Tali Moli he Atua e Tau Liogi

Konelio ko e tagata ne kumi e fiafia he Atua ke he puhala he tau liogi tumau mai he loto. Ka kua fakaaoga fakamitaki e ia e tuaga hana ko e takitaki kau. Hagaao ke he Tohi Tapu, “ne age [e ia] e tau mena fakaalofa ne loga” ke he tau tagata nonofogati.—Gahua 10:1, 2.

HE MAGAAHO ia, kua feaki hake e fakapotopotoaga Kerisiano he tau Iutaia talitonu, tau tagata liliuina, mo e tau Samaria. Ko Konelio ko e Tagata Motu Kehe nakala peritome mo e nakai fai vala he fakapotopotoaga Kerisiano. Kua pehe kia e mena nei kua fakateaga hana tau liogi? Nakai. Ne mailoga e Iehova ko e Atua, a Konelio mo e hana tau liogi.—Gahua 10:4.

He puhala he takitakiaga fakaagelu, ne matutaki mai a Konelio ke he fakapotopotoaga Kerisiano. (Gahua 10:30-33) Ko e fua, ko ia mo e hana magafaoa kua monuina ke eke mo tau Tagata Motu Kehe nakai peritome fakamua ne talia ke he fakapotopotoaga Kerisiano. Ne kitia e Iehova ko e Atua e moui fakatagata a Konelio ke lata ke putoia foki ke he fakamauaga he Tohi Tapu. Nakai fakauaua, ne kua taute e ia e tau hikihikiaga loga ke ta mai e moui hana ke fakatatau katoatoa mo e tau fakatufono he Atua. (Isaia 2:2-4; Ioane 17:16) Ko e moui ha Konelio kua lata ke fakamafanatia ke he tau tagata he tau motu oti ne fa e kumi e fiafia he Atua he vaha nei. Kia kikite ke he falu fakafifitakiaga.

Tau Fakafifitakiaga he Vaha Fou Nei

Ko e fifine fuata i Initia kua manako lahi ma e fakamafanaaga. Kua mau he 21 e tau, mo e ua e tama hana. Ka e nakai la leva e fanau he tama ke ua aki, ne mate hana tane. Kua fakalutukia ai, he 24 e tau, kua takape a ia mo e tama fifine mukemuke 2 mahina, mo e tama tane 22 mahina. Ko e mena ia ati manako ai a ia ma e fakamafanaaga! To fuluhi atu a ia ki a hai? He taha po, kua lahi e fakaatukehe hana, ti liogi a ia, he talahau, “Ma Matua he lagi, fakamolemole la ti fakamafana mai he Kupu hau au.”

He pogipogi hake, ne fai tagata ne aahi mai a ia. Ko ia ko e taha he Tau Fakamoli a Iehova. He aho ia, kua uka e gahua ke he taha fale mo e taha fale hana ha kua tokogaogao ni ne hafagi e gutuhala ki a ia. Kua fakateafu mo e loto lolelole, ne amanaki a ia ke fano ki kaina, ka kua peehi a ia ke aahi taha e fale ne toe. Ne feleveia ai a ia mo e fifine takape fuata. Ne uiina he fifine a ia ki fale mo e talia e tohi ne fakamaama e Tohi Tapu. Kua moua he fifine e mafanatia he totou e tohi ia mo e mai he hana fakatutalaaga mo e Fakamoli. Ne ako e ia e maveheaga he Atua ke fakatu hake e tagata mate mo e ke he  Kautu he Atua, ka nakai leva ti taute e lalolagi ke he parataiso. Ka ko e mena ne mua, kua iloa tuai mo e fakaalofa a ia ke he Atua moli tokotaha, ko Iehova, ne tali hana liogi.

Ko Nora, ne nofo he taone ko George, i Aferika Toga, ne fakatoka e mahina ke fakalataha ke he gahua fakamatala mau. Ato kamata ai, ne liogi fakamakamaka a ia ki a Iehova ke lagomatai a ia ke moua taha tagata ne fiafia moli ke fakaako e Tohi Tapu. Ko e matakavi ne kotofa a ia ke gahua ai kua ha ha ai foki e kaina he tagata ne favale ki a Nora he tau aahi fakamua atu. Kua fakamalolo, ne liu aahi atu a Nora ke he kaina ia. Kua ofo a ia, he moua e ia e tagata fou ne hiki mai laia ke he fale, ne higoa ko Noleen. Ka kua fa liogi a Noleen mo e hana matua fifine ke he Atua ma e lagomatai ke maama e Tohi Tapu. “He magaaho ne foaki e au ki a laua e fakaakoaga Tohi Tapu,” he talahau e Nora, “ne fiafia lahi a laua.” Kua mafiti e holo ki mua ha Noleen mo e hana matua fifine. Fai magaaho, ne kamata tokoua foki a laua ke fakalataha mo Nora ke he gahua fakamalolo fakaagaga.

Taha fakafifitakiaga ne fakakite e malolo he liogi kua haia he hoa tokoua ne nonofo i Aferika Toga he taone ko Johannesburg. He po Faiumu he 1996, ko e fakamauaga ha Dennis mo Carol kua hokotia ke mavehevehe. Ko e laliaga fakamui, ne fifili a laua ke liogi ma e lagomatai, ne kua liu fatiaki e laua ato hoko atu ke he tuloto po. He pogipogi hake, he matahola 11 , ua mai he Tau Fakamoli a Iehova ne nokonoko e gutuhala ha laua. Ne tali e Dennis e gutuhala mo e tala age ki a laua ke fakatali ka e hea e hoana hana. Ne hataki age a Dennis ki a Carol ka uiina e ia e Tau Fakamoli ki loto, liga to uka ke fekau a laua ke o. Ne fakamanatu age e Carol ki a Dennis kua liogi a laua ma e lagomatai mo e liga, he talahau, ko e tali he Atua ainei ke he ha laua a tau liogi. Kua uiina ai e Tau Fakamoli ki loto, ati kamata agataha e fakaakoaga Tohi Tapu he tohi Iloilo Ne Takitaki Atu ke he Moui Tukulagi. Kua olioli a Dennis mo Carol ke he mena ne ako e laua. He pale la ia ni, ne o atu a laua ke he feleveiaaga fakamua ha laua he Fale he Kautu he Tau Fakamoli a Iehova. He fakagahuahua e iloilo ne ako mai he Tohi Tapu, ne moua e Dennis mo Carol e tau tali ke he tau lekua he fakamauaga ha laua. Kua fiafia a laua he mogonei, ko e tau tagata fakaheke kua fakauku ha Iehova mo e kua fakamatala tumau e tau taofiaga fakave ke he Tohi Tapu ha laua ke he ha laua a tau tuuta kaina.

Ka e Kua ka Maimaina a Koe ke Liogi?

Falu tagata kua maimaina ke liogi ha ko e puhala kelea ha lautolu he moui. Ne talahau e Iesu Keriso e tala hagaao ke he tagata tane ne pihia, ko e telona fakavihia. He hu atu ke he lotopa he faituga, kua maimaina e tagata nei ke hau ke he fale ne fa liogi ai. “Kua tu mamao atu, . . . [ne] pokipoki hana fatafata, kua pehe age, Ko e Atua na e, kia fakaalofa mai a koe kia au ko e tagata hala.” (Luka 18:13) He fakalata atu ki a Iesu, ne moua he tagata nei e logonaaga mitaki. Kua fakamoli he mena nei ko Iehova ko e Atua fakaalofa noa mo e kua fakamakai ke lagomatai e tau tagata hala ne tokihala moli.

Kikite ke he fuata tane i Aferika Toga ne higoa ko Paul. He vaha tote, ne finatu a Paul ke he tau feleveiaaga Kerisiano mo e hana matua fifine. Ka e he magahala he tau tau hana he aoga tokoluga, ne kamata a ia ke feoaki mo e tau fuata ne nakai muitua ke he tau puhala he Atua. He oti e aoga, ne gahua a ia he matakautau he fakatufono totoko fakamua i Aferika Toga. He  mogoia, ne amanaki e kapitiga fifine hana ti fakaoti ha laua matutakiaga. Ko e puhala moui nakai makona nei kua taute a Paul ke fakaatukehe. “He taha afiafi,” he manatu e ia, “ne liogi au ki a Iehova mo e ole lagomatai, pete ni kua nakai la liogi fakamoli au ke he Atua ke he tau tau loga.”

Nakai leva he mole e liogi nei, ne uiina he matua fifine ha Paul a ia ke he Fakamanatuaga he matulei he Keriso ne lagataha he tau. (Luka 22:19) Kua kehe lahi ai ki a Paul he taute he matua fifine hana e mena nei, ha kua liuliu lahi a ia mo e temotemoai e fiafia ke he Tohi Tapu. “Kitia e au e uiina nei ko e tali a Iehova ke he liogi haku ti logona hifo e au kua lata ni ia au ke talia.” Tali mai he magaaho ia, ne kamata a Paul ke fina atu ke he tau feleveia Kerisiano oti. He mole e fa mahina he fakaako Tohi Tapu, kua latatonu a ia ke papatiso. Mua atu, ne tiaki e ia e tau fakaakoaga enisinia hana mo e fifili e feua ke fakalataha ke he gahua fakamatala mau. He mogonei, ko e tagata fiafia a Paul, kua nakai tuai fakaatukehe ha ko e moui he vaha kua mole hana. Ke he 11 tau ne mole, hane fekafekau a ia he la ofisa he Watch Tower Society i Aferika Toga.

Moli lahi, kua tali fakamitaki e Iehova ko e Atua e tau liogi ti “ko ia foki kua taui mai a lautolu kua kumi fakamakutu kia ia.” (Heperu 11:6) Nakai leva to hoko mai e aho lahi a Iehova mo e ta mai e fakaotiaga ke he tau mahani kelea oti. Ka e he mogonei, haia a Iehova ne fa e tali e tau liogi he tau tagata hana ke fakamalolo mo e takitaki he fakamakutu a lautolu ke he gahua aoga he fakamatalaaga. Ti, ko e totou miliona he tau tagata takitokotaha mai he tau motu oti kua hane fakamatutaki atu ke he fakapotopotoaga Kerisiano mo e kua fakamonuina aki e iloilo he Tohi Tapu ne takitaki atu ke he moui tukulagi.—Ioane 17:3.

[Fakatino he lau 3]

Ko e liogi hake he loto ha Konelio kua takitaki atu ke he hana aahiaga mai he aposetolo ko Peteru

[Fakatino he lau 4]

Kua lagomatai he liogi e tokologa he tau magaaho fakaatukehe

[Tau Fakatino he lau 5]

Kua mitaki ke liogi lagomatai ke maama e Tohi Tapu

Lata he tau hoa mau ke liogi lagomatai ke fakamalolo e fakamauaga ha laua