Hane Puke e Fale a Iehova ke he “Tau Mena kua Manako”

“To luelue foki e au [ko Iehova] e tau motu oti; ti hoko mai ai e tau mena kua manako ki ai e tau motu oti; to fakapuke foki e au e fale nai ke he lilifu.”—HAKAI 2:7.

1. He magaaho he fakamafitiaga, ko e ha kua manamanatu fakamua a tautolu ke he tau fakahelehele ha tautolu?

KO E heigoa e tau mena kua manako ne fakapuke aki e fale hau? Ha ha nakai ia koe e tau koloa tau uka, ko e komopiuta mafiti he vaha fou nei, ko e motoka fou he fale motoka hau? Pete ni e ha ha ia koe e tau mena oti nei, nakai kia talia e koe, ko e tau mena kua mahomo atu e uho he kaina hau ko e tau tagata—ko e tau tagata takitaha he magafaoa hau? Manamanatu la he taha po kua ala a koe ke he hohogo he ahua. Kua vela tuai e fale hau, ti nakai lahi e magaaho ke hola a koe! Ko e heigoa e kapeletu fakamua hau? Tau koloa hau? Komopiuta hau? Motoka hau? Nakai kia kua manamanatu a koe ke he hau a tau fakahelehele? To pihia moli a koe, ha ko e tau tagata kua mahomo atu e uho ke he tau koloa.

2. Ko e heigoa e fakalaulahiaga he tufugatia ha Iehova, mo e ko e heigoa e vala i ai ne kua ofania lahi e Iesu?

² Manamanatu la mogonei ki a Iehova ko e Atua mo e hana Tama, ko Iesu Keriso. Ko Iehova ko e “Atua . . . ne eke e lagi, mo e lalolagi, mo e tahi, mo e tau mena oti kana ne toka ai ia lautolu.” (Gahua 4:24) Ko e Tama hana, ko e ‘iki tufuga,’ ko e hukui ne tufuga ai e Iehova falu mena foki. (Tau Fakatai 8:30, 31; Ioane 1:3; Kolose 1:15-17) Moli kua uho tokoua ki a Iehova mo Iesu e tau mena oti ne tufugatia. (Fakatatai Kenese 1:31.) Ka ko e vala fe he tufugatia ne manatu e koe kua mua atu ki a laua—ko e tau koloa po ke tau tagata? He matagahua he tagata pulotu, ne talahau e Iesu: “Ko e haku a fiafia foki, ha ha i ai ke he fanau he tau tagata haia,” po ke talahau ai he fakaliliu ha William F. Beck, ne “fiafia lahi [a Iesu] ke he tau tagata.”

3. Ko e heigoa e perofetaaga ne talahau e Iehova he puhala mai ia Hakai?

³ Nakai fakauaua kua uho lahi e tau tagata ki a Iehova. Ko e taha fakakiteaga he mena nei ne moua ke he tau kupu fakaperofeta ne vagahau e ia he tau 520 F.V.N. he puhala he perofeta hana ko Hakai. Ne fakapuloa e Iehova: “To luelue foki e au e tau motu oti; ti hoko mai ai e tau mena kua manako ki ai e tau motu oti, to fakapuke foki e au e fale nai ke he lilifu. . . . Kua mua e lilifu fakamui he fale nai ke he hana lilifu fakamua.”—Hakai 2:7, 9.

4, 5. (a) Ko e ha kua nakai mitaki ke fakahikuaki e tau kupu “tau mena kua manako” hagaao ke he tau koloa tau uka? (e) Fakamaama fefe e koe e “tau mena kua manako,” mo e ko e ha?

 ⁴ Ko e heigoa e “tau mena kua manako” ka fakapuke aki e fale a Iehova mo e ta mai ai hana lilifu mua ue atu? Ko e tau koloa loga mo e fulufuluola? Ko e auro, ario, mo e tau maka uho? Nakai tonu e fakalataaga nei. Manatu, ko e faituga fakamua, ne kamata he tau senetenari lima fakamua atu, ko e fale ne piliona e tau tupe ne totogi aki! * Moli, nakai amanaki a Iehova ke he faituga ne talaga he matakau tote nei he tau Iutaia ne liliu ke fakatokoluga mai he faituga a Solomona ha ko e tau koloa tau uka!

⁵ Ti, ko e heigoa mogoia, e “tau mena kua manako” ka fakapuke aki e fale a Iehova? Maaliali ai, ko lautolu ko e tau tagata. Mua atu, ko e tau mena ne fakafiafia aki e loto a Iehova nakai ko e auro mo e ario ka ko e tau tagata kua fekafekau ki a ia mai he fakaalofa. (Tau Fakatai 27:11; 1 Korinito 10:26) E, kua uho ki a Iehova e tau tagata tane, tau fifine, mo e tau fanau oti kana kua tapuaki fiafia ki a ia. (Ioane 4:23, 24) Ko e “tau mena kua manako” anei, ti kua mahomo atu e uho ha lautolu ki a Iehova mai he tau koloa fakamanaia aki e faituga a Solomona.

6. Ko e heigoa e kakano ne taute ai e faituga i tuai he Atua?

⁶ Pete ni e totokoaga vevela, ne mau e faituga he 515 F.V.N. Ato hoko e magaaho ke poa a Iesu, ne tumau ni e faituga i Ierusalema mo matapatu tapuakiaga mea ma e tokologa he “tau mena kua manako,” ko e tau Iutaia he tino mo e tau tagata liliuina Motu Kehe. Ka kua fakamailoga he faituga e taha mena kua mua ue atu, ka kitia ai e tautolu.

Fakamoliaga he Senetenari Fakamua

7. (a) Ko e heigoa kua fakaata mai he faituga i tuai he Atua i Ierusalema? (e) Fakamaama e tau gahua he ekepoa ne mua he Aho he Fakafeiloaga.

⁷ Ne fakaata tuai he faituga i Ierusalema e fakatokaaga lahi ma e tapuakiaga. Ko e faituga fakaagaga he Atua, ne kua fakatu e Iehova he 29 V.N. mo Iesu ko e Ekepoa ne Mua. (Heperu 5:4-10; 9:11, 12) Manamanatu la ke he fakatataiaga he tau matagahua he ekepoa ne mua ha Isaraela mo e tau gahua a Iesu. He tau tau takitaha he Aho he Fakafeiloaga, ne fina atu e ekepoa ne mua ke he fatapoa he lotopa he faituga mo e foaki e povi ke fakafeilo e tau agahala he tau ekepoa. Fakamui, ne hu atu a ia ke he faituga mo e toto he povi, mole atu e tau gutuhala ne vevehe e lotopa mai he Tapu ti fina atu ke he tau ie puipui ne vehevehe e Tapu mai he Tapu Ue Atu. Ka hokotia atu ki loto he Tapu Ue Atu, ne pipi he ekepoa ne mua e toto ki mua he puha he maveheaga. He fatiaki e puhala taha, ne foaki e ia e koti ke fakafeilo e tau magafaoa ne nakai ko e tau ekepoa ne 12 ha Isaraela. (Levitika 16:5-15) Tatai fefe e fakamanatuaga nei ke he faituga fakaagaga he Atua?

8. (a) Ke he kakano fe ne foaki a Iesu he kamataaga he 29 V.N.? (e) Ko e heigoa e fakafetuiaga uho ne olioli e Iesu mo Iehova tali mai he fekafekauaga hana he lalolagi?

⁸ Lauia ai ne foaki a Iesu he fatapoa he finagalo he Atua he magaaho ne papatiso a ia mo e fakauku he agaga tapu he Atua he 29 V.N. (Luka 3:21, 22) Moli, ko e mena tupu nei kua fakamailoga e kamataaga he puhala ne poa he moui ha Iesu ne katoatoa ai ke tolu mo e hafa e tau. (Heperu 10:5-10) Ke he magahala ia, ne olioli e Iesu e fakafetuiaga fakaagaga hana mo e Atua. Ko e tuaga kehe ue atu nei ne ha ha ia Iesu mo e Matua hana he lagi kua nakai maama katoatoa he falu tagata. Kua tuga e puipui ne ufi aki ha lautolu a tau mata he loto, tuga ni e puipui ufi ne fakamalu aki e Tapu mai he kitiaaga ha lautolu he lotopa he faituga utafano.—Esoto 40:28.

9. Ko e ha ne nakai fina atu tino tagata a Iesu ke he lagi, ti fakatoka fefe e tuaga nei?

⁹ Pete ni ko ia ko e Tama he Atua ne fakauku he agaga, ne nakai fina atu fakatino tagata a Iesu ke he lagi. Nakai pihia he ha? Ha kua nakai hokotia ke he Kautu he Atua he lagi e tino kakano mo e toto. (1 Korinito 15:44, 50) Ha kua fakakaupa e tino he tagata ko Iesu, kua fakamailoga fakamitaki he ie puipui ne vevehe e Tapu mo e Tapu Ue Atu he faituga tuai he Atua. (Heperu 10:20) Ka e tolu e aho he mole e mate  hana, ne liu e Atua fakatu mai a Iesu ko e agaga. ( Peteru 3:18) Ti maeke ia ia ke hu atu ke he fale he Tapu Ue Atu he faituga fakaagaga he Atua—he lagi. Ti ko e mena tonu nei ni ne tupu. Kua tohi e Paulo: “Ha kua nakai haele atu a Keriso ke he tau mena tapu kua eke he tau lima, ko e fakatai haia ke he tau mena moli, ka ko e lagi ni, kua fakakite ainei a ia ki mua he Atua ma tautolu.”—Heperu 9:24.

10. Ko e heigoa ne taute e Iesu he liu atu a ia ke he lagi?

¹⁰ He lagi, ne “pipi takai [e Iesu] e toto” he hana poa he foaki e uho he lukutoto he hana toto moui ki a Iehova. Ka e, lahi atu e mena ne taute e Iesu. Nakai leva ato hoko hana mate, ne tala age a ia ke he tau tutaki hana: “Fano au ke taute taha mena ke nonofo ai a mutolu. Kaeke foki ke fano au mo e taute taha mena ke nonofo ai a mutolu, to liu mai au, ti talia mai foki e au a mutolu kia fakalataha mo au, kia nonofo ai a mutolu ke he mena ha i ai au.” (Ioane 14:2, 3) Ti he hoko atu ke he Tapu Ue Atu, po ke lagi, ne hafagi e Iesu e puhala ma e falu ke muitua. (Heperu 6:19, 20) Ko lautolu nei, ka numera 144,000, to eke mo tau ekepoa lagomatai he fakatokaaga he faituga fakaagaga he Atua. (Fakakiteaga 7:4; 14:1; 20:6) Tuga ni e ekepoa ne mua ha Isaraela ne uta fakamua e toto he povi ke he Tapu Ue Atu ke fakafeilo e tau agahala he tau ekepoa, ko e uho he toto a Iesu ne liligi kua hagaaki fakamua ke he tau ekepoa lagomatai nei ne 144,000. *

“Tau Mena Kua Manako” he Vaha Fou Nei

11. Ne poa he tau ekepoa ne mua a Isaraela e koti ke lata mo hai, ti ko e heigoa ne fakaata mai he mena nei?

¹¹ Kua fakalata ke he tau 1935, ko e fakapotopoto ia lautolu ne fakauku kua fakakatoatoa ai. * Ka e nakai fakaoti e Iehova e fakahekeaga he hana fale. Nakai, ai la oti e “tau mena kua manako” he o mai ki loto. Manatu na foaki he ekepoa ne mua i Isaraela ua e manu totolo—ko e povi ma e tau agahala he tau ekepoa mo e koti ma e tau agahala he tau magafaoa nakai ko e tau ekepoa. Ha kua fakatino he tau ekepoa a lautolu ne fakauku ka fakalataha mo Iesu ke he Kautu he lagi, ko hai kua hukui he tau magafaoa nakai ko e tau ekepoa? Kua moua e tali he tau kupu a Iesu ne fakamau ia Ioane 10:16: “Kua fai mamoe kehe au, nakai ha he lotopa nai; ko lautolu foki kua lata he takitaki mai e au, to fanogonogo foki a lautolu ke he leo haku; ati taha ai e fuifui mamoe, mo e leveki mamoe ne tokotaha.” Ti, aoga e liligi e Iesu e toto ke he ua e matakau tagata—fakamua, ki a lautolu e tau Kerisiano ne amaamanaki ke pule mo Iesu he lagi mo e ua aki, ko lautolu kua onoono atu ke he moui tukulagi he lalolagi parataiso. Moli ai,  ko e matakau nei ke ua aki ne fakatino he “tau mena kua manako” he perofetaaga a Hakai.—Mika 4:1, 2; 1 Ioane 2:1, 2.

12. Ha ne futiaki mai fefe e tokologa he “tau mena kua manako” ke he fale he Atua he vaha nei?

¹² “Ko e tau mena kua manako” anei hane fakapuke agaia aki e fale a Iehova. He tau tau e kua mole, ne uta kehe ai e tau puipuiaga i Europa Uta, falu vala i Aferika, mo e falu motu, he fakaata e tala mitaki ne fakave ke he Kautu he Atua ke tupuola ai ke hokotia ke he tau matakavi kua nakai la gahua ia. Ha kua o mai a lautolu kua manako ke he fakatokaaga he faituga he Atua, ne lali foki a lautolu ke fakalaulahi e taute tutaki, he omaoma ke he poakiaga ha Iesu. (Mataio 28:19, 20) He taute e lautolu pihia, ne fehagai a lautolu mo e tau tagata tokologa, kua fuata mo e fuakau, ne kua fai amanakiaga mo “tau mena kua manako” ka fakaheke e fale a Iehova. Manamanatu la ke he tau fakataiaga gahoa he puhala ka hoko e mena nei.

13. Fakatata fefe he tama fifine tote i Polivia e fakamakai hana he folafola e fekau he Kautu?

¹³ I Polivia, ko e tama fifine ne lima e tau he moui na feaki he tau mamatua Fakamoli ne ole ke he faiaoga hana ke nakai fano he aoga he fahitapu ka ahiahi mai e leveki he takaiaga. Ko e ha? Manako a ia ke fakalataha ke he fekafekauaga he matagahua pauaki he fahitapu katoa nei. Ne ofo e tau mamatua hana ha ko e mena nei, ka kua fiafia a laua ha ko e aga mitaki hana. Ko e tama fifine tote he mogonei kua taute lima e fakaakoaga Tohi Tapu he kaina, ti kua fakalataha atu foki falu he tau tagata fakaako nei ke he tau feleveiaaga Kerisiano. Ti ta mai foki e ia hana faiaoga ke he Fale he Kautu. Liga ke he magaaho ku, to fakakite he falu he tau tagata fakaako Tohi Tapu hana a lautolu ko e “tau mena kua manako” ka fakaheke e fale a Iehova.

14. I Korea, palepale fefe e fakauka he matakainaga fifine ke he tagata ne tuga kua nakai fiafia?

¹⁴ He fakatali he tuaga tuleni, ko e fifine Kerisiano  i Korea ne fina atu ke he tama aoga ne fanogonogo ke he kofe he tau mena fanogonogo teliga hana. “Fai lotu nakai a koe?” he huhu e ia. “Ai fiafia au ke he ha lotu,” he tali he tama aoga. Kua nakai fakalolelole e matakainaga fifine. “He mole atu e tau magaaho,” ne matutaki e ia, “liga to manako e tagata ke fifili e lotu. Kaeke ke nakai fai iloilo a ia ke he lotu, liga to fifili e ia e lotu hepe.” Ne hiki ai e fofoga he tama aoga, ti kamata agataha a ia ke fanogonogo ke he matakainaga fifine ha tautolu mo e fiafia. Ne foaki e ia e tohi Is There a Creator Who Cares About You? ki a ia mo e tala age ko e tohi nei to lagomatai lahi ka hoko mai e magaaho ma hana ke fifili e lotu. Ne talia fiafia e ia e tohi. He tapu hake, ne kamata fakaako e ia e Tohi Tapu mo e Tau Fakamoli a Iehova, ti kua fakalataha atu a ia ke he tau feleveiaaga oti he fakapotopotoaga.

15. Kamata fefe he tama fifine tote i Sapani e tau fakaakoaga Tohi Tapu, ti kua palepale fefe hana tau laliaga?

¹⁵ I Sapani, ko Megumi, ne 12 e tau he moui ne onoono ke he aoga hana ko e fonua mautu he fakamatala mo e fakaako. Kua maeke foki ia ia ke kamata e tau fakaako Tohi Tapu loga. Taute fefe e Megumi? He totou e ia e Tohi Tapu mo e tauteute e tau feleveiaaga he tau magaaho okioki kai la, fa mahani e tau kapitiga hana he vahega ke huhu ki a ia ko e heigoa hana fa e taute. Ko e falu ne huhu ki a Megumi ko e ha ne nakai fai vala a ia he falu matagahua he aoga. Kua tali e Megumi e tau huhu ha lautolu mo e tala age ki a lautolu e higoa he Atua. Kua fa fakalagalaga he mena nei e fiafia he tau tagata fanogonogo hana. Ti foaki mogoia e ia ki a lautolu e fakaakoaga Tohi Tapu. Kua taute e Megumi 20 e fakaakoaga mogonei—18 ia lautolu ko e tau kapitiga hana he poko aoga.

16. Maeke fefe he matakainaga tane i Kamerono ke kamata e tau fakaakoaga Tohi Tapu mo e falu he matakau he tau tagata vaiga?

¹⁶ I Kamerono, ko e matakau he tau tagata tane tokovalu ne gahua ke he matakavi gahua ne hea atu ke he matakainaga tane ne fa e foaki e tohi faka-Tohi Tapu ke he tau tagata o fano. He manako ai ke vaiga e matakainaga, ne huhu a lautolu ki a ia ko e ha ne nakai talia e ia e Tolu Taha, afi helo, po ke solu nakai maeke ke mate. Fakaaoga ai e Tohi Tapu, ne tali he matakainaga tane ha tautolu e tau huhu ha lautolu. Ti ko e fua, tokotolu e tagata tane ne talia e tau fakaako Tohi Tapu. Taha ia lautolu, ko Daniel, ne kamata ke fina atu ke he tau feleveiaaga mo e moumou foki e tau koloa oti hana ne felauaki mo e matutakiaga fakataulatua. (Fakakiteaga 21:8) He nakai la katoa e tau, ne papatiso a ia.

17. Maeke fefe he falu matakainaga tane i Ele Salavatoa ke fakailoilo ke fakamatala ke he tagata tane ne nakai manako he magaaho fakamua ke logona e fekau he Kautu?

¹⁷ I Ele Salavatoa, ne pipi he taha tagata tane e kuli vale hana i mua he gutuhala ka kitia e ia e Tau Fakamoli a Iehova hane tata mai. Ne leo e tagata tane ke momole e Tau Fakamoli, ato liuaki mai e ia e kuli ki loto he fale. Ne nakai maeke e tau matakainaga ke tutala ke he tagata tane. Ti taha aho ne pulega a laua ke fakaaoga e taha puhala foki. Iloa ai to logona he tagata tane e mena ne talahau e laua, ne fifili a laua ke fakamatala ke he kuli. Ne o mai a laua ke he fale, ne fakafeleveia ke he kuli, ti pehe ko e fiafia ha ia ha laua kua fai magaaho ke tutala ki ai. Ne tutala a laua ke he magaaho ka ha ha ai e parataiso ke he lalolagi, ka nakai fai tagata ka ita—e, to mafola pihia foki e tau manu. Ti mavehe totonu atu a laua ke he kuli mo e kamata o hifo  he hala. Kua lahi e ofomate ha laua, he hau e tagata ki fafo he fale hana mo e fakamolemole he nakai foaki ke he Tau Fakamoli e magaaho ke tutala ki a ia. Ne talia e ia e tau mekasini, mo e kamata e fakaakoaga Tohi Tapu. Ko e tagata tane nei ko e matakainaga ha tautolu mogonei—ko e taha he “tau mena kua manako”!

“Aua Neke Matakutaku”

18. Ko e heigoa e tau paleko ne fehagai he tau Kerisiano tokologa, ka e fefe e onoonoaga ha Iehova ke he tau tagata tapuaki hana?

¹⁸ Fai vala kia a koe he gahua aoga—he fakamatala mo e taute tutaki—he Kautu? Ka pihia, kua tu kotofa moli a koe. Nakai uaua ai, mai he gahua nei kua futiaki e Iehova e “tau mena kua manako” ke he hana fale. (Ioane 6:44) Moli, kua fa mategugu po ke fakalolelole a koe ke he falu magaaho. Ke he tau magaaho, ko e falu—pihia foki ke he tau fekafekau tua fakamoli a Iehova—kua taufetului mo e tau logonaaga he fakateaga. Ka e aua fakalolelole! Kua onoono a Iehova ke he tau tagata tapuaki takitaha hana ko e tau mena kua manako, ti makai lahi a ia ke he fakamouiaga hau.—2 Peteru 3:9.

19. Ko e heigoa e fakamaloloaga ne foaki e Iehova puhala ia Hakai, ti maeke fefe he tau kupu nei ke eke mo punaaga he fakamaloloaga ki a tautolu?

¹⁹ Ka logona e tautolu e fakalolelole, ha ko e totokoaga po ke falu tuaga nakai mitaki, kua eke e tau kupu a Iehova ke he tau Iutaia ne liliu mo punaaga he fakamaloloaga. Kua totou e tautolu ia Hakai 2:4-6: “Ka ko e hanai, kia fakamalolo a koe ma Serupapelu na e, kua pihia mai a Iehova; mo e fakamalolo ā koe Iosua na e ko e tama a Iosataka ko e ekepoa ne mua; mo e fakamalolo ā mutolu ko e tau tagata oti he motu mo e gahua ai a mutolu, kua pihia mai a Iehova; ha ko au, kua ha i ai au mo mutolu, kua pihia mai a Iehova Sapaota. Ko e maveheaga ne eke ai e au mo mutolu he ta mai e au a mutolu i Aikupito, katoa mo e haku a Agaaga kua tumau ai ia mutolu; aua neke matakutaku a mutolu. Ha ko e mena kua pehe mai a Iehova Sapaota, Ko e laga taha foki ni, kua toe tote ni, ti luelue ai e au e lagi, mo e lalolagi, mo e tahi, katoa mo e kelekele momo.” Mailoga kua nakai ni tomatoma e Iehova a tautolu ke fakamalolo ka kua foaki foki e ia ki a tautolu e tau puhala ke moua e malolo. Fefe? Mailoga e tau kupu mafanatia: “Kua ha i ai au mo mutolu.” Ko e fakamalolo ha ia he tua ke mailoga pete ni kua fehagai a tautolu mo e ha mena vihi, ko Iehova mo tautolu!—Roma 8:31.

20. Ko e heigoa e puhala he lilifu mua ue atu kua puke mogonei ke he fale a Iehova?

²⁰ Kua fakakite molioli e Iehova ko ia mo e hana tau tagata. Moli, tuga ni he talahau e ia mai he perofeta ko Hakai: “Kua mua e lilifu fakamui he fale nai ke he hana lilifu fakamua . . . to foaki atu ai foki e au e monuina ke he mena nai.” (Hakai 2:9) Moli, ko e lilifu ue atu he vaha nei ke ha ha i loto he faituga fakaagaga a Iehova. Kua totou teau afe ne tafe mai ke he tapuakiaga moli he tau tau takitaha. Kua fagai fakaagaga mitaki a lautolu nei, ti pihia foki he lalolagi favale nai, kua olioli e lautolu e mafola ka mua atu he mena ka moua he lalolagi fou he Atua.—Isaia 9:6, 7; Luka 12:42.

21. Ko e heigoa mogoia e fifiliaga ha tautolu?

²¹ Ko e luelue ha Iehova ke he tau motu i Amaketo kua tata lahi mahaki mai mua. (Fakakiteaga 16:14, 16) Kia lata ia tautolu ke fakaaoga e magaaho ne toe he lagomatai ke fakahao e tau momoui tokologa. Kia fakamalolo a tautolu mo e falanaki katoatoa ki a Iehova. Kia eke mo fifiliaga ha tautolu ke fakatumau e tapuakiaga ke he hana faituga fakaagaga lahi, he fakapuke atu foki aki e tokologa he “tau mena kua manako” ato pehe a Iehova kua fakakatoatoa tuai e gahua ha tautolu.

[Tau Matahui Tala]

Manatu Nakai e Koe?

• Ko e heigoa kua mua atu e uho ki a Iehova ke he tau koloa fakatino?

• Ko e liligi he toto a Iesu kua aoga ke he tau matakau ua fe he tau tagata?

• Ko hai e “tau mena kua manako” ne kua fakapuke aki e fale a Iehova ke he lilifu?

• Ko e heigoa e fakamoliaga kua moua e tautolu he perofetaaga a Hakai ne kua fakamoli he vaha nei?

[Tau Huhu he Fakaakoaga]

[Fakatino he lau 12]

(Ma e puhala katoa ne tohi aki, kikite e tohi)

Iloa nakai e koe e aoga lahi mahaki he fakatai he faituga i tuai ha Iehova?

Tapu Ue Atu

Ie Puipui

Tapu

Fakamaluaga

Fatapoa

Lotopa

[Fakatino he lau 13]

Ne foaki he ekepoa ne mua e povi ma e tau agahala he tau ekepoa mo e koti ma e tau agahala ha lautolu ne nakai ko e tau ekepoa a Isaraela

[Fakatino he lau 14]

Ko e gahua fakamatala he Kautu he lalolagi katoa kua futiaki e tau tagata tokologa ke he fale a Iehova