolo.”—ISAIA 60:22
1, 2. (a) Ko e ha ne ufitia he pouli e lalolagi he vaha nei? (e) Kua kikila tumau fefe e maama a Iehova ke he hana tau tagata?
“TO UFITIA e lalolagi ke he pouli kikio, to ufitia foki e tau motu ke he pouli; ka to haele hake a Iehova ki luga hau, mo e lilifu hana to kitia ai ki luga hau.” (Isaia 60:2) Ko e tau kupu nei kua fakamaama mitaki e tuaga he lalolagi tali mai he 1919. Kua fakaheu e Kerisitenitome e fakamailoga he ha ha hinei fakapatuiki ha Iesu Keriso, “ko e maama he lalolagi.” (Ioane 8:12; Mataio 24:3) Ha ko e “ita lahi” a Satani, ko e pule he “tau iki he pouli ha he lalolagi nai,” ko e senetenari ke 20 aki ko e vaha ne kua mua atu e mamahi mo e matematekelea he fakamauaga tuai he tagata. (Fakakiteaga 12:12; Efeso 6:12) Ko e laulahi he tau tagata kua nonofo he pouli kikio fakaagaga.
2 Ka kua kikila agaia e maama he vaha nei. Kua “haele hake” a Iehova ke he hana tau fekafekau, ko e tau tagata fakauku ne toe, ko e tau hulalo he lalolagi he hana “fifine” he lagi. (Isaia 60:1) Mua atu he magaaho ne fakatoka mai a lautolu he paeaaga i Papelonia he 1919, ko lautolu nei kua fakaata e lilifu he Atua mo e kua ‘fakakikila ha lautolu a maama ki mua he tau tagata.’ (Mataio 5:16) Mai he 1919 ke he 1931, ko e maama he Kautu kua tumau ke kikila he tiaki e lautolu nei e tau filifili ne toe he tau manamanatuaga faka-Papelonia. Ati tupu tolomaki ke hogofulu e tau afe numera ha lautolu he fakamoli e Iehova hana maveheaga: “To tatanaki ni e au a lautolu, to tuku fakalataha e au a lautolu ne toe ia Isaraela, tuga ne fuifui mamoe i Posara, tuga e fuifui manu ki loto he mena ne fagai ai, to go lahi mai ni a lautolu, ha ko e motu o tagata.” (Mika 2:12) He 1931, ne kitia lahi e lilifu a Iehova ke he tau tagata hana he talia e lautolu e matahigoa ko e Tau Fakamoli a Iehova.—Isaia 43:10, 12.
3. Kua kitia moli fefe to kikila e maama a Iehova ke he falu foki ne nakai ni mai he tau tagata fakauku?
3 To kikila ni kia hokoia a Iehova ki a lautolu ne toe he “fuifui mamoe gahoa”? (Luka 12:32) Nakai. Ne tuhi e fufuta he The Watch Tower, Sepetema 1, 1931, ke he taha matakau foki. He fakamaamaaga mitaki he Esekielu 9:1-11, kua fakakite e tagata mo e lupo vaitohi ne totoku he tau kupu nei ke hulalo e tau tagata fakauku ne toe. Ko hai ne fakamailoga he “tagata” ia e tau matale? Ko e tau “mamoe kehe,” ko lautolu ne ha ha ai e amaamanakiaga ke moui tukulagi he lalolagi parataiso. (Ioane 10:16; Salamo 37:29) He 1935 ko e matakau nei he “falu mamoe kehe” kua mailoga ai ko e “moto tagata tokologa . . . mai he tau motu oti” ne kitia i loto he fakakiteaga he aposetolo ko Ioane. (Fakakiteaga 7:9-14) Mai he 1935 ato hoko e magaaho nei, kua lahi e fakamahino ke he fakapotopoto mai he moto tagata tokologa.
4. Ko hai e “tau patuiki” mo e “tau motu” ne hagaao ki ai he Isaia 60:3?
4 Ko e gahua fakapotopoto nei kua hagaaki ki ai he perofetaaga ha Isaia he magaaho ne talahau: “To o mai e tau motu kehe ke he hau a maama, ko e tau patuiki foki to o mai a lautolu ke he kikila he hāu a hake.” (Isaia 60:3) Ko hai e “tau patuiki” ne hagaao ki ai he mena nei? Ko e tau tagata ne toe he 144,000 ne fakalataha mo Iesu Keriso, ko e tau hakega he Kautu he lagi mo e takitaki e gahua fakamatala. (Roma 8:17; Fakakiteaga 12:17; 14:1) He vaha nei, ko e afe tagata ne toe kua gahoa lahi he “tau motu,” ko lautolu ne ha ha ai e amaamanakiaga he lalolagi ne o mai ki a Iehova ke moua e fakaakoaga mo e uiina e falu ke taute pihia foki.—Isaia 2:3.
Tau Fekafekau Fakamakamaka ha Iehova
5. (a) Fakakite he heigoa kua nakai galo e fakamakamaka he tau tagata ha Iehova? (e) Ko e tau motu fe ne kitia lahi ai e tupu tolomaki he 1999? (Kikite e fakafonua he tau lau tohi 25 ke he 28.)
5 Ko e fakamakamaka ha ia ne fakakite he Tau Fakamoli a Iehova he vaha fou nei he magahala he senetenari ke 20 aki! Mo e pete ni ko e tupu tolomaki he tau mena uka, kua nakai galo e fakamakamaka ha lautolu he hoko mai e tau 2000. Kua kakano lahi agaia e poaki ha Iesu ki a lautolu: “Kia o atu a a mutolu ke eke e tau motu oti kana mo tutaki.” (Mataio 28:19, 20) Ko e numera he tau tagata fakailoa fakamakamaka he tala mitaki he tau he fekafekauaga kua mole he senetenari ke 20 aki kua hokotia ke he tapunu fou ke 5,912,492. Ne fakaaoga e lautolu e katoatoa he tau matahola ke 1,144,566,849 he tutala ke he falu hagaao ke he Atua mo e hana tau finagalo. Ne taute e lautolu 420,047,796 e tau liu aahi atu ke he tau tagata ne fiafia mai mo e takitaki 4,433,884 e tau fakaakoaga Tohi Tapu nakai totogi ke he tau kaina. Ko e fakamauaga homo ue atu ha ia he fekafekauaga fakamakamaka!
6. Ko e heigoa e fakaholoaga fou ne taute ma e tau paionia, mo e fefe e tali ki ai?
6 Ia Ianuari kua mole, ne fakapuloa he Kau Fakatufono e hiki he tau matahola ne lata mo e tau paionia. Tokologa ne fakaaoga fakamitaki e mena nei ke huhu atu ke he tuaga paionia tumau po ke fakaku. Ke fakatai ki ai, he magahala he tau mahina fa fakamua he kalena ha tautolu he 1999, ne moua he la ofisa i Netelani fakalahi fa e loga he tau tohi ole ke paionia tumau tuga he magahala taha ia ni he tau fakamua atu. Ne hokotaki mai i Kana: “Tali mai he magaaho ne kamata e foliaga he tau matahola paionia fou, ko e tuaga he tau paionia tumau ha mautolu kua mauokafua e holo ki mua.” I loto he tau he fekafekauaga he 1999, ko e numera he tau paionia he lalolagi katoa kua hokotia ke 738,343 —ko e fakatataaga homo ue atu he ‘fakamakamaka ma e mahani mitaki.’—Tito 2:14.
7. Fakamonuina fefe e Iehova e gahua fakamakamaka he tau fekafekau hana?
7 Kua fakamonuina kia e Iehova e gahua fakamakamaka nei? E. He puhala ia Isaia ne pehe a ia: “Kia hagahaga fano a koe ke he tau fahi oti, mo e kitia e koe, kua fakapotopoto mai a lautolu oti; kua o mai a lautolu kia koe, to o mai hau a tau tama tane he mena mamao, to hapini foki hau a tau tama fifine ke he hau a kahokaho.” (Isaia 60:4) Ko e “tau tama tane” mo e “tau tama fifine” fakauku ne fakapotopoto mai kua fekafekau fakamakamaka agaia ke he Atua. Mo e he mogonei, ko e tau mamoe kehe ha Iesu kua fakapotopoto ke he paka he “tau tama tane” mo e “tau tama fifine” fakauku ha Iehova ke he 234 he tau motu mo e tau aelani he tahi.
“Tau Gahua Mitaki Oti Kana”
8. Ko e heigoa e “tau gahua mitaki” ne makau e Tau Fakamoli a Iehova ki ai?
8 Kua ha ha he tau Kerisiano e matagahua ke fakamatala e tala mitaki he Kautu mo e ke lagomatai a lautolu ne fiafia mai ke eke mo tau tutaki. Ka kua “taute ni [a lautolu] ke he tau gahua mitaki oti kana.” (2 Timoteo 3:17) Ko e mena ia ne leveki fakamitaki e lautolu ha lautolu a tau magafaoa, fakakite e fakamokoi, mo e aahi a lautolu ne gagao. (1 Timoteo 5:8; Heperu 13:16) Mo e tau tagata foaki lagomatai noa kua putoia ke he tau matagahua tuga e ta e tau Fale he Kautu—ko e gahua ne foaki foki e fakamatalaaga. I Togo, he mole e ta he taha fale, ko e takitaki he tapu fakakarisima ne manako ke iloa ko e ha ne maeke he Tau Fakamoli a Iehova ke ta ne lautolu ha lautolu a tau fale ka e totogi he tapu e tau tagata ma e gahua nei ni! Ne hokotaki mai i Togo, ko e puhala ta mitaki he tau Fale he Kautu kua lauia mitaki ke he katofia ati lali falu tagata ke totogi po ke ta e tau fale ke nonofo ai he matakavi ia ni ka ta ai e tau Fale he Kautu.
9. Fefe e mahani he Tau Fakamoli a Iehova ke he tau matematekelea?
9 He falu mogo, fai fahi foki he gahua mitaki ne manako ki ai. Loga e motu he tau he fekafekauaga kua mole ne to matematekelea, mo e fa tomua ke foaki e lagomatai ko e Tau Fakamoli a Iehova. Ke fakatai ki ai, kua lahi e matakavi i Honotura ne moumou he Afa ko Mitch. Ne fakatepe e la ke fakatu e tau komiti ke fakatokatoka fakamafiti e tau gahua lagomatai. Ko e Tau Fakamoli i Honotura mo e loga he falu motu kua foaki noa e tau mena tui, mena kai, vai ekekafo, mo e falu koloa kua lata. Ne fakaaoga he tau Komiti Ta Fale Matakavi e lotomatala ha lautolu ke liu ta e tau fale. Nakai leva, ko e tau matakainaga ha tautolu ne putoia ke he matematekelea nei kua lagomatai ke liliu ke he tau gahua fa mahani ha lautolu. I Ekuatoa, ne o e Tau Fakamoli a Iehova ke lagomatai e tau matakainaga ha lautolu he magaaho ne puke mo e moumou he vai e falu kaina. He mole e matakaki atu ke he puhala mitaki lahi ne fehagai a lautolu mo e tuaga ia, ne pehe taha tagata gahua fakatufono: “Kaeke ko e matakau haku anei, to mahuiga e tau mena ka taute e au! Ko e tau tagata tuga a mutolu kua lata ke ha ha he tau fahi oti he lalolagi.” Ko e tau gahua mitaki pihia kua fakaheke atu ki a Iehova ko e Atua mo e kua fakamoli ha tautolu a “mahani Atua [ne] kua aoga ia ke he tau mena oti kana.”—1 Timoteo 4:8.
‘Kua Lele a Lautolu po ke Aolagi’
10. Pete ni he to hifo fakahaga e numera he tau tagata fakauku, ko e ha kua mahomo atu e fakapuloa he higoa a Iehova nakai fakalata ke he tau vaha fakamua?
10 Ne huhu a Iehova he mogonei: “Ko hai kia a lautolu kua lele po ke aolagi, ke tuga ne tau lupe foki ke he tau gutuhala ha lautolu? Ha kua tatali kia au e tau motu ne takai he tahi, to mumua foki e tau foulua Tasesa, ke ta mai hau a fanau mai he mena mamao . . . To ati hake he tau tagata kehe hau a tau kaupa; to fekafekau mai kia koe ha lautolu a tau patuiki.” (Isaia 60:8-10) Ko lautolu fakamua ke tali e “haele hake” ha Iehova ko e “fanau” hana, ko e tau Kerisiano fakauku. Mole ai ko e tau “tagata kehe,”ko e moto tagata tokologa, ne fekafekau fakamoli ke he ha lautolu a tau matakainaga fakauku, he mumuitua ke he ha lautolu a takitakiaga he fakamatala e tala mitaki. Ti, pete ni kua to hifo lahi e numera he tau tagata fakauku, kua mahomo atu e fakapuloa he higoa a Iehova nakai fakalata ke he tau vaha fakamua.
11. (a) Ko e heigoa ne fa e taute agaia mo e ko e heigoa e fua he 1999? (e) Ko e tau motu fe ne kitia lahi e numera ne papatiso he 1999? (Kikite e fakafonua he tau lau tohi 25 ke he 28.)
11 Ko e fua, kua totou miliona hane fuhi mai “tuga ne tau lupe foki ke he tau gutuhala ha lautolu,” ke moua e huaga i loto he fakapotopotoaga Kerisiano. Ko e totou teau mo e totou afe kua lafi mai he tau tau takitaha, mo e kua hafagi agaia e gutuhala ma e falu foki. Ne pehe a Isaia: “To toka noa mau hau a tau gutuhala nakai ni pa ke he aho mo e po; ke tamai ai kia koe e koloa he tau motu kehe.” (Isaia 60:11) He tau kua mole, 323,439 ne papatiso he fakamailoga e tukulele ha lautolu ki a Iehova, mo e nakaila pa e ia e tau gutuhala. “[Ko e] tau mena kua manako ki ai e tau motu oti,” ko lautolu he moto tagata tokologa, kua fuhi mai agaia ki loto. (Hakai 2:7) Nakai la fai tagata ne manako ke tiaki e pouli kikio, kua liliu kehe mai ai. (Ioane 12:46) Kia nakai galo e lautolu oti ia e loto fakaaue ha lautolu ke he maama!
Nakai Matakutaku he Fehagai mo e Totokoaga
12. Kua lali fefe a lautolu ne manako ke he pouli kikio ke tamate e maama?
12 Ko lautolu ne manako ke he pouli kikio kua vihiatia e maama a Iehova. (Ioane 3:19) Ti kua lali foki falu ke tamate e maama ia. Ko e mena amanaki tuai ki ai anei. Pihia foki a Iesu, “ko e maama moli kua fakamaama aki e tau tagata oti kana,” kua fakavihia, totoko, mo e fakahiku ke kelipopo he tau tagata he motu hana. (Ioane 1:9) Tali mai he senetenari ke 20 aki, ko e Tau Fakamoli a Iehova kua va, tuku fale puipui, pa, mo e kelipopo foki, he fakakikila fakamoli e lautolu e maama a Iehova. He tau tau e ne mole laia, ko e tau tagata totoko kua mautali ke folafola e fatipiko ke he puhala fematutaki hagaao ki a lautolu ne fakakikila e maama he Atua. Ko e falu kua manako ke fakaohooho e tau tagata ke talitonu ko e tau tagata vale e Tau Fakamoli a Iehova mo e kua lata ke fakakikili po ke pa ai. Kua kautu kia e tau totokoaga pihia?
13. Ko e heigoa e fua he fakamaama fakamitaki e moli hagaao ki a tautolu ke he puhala fematutaki?
13 Nakai. Ke he mena kua lata, ne o atu e Tau Fakamoli a Iehova ke he puhala fematutaki ke fakamaama e tau tala moli. Ko e fua, kua lomi fakailoa ai ke he lalolagi katoa e higoa a Iehova i loto he tau tohi tala mo e tau mekasini mo e he letio mo e televisoni. Kua mitaki ai e fakahikuaga he mena nei ke he gahua fakamatala. I Tenemaka, ke fakatai ki ai, ne fehagai e polokalama he TV he motu katoa ke he matapatu tala “Ko e ha kua to hifo fakahaga e tua he tau tagata Tenemaka.” Katoa mo e falu, ne huhu tala atu ke he Tau Fakamoli a Iehova. He mole atu, ne talahau mai e fifine ne kitia e polokalama: “Kua kitia maali tuai ko hai ne tokai e agaga he Atua.” Kua kamata ai e fakaakoaga mo ia.
14. Ke he ha lautolu a kapeletu, ko e heigoa ka nakai leva ti peehi a lautolu ne totoko ke mailoga?
14 Iloa he Tau Fakamoli a Iehova kua tokologa he lalolagi nei ka totoko ki a lautolu. (Ioane 17:14) Pete ia, kua fakamalolo he perofeta ha Isaia a lautolu: “Ko e fanau ha lautolu ne favale atu kia koe to o mai a lautolu, mo e hufeilo a lautolu kia koe; ko lautolu oti ne fakavihia a koe to fakaveveli fakafohifo ai a lautolu ke he hau a tau aloalovē; to ui e lautolu a koe, ko e maga a Iehova, Ko Siona ko e maga hana ne Tapu i Isaraela.” (Isaia 60:14) Ke he kapeletu ha lautolu, nakai leva to mailoga he tau tagata totoko kua tau ni a lautolu ke he Atua. Ko hai ka kautu ke he tauaga pihia?
15. Maeke fefe e Tau Fakamoli a Iehova ke ‘kai e puke huhu he tau motu kehe,’ mo e kua kikila fefe e mena nei ke he tau fakaakoaga mo e tau gahua fakamatala ha lautolu?
15 Ne mavehe foki a Iehova: “To eke e au a koe mo motu fulufuluola tukulagi . . . To kai e koe e puke huhu he tau motu kehe, to kai foki e koe e tau huhu he tau patuiki; ti iloa ai e koe au ko Iehova ko e hau a Fakamoui.” (Isaia 60:15, 16) E, ko Iehova e Fakamoui he hana tau tagata. Kaeke ke falanaki a lautolu ki a ia, to moui “tukulagi” a lautolu. Mo e to “kai e [lautolu] e puke huhu he tau motu kehe,” he fakaaoga falu koloa ma e fakalaulahiaga he tapuakiaga moli. Ke fakatai ki ai, ko e fakaaogaaga fakapulotu he komopiuta mo e tau puhala matutakiaga he vaha nei kua fakamukamuka ke fakatupu he mogo taha e tau tohi Ko e Kolo Toko ke he 121 e vagahau mo e Awake! ke he 62. Kua talaga pauaki taha polokalama he komopiuta ke lagomatai ke fakaliliu e New World Translation ke he tau vagahau fou, mo e ta mai he tau fakaliliuaga ia e fiafia lahi. He magaaho ne fakatoka mai e liliuaga faka-Koroatia he tau Tohiaga Tapu Heleni Kerisiano he 1999, ne totou afe kua hihina e tau mata he fiafia. Taha e matakainaga tane motua lahi ne pehe: “Kua leva tuai e leo haku ke he Tohi Tapu nei. Mogonei, to mate au mo e mafola!” Ko e tufatufaaga he New World Translation, tohi katoa po ke taha vala ni, kua molea e 100 miliona ke he 34 e tau vagahau.
Tau Tuaga Tokoluga he Mahani
16, 17. (a) Pete he uka, ko e ha kua lata ke kuku mau e tau tutuaga tokoluga a Iehova? (e) Ko e heigoa e tau mena tutupu ne fakakite kua maeke he tau fuata ke kalo mai he aga kiva he lalolagi?
16 Ne pehe a Iesu: “Ko lautolu oti kua eke mena kelea, kua vihiatia e lautolu e maama.” (Ioane 3:20) Ke he taha fahi, ko lautolu ne tumau ke he maama kua manako lahi ke he tau tuaga tokoluga a Iehova. Ne talahau e Iehova he puhala ia Isaia: “To tututonu foki hau a tau tagata oti kana.” (Isaia 60:21a) Kua uka lahi foki ke fakatumau e tau tutuaga tututonu he lalolagi ne holopi ai e mahani feuaki, pikopiko, fulukovi, mo e fakaikaluga. Ke fakatai ki ai, he falu motu, kua tupu tolomaki e tuaga he tupe mo e kua mukamuka ke tutuli ni e maukoloa. Ati hataki a Paulo: “Ko lautolu kua manako ke maukoloa, kua moua a lautolu he kamatamata, mo e hele, mo e tau manako lahi ne loga kua goagoa ai mo e kelea ai, ko e tau mena ia kua fakatomo ai e tau tagata ke he mahaikava mo e malaia.” (1 Timoteo 6:9) Kua kelea ha ia he mogo ka hufia lahi taha tagata ke he tau feua pisinisi ti tiaki e ia e tau mena ne aoga moli, tuga e feoaki faka-Kerisiano, fekafekauaga tapu, tau matapatu fakaakoaga he tau mahani, mo e tau matagahua ke he magafaoa!
17 Ke fakatumau e tau tutuaga tututonu kua uka lahi ke he tau fuata ikiiki, ha kua tokologa he atutaha ha lautolu kua putoia he kai tulaki mo e mahani feuaki. I Suriname, ne finatu e tama tane matafuluola he aoga ke he tama fifine 14 e tau tau he moui mo e ole ke eke e mahani fakatane mo e fifine. Nakai mahalo a ia, ti fakamaama age na fakatapu he Tohi Tapu e tau mena ia i fafo he fakamauaga. Ne va he falu tama fifine he aoga a ia mo e lali ke peehi a ia ke hiki hana manatu, he talahau kua loto e tau tama oti ke momohe mo e tama tane ia. Pete ni ia, ne tu mauokafua e tama fifine. Fai fahi tapu he mole, ne moua he tama tane ia e HIV mo e gagao lahi. Kua fiafia lahi e tama fifine ha kua omaoma a ia ke he poakiaga a Iehova ke ‘fakamamao mai he feuaki.’ (Gahua 15:28, 29) Kua nava lahi e Tau Fakamoli a Iehova ke he fanau ne ha ha ia lautolu ne tutu mauokafua ke he mena kua hako. Ko e tua ha lautolu, mo e he tau matua ha lautolu, kua “fakaheke” e higoa a Iehova ko e Atua.—Isaia 60:21e.
Kua Fakatupu Tolomaki e Iehova
18. (a) Ko e heigoa e mena mua ne taute e Iehova ma e tau tagata hana? (e) Ko e heigoa e fakamoliaga ne ha ha ai to fakatumau e tupu hake, mo e ko e heigoa e amaamanakiaga mua ue atu ne tatali ki a lautolu ne nonofo mau mo e maama?
18 E, ne fakakikila e Iehova e maama ke he hana tau tagata, kua fakamonuina, takitaki, mo e fakamalolo a lautolu. He magahala he senetenari ke 20 aki, ne kitia e lautolu e fakamoliaga he tau kupu a Isaia: “Ko e tokogahoa to eke ia mo tokoafe, mo e maga fakateaga to eke ia mo motu malolo; ko au ko Iehova to fakaave au ke eke ke he hana ni a aho.” (Isaia 60:22) Mai he fiha maka he 1919, “ko e tokogahoa” kua loga lahi atu he “tokoafe.” Mo e nakai la oti e tupu tolomaki ia! He tau kua mole toko 14,088,751 ne o atu ke he Fakamanatuaga he matulei a Iesu. Tokologa ia lautolu nei, nakai ko e Tau Fakamoli gahuahua. Kua fiafia a tautolu he o mai a lautolu ke he fakamanatuaga aoga ia, mo e uiina e tautolu a lautolu ke fakatumau ke o atu ke he maama. Hane kikila agaia a Iehova ke he tau tagata hana. Ko e gutuhala ke he fakatokatokaaga hana kua hafagi agaia. Ati lata mogoia, a tautolu oti ke fakamalolo ke nonofo he maama a Iehova. Ko e tau monuina ha ia ne fua ia tautolu he mogonei! Mo e ko e fiafia ha ia ka ta mai he vaha i mua he magaaho ka fakaheke he tau tufugatia oti kana a Iehova mo e olioli ke he kikila he hana lilifu!—Fakakiteaga 5:13, 14.
Maeke Nakai a Koe ke Fakamaama?
• Ko hai ne fakakikila e maama a Iehova he tau aho fakahiku nei?
• Fakakite he heigoa kua nakai galo e fakamakamaka he tau tagata ha Iehova?
• Ko e heigoa falu gahua mitaki ne lavelave e Tau Fakamoli a Iehova ki ai?
• Pete ko e totoko vevela, ko e heigoa ne mauokafua a tautolu ki ai?
[Tau Huhu he Fakaakoaga]
[Fakafonua he lau 25-28]
HOKOTAKI HE FEKAFEKAUAGA HE TAU HE TAU FAKAMOLI A IEHOVA HE LALOLAGI OTI HE 1999
(Kikite pega volume)
[Tau Fakatino he lau 31]
Fuhi mai agaia e tau tagata ke he fakatokatokaaga ha Iehova