Iehova—ko Ia ne Malolo Lahi

“Ko e hana malolo lahi mo e hana mana lahi; nakai ni galo taha ia lautolu.”—ISAIA 40:26.

1, 2. (a) Ko e heigoa e punaaga he malolo fakatino ne falanaki a tautolu ki ai? (e) Fakamaama ko e ha a Iehova ko e Punaaga ne mua he tau malolo oti.

MALOLO ko e taha mena a ia ne uta fakateaga he tokologa ia tautolu. Ke fakatai ki ai, kua temotemoai e manamamatu ha tautolu ke he malolo hila ne foaki ki a tautolu e maama mo e mafana po ke, ke he fakamouiaga he ha lakau hila ha tautolu. Ko e mataofi fakalutukia ni he hila ka fakamataala aki a tautolu ka nakai fai malolo hila, to nakai gahuahua e tau taone he tau tagata. Ko e laulahi he malolo hila ne falanaki a tautolu ki ai kua mai he punaaga ne mua he lalolagi—ko e la. * He tau sekone oti ne fakaaoga he sola nei lima e miliona tane he malolo niukilia, fakafano mai ai ke he lalolagi e malolo foaki moui.

² Ka e mai i fe e tau malolo sola nei? Ko hai ne talaga e tau tanakiaga hila nei he lagi? Kua talaga ni e Iehova ko e Atua. Hagaao ki a ia, ne talahau he Salamo 74:16: “Ko koe ni ne taute e maama mo e la.” E, ko Iehova ko e Punaaga ne mua he tau malolo oti, tuga ni ko ia e Punaaga he moui. (Salamo 36:9) Kua nakai lata ia tautolu ke uta fakateaga e malolo hana. He puhala he perofeta ko Isaia, ne fakamanatu mai e Iehova ki a tautolu ke hahaga hake ke he tau tufugatia he lagi, tuga e la mo e tau fetu, mo e manamanatu fakahokulo ke he puhala ne talaga ai a lautolu. “Hahaga hake a ki luga mo e kitekite ā mutolu, po ko hai ne eke e tau mena nai? Kua takitaki mai ha lautolu a tau kau kua totou, ti ui e ia a lautolu oti ke he tau higoa ha lautolu, ko e hana malolo lahi mo e hana mana lahi; nakai ni galo taha ia lautolu.”—Isaia 40:26; Ieremia 32:17.

3. Moua fefe e tautolu e aoga mai he tau fakakiteaga he malolo a Iehova?

³ Ha kua malolo lahi a Iehova, kua lata ia tautolu ke loto totoka to fakatumau e la  ke foaki ki a tautolu e maama mo e mafana ne falanaki e tau momoui ha tautolu ki ai. Pete ni ia, kua falanaki a tautolu ke he malolo he Atua ke mua atu ke he tau manako fakatino. Ko e ha tautolu a fakamagalo mai he hala mo e mate, ko e amaamanakiaga ha tautolu ma e vaha anoiha, mo e falanaki ha tautolu ki a Iehova kua matutaki lahi atu ke he fakagahuaaga he hana malolo. (Salamo 28:6-9; Isaia 50:2) Kua puke e Tohi Tapu he tau fakafifitakiaga ne fakamoli e malolo a Iehova ke tufugatia mo e fakamagalo, ke fakamoui hana tau tagata mo e fakamahaikava hana tau fi.

Kua Kitia e Malolo he Atua ke he Tau Tufugatiaaga

4. (a) Lauia fefe a Tavita he haga hake ke he lagi he po? (e) Ko e heigoa ne fakakite he tau tufugatia he lagi hagaao ke he malolo faka-Atua?

⁴ Ne fakamaama he aposetolo ko Paulo ko e ‘mana he ha tautolu a Tufuga kua kitia ia he manamanatu e tau mena ne eke.’ (Roma 1:20) He tau senetenari fakamua atu, ko e salamo ko Tavita, ko e leveki mamoe, ne liga haga hake tumau ke he lagi he po, kitia e homo ue atu he pulagi likoliko mo e malolo he hana Tufuga. Ne tohia e ia: “Ka kikite atu au ke he lagi hāu, ko e gahua he hāu a tau mata lima, ko e mahina katoa mo e tau fetu ne eke e koe. Ko e heigoa kia e tagata kia manatu mai ai a koe kia ia, mo e tama he tagata kia ahi mai ai e koe a ia?” (Salamo 8:3, 4) Pete kua nakai lahi e iloilo hana ke he tau tufugatia he lagi, ne mailoga e Tavita e tikuhila hana ka fakatatai mo e Tufuga he lalolagi mo e lagi katoatoa ha tautolu. He vaha nei, kua lahi atu e mena ne iloa he tau tagata kumikumi ke he aolagi hagaao ke he lahi ue atu he lalolagi mo e lagi katoatoa mo e malolo ne fakamoui ai. Ke fakatai ki ai, ne talamai a lautolu ki a tautolu ko e he tau sekone oti ne fakatoka mai he la ha tautolu e malolo, kua tatai ke he pa he 100,000 miliona he tau mekatane he TNT. * Ko e tama vala tote he malolo ia kua hoko mai ke he lalolagi; ka kua lata ni ke fakamoui aki e tau momoui oti he palaneta ha tautolu. Ka kua nakai ni ko e la ha tautolu e fetu ne mua atu e malolo he lagi. Falu fetu kua  fakakikila e malolo ke taha maka e sekone ka kua fakakikila he la ke he aho katoa. Manamanatu la, mogoia, ke he malolo ne tokai ia Ia ne tufuga e tau tufugatiaaga he lagi! Ati hako ai e talahauaga a Elihu: “Ka ko Ia hana e malolo oti kana, nakai ni maeke kia tautolu ke iloa a ia; kua mua ue atu hana malolo.”—Iopu 37:23.

5. Ko e heigoa e fakamoliaga he malolo a Iehova ne moua e tautolu he hana tau gahua?

⁵ Kaeke ‘kumi e tautolu e gahua a Iehova’ tuga ne taute e Tavita, to kitia moli e tautolu hana malolo ke he tau mena oti—ke he matagi mo e tau peau, he tau pakulagi mo e tau uhila, he tau vaitafe lalahi mo e tau mouga mamahaki. (Salamo 111:2; Iopu 26:12-14) Mua atu foki, tuga ne fakamanatu e Iehova a Iopu, kua fakakite he tau manu e Hana malolo. He tau manu nei a Pehemota, po ke hipotomati. Ne tala age a Iehova ki a Iopu: “Ne toka ai hana malolo ke he hana tokupu . . . kua tuga ne tau koho lapatoa hana tau hui motua.” (Iopu 40:15-18) Ko e malolo matakutakuina he tau rema kua talahaua he vaha Tohi Tapu, mo e liogi a Tavita ke fakahao mai a ia ‘he gutu he leona, mo e he tau hoe he tau rema.’—Salamo 22:21; Iopu 39:9-11.

6. Ko e heigoa ne fakatino he rema he tau Tohiaga Tapu, mo e ko e ha? (Kikite matahui tala.)

⁶ Ha ko e hana malolo, kua fakaaoga i loto he  Tohi Tapu e rema ke fakatino e malolo a Iehova. * Ko e fakakiteaga he aposetolo ko Ioane ke he nofoaiki ha Iehova kua fakakite e tau mena momoui tokofa, taha ne mata tuga e punua povi. (Fakakiteaga 4:6, 7) Kitia maali ai, ko e taha mai he tau fua ne fa nei ne mua ha Iehova kua fakatino he tau kerupi nei ko e malolo. Ko e falu foki ko e fakaalofa, pulotu, mo e fakafili tonu. Ha ko e malolo ko e vala aoga lahi he mahani mau he Atua, ti ko e maama mitaki ke he hana malolo mo e puhala ne fakaaoga ai e ia ka futia fakatata a tautolu ki a ia mo e lagomatai a tautolu ke fifitaki hana puhala he fakaaoga fakamitaki e malolo ka moua e tautolu.—Efeso 5:1.

“Iehova Sapaota, ko e Malolo”

7. Iloa moli fefe e tautolu to kautu e mitaki ke he kelea?

⁷ He tau Tohiaga Tapu, kua ui a Iehova “ko e Atua Malolo Ue Atu,” ko e mataulu ne fakamanatu mai ki a tautolu kua nakai lata ia tautolu ke fakateaga hana malolo po ke mahalohalo ke he fahia hana ke fakakaumahala hana tau fi. (Kenese 17:1, fakatatai NW; Esoto 6:3) Kua tuga e puipui mitaki e fakatokaaga kelea a Satani, ka ke he fofoga a Iehova “kua tatai e tau motu mo e maaga vai tote kua hihina hifo he pakete; kua totou a lautolu tuga ne efuefu ke he fua hahamo.” (Isaia 40:15) Fakaaue ke he malolo faka-Atua pihia, ati nakai ke fakauaua to kautu e mitaki ke he kelea. He magaaho ka tupu holofa e mahani kelea, kia mafanatia a tautolu he iloa ko “Iehova Sapaota, ko e Malolo a Isaraela” to fakaotioti tukumalagi e mahani kelea.—Isaia 1:24; Salamo 37:9, 10.

8. Ko e heigoa e tau kau he lagi ne fekafekau ki a Iehova, mo e ko e heigoa ne kitia e tautolu ke he ha lautolu a malolo?

⁸ Ko e talahauaga “ko Iehova Sapaota,” ne kitia ke laga 285 i loto he Tohi Tapu, ko e taha fakamanatuaga a ia he malolo he Atua. Ko e ‘tau sapaota’ [kau] ne hagaao ki ai ko e tau mena momoui fakaagaga loga ne fekafekau ki a Iehova. (Salamo 103:20, 21; 148:2) He po taha ni, ne kelipopo he taha he tau agelu nei 185,000 he tau kautau Asuria ne fakamatakutaku a Ierusalema. (2 Tau Patuiki 19:35) Kaeke mailoga e tautolu e malolo he tau kau ha Iehova he lagi, to nakai mukamuka ke he tau tagata totoko ke fakamatakutaku a tautolu. Ko e perofeta ko Elisaio kua nakai kapaletu he magaaho ne takai he kau ne kumi a ia ha kua, nakai tuga e fekafekau hana, fioia e ia mo e tau mata he tua e tau kau mano he lagi ka lagomatai a ia.—2 Tau Patuiki 6:15-17.

9. Ko e ha, tuga a Iesu, kua lata ia tautolu ke mauokafua ke he puipuiaga faka-Atua?

⁹ Ne mailoga foki e Iesu e lagomatai he tau agelu he magaaho ne fehagai a ia mo e matakau ne toto e tau pelu mo e tau katoua he katene ko Ketesemane. He mole e tala age ki a Peteru ke liuaki hana pelu ke he hana tokaaga, ne pehe a Iesu ki a ia, ane mai kua lata, maeke ia Ia ke ole ke he hana Matua ma e “tau agelu ne mua he tokologa ke he lekeona ne hogofulu ma ua.” (Mataio 26:47, 52, 53) Kaeke ke loto fakaaue pihia a tautolu ma e tau kau i luga he lagi ne pule he Atua, to falanaki katoatoa foki a tautolu ke he talitua faka-Atua. Ne tohia he aposetolo ko Paulo: “Ko e hanai, to talahaua ha ha a tautolu ke he tau mena nai? Kaeke ke kau e Atua mo tautolu, ko hai kia taha ke paleko mai kia tautolu?”—Roma 8:31.

10. Ma hai ne fakagahuahua e Iehova hana malolo?

¹⁰ Kua ha ha ai ia tautolu e tau kakano oti ke falanaki ke he puipuiaga a Iehova. Ne fakaaoga tumau e ia hana malolo ma e mitaki mo e fakatatau atu ke he falu fua foki hana—ko e fakafili tonu, pulotu, mo e fakaalofa. (Iopu 37:23; Ieremia 10:12) He taholi hololoa he tau tagata pule malolo e tau tagata nofogati mo e fakatokolalo ha ko e lotokai, ne ‘fakatu hake e Iehova he kelekele e lalo tagata’ mo e ‘malolo ke fakamoui.’ (Salamo 113:5-7; Isaia 63:1) Tuga ne maama e Maria, ko e matua fifine mahani fakalatalata mo e nakai ohooho ha Iesu, ‘ko Ia ne malolo’ ne fakagahuahua fakamokoi hana malolo ma lautolu ne matakutaku ki a ia, mo e fakatokolalo a lautolu ne fakatokoluga mo e fakamatalahi a lautolu ne fakateaga.—Luka 1:46-53.

Fakakite e Iehova Hana Malolo ke he Tau Fekafekau Hana

11. Ko e heigoa e fakamoliaga ke he malolo he Atua ne kitia mata he tau Isaraela he tau 1513 F.V.N.?

¹¹ Kua lagaloga e magaaho ne fakakite e Iehova  hana malolo ke he tau fekafekau hana. Taha he tau magaaho ia kua ha ha he Mouga ko Sinai he 1513 F.V.N. He magahala he tau ia kua fita he kitia moli he tau Isaraela e malolo he Atua. Ne kua fakakite he tau malaia hogofulu e lima malolo a Iehova mo e lolelole he tau atua Aikupito. Nakai leva he mole atu, ko e o hui he Tahi Kula mo e fakaotiotiaga he tau kau a Farao kua foaki mai foki e fakamoliaga he malolo faka-Atua. Tolu a mahina he mole, i lalo he Mouga ko Sinai, ne uiina e Iehova e tau Isaraela ke ‘eke mo koloa uho hana, ke mua atu ke he tau motu oti.’ Ma lautolu, ne mavehe a lautolu: “Ko e tau mena oti ne tala mai e Iehova, to eke ni e mautolu.” (Esoto 19:5, 8) Ati foaki e Iehova e fakatataaga maaliali he hana malolo. Fakalataha mo e tau pakulagi mo e tau uhila mo e leo mahaki he pu, ne ahua mo e vivivivi e Mouga ko Sinai. Ko e tau tagata ne tutu mamao mai, kua matakutakuina. Ka e tala age a Mose ki a lautolu kua latatonu e mena tupu nei ke fakaako ki a lautolu e matakutaku faka-Atua, ko e matakutaku ka omoi a lautolu ke omaoma ke he Atua malolo mua ue atu mo e moli tokotaha ha lautolu, ko Iehova.—Esoto 19:16-19; 20:18-20.

12, 13. Ko e heigoa ne takitaki a Elia ke tiaki hana kotofaaga, ka e fakamalolo fefe e Iehova a ia?

¹² He fai senetenari ne mole atu, he magahala he vaha a Elia, ne tupu foki taha fakatataaga he malolo faka-Atua ke he Mouga ko Sinai. Kua fita he kitia he perofeta e lauiaaga he malolo he Atua. Ke he tolu mo e hafa e tau, ne ‘papa he Atua e lagi’ ha ko e tiaki taofiaga he motu a Isaraela. (2 Nofoaga he Tau Patuiki 7:13) He magahala he vaha la, ne fagai he tau oreva a Elia he tapa he vailele ko Kerita, mo e fakamui ko e tama pukupuku falaoa mo e puke lolo tote ne fakalahi fakamana ke kai foki a ia. Ne foaki foki e Iehova e malolo ki a Elia ke liu fakatu mai e tama tane he fifine takape nei. Fakahiku ai, ke he kamatamata he tuaga Atua he Mouga ko Karamelu, ne hifo mai e afi he lagi mo e tugi e poa ha Elia. (1 Tau Patuiki 17:4-24; 18:36-40) Ka e, nakai leva he mole, ne matakutaku mo e fakalolelole a Elia he magaaho ne ui a Iesepela ke kelipopo a ia. (1 Tau Patuiki 19:1-4) Ne hola ai a ia he motu, mo e manatu kua oti tuai hana matagahua ko e perofeta. Ke fakamafana mo e fakamalolo aki a ia, ne fakakite fakaalofa e Iehova ki a ia e fakatataaga he malolo faka-Atua.

¹³ He fakamumuli a Elia he ana, ne kitia e ia e fakakiteaga he agaga he Atua ne tolu he tau malolo ne pule e Iehova: ko e matagi malolo, mafuike, mo e fakahiku ko e afi. Ka e he mogo ne vagahau a Iehova ki a Elia, ne ‘leo tote mo e fakatekiteki’ a ia. Ne kotofa age e Ia ki a ia e falu gahua foki ke taute mo e tala age ki a ia kua ha ha agaia he motu e 7,000 he tau tagata tapuaki tua fakamoli ha Iehova. (1 Tau Patuiki 19:9-18) Kaeke, ke tuga a Elia, kua logona e tautolu e lolelole he nakai fai fua e fekafekauaga ha tautolu, lata ia tautolu ke ole ki a Iehova ma e ‘malolo lahi ue atu’—ko e malolo ka fakamalolo aki a tautolu ke fakatumau ke fakamatala e tala mitaki mo e nakai fakalolelole.—2 Korinito 4:7.

Fakamoli he Malolo a Iehova e Fakamoliaga he Hana Tau Maveheaga

14. Ko e heigoa ne fakakite he higoa a Iehova, mo e matutaki fefe e malolo hana ke he hana higoa?

¹⁴ Ko e malolo a Iehova kua matutaki lahi foki ke he hana higoa mo e fakahokoaga he hana finagalo. Ko e higoa kehe ue atu a Iehova, ne kakano “Ko Ia ne Taute ke Tupu Moli,” ne fakakite kua taute ne ia a ia mo Fakamoliaga he tau maveheaga. Nakai fai mena po ke ha tagata ka taofi e Atua he fakamoli hana tau maveheaga, pete ni kua mamaoligo e tau mena ia ke he tau tagata tuaha. Tuga ne tala age e Iesu ke he tau aposetolo hana, “maeke e tau mena oti ke he Atua.”—Mataio 19:26.

15. Ne fakamanatu fefe ki a Aperahamo mo Sara, kua nakai uka ha mena ki a Iehova?

¹⁵ Ke fakataitai, ne mavehe a Iehova ki a Aperahamo mo Sara to taute e ia e tau ohi ha laua mo motu lahi. Ka kua nakai fanau a laua ke he tau tau loga. Kua momotua lalahi a laua he magaaho ne tala age a Iehova ki a laua kua amanaki tuai e maveheaga ke fakamoli ati kata a Sara. Ne tali age e agelu: “Kua uka kia ha mena kia Iehova?” (Kenese 12:1-3; 17:4-8; 18:10-14) Fa e senetenari he mole, he magaaho ne fakapotopoto e Mose e tau ohi ha Aperahamo—ko e motu lahi he mogonei—he Kelekele Tatai a Moapi, ne fakamanatu e ia ki a lautolu kua fakamoli tuai he Atua hana maveheaga. Ne pehe a Mose: “Ne fakaalofa a ia [Iehova] ke he hau a tau matua, ko e mena ia ne fifili  ai e ia ha lautolu a fanau, ke mumui atu ai kia lautolu, ti ta mai ai e ia a koe ki mua hana ke he hana mana lahi i Aikupito. Kia vega ai ki mua hau e tau motu ne mua kia koe he malolo mo e tokologa kia fakahoko atu a koe ki ai, ke tuku atu foki ha lautolu a kelekele ke eke mo tufaaga mau, tuga ne eke ai ke he aho nai.”—Teutaronome 4:37, 38.

16. Ko e ha ne mokulu e tau Satukaio ke he heheaga he fakatikai e liu tu mai he tagata mate?

¹⁶ He tau senetenari he mole atu, ne fakafili e Iesu e tau Satukaio, he nakai talitonu ke he liu tu mai. Ko e ha ne nakai mahalo a lautolu ke talitonu ke he maveheaga he Atua to liuaki mai e ia e tagata mate? Ne tala age a Iesu ki a lautolu: “He nakai iloa e mutolu e tau Tohi, mo e malolo he Atua.” (Mataio 22:29) Ne fakamoli mai e tau Tohi ki a tautolu to ‘logona ai e lautolu katoa ha he tau tukuaga hana leo, mo e o mai ai.’ (Ioane 5:27-29) Kaeke ke iloa e tautolu e mena ne talahau he Tohi Tapu hagaao ke he liu tu mai, ko e mauokafua ha tautolu ke he malolo he Atua ka talitonu ai a tautolu to liu fakatu hake e tagata mate. “To fakaoti tukulagi [he Atua] e mate, . . . ha kua vagahau mai ai e Iehova.”—Isaia 25:8.

17. Ke he aho fe anoiha ka lata ai ke falanaki ki a Iehova he puhala uho?

¹⁷ He vaha anoiha ne tata mai, to ha ha ai e magaaho ka falanaki a tautolu oti kana ke he malolo fakamoui he Atua ke he puhala uho. To tau a Satani ko e Tiapolo ke he tau tagata he Atua, ne tuga kua nakai fai puipuiaga. (Esekielu 38:14-16) Mogoia ka fakakite he Atua hana malolo mua ue atu ma tautolu, ati iloa ai he tau tagata oti ko ia ko Iehova. (Esekielu 38:21-23) Mogonei ko e magaaho ke feaki hake ha tautolu a tua mo e mauokafua ke he Atua ko e Malolo Ue Atu ke nakai maluelue ai a tautolu he magaaho kelea lahi.

18. (a) Ko e heigoa e aoga ka moua e tautolu mai he manamanatu fakahokulo ke he malolo a Iehova? (e) Ko e heigoa e huhu ka mailoga he vala tala ka mui mai?

¹⁸ Nakai fakauaua, kua ha ha ai e tau kakano loga ke manamanatu fakahokulo ke he malolo a Iehova. He manamanatu a tautolu ke he hana tau gahua, kua omoi fakatokolalo a tautolu ke fakaheke e Tufuga Homo Ue Atu ha tautolu mo e fakaaue he fakaaoga e ia hana malolo ke he puhala pulotu mo e fakaalofa pihia. To nakai fakamatakutaku a tautolu kaeke falanaki a tautolu ki a Iehova Sapaota. Ko e tua ha tautolu ke he hana tau maveheaga to nakai maueue. Ka e manatu, kua tufugatia a tautolu he fakatai he Atua. Ti kua ha ha ia tautolu foki e malolo—pete ni kua fakakaupa ai. Lata fefe a tautolu ke fifitaki e Tufuga ha tautolu ke he puhala ne fakaaoga e tautolu ha tautolu a malolo? To mailoga e mena nei he vala tala ka mui mai.

[Tau Matahui Tala]

Maeke Nakai a Koe ke Tali e Tau Huhu Nei?

• Fakamoli fefe e tau tufugatia ke he malolo a Iehova?

• Ko e heigoa e tau kau ka fakaaoga e Iehova ke lagomatai hana tau tagata?

• Ko e heigoa falu magaaho ne fakatata e Iehova hana malolo?

• Ko e heigoa e fakamoliaga ne ha ha ia tautolu to fakamoli e Iehova hana tau maveheaga?

[Tau Huhu he Fakaakoaga]

[Tau Fakatino he lau 24]

“Hahaga hake a ki luga mo e kitekite a mutolu, po ko hai ne eke e tau mena nai?”

[Credit line]

Photo by Malin, © IAC/RGO 1991

[Tau Fakatino he lau 27]

Ke manamanatu fakahokulo ke he tau fakatataaga he malolo a Iehova ka feaki hake e tua ke he hana tau maveheaga