To Nakai Mule a Iehova
To Nakai Mule a Iehova
“Pete he fakamule mai [e fakakiteaga], ka kia tatali atu ki ai; ha ko e mena to hoko mai ni, nakai mule mai.”—HAPAKUKA 2:3.
1. Ko e heigoa e fakamaloloaga ne fakakite he tau tagata ha Iehova, mo e ko e heigoa ne omoi a lautolu ke taute?
“TO TU ai au ke he haku mena ke toko ni.” Ko e fakamoliaga a ia he perofeta he Atua ko Hapakuka. (Hapakuka 2:1) Ko e tau tagata ha Iehova he senetenari ke 20 aki kua fakakite e fifiliaga malolo pihia. Ha ko e mena ia, ne talia fakamakai e lautolu e tuogo nei he fonoaga uho lahi ia Sepetema 1922: “Ko e aho ni he tau aho oti ainei. Kitiala, kua pule e Patuiki! Ko mutolu hana tau hukui kua kitia. Hanai, kia fakailoa, fakailoa, fakailoa, e Patuiki mo e hana kautu.”
2. He magaaho ne liu fakatu ke he gahua malolo he mole e Felakutaki I he Lalolagi, ko e heigoa kua lata he tau Kerisiano fakauku ke fakapuloa?
2 He mole e Felakutaki I he Lalolagi, ne liu fakatu e Iehova e tau tagata fakauku tua fakamoli ne toe ke he tuaga gahua malolo. Ke tuga a Hapakuka, ne igatia a lautolu ke talahau: “To tu foki au ke he kolo, to kitekite foki au ke kitia po ke heigoa e mena ke vagahau mai ai e ia kia au.” Ko e tau kupu Heperu ma e “kitekite” mo e “toko” kua liu fatiaki mai he tau perofetaaga loga.
“Nakai Mule Mai”
3. Ko e ha kua lata ia tautolu ke mataala?
3 He fakatuogo he Tau Fakamoli a Iehova e hatakiaga he Atua he vaha nei, kua lata a lautolu ke mataala tumau he omaoma ke he tau kupu fakahiku he perofetaaga ne mua a Iesu: “Kia mataala a mutolu; ha kua nakai iloa e mutolu po ke hau a fe e Iki he fale, po ke magaaho afiafi, po ke magaaho tulotopo, po ke magaaho ke ko ai e tau moa, po ke magaaho pogipogi. Neke hau fakalutukia a ia, ti moua a mutolu ha ne momohe. Ko e mena kua tala atu e au kia mutolu, kua tala atu ai e au ke he tau tagata oti, Kia mataala a.” (Mareko 13:35-37) Ke tuga a Hapakuka, mo e ke fakatauo mo e tau kupu ha Iesu, kua lata ia tautolu ke mataala tumau!
4. Kua tatai fefe e tuaga ha tautolu ke he ha Hapakuka he kavi 628 F.V.N.?
4 Liga fakaoti e Hapakuka e tohiaga he hana tohi he kavi 628 F.V.N., fakamua to eke a Papelonia mo pule malolo he lalolagi. Kua fita tuai ke he tau tau loga e taogo atu he fakafiliaga a Iehova ki a Ierusalema ne tiaki taofiaga. Pete ia, kua nakai fai fakamahinoaga ko e magaaho fe ka fakahoko ai e fakafiliaga ia. Ko hai ka talitonu ko e kavi ke 21 ni e tau tau ne toe ati eke a Papelonia mo fakahoko tau ha Iehova? Tatai foki mo e vaha nei, kua nakai iloa e tautolu e ‘aho mo e magaaho’ ne fakatoka ma e fakaotiaga he fakatokaaga nei, ka kua hataki tuai mai a Iesu ki a tautolu: “Kia nonofo tauteute ai a mutolu; ha ko e magaaho nakai manatu ai e mutolu, ke hau ai e Tama he Tagata.”—Mataio 24:36, 44.
5. Ko e heigoa ne mahomo atu e fakamafanatia hagaao ke he tau kupu he Atua ne fakamau he Hapakuka 2:2, 3?
5 Ko e kakano mitaki ne foaki ai e Iehova ki a Hapakuka e matagahua loto fakalagalaga nei: “Kia tohi a e fakakiteaga, kia hihika ai fakamitaki ke he tau lapa maka, kia poi a ia kua totou ai. Ha kua tuku mai e fakakiteaga mo e hana tau aho ne kotofa, kua alumaki foki a ia ke hoko ke he fakahikuaga, to nakai pikopiko a ia; pete he fakamule mai a ia, ka kia tatali atu ki ai; ha ko e mena to hoko mai ni, nakai mule mai.” (Hapakuka 2:2, 3) He vaha nei, kua holofa e mahani kelea mo e holifono he lalolagi katoa, fakakite kua ha ha a tautolu he tapitapi tonu he “aho a Iehova kua lahi mo e matakutakuina.” (Ioelu 2:31) Kua mafanatia moli ha e tau kupu fakamalolo a Iehova: “Nakai mule mai”!
6. To hao fefe a tautolu he aho ka fakahoko e fakafiliaga ne hane hau?
6 Ka e liga hao mai fefe mogoia a tautolu he aho he fakafiliaga hane hau? Ne tali mai a Iehova he taute e kehekeheaga he vahaloto ha lautolu ne tututonu mo e nakai tututonu: “Kitiala, ko ia kua mahani fakatokoluga nakai tonu hana loto i loto ia ia; ka to moui e tagata tututonu ke he hana tua.” (Hapakuka 2:4) Ko e tau pule mo e tau tagata fakaikaluga mo e lotokai kua fakailaila e tau lau tohi he fakamauaga tala he vaha fou nei aki e toto he totou miliona he tau tagata noa, ne kua kitia maali ke he tau felakutaki ne ua he lalolagi mo e he kelipopoaga fakamatakau. Ke he taha fahi, ko e tau fekafekau fakauku loto mafola he Atua kua fakauka he tua fakamoli. Ko lautolu ko e ‘motu mahani tututonu mo e omaoma ke he mena moli.’ Ko e motu nei, fakalataha mo e tau hoa hana, ko e tau “mamoe kehe,” kua muitua ke he tomatomaaga: “Kia tua ā mutolu kia Iehova tukulagi; ha ko Ioha ko Iehova, ko e maka tumau tukulagi haia.”—Isaia 26:2-4; Ioane 10:16.
7. He oma e fakaaogaaga ha Paulo he Hapakuka 2:4, ko e heigoa kua lata ia tautolu ke taute?
7 He tohia ke he tau Kerisiano Heperu, ne liu fatiaki mai he aposetolo ko Paulo e Hapakuka 2:4 he magaaho ne tala age ke he tau tagata ha Iehova: “Nukua aoga kia mutolu e fakauka, kia moua ai e mutolu e tau mena kua talahaua mai, ka oti he eke e mutolu e finagalo he Atua. Ha ko e toe tote ni to hoko mai a ia ha ne haele mai mo e nakai mule mai. Ka e moui e tagata tututonu ke he tua; kaeke foki ke tukumuli, nakai fiafia haku a loto kia ia.” (Heperu 10:36-38) Kua nakai fai magaaho e vaha ha tautolu ke fakatalofelofe e tau lima po ke moua he puhala velevelemena mo e manako fiafia he lalolagi a Satani. Ko e heigoa ha tautolu ka taute ato fakaoti e magaaho “toe tote ni” ia? Ke tuga a Paulo, ko tautolu he mouga tapu a Iehova kua lata ke ‘oho atu ke he tau mena ha i mua he poi atu ke moua e palepale’ he moui tukulagi. (Filipi 3:13, 14) Mo e tuga a Iesu, kua lata ia tautolu ke ‘fakauka ha ko e fiafia kua toka i mua ha tautolu.’—Heperu 12:2.
8. Ko hai e “tagata” he Hapakuka 2:5, mo e ko e ha ka feleveia a ia mo e nakai kautu?
8 Ne fakamaama he Hapakuka 2:5 “e tagata” kua, nakai tatai mo e tau fekafekau ha Iehova, kaumahala ke hokotia ke he hana palepale, pete ni he “fakalahi e ia hana manako tuga a seoli.” Ko hai e tagata nei ne “nakai ni makona”? Mo e lotokai tuga ia ha Papelonia he vaha a Hapakuka, ko e “tagata” vala kehekehe he vaha nei, kua feaki hake he tau pule politika—pete ko e Fasisi (Fascist), Nasi, Komunisi, po ke falu ne fakahigoa ko e fakatemokarasi—kua taute e tau felakutaki ke fakalaulahi aki hana tau motu. Ne fakapuke foki e ia a Seoli, ko e tukuaga, aki e tau solu mitaki. Ka ko e “tagata” vala kehekehe nei he lalolagi a Satani, kua konahia ke he hana ni a mauokafua fakatagata, kua nakai kautu he “fakapotopoto ai e tau motu kehe oti kia ia, ne tatanaki ai foki e tau motu oti kia ia.” Ko Iehova ko e Atua ni hokoia kua maeke ke fakalataha e tau tagata oti, mo e to fakakatoatoa e ia e mena nei he puhala he Kautu faka-Mesia.—Mataio 6:9, 10.
Ko e Oi Fakamua he Tau Matematekelea Lalahi ne Lima
9, 10. (a) Ko e heigoa ne manako a Iehova ke fakapuloa he puhala ia Hapakuka? (e) Hagaao ke he mouaaga nakai tututonu, ko e heigoa e tuaga he vaha nei?
9 He puhala he hana perofeta ko Hapakuka, ne fakaholo atu a Iehova ke fakapuloa e tau oi ne lima, ko e tau fakafiliaga ne kua lata ke fakamoli ke eke e lalolagi ke nonofo ai e tau tagata tapuaki tua fakamoli he Atua. Ko e tau tagata loto tututonu pihia kua ‘taute ai e fakatai’ ne foaki e Iehova. Ne totou e tautolu he Hapakuka 2:6: “Oi te fakaalofa kia ia kua fakapotopoto ai e tau mena nakai ko e tau mena hana! Ato a fe kia? Oi te fakaalofa foki kia ia kua tatanaki kia ia e tau koloa kehe!”
10 Hanei kua peehi lahi ni ke he mouaaga nakai tututonu. I loto he lalolagi ne takai ia tautolu, ko e tau mautu kua mautu lalahi, mo e tau mativa kua mativa lalahi. Ko e tau tagata fakafua tulaki mo e tau tagata fakavaia kua moua e tau monuina lalahi, ka ko e tokologa he tau lalo tagata kua hoge. Ko e veveheaga ke fa aki he puke tagata he lalolagi kua talahau ke mativa kelea. Ko e tau nonofoaga kua ofoofogia lahi ke he falu motu. Ko lautolu ne manako lahi ma e tututonu he lalolagi kua talahau: “Ato a fe kia” e holofa he tau mena kelea nei! Ka kua tata lahi mai e fakaotiaga! Moli, ko e fakakiteaga to “nakai mule mai.”
11. Ko e heigoa ne talahau e Hapakuka hagaao ke he fakamaligi he toto tagata, mo e ko e ha kua maeke ia tautolu ke talahau kua lahi e fakamaligi toto he lalolagi he vaha nei?
11 Ne tala age he perofeta ke he tau tagata mahani kelea: “Kua eke e koe e tau motu loga mo tau mena ne fofo he tau, ko e mena ia to eke ai a koe mo mena kua moua he tau ke he tau motu oti ne toe; ha ko e toto he tau tagata, mo e favale ke he motu, mo e maga mo lautolu oti kua nonofo ai.” (Hapakuka 2:8) Ko e fakamaligi toto ha ia ne kitia e tautolu he lalolagi he vaha nei! Ne talahau fakalapalapa e Iesu: “Ko lautolu oti kana ke toto e pelu, to mamate a lautolu he pelu.” (Mataio 26:52) Ka e he senetenari ke 20 aki hokoia, ko e tau motu fakamaligi toto mo e tau matakau ikiiki kua lago ki ai e kelipopo he molea e teau he tau miliona tagata. Oi te ki a lautolu ne fai vala ke he tau kelipopoaga nei!
Ko e Oi ke Ua Aki
12. Ko e heigoa e oi ke ua aki ne fakamau e Hapakuka, mo e iloa moli fefe e tautolu ko e tau muhukoloa nakai tututonu to nakai aoga?
12 Ko e oi ke ua aki, ne fakamau he Hapakuka 2:9-11, kua hoko “kia ia kua moua ai ke he mahani kelea e koloa ma e hana magafaoa kia tuku ai e ia hana fata ke he mena tokoluga, kia laveaki mai a ia he malaia.” Ko e mouaaga nakai fakamoli to nakai aoga, tuga ne fakamaali mai he salamo: “Aua neke matakutaku a koe ka maukoloa ai e taha tagata, ka fakalahi foki e lilifu he hana faoa. Ha kua nakai uta e ia ha mena ka mate a ia; nakai mui hifo kia ia e lilifu hana.” (Salamo 49:16, 17) Kua mailoga lahi tuai e hatakiaga pulotu ha Paulo: “Kia tala age ke he tau maukoloa he mouiaga nai, aua neke fakatokoluga a lautolu, aua foki neke tua ke he koloa nakai tumau, ka ko e Atua moui kua foaki fakalahi mai e tau mena oti ke fiafia ai.”—1 Timoteo 6:17.
13. Ko e ha kua lata ia tautolu ke fakatumau ke fakatuogo e hatakiaga he Atua?
13 Kua aoga lahi ha ia ke fakatuogo e tau matafekau he fakafiliaga he Atua he vaha nei! He magaaho ne totoko e tau Farasaio ke he moto tagata he fakaheke a Iesu ko e “Patuiki, kua haele mai ke he higoa he Iki [Iehova],” ne pehe a ia: “Ke tala atu e au kia mutolu, ka fakamamate a lautolu nai, ti ui mai ni e tau maka.” (Luka 19:38-40) Tuga anei, kaeke kaumahala e tau tagata he Atua he fakatapakupaku e mahani kelea ne ha ha e lalolagi nei, “ko e mena to tagi mai e maka mai he kaufale.” (Hapakuka 2:11) Ti lata ai ia tautolu ke fakamalolo ke fakatumau ke fakatuogo e hatakiaga he Atua!
Ko e Oi ke Tolu Aki mo e Matakupu he Fakamaligi Toto
14. Ko e fakamaligi toto fe ne fakalago ke he tau lotu he lalolagi?
14 Ko e oi ke tolu aki ne fakapuloa he puhala ia Hapakuka kua ha ha ai e matakupu he fakamaligi toto. Ne talahau he Hapakuka 2:12: “Oi te fakaalofa kia ia kua ati e maga ke he toto, mo e fakatu ai ke he mahani hepehepe!” He fakatokaaga nei, ko e nakai tututonu mo e fakamaligi toto kua fa fehoaaki. Kitia ai, kua fakalago ke he tau lotu he lalolagi e tau kelipopo ne mua atu he fakamauaga tuai. Kia totoku ni e tautolu e tau Kautau Fakalotu, ne fakalatau e tau Kerisiano pikopiko mo e tau Musilimi; e Hopo Fakafili Katolika i Sepania mo Amerika Latini; ko e Tolugofulu Tau he Felakutaki i Europa he vahaloto he tau Porotesano mo e tau Katolika; mo e fakamaligi toto lahi ia lautolu oti, ko e tau felakutaki ne ua he lalolagi he senetenari ha tautolu, kua kamata mua a laua he fahi ha Kerisitenitome.
15. (a) Ko e heigoa ne fakatumau e tau motu ke taute ha ko e lagomatai mo e taliaaga he tau lotu? (e) Maeke nakai he Tau Motu Kaufakalataha ke ta mai e fakaotiaga ke he taute kanavaakau tau he lalolagi nei?
15 Taha he tau vala ne mua e kelea he felakutaki ke ua aki ko e Fakalutukiaaga Nasi, ne pule kelea ke he tau miliona Iutaia mo e falu tagata noa i Europa. Nakai la leva ne talahau fakamoli mai he matakau tokoluga he Katolika Roma i Falani, kua kaumahala a lautolu ke totoko he mogo ne fakafano e tau teau miliona tagata ke he kemu keli tagata Nasi. Pete ia, kua fakatumau ni e tau motu ke fakamaligi toto, fakalataha mo e lagomatai po ke taliaaga he lotu. Hagaao ke he Lotu Ofotoko Rusia, ne talahau fou he mekasini Time (fufuta ma e lalolagi katoa): “Ko e lotu fakafou kua fehagai foki ke he tau fakaohoohoaga kua lata he matakavi, ne fakamua ke nakai tuaha ki ai: ko e tau matini felakutaki ha Rusia. . . . Ko e fakamonuina he tau vakalele tau mo e tau fale kautau kua teitei mo mena taute mau. Ia Novema, he Danilovsky Monastery i Moscow, ko e fahi pule he Kaina he Tupuna Lotu a Rusia, ne to muatua e lotu ke fakauku e tau kanavaakau niukilia a Rusia.” To maeke nakai he Tau Motu Kaufakalataha ke taofi e lalolagi nei he liu taute e tau kanavaakau felakutaki fakatemoni? Nakai fakaai! Hagaao ke he nusipepa The Guardian ha London, Igilani, ne talahau he tagata ne moua e Nobel Peace Prize: “Ko e mena fakatupetupe moli, ko e tokolima ne gahua mau he UN Security Council ko lautolu tokolima ia ne mua atu e fakafua he tau kanavaakau tau he lalolagi.”
16. Ko e heigoa ka taute e Iehova ke he tau motu fia tau?
16 To fakahoko nakai e Iehova e fakafiliaga ke he tau motu fakalagalaga tau? Ne tohi he Hapakuka 2:13: “Kitiala, nakai kia mai ia Iehova Sapaota ne gahua ai he tau tagata ma e afi, mo e oti manava ai e tau motu ke he tau mena nakai aog[a]?” “Iehova Sapaota”! E, ha ha ia Iehova e tau kau agelu he lagi, ka fakaaoga e ia ke ta mai aki e tau tagata mo e tau motu fakalagalaga tau ke he mena nakai aoga!
17. To hoko ki fe e puke he iloilo a Iehova ke he lalolagi he mole e fakahokoaga he hana fakafiliaga ke he tau matakau vale he tau motu?
17 Ko e heigoa ka mui mai he oti e fakahoko e Iehova e fakafiliaga ke he tau matakau favale ia he tau motu? Ne foaki he Hapakuka 2:14 e tali: “Ko e mena to puke e lalolagi ke he maama he lilifu a Iehova, tuga ne toka kua ūfia ke he puke tahi.” Ko e amaamanakiaga mitaki lahi ha ia! Ia Amaketo, to fakatokoluga tukulagi e pule katoatoa a Iehova. (Fakakiteaga 16:16) Ne fakamoli mai a ia ki a tautolu ‘to fakalilifu e mena ke tu ai hana a tau hui,’ ko e lalolagi nei ne nonofo ai a tautolu. (Isaia 60:13) Ko e tau tagata oti to fakaako ke he puhala moui he Atua, ti ko e iloilo ke he tau finagalo lilifu ha Iehova to pukenamo he lalolagi tuga ne puke he moana ke he tau loloto he tahi.
Ko e Tau Oi ke Fa Aki mo e ke Lima Aki
18. Ko e heigoa e oi ke fa aki ne fakapuloa he puhala ia Hapakuka, mo e kua fakakite fefe he mahani he lalolagi he vaha nei?
18 Ko e oi ke fa aki kua fakamaama he Hapakuka 2:15 ke he tau kupu nei: “Oi te fakaalofa kia ia kua fakainu e tagata ne katofia mo ia, ko koe kua liligi atu hau a tau mena kona kia ia, kua fakakona foki a ia kia kitekite atu a koe ke he ha lautolu a nakai fai felevehi.” Kua fakakite he mena nei e tuaga nakai mataofi mo e holifono he lalolagi he vaha nei. Ko e hana mahani feuaki, ne lago foki he tau fakatokatokaaga fakalotu, kua au atu ki mua e kelea muitui. Ko e tau malaia, tuga e AIDS mo e falu gagao pikitia he mahani fakatane mo e fifine, kua holofa ke he lalolagi katoa. He nakai fakakite e “lilifu a Iehova,” ko e atuhau fulukovi he vaha nei kua to hifo taha ke he mahani fakalialia mo e hane o atu ke fakahala he fakafiliaga he Atua. ‘Kua puke ke he ma nakai ko e lilifu,’ ko e lalolagi matahavala nei kua teitei tuai ke inu mai he polu he ita a Iehova, ne fakakite hana finagalo ki ai. ‘To ha i ai foki e kokō ke ma ai ki luga he hana lilifu.’—Hapakuka 2:16.
19. Ko e onoonoaga ke he oi ke lima aki ne fakapuloa e Hapakuka kua hagaao ke he heigoa, mo e ko e ha ne mailoga lahi e tau kupu ia he lalolagi he vaha nei?
19 Ko e onoonoaga ke he oi ke lima aki kua hataki fakamalolo atu ke he tapuakiaga he tau tupua ta. Ne poaki e Iehova e perofeta ke fakapuloa e tau kupu malolo nei: “Oi te fakaalofa kia ia kua pehe age ke he akau, Kia ala mai a; mo e maka nakai vagahau, Kia matike mai a! To fakaako mai kia he mena na? Kitiala a ia, kua fakakili aki ke he auro mo e ario, ka e nakai ha i ai ha fafagu i loto ia ia.” (Hapakuka 2:19) Ke hifo mai ke he vaha nei, ko e tau Kerisitenitome mo e tau tagata pouliuli kua fakafeilo ke he ha lautolu a tau satauro, tau Maddonna, mo e tau tupua ta, mo e falu mena fakatai he tagata mo e manu. Nakai fakai a lautolu nei ke ala hake ke fakamoui e tau tagata ne tapuaki ki a lautolu he magaaho ka hau a Iehova ke fakahoko hana fakafiliaga. Ko e fakakili he tau auro mo e tau ario ha lautolu kua nakai fai aoga ka fakatatai atu ke he homo ue atu he Atua moui tukulagi, ko Iehova, mo e tau lilifu he hana tau tufugatia. Kia fakatokoluga tukulagi e tautolu hana higoa tokotaha maka!
20. Ko e heigoa e fakaholoaga he faituga ne monuina a tautolu ke fekafekau mo e olioli ki ai?
20 E, ko e ha tautolu a Atua, ko Iehova, kua latatonu ke fakaheke. Mo e logonaaga hokulo he fakalilifu ki a ia, ki a omaoma a tautolu ke he hataki malolo ia ke he tapuaki tupua. Ka kia fanogonogo la! Kua vagahau agaia a Iehova: “Ko Iehova ha ha he faituga tapu hana a ia; kia fakanonono a e lalolagi oti ki mua hana.” (Hapakuka 2:20) Nakai fakauaua kua ha ha he loto he perofeta e faituga a Ierusalema. Ka e, he vaha nei kua monuina a tautolu ke tapuaki ha ko e fakaholoaga he faituga ne mua ue atu e mitaki, ne ha ha ai e Iki ha tautolu ko Iesu Keriso ko e Ekepoa ne Mua. Hanei, he lotopa he lalolagi he faituga ia, kua feleveia ai a tautolu, fekafekau, mo e liogi, he foaki ki a Iehova e fakahekeaga ne kua lata mo e higoa lilifu hana. Mo e kua olioli ha ia ha tautolu he tapuaki mo e loto katoa ke he ha tautolu a Matua totonu he lagi!
Manatu Nakai e Koe?
• Fefe a koe ke he tau kupu a Iehova: “Nakai mule mai”?
• Ko e heigoa e tau oi kua mailoga lahi he vaha fou nei ne fakapuloa he puhala ia Hapakuka?
• Ko e ha kua lata ia tautolu ke fakatumau ke fakatuogo e hatakiaga a Iehova?
• I loto he lotopa he faituga fe ne kua monuina a tautolu ke fekafekau i ai?
[Tau Huhu he Fakaakoaga]
[Tau Fakatino he lau 23]
Ke tuga a Hapakuka, ne iloa he tau fekafekau he Atua he vaha nei to nakai mule a Iehova
[Tau Fakatino he lau 26]
Loto fakaaue nakai a koe ke he monuina he tapuaki a Iehova he lotopa he hana faituga fakaagaga?
[Fakatino Credit Line he lau 24]
U.S. Army photo