Ne Fakamalolo a Lautolu

Nakai mukamuka tumau e fakamalolo ke fakamatala atu. Moli, ne pehe e aposetolo ko Paulo he taha magaaho, ne taute ai e ia “mo e tau lahi.” (1 Tesalonia 2:2) Kua aoga lahi kia e “tau” ke fakamatala atu? Nakai fai fakamoliaga he tau mouaaga homo ue atu, ka e fa fiafia e tau tagata he Atua ha kua fakamalolo a lautolu. Onono la ke he falu he tau fakafifitakiaga.

Ko e tama fifine valu e tau he moui ne higoa ko Tara ne fanogonogo fakamakutukutu he tala age e faiaoga hana ke he vahega ko e Felakutaki II he Lalolagi, ko e tau tagata he kemuaga pagota lutaia ne tui e Fetu ago ha Tavita ma e fakakiteaga. Ne manamanatu a Tara kua lata kia a ia ke vagahau. “Ne liogi au mo e ala e tau mata,” he liu manatu e ia. Ti hiki hake e lima hana mo e pehe ko e Tau Fakamoli a Iehova foki he tau kemuaga ia, ti tui e lautolu e pakatolu lanu fuahoi. Ne fiafia e faiaoga mo e fakaaue ki a ia. Ne hafagi he talahauaga a Tara e puhala ma e fakalaulahi atu he tau fakatutalaaga mo e faiaoga, ti he magaaho fakamui, ne fakakite foki ke he vahega katoa hana e vitio Jehovah’s Witnesses Stand Firm Against Nazi Assault.

I Kini, ha Aferika Lalo, ko e fuata tote fakailoa nakai la papatiso ne higoa ko Irène ne manako ke fakatolomaki hana fekafekauaga. Ne fakamalolo he misionare ne fakaako Tohi Tapu mo ia a ia ke lali ke foaki e tau mekasini Watchtower mo e Awake! ke he tau fanau aoga. Ne fakauaua a Irène ha ko e mena nakai fanogonogo e tau kapitiga aoga hana. Pete ia, he fakalagalaga he fakamaloloaga he misionare, ne fifili a Irène ke tutala fakamua mo e tama aoga ne matamata ke totoko lahi. Ke he ofomate a Irène, ne fanogonogo e tama fifine mo e talia fakatepe e tau mekasini. Ne talia pihia foki he falu fanau aoga. Ne loga atu e tau mekasini ne foaki e Irène he mahina ia ke he tau mahina lima fakamua.

I Tirinitata ne maimaina e logonaaga he motua hagaao he fina atu ke he ulu aoga ke fakakite ki a ia e aoga he fakaakoaga he mekasini Awake! Moha ia, ne fakamalolo a ia. Kua pehe a ia: “Ne liogi au he fina atu ke he pa aoga. Nakai talitonu au he magaaho ne totonu lahi mahaki e ulu aoga.” Ne talia e ia e mekasini Awake! “Ko e Heigoa e Amaamanakiaga ma e Tau Fuata he Vaha Nei?” ti talia foki he fakaaoga ke fakaako aki e vahega. Tali mai mogoia, ne talia e ia 40 e mekasini ne putoia ai e tau matakupu kehekehe.

Ko e fuata ko Vaughn, ne uka lahi tumau ke fakamatala. “Ne vivivivi au, ti kavakava e tau alolima, ti vagahau mafiti au—nakai maeke ia au ke fakatotoka hifo.” Pete ia, ne eke a ia mo fekafekau gahua mau. Ka e, nakai la mukamuka ia ia ke vagahau. Lagataha, he mole e aho fakalolelole he kumi gahua, ne manako a ia ke fakamatala ke he taha tagata he tuleni, “kau ke fai mena mitaki kua moua mai he aho kelea.” Ka e matakutaku a ia he tau tagata tane pisinisi kua foliga aoga he tuleni fano hala kelekele. Fakahiku ai, ne fakamalolo a ia ke vagahau ke he tagata tane fuakau he tapa hana. Ne fua mai e fakatutalaaga loa. “Ha ha ia koe e tau huhu mitaki ko e fuata tote,” he talahau he tagata pisinisi, he huhu, “Ko e tagata fioloti kia a koe?” Ne tali a Vaughn, “Nakai, ko au ko e taha he Tau Fakamoli a Iehova.” “Aha,” he mamali he tagata tane. “Maama laia e au mogonei.”

Ko e Tau Fakamoli oti nei—mo e loga atu foki—hane fiafia kua fakamalolo a lautolu ke fakamatala. To taute pihia foki nakai e koe?

[Fakatino he lau 17]

Tara

[Fakatino he lau 17]

Vaughn