‘Atua Na e, Kia Fakafano Mai Hau a Maama’

“Kia fakafano mai hau a maama mo e hau a tonu, to takitaki e laua au.”—SALAMO 43:3.

1. Fakakite fefe e Iehova hana tau finagalo?

KUA manamanatu lahi a Iehova ke he puhala ne fakailoa e ia hana finagalo ke he hana tau fekafekau. He nakai fakakite oti e kupu moli he mogo taha, kua fakamaama fakahaga mai e ia ki a tautolu. Ko e fenoga ha tautolu he puhala he moui kua liga ke fakatatai ke he tagata fano hui he hala loa. Kua kamata tuai a ia he magaaho pogipogi mo e mahegihegi ti ataata ai. He kamata e la ke hake mai fakatekiteki ke he mapualagi, kua maeke he tagata fano hui ke mailoga e falu mena ne viko takai ia ia. Kua kitia taumaleku e ia e tau kalakala. Ka e he fakatumau e la ke hake, maeke ia ia ke kitia mamao atu. Ti pihia foki e maama fakaagaga kua foaki he Atua. Kua fakaata e ia a tautolu ke maama fakahaga falu mena gahoa. Ko e Tama he Atua, ko Iesu Keriso, kua foaki e fakamaamaaga fakaagaga ke he puhala taha. Kia onoono la tautolu ke he puhala ne fakamaama e Iehova hana tau tagata he vaha i tuai mo e puhala kua taute e ia he vaha nei.

2. Foaki fefe e Iehova e fakamaamaaga ke he tau vaha nakai la Kerisiano ia?

² Ko lautolu ne tohi e Salamo 43 ne tuga e fanau tane a Koru. Ko e tau Levi, ne kotofa a lautolu ke fakaako e Fakatufono he Atua ke he tau tagata. (Malaki 2:7) Moli, ko Iehova ko e Faiaoga Homo ue Atu ha lautolu, ti ono a lautolu ki a ia ko e Punaaga he pulotu oti kana. (Isaia 30:20) “Ko e Atua na e, . . . kia fakafano mai hau a maama mo e hau a tonu,” he liogi he salamo. “To takitaki e laua au.” (Salamo 43:1, 3) He tumau e mahani fakamoli he tau Isaraela ki a Iehova, ne fakaako e ia a lautolu ke he hana tau puhala. He tau senetenari fakamui, ne foaki e Iehova ki a lautolu e maama mo e kupu moli he tau puhala mua ue atu. Ne taute pihia he Atua he fakafano mai e ia hana Tama ke he lalolagi.

3. Ko e heigoa e puhala ne kamatamata e tau Iutaia ha ko e fakaakoaga a Iesu?

³ Ko e tagata ko Iesu Keriso, ko e Tama he Atua ko e “maama he lalolagi.” (Ioane 8:12) Ne fakaako e ia e tau tagata ke he ‘tau mena loga mo e tau kupu fakatai’—ko e tau mena fou. (Mareko 4:2) Ne tala age a ia ki a Ponotio Pilato: “Nakai ko e kautu he lalolagi nai haku a kautu.” (Ioane 18:36) Ko e manatu fou a ia ma e tagata Roma mo e pihia foki ma e tau Iutaia papale fakamotu, ha kua manatu a lautolu to fakakaumahala he Mesia e Kautu Roma mo e fakafou a Isaraela ke he lilifu fakamua hana. Ne fakaata e Iesu e maama mai ia Iehova, ka kua nakai fakafiafia he tau kupu hana e tau takitaki Iutaia, ne kua “mua ha lautolu a manako ke he fakahekeaga mai he tau tagata, ka e tote e manako ke he fakahekeaga mai he Atua.” (Ioane 12:42, 43) Tokologa e tau tagata ne fifili ke tapiki mau ke he tau aga fakamotu fakatagata ha lautolu he nakai talia e maama mo e kupu moli mai he Atua.—Salamo 43:3; Mataio 13:15.

4. Iloa fefe e tautolu to matutaki e tau tutaki ha Iesu ke tupu ke he maama?

⁴ Pete ia, kua gahoa e tau tagata tane mo e fifine loto fakamoli ne kuku olioli e kupu moli ne fakaako e Iesu. Ne mauokafua fakahaga a lautolu ke he maamaaga ha lautolu he tau finagalo he Atua. He tata mai e fakahikuaga he moui fakalalolagi he Faiaoga ha lautolu, kua lahi agaia e mena ne kua lata ia lautolu ke ako. Ne tala age a Iesu ki a lautolu: “Loga gaia e tau mena ia au ke tala atu e au kia mutolu, ka kua nakai maeke ke talia e mutolu ke he vaha nai.” (Ioane 16:12) E, to matutaki e tau tutaki ke tupu e maamaaga ke he kupu moli he Atua.

Matutaki Gaia e Maama ke Kikila

5. Ko e heigoa e huhu ne laga mai he senetenari fakamua, ti ko e matagahua ha hai ke fakamafola ai?

⁵ He mole e mate mo e liu tu mai a Iesu, ne  kikila lahi mai e maama he Atua nakai pihia fakamua. He fakakiteaga ne age ki a Peteru, ne fakakite e Iehova to eke e tau Tagata Motu Kehe nakai peritome mo tau tutaki ha Keriso. (Gahua 10:9-17) Ko e fakakiteaga moli ha ia! Moha ia, ne laga mai e huhu he magaaho fakamui: Manako kia a Iehova ke he tau Tagata Motu Kehe ia ke peritome he mole atu e taute mo tau Kerisiano? Nakai la tali e huhu ia he fakakiteaga, ti kua eke ai mo matakupu he taufetoko vevela ke he tau Kerisiano. Nukua lata he fakamafola, neke fakalolelole ai e fakalatahaaga uho ha lautolu. Ti ko e mena ia, i Ierusalema, ne “fakapotopoto ai e tau aposetolo mo e tau patu ke pulega ke he mena na.”—Gahua 15:1, 2, 6.

6. Ko e heigoa e fakatokaaga ne muitua he tau aposetolo mo e tau patu he tutala ai a lautolu ke he huhu he peritome?

⁶ Maeke fefe ia lautolu ne ha ha he fonoaga ia ke mailoga e finagalo he Atua ma lautolu e tau Tagata Motu Kehe ne talitonu? Ne nakai fakafano mai e Iehova e agelu ke pule ke he tau fakatutalaaga, nakai talia foki e ia a lautolu ne ha ha ai e fakakiteaga. Ka e nakai tokanoa katoatoa e tau aposetolo mo e tau patu ke nakai fai takitakiaga. Ne moua e lautolu e fakamoliaga mai he falu Kerisiano Iutaia ne kitia e puhala ne kamata e Atua ke fehagai mo e tau tagata he tau motu, he liligi hana agaga tapu ke he tau Tagata Motu Kehe nakai peritome. Ne kumikumi foki e lautolu e tau Tohiaga Tapu ma e takitakiaga. Ti ko e fua, ne taute he tutaki ko Iakopo e talahauaga mitaki  ne fakave ke he maamaaga mai he kupu tohi. He manamanatu a lautolu ke he fakamoliaga, to maama fakahaga e finagalo he Atua. Ko lautolu he tau motu ne nakai lata ke peritome ke maeke ke olioli e taliaaga ha Iehova. Ne fakamafiti e tau aposetolo mo e tau patu he tohi hifo e tau manatu ke maeke ke takitaki aki e tau matakainaga Kerisiano.—Gahua 15:12-29; 16:4.

7. Ke he puhala fe ne tolomaki atu ki mua e tau Kerisiano ke he senetenari fakamua?

⁷ Nakai tuga e tau takitaki lotu Iutaia, ne tapiki mau ke he tau aga fakamotu he tau tupuna ha lautolu, laulahi he tau Kerisiano Iutaia ne olioli he magaaho ne moua e lautolu e maamaaga fou mua ue atu nei ke he finagalo he Atua ne hagaao ke he tau tagata he motu, pete ne talia kua manako ke hiki e manatu hagaao ke he tau Tagata Motu Kehe. Ne fakamonuina e Iehova e tau aga fakatokolalo ha lautolu, mo e “kua mauokafua e tau ekalesia ke he tua, mo e fakatokologa a lautolu ke he taha aho mo e taha aho.”—Gahua 15:31; 16:5.

8. (a) Iloa fefe e tautolu kua lahi e maama ne amaamanaki ki ai he mole atu e senetenari fakamua? (e) Ko e heigoa e huhu aoga ka manamanatu a tautolu ki ai?

⁸ Kua matutaki e maama fakaagaga ke kikila mau he senetenari fakamua. Ka e nakai fakakite e Iehova e tau puhala oti he hana tau finagalo ke he tau Kerisiano fakamua. Ne tala age e aposetolo ko Paulo ke he tau tagata talitonu he senetenari fakamua: “Ha ko e vaha nai kua kitia taumaleku ai e tautolu ke he fakaata.” (1 Korinito 13:12) Ko e tau fakaata ia kua pulefu. Fakamua mogoia, ko e iloa mitaki he maama fakaagaga to fakakaupa ni. He mole atu e mamate e tau aposetolo, ne fai magaaho ne tolili e maama, ka e he tau vaha fou kua tupu lahi e iloilo faka-Tohiaga Tapu. (Tanielu 12:4) Foaki fefe e Iehova e maama ke he hana tau tagata he vaha nei? Ti tali atu fefe a tautolu ka fakalaulahi e ia e maamaaga ha tautolu ke he tau Tohiaga Tapu?

Hane Hoko Mai Fakahaga e Maama

9. Ko e heigoa e puhala mahomo atu mo e lauia mitaki he fakaako Tohi Tapu ne fakaaoga he tau Tagata Fakaako Tohi Tapu fakamua?

⁹ He vaha fou nei ko e lupa moli fakamua he maama kua kamata ke kitia he kuata fakahiku he senetenari 19 aki ne kamata he matakau he tau Kerisiano tane mo e fifine e fakaakoaga makutu ke he tau Tohiaga Tapu. Ne feaki e lautolu e puhala aoga he fakaako Tohi Tapu. To fakatu he taha e huhu; ti kumikumi agataha e matakau ke he tau kupu Tohiaga Tapu oti ne tatai ki ai. Ka fai kupu Tohi Tapu ne nakai fetataiaki, ne lali e tau Kerisiano fakamoli nei ke fakalagotatai ua ai. Nakai tuga e tau takitaki lotu he vaha ia, ne fifili e tau Tagata Fakaako Tohi Tapu (ne iloa ai ko e Tau Fakamoli a Iehova he magaaho ia) ke eke e tau Tohiaga Tapu mo takitakiaga ha lautolu, ka e nakai ko e aga tuai po ke manatu ne taute he tagata. He mole atu e manamanatu ha lautolu ke he tau fakamoliaga faka-Tohiaga Tapu kua ha ha ai, ne fakamau e lautolu e tau fakakatoatoaaga ha lautolu. He puhala ia ko e maamaaga ha lautolu ke he loga he tau matapatu fakaakoaga he Tohi Tapu kua iloa mitaki ai.

10. Ko e heigoa e tau tohi fakaako Tohi Tapu lagomatai ne tohi e Charles Taze Russell?

¹⁰ Ko e taha kua mahomo atu he tau Tagata Fakaako Tohi Tapu ko Charles Taze Russell. Ne tohi e ia ono e fufuta he tau tohi lagomatai ke fakaako Tohi Tapu ne mataulu Studies in the Scriptures. Ne manako a Matakainaga Russell ke tohi e volume ke fitu aki, nukua fakamaama aki e tohi ha Esekielu mo Fakakiteaga he Tohi Tapu. “Ka maeke ia au ke moua e tali,” he talahau e ia, “to tohi e au e Volume ke Fitu Aki.” Ne lafi atu e ia: “Ka foaki mai he Iki e kei ke he taha tagata, maeke ia ia ke tohi ai.”

11. Ko e heigoa e matutakiaga he vahaloto he magaaho mo e maamaaga ha tautolu ke he tau finagalo he Atua?

¹¹ Ko e talahauaga fakamua mai ia C. T. Russell kua fakatata e manatu aoga he lotomatala ha tautolu ke maama e falu vala he Tohi Tapu—ko e magaaho. Ne iloa e Matakainaga Russell nakai maeke ia ia ke fakaohooho e maama ke kikila ke he tohi ha Fakakiteaga ke tuga na maeke he tagata fano hui makaukau ke fakamafitifiti e la ke hake ato hoko hana magaaho fafati.

Fakakite—Ka ke he Magaaho Ni he Atua

12. Magaaho fe ne maama mitaki e perofetaaga he Tohi Tapu? (e) Ko e heigoa e fakataiaga kua fakakite ko e lotomatala ha tautolu ke maama e perofetaaga he Tohi Tapu, kua falanaki ke he fakatokaaga he magaaho ni he Atua? (Kikite matahui tala.)

¹² Tuga ni he maama he tau aposetolo e tau  perofetaaga loga hagaao ke he Mesia he mole e mate mo e liu tu mai a Iesu, ne maama hokoia he tau Kerisiano he vaha nei e perofetaaga he Tohi Tapu ke he fakamatafeiga mitaki he mole atu ai e fakamoliaga. (Luka 24:15, 27; Gahua 1:15-21; 4:26, 27) Ko e tohi fakaperofeta e Fakakiteaga, ti kua lata ia tautolu ke amanaki ke maama mahino ai ha kua fakamaama mai ai he kitia ke he tau mena hane tutupu. Ma e fakatai, nakai maama mitaki e C. T. Russell e kakano he manu favale kula uhi ne talahau he Fakakiteaga 17:9-11, ha ko e fakatokatokaaga ne hukui he manu favale, ko e Kautaha he Tau Motu mo e Tau Motu Kaufakalataha, ne nakai kitia to mate a ia. *

13. Ko e heigoa e mena kua tupu falu magaaho ka kikila mai e maama ke he falu vala tala he Tohi Tapu?

¹³ He magaaho ne ako he tau Kerisiano fakamua to eke e tau Tagata Motu Kehe nakai peritome mo tau matakainaga talitonu, ne takitaki e hikiaga ia ke he huhu fou nukua lata he tau tagata he tau motu ke peritome. Kua omoi he mena nei e tau aposetolo mo e tau patu ke liu kumikumi e matakupu katoa he peritome. Kua moli agaia e puhala taha ia he vaha nei. He falu magaaho ne takitaki he lupa kikila he maama ke he taha matakupu he Tohi Tapu e tau fekafekau fakauku he Atua, ko e “fekafekau fakamoli mo e loto matala,” ke liu kumikumi e tau mataulu tala ne tatai ki ai, tuga he fakatata he fakataiaga nakai la leva to hoko mai.—Mataio 24:45.

14-16. Maeke fefe e fakalaulahiaga he manatu ha tautolu hagaao ke he faituga fakaagaga ke lauia e maamaaga ha tautolu ia Esekielu, tau veveheaga 40 ke he 48?

¹⁴ He 1971 ne lolomi ai e fakamaamaaga he perofetaaga ha Esekielu he tohi “The Nations Shall Know That I Am Jehovah”—How? Ko e veveheaga he tohi ia ne talahau fakaku e fakakiteaga ha Esekielu ke he faituga. (Esekielu, tau veveheaga 40-48) He magaaho ia, kua hagaaki ke he puhala ka fakamoli e fakakiteaga ha Esekielu ke he faituga he lalolagi fou.—2 Peteru 3:13.

¹⁵ Pete ia, ko e tau vala tala ua ne lolomi he The Watchtower ia Tesemo 1, 1972, ne lauia e maamaaga ha tautolu ke he fakakiteaga ha Esekielu. Ne fakatutala ai ke he faituga fakaagaga ne mua nukua fakamaama he aposetolo ko Paulo ia Heperu veveheaga 10. Ne fakamaama he The Watchtower ko e tau poko Tapu mo e tau lotopa  i loto he faituga fakaagaga ke tatai ke he tuaga ha lautolu ne fakauku he nonofo agaia he lalolagi. He liu fokifoki e Esekielu tau veveheaga 40 ke he 48 he tau tau fakamui, ne maama ai ko e faituga fakaagaga hane gahuahua he vaha nei, ti ko e faituga ne kitia e Esekielu he fakakiteaga kua kau foki ke gahuahua he vaha nei. Pihia fefe?

¹⁶ He fakakiteaga ha Esekielu, kua kitia ai e tau ekepoa ne o fano he lotopa he faituga he fekafekau a lautolu ke he tau magafaoa nakai fakaekepoa. Ne hukui fakamaali he tau ekepoa nei e “tau patuiki mo e tau ekepoa,” ko e tau fekafekau fakauku ha Iehova. (1 Peteru 2:9) Pete ia, to nakai fekafekau a lautolu he lotopa he faituga he lalolagi ke he Pule Afe Tau he Keriso. (Fakakiteaga 20:4) He laulahi he magahala ia, ka nakai katoa, to fekafekau a lautolu ne fakauku ke he Atua he faituga Tapu ue Atu fakaagaga he “lagi ni.” (Heperu 9:24) Ha kua kitia e tau ekepoa ne o fano he tau lotopa he faituga a Esekielu, ko e fakakiteaga ia liga hane fakamoli agaia he lalolagi mogonei, he nonofo agaia falu ha lautolu ne fakauku he lalolagi. Tatai ai, ko e fufuta he mekasini nei ia Mati 1, 1999, kua fakaata e onoonoaga ne fakalautatai ke he vala tala nei. Ti, hokotia ai ke he fakaotiaga he senetenari ke 20 aki, kua fakakikila e maama fakaagaga ke he perofetaaga a Esekielu.

Mautali ke Hiki Hau a Manatu

17. Ko e heigoa e tau hikiaga ne taute e koe ke he manatu fakatagata tali mai he iloa e iloilo ke he kupu moli, ti aoga fefe ai ki a koe?

¹⁷ Ko e ha tagata kua manako ke he iloilo he kupu moli kua lata ke mautali he “mahala e tau manatu oti ke omaoma kia Keriso.” (2 Korinito 10:5) Nakai mukamuka tumau ai, mua atu ka vakavaka mao e tau manatu. Ma e fakatai, ato fakaako e kupu moli he Atua, kua liga ke olioli e koe e fakamanatuaga he falu aho okioki fakalotu mo e magafaoa hau. He mole e kamata a koe ke fakaako e Tohi Tapu, mailoga e koe ko e tau fakamanatuaga nei kua mai he tupuaga pouliuli moli. Fakamua, kua fakauaua a koe ke fakagahua e mena ne ako e koe. Fakahiku ai, ko e fakaalofa ma e Atua kua fakamoli ke malolo lahi mai he manatu fakalotu, ti fakaoti e koe e tau fakalatahaaga kua nakai fakafiafia e Atua. Nakai kia fakamonuina e Iehova e fifiliaga hau?—Fakatatai Heperu 11:25.

18. Kua lata fefe a tautolu ke tali atu ka maama a tautolu ke he kupu moli he Tohi Tapu?

¹⁸ Kua aoga tumau a tautolu he taute e tau mena ke he puhala he Atua. (Isaia 48:17, 18) Ti ka maama e onoonoaga ha tautolu ke he kupu he Tohi Tapu, kia olioli a tautolu he fakaholo ki mua ke he kupu moli! Moli, ko e matutaki ha tautolu ke maama kua fakamoli ko tautolu ha he hala hako. Ko e “puhala he tau tagata tututonu,” kua “lata ia mo e maama he aho, kua tupu tolomaki atu hana maama ke hoko ke he tupoula.” (Tau Fakatai 4:18) Moli, ke he magaaho nei kua kitia e tautolu falu puhala he finagalo he Atua “kua kitia taumaleku.” Ka e ka hoko mai e magaaho tonu he Atua, to kitia e tautolu e kupu moli ke fulufuluola lahi, ti maeke he tau hui ha tautolu ke tumau mauokafua ke he “puhala.” He magaaho nei, kia olioli e tautolu e tau kupu moli ne kua fakamaama fakamahino mai e Iehova, he tatali ke he maamaaga ha lautolu ne nakai la maama mahino ia.

19. Ko e heigoa taha puhala ke fakakite kua ofania e tautolu e kupu moli?

¹⁹ Fakatata fefe e tautolu e fakaalofa ha tautolu ma e maama ke he puhala aoga? Ko e taha puhala ke totou tumau e Kupu he Atua—he tau aho oti ka maeke. Muitua tumau nakai a koe ke he fakaholoaga he totouaga Tohi Tapu? Ko e tau mekasini Kolo Toko mo e Awake! kua foaki mai ki a tautolu e loga atu foki he tau mena kai fakaagaga atihake ke olioli ai. Manamanatu foki ke he tau tohi, tau porosua, mo e falu tohi ne kua tauteute ke aoga ai a tautolu. Ka e kua e tau hokotaki fakamalolo he  tau gahua fakamatala he Kautu ne lomi he Yearbook of Jehovah’s Witnesses?

20. Ko e heigoa e matutakiaga he vahaloto he maama mo e kupu moli mai ia Iehova mo e o atu ha tautolu ke he tau feleveiaaga Kerisiano?

²⁰ E, ko Iehova he puhala homo ue atu kua tali e liogi ne talahau he Salamo 43:3. He matahiku he kupu ia, kua totou e tautolu: “To fakahoko [he maama mo e tonu hau] au ke he hāu a mouga tapu, mo e hāu a faituga.” Onoono makai atu kia a koe he tapuaki ki a Iehova, fakalataha mo e falu he moto tagata? Ko e fakaakoaga fakaagaga ne foaki he tau feleveiaaga ha tautolu ko e puhala aoga kua foaki e Iehova e maamaaga he vaha nei. Ko e heigoa ha tautolu ka taute ke fakahokulo e loto fakaaue ha tautolu ma e tau feleveiaaga Kerisiano? Kua uiina e mautolu a koe ke manamanatu ke he mataulu tala nei ke he liogi he vala tala ka mui mai.

[Matahui Tala]

Maeke Nakai Ia Koe ke Tali?

• Kua fakakite fakahaga he ha e Iehova hana finagalo?

• Fakamafola fefe he tau aposetolo mo e tau patu i Ierusalema e matakupu he peritome?

• Ko e heigoa e puhala he fakaako Tohi Tapu ne moua he tau Tagata Fakaako Tohi Tapu, ti ko e ha ne kehe ue atu ai?

• Fakatai e puhala ne fakakite e maama fakaagaga ke he magaaho tonu ni he Atua.

[Tau Huhu he Fakaakoaga]

[Fakatino he lau 14]

Ne iloa e Charles Taze Russell to kikila e maama ke he tohi ha Fakakiteaga ke he magaaho tonu ni he Atua