Taofi Mau e Fakaakoaga Mahani Atua
Taofi Mau e Fakaakoaga Mahani Atua
“Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.”—TAU FAKATAI 3:5, 6.
1. Kua fakatapakupaku fefe a tautolu ke he iloilo he tagata tuga kua nakala pihia ia fakamua?
HE VAHA NEI, kua kavi ke 9,000 e tau nusipepa he aho, hane fa e tufa he lalolagi katoa. He tau tau oti kua lolomi ke hoko ke he 200,000 e tau tohi fou he Tau Fahi Kaufakalataha hokoia ni. Hagaao ke he taha fuafuaaga, ia Mati he 1998, kua kavi ke 275 e miliona he tau fahi Web he Internet. Ko e numera nei kua talahau ke mafiti fakahaga hake ke 20 e miliona he fahi Web he mahina. Nakala pihia ia fakamua, kua ataina e tau tagata ke moua e tau fakailoaaga ke he ha vala tala ni. Pete kua fai mitaki ne mai he mena nei, ko e tau fakailoaaga loga pihia kua fakatupu e tau mena vihi.
2. Ko e heigoa e tau mena vihi ka tupu mai he hu atu ke he tau fakailoaaga kua loga?
2 Ko e falu tagata kua eke ke hufia ke he tau fakailoaaga, ti kua fakafou tumau e tau manako nakai makona, ka e tiaki e tau mena ne mua he aoga. Falu kua moua e tau fakailoaaga hagaao ke he tau puhala iloilo vihi, ati talahau ni e lautolu a lautolu mo tau tagata makaka lahi. He tua ke he maama tote, ne taute e lautolu e tau fifiliaga uka ka fakatupu ki a lautolu ni po ke falu foki e hagahaga kelea. Ti kua hagahaga kelea tumau he fakatapakupaku ke he tau fakailoaaga fakavai po kua nakai hako. Kua nakai fai puhala tonu ke iloa moli kua hako mo e lagotatai e tau fakailoaaga loga.
3. Ko e heigoa e tau hatakiaga hagaao ke he tutuliaga he pulotu he tagata kua moua he Tohi Tapu?
3 Ko e matamulefu ko e aga mai tuai tigahau he tagata. Ko e tau hagahaga kelea he moumou magaaho he tutuli e tau mena fakateaga po ke tau fakailoaaga fakahagahaga kelea kua leva mai tuai he tau aho he Patuiki ko Solomona. Ne pehe a ia: “Kia fakaako . . . nakai fai fakahikuaga he tohi e tau tohi loga; ko e kumi lahi foki ke he tau kupu kua lolelole ai e tino.” (Fakamatalaaga 12:12) He mole e tau senetenari ne tohia e aposetolo ko Paulo ki a Timoteo: “Kia taofi e koe ke he mena ne tuku atu kia koe, kia kalo kehe mo e tau kupu kua kelea mo e nakai aoga, mo e tau taufetoko ke he tau mena kua fakahigoa pikopiko ai ko e iloilo. Kua taofi ki ai e falu, ti hehe ai a lautolu ke he tua.” (1 Timoteo 6:20, 21) E, kua lata he tau Kerisiano he vaha nei ke kalo kehe mai he fakatapakupaku ke he tau manatu fakahagahaga kelea.
4. Ko e heigoa taha puhala kua maeke ia tautolu ke fakakite ha tautolu a falanaki ki a Iehova mo e tau fakaakoaga hana?
4 Kua mitaki foki he tau tagata a Iehova ke oma e tau kupu he Tau Fakatai 3:5, 6: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” Ke falanaki ki a Iehova kua lata foki ke fakaheu ha manatu ne totoko ke he Kupu he Atua, pete ko e tau manatu ha tautolu ni po ke mai he tau katofia ha tautolu. Ke puipui e tuaga fakaagaga ha tautolu, kua lata ke fakamahani ni e tautolu ha tautolu a tau manamanatuaga ke maeke ai ia tautolu ke kitia e tau fakailoaaga fakahagahaga kelea mo e tiaki ai. (Heperu 5:14) Kia lata a tautolu ke fakatutala ke he tau punaaga he tau fakailoaaga pihia.
Ko e Lalolagi Pule e Satani
5. Ko e heigoa taha punaaga he tau manatu hagahaga kelea, mo e ko hai ne omoi ai?
5 Ko e lalolagi nei ko e punaaga talumelie he tau manatu hagahaga kelea. (1 Korinito 3:19) Ne liogi a Iesu Keriso ke he Atua hagaao ke he hana tau tutaki: “Nakai liogi au kia uta kehe e koe a lautolu he lalolagi, ka kia leveki atu e koe a lautolu mai ia ia ne mahani kelea.” (Ioane 17:15) Ko e ole ha Iesu ke puipui e tau tutaki hana mai “ia ia ne mahani kelea,” kua fakakite e fakaohoohoaga a Satani he lalolagi. Ha ko tautolu ko e tau Kerisiano, kua nakai amanaki noa ni ti puipui a tautolu mai he tau fakaohoohoaga kelea he lalolagi nei. Ne tohia e Ioane: “Kua iloa e tautolu mai he Atua a tautolu; ka ko e lalolagi oti ha he pule hana kua mahani kelea.” (1 Ioane 5:19) Mua atu he magahala he tau vala fakahiku nei he tau aho fakamui, kua amanaki pihia to fakamakona e Satani mo e hana tau temoni e lalolagi aki e tau fakailoaaga hagahaga kelea.
6. Maeke fefe he lalolagi fakafiafia ke fakatupu e mahani fakamao?
6 Kua amanaki foki ke he falu he tau fakailoaaga fakahagahaga kelea nei to eke ke mitaki. (2 Korinito 11:14) Manamanatu la, ke fakatai ki ai, ke he lalolagi fakafiafia, mo e hana tau fakatataaga tivi, tau kifaga, tau leo kofe, mo e tau tohi. Kua tokologa ne talia ko e tau mena loga ne tutupu, kua fakatokoluga he falu a fakafiafiaaga e tau mahani fakalialia, tuga e feuaki, favale, mo e hufia he tulaki. He kitia fakamua taha fakafiafiaaga ne kelea muikau, liga ofomate e tau tagata. Ka e ka kitia tumau, to eke e tagata ke nakai tupetupe ki ai. Ti kua nakai lata ia tautolu ke manatu kua latatonu po ke kua mitaki e tau fakafiafiaaga ne fakatokoluga e tau manatu fakahagahaga kelea.—Salamo 119:37.
7. Ko e heigoa e faga pulotu fakatagata ka tatafi kehe e mauokafua ha tautolu ke he Tohi Tapu?
7 Manamanatu ke he taha punaaga foki he tau fakailoaaga ka fakahagahaga kelea—ko e tau manatu loga ne lomi fakailoa he falu saienetisi mo e tau tagata fakaako tokoluga ne paleko e tonuhia he Tohi Tapu. (Fakatatai Iakopo 3:15.) Ko e tau vala tala pihia ne fa kitia he tau mekasini talahaua mo e tau tohi mahuiga, kua maeke ke fakagalo e mauokafua ke he Tohi Tapu. Ko e falu tagata kua hula ke fakalolelole e pule malolo he Kupu he Atua aki e tau manatu tuaha hololoa. Ko e hagahaga kelea ia ni ne tupu he vaha he tau aposetolo, tuga ne fakamaama he tau kupu he aposetolo ko Paulo: “A mutolu, neke lautaki e taha a mutolu ke he pulotu nakai aoga ke fakahehe ai, ke lata mo e kupu toka tuai he tau tagata, ke lata foki mo e tau kupu fakamua he lalolagi, ka e nakai lata mo Keriso.”—Kolose 2:8.
Tau Fi he Kupu Moli
8, 9. Kua hane kitia fefe e tiaki taofiaga he vaha nei?
8 Maeke he tau tagata tiaki taofiaga ke fakaneinei mai taha hagahaga kelea foki ke he tuaga fakaagaga ha tautolu. Ne talahau tuai he aposetolo ko Paulo to mafuta hake e tiaki taofiaga ia lautolu ne talahau teao ko e tau Kerisiano. (Gahua 20:29, 30; 2 Tesalonia 2:3) Ke fakamoli hana tau kupu, he mole e mamate he tau aposetolo, ne takitaki atu e tiaki taofiaga lahi ke he ati hakeaga a Kerisitenitome. He vaha nei, kua nakai lahi e tiaki taofiaga ke he tau tagata he Atua. Pete ni ia, kua tokogaogao e tagata ne tiaki e tau fakaholoaga ha tautolu, ti kua ukufeke falu ia lautolu ke ekefakakelea e Tau Fakamoli a Iehova he fakaholofa e tau pikopiko mo e tau tala hehe. Ko e falu kua fegahuaaki mo e falu matakau ke pulega e totoko ke he tapuakiaga mea. He taute pihia, kua kau a lautolu mo ia ne tiaki taofiaga fakamua, ko Satani.
9 Ko e falu tagata tiaki taofiaga kua fakatolomaki e fakaaogaaga he tau puhala kehekehe he matutakiaga, putoia ai e Internet, ke fakaholofa e tau fakailoaaga fakavai hagaao ke he Tau Fakamoli a Iehova. Ti ko e fua, he magaaho ka kumikumi a lautolu ne mahani moli ke he tau taofiaga ha tautolu, liga fakataupa a lautolu mo e tau manatu he tau tagata tiaki taofiaga. Kua fakatapakupaku fakahanoa foki he falu he Tau Fakamoli a lautolu ni ke he tau vala tala fakahagahaga kelea nei. Ke lafi ki ai, kua fa mahani e tau tagata tiaki taofiaga ke fai vala he televisoni po ke tau polokalama he letio. Ko e heigoa mogoia e puhala pulotu ke muitua hagaao ke he mena nei?
10. Ko e heigoa e aga pulotu ke he tau manatu he tau tagata tiaki taofiaga?
10 Ne fakatonu he aposetolo ko Ioane e tau Kerisiano ke nakai talia e tau tagata tiaki taofiaga ke he ha lalu loto kaina. Ne tohia e ia: “Kaeke kua fina age kia mutolu taha, ka e nakai ta age e kupu nai, aua neke talia a ia ke he fale ha mutolu, aua foki neke tala age a mutolu kia monuina. Ha ko ia kua tala age kia ia kia monuina kua kau fakalataha mo ia ke he hana tau gahua kelea.” (2 Ioane 10, 11) He kalo kehe mai he tau matutakiaga oti mo e tau tagata totoko nei ka puipui a tautolu mai he tau manamanatu keukeu ha lautolu. He fakatapakupaku e tautolu a tautolu ni ke he tau fakaakoaga he tiaki taofiaga ha ko e tau puhala kehekehe he matutakiaga he vaha fou nei, kua tatai ni e fakahagahaga kelea ia mo e uiina e tagata tiaki taofiaga ke he tau loto kaina ha tautolu. Kia nakai lata a tautolu ke fakaata e matamulefu ke tataki a tautolu ke he tau puhala fakamatematekelea pihia!—Tau Fakatai 22:3.
I Loto he Fakapotopotoaga
11, 12. (a) Ko e heigoa e punaaga he tau manatu hagahaga kelea he fakapotopotoaga he senetenari fakamua? (e) Kua kaumahala fefe falu Kerisiano ke taofi mau e fakaakoaga mahani Atua?
11 Manamanatu la ke he taha punaaga foki he tau manatu hagahaga kelea. Kua nakai pauaki ke fakaako e tau mena fakavai, na maeke he Kerisiano tukulele ke feaki e aga vagahau fakahanoa. (Tau Fakatai 12:18) Ha ko e foliga nakai mitaki katoatoa ha tautolu, kua holifono oti a tautolu he falu magaaho ha ko e ha tautolu a alelo. (Tau Fakatai 10:19; Iakopo 3:8) Kitia maali ai, he vaha he aposetolo ko Paulo, ha ha ai falu he fakapotopotoaga ne kaumahala ke tau taofi e tau alelo ha lautolu mo e fakalataha ke he tau taufetoko hagaao ke he tau kupu. (1 Timoteo 2:8) Kua haia falu foki ne fakatokoluga e tau manatu ha lautolu ni ati hokotia atu ke paleko e pule ha Paulo. (2 Korinito 10:10-12) Ko e agaga pihia kua fua mai e tau taufetoko teao.
12 He falu magaaho kua tolomaki e tau manatu kehekehe nei ke he “tau taufetoko teao,” kua faguna ai e mafola he fakapotopotoaga. (1 Timoteo 6:5; Kalatia 5:15) Kia lautolu ne fakatupu e tau taufetoko nei, ne tohia a Paulo: “Kaeke kua fakaako kehe e taha, mo e nakai omaoma ke he tau kupu tonu ko e tau kupu haia he Iki ha tautolu ko Iesu Keriso, mo e kupu kua lata mo e mahani Atua. Kua fakatokoluga a ia, kua nakai iloa ha mena, ka kua mate a ia he fia kumikumi mo e taufetoko ke he tau kupu, kua tutupu mai ai e mahekeheke, mo e taufetoko mo e tau vagahau kelea, mo e tau manatu mahalohalo kelea.”—1 Timoteo 6:3, 4.
13. Ko e heigoa e tau mahani he laulahi he tau Kerisiano he senetenari fakamua?
13 Fiafia ai, he vaha he tau aposetolo kua tokologa e tau Kerisiano ne tua fakamoli mo e mamata atu ni ke he gahua fakapuloa he tala mitaki he Kautu he Atua. Kua galala a lautolu ke ahi e “tau tagata kua mamate e tau matua, mo e tau fifine takape ke he ha lautolu a matematekelea” mo e ‘leveki foki e lautolu a lautolu ni neke ilaila he lalolagi,’ ti nakai moumou e magaaho ha lautolu ke he tau taufetoko teao hagaao ke he tau kupu. (Iakopo 1:27) Ne kalo kehe mai a lautolu he “feoaki mo lautolu kua mahani kelea” pihia foki i loto he fakapotopotoaga Kerisiano ke puipui aki ha lalu a tuaga fakaagaga.—1 Korinito 15:33; 2 Timoteo 2:20, 21.
14. Ka nakai fakaeneene a tautolu, to maeke fefe e tau feutaaki he tau manatu ke hokotia atu ke he tau taufetoko hagahaga kelea?
14 Kua pihia foki e tau tutuaga ne fakamaama he paratafa 11, ke he tau fakapotopotoaga he Tau Fakamoli a Iehova he vaha nei. Pete ni ia, kua lata ia tautolu ke mailoga e hagahaga ke he tau taufetoko teao pihia. Moli, ko e mena fa mahani ke tutala ke he tau fakamauaga he Tohi Tapu po ke tuaha noa hagaao ke he tau puhala he lalolagi fou ne mavehe mai ka e nakala kitia ia. Mo e nakai fai hepe he feutaaki e tau manatu ke he tau mena fakatagata, tuga e tau tapulu mo e teuteuaga po ke fifiliaga he tau mena fakafiafia. Ka e, kaeke ulupulega ni a tautolu hagaao ke he tau manatu ha tautolu mo e ita ka nakai talia falu mo tautolu, liga fakahiku e fakapotopotoaga ke mavehevehe ke he tau matakupu ikiiki. Ko e tala mitaki he mogo fakamua ka liga hoko moli ni ke fakahagahaga kelea.
Puipui e Mena Tuku Mai ki a Tautolu
15. Kua laulahi fefe e fakahagahaga kelea he “tau kupu he tau temoni” ke he tuaga fakaagaga ha tautolu, mo e ko e heigoa e fakatonuaga kua foaki i loto he tau Tohiaga Tapu?
15 Ne hataki mai e aposetolo ko Paulo: “Kua talahau fakatonu mai he Agaga, to o kehe e falu mai he tua ke he tau aho fakamui, to fanogonogo a lautolu ke he tau agaga ke fakahehe ai, mo e tau kupu he tau temoni.” (1 Timoteo 4:1) E, ko e tau manatu hagahaga kelea ka laga mai e tau fakamatakutaku moli. Kua maama, ne oleole fakatekiteki ai a Paulo ke he hana kapitiga fakahele ko Timoteo: “Timoteo na e, kia taofi e koe ke he mena ne tuku atu kia koe, kia kalo kehe mo e tau kupu kua kelea mo e nakai aoga, mo e tau taufetoko ke he tau mena kua fakahigoa pikopiko ai ko e iloilo. Kua taofi ki ai e falu, ti hehe ai a lautolu ke he tua.”—1 Timoteo 6:20, 21.
16, 17. Ko e heigoa ne tuku mai he Atua ki a tautolu, mo e kia puipui fefe ai e tautolu?
16 Maeke fefe a tautolu he vaha nei ke lagomatai he hatakiaga hofihofi nei? Kua fai mena ne tuku ki a Timoteo—taha mena uho ke leveki mo e ke taofi mau. Ko e heigoa e mena ia? Ne fakamaama e Paulo: “Kia eke e koe mo fakafifitaki hau e tau kupu tonu, ne fanogonogo ai a koe kia au mo e tua mo e fakaalofa ha ia Keriso Iesu. Ko e mena mitaki ne tuku atu kia koe kia leveki ai e koe ke he lagomatai mai he Agaga Tapu kua nofo i loto ia tautolu.” (2 Timoteo 1:13, 14) E, ko e tau mena tuku ki a Timoteo kua putoia ai e “tau kupu tonu,” “mo e kupu kua lata mo e mahani Atua.” (1 Timoteo 6:3) Ke fakalautatai ke he tau kupu nai, kua fakamalolo e tau Kerisiano he vaha nei ke puipui e tua ha lautolu mo e he tau kupu moli loga ne kua tuku age ki a lautolu.
17 Ke puipui e mena ia ne tuku mai kua putoia e feaki hake he tau mena tuga e aga fakaako Tohi Tapu mitaki mo e fakauka ke he liogi, he mogo taha “kia mahani mitaki . . . ke he tau tagata oti kana, ka e au atu ke he faoa ne tua.” (Kalatia 6:10; Roma 12:11-17) Ne tomatoma age foki e Paulo: “Kia tutuli e tututonu, mo e mahani Atua, mo e tua, mo e fakaalofa, mo e fakauka, mo e mahani molu. Kia tau ke he tau mitaki kua lata mo e tua, kia toto e moui tukulagi, ne ui foki a koe ki ai, ne talahau atu ai e koe e talahauaga mitaki ki mua he tau talahau tokologa.” (1 Timoteo 6:11, 12) Ko e fakaaogaaga ha Paulo ke he tau kupu tuga e “tau ke he tau mitaki” mo e “toto e moui tukulagi,” kua fakamaali mai e lata ha tautolu ke fakagahuahua mo e fakamalolo ke totoko fakaagaga e tau fakaohoohoaga hagahaga kelea.
Ko e Lata ke Fakalotomatala
18. Kua lata fefe a tautolu ke fakakite e lagotatai faka-Kerisiano he kumi atu ke he tau fakailoaaga fakalalolagi?
18 Moli, ke tau ke he tau mitaki he tua, kua lata ni ke fakalotomatala. (Tau Fakatai 2:11; Filipi 1:9) Tuga anei, kua nakai hako ke fakaheu e tau fakailoaaga oti he lalolagi nei. (Filipi 4:5; Iakopo 3:17) Kua nakai totoko oti e tau manatu he tagata ke he Kupu he Atua. Ne haga a Iesu ke he lata he tau tagata gagao ke kumi e ekekafo iloilo—ko e matafeua he lalolagi nei. (Luka 5:31) Pete ni kua tuai tigahau e foliga he vai tului he vaha a Iesu, ne talahau e ia kua fai aoga ne tupu mai he lagomataiaga fakaekekafo. Ko e tau Kerisiano he vaha nei kua fakalagotatai ke he tau fakailoaaga fakalalolagi, ka kua totoko e lautolu e fakatapakupaku ke he ha mena ka liga fakahagahaga kelea fakaagaga a lautolu.
19, 20. (a) Kua fakalotomatala fefe e tau motua he magaaho ka lagomatai a lautolu ne vagahau fakagoagoa? (e) Kua fakafehagai fefe e fakapotopotoaga ki a lautolu ne fakamiko ke fakatokoluga e tau fakaakoaga fakavai?
19 Kua lata lahi foki e lotomatala ma e tau motua he magaaho ka tauui ke lagomatai a lautolu ne vagahau fakagoagoa. (2 Timoteo 2:7) He falu magaaho, liga kua fakafita falu he fakapotopotoaga ke he tau taufetoko hagaao ke he tau mena teao mo e tuaha noa. Ke puipui e kaufakalataha he fakapotopotoaga, kua lata he tau motua ke mafiti ke fakafehagai ke he tau lekua pihia. He magaaho taha ia ni, kia kalo mai a lautolu he fakatupu e tau manatu hepe ke he tau matakainaga ha lautolu mo e kia nakai vave lahi ke talahau a lautolu ko e tau tagata tiaki taofiaga.
20 Ne fakamaama e Paulo e agaga ne kua lata ke foaki e lagomatai. Ne pehe a ia: “Ko e tau matakainaga na e, kaeke ke moua he tagata he taha holifono ko mutolu kua mahani fakalata ke he Agaga, kia liuaki mai e mutolu a ia kua pihia mo e loto he mahani molu.” (Kalatia 6:1) He vagahau pauaki hagaao ke he tau Kerisiano ne taufetului mo e tau fakauaua, ne tohia e Iuta: “Kia fakaalofa age a mutolu ke he falu mo e fakalatalata. Ka ko e falu kia fakamoui e mutolu a lautolu mo e matakutaku, kia hamu a lautolu mai he afi.” (Iuta 22, 23) Ka e, ka fakamiko ni taha ke fakatokoluga e tau fakaakoaga fakavai ka kua fita e tau tomatomaaga loga, kua lata e tau motua ke taute taha mena ke puipui e fakapotopotoaga.—1 Timoteo 1:20; Tito 3:10, 11.
Fakapuke e Tau Loto ha Tautolu Aki e Tau Mena Fakamonu
21, 22. Ko e heigoa kua lata ia tautolu ke fifili fakamitaki, mo e heigoa kua lata ke fakapuke aki e tautolu e tau loto ha tautolu?
21 Kua tiaki he fakapotopotoaga Kerisiano e tau kupu hagahaga kelea nukua “tuga ne popo.” (2 Timoteo 2:16, 17; Tito 3:9) Kua moli e mena nei pete ni ko e tau kupu tuga ne fakaata e “pulotu” fakahehe he lalolagi nei, tau manatu he tau tagata tiaki taofiaga, po ke tutala fakahanoa i loto he fakapotopotoaga. Pete ni kua mitaki e manako malolo ke ako e tau mena fou, to liga fakatapakupaku he matamulefu tokanoa a tautolu ke he tau manatu hagahaga kelea. Kua nakai pouli a tautolu ke he tau lagatau a Satani. (2 Korinito 2:11) Iloa e tautolu kua gahua lahi a ia ke fakatauhele aki a tautolu ke fakaetoeto e fekafekau ke he Atua.
22 Ko e tau fekafekau mitaki, kia taofi mau e tautolu e fakaakoaga mahani Atua. (1 Timoteo 4:6) Kia fakaaoga fakapulotu a e tautolu ha tautolu a magaaho he fifili fakamitaki e tau fakailoaaga ka talia e tautolu. Mogoia ka nakai mukamuka a tautolu ke lulululu he tau manatu fakaohooho a Satani. E, kia fakatumau a tautolu ke manamanatu ke he “tau mena oti kua moli, ko e tau mena oti kua gali, ko e tau mena oti kua tonu, ko e tau mena oti kua mea, ko e tau mena oti kua fulufuluola, ko e tau mena oti kua talahaua mitaki, ko e tau mahani mitaki oti ne toka ai mo e tau mahani ke nava ki ai.” Kaeke ke fakapuke e tautolu e tau loto ha tautolu aki e tau mena pihia, to ha ia tautolu e Atua hana e monuina. —Filipi 4:8, 9.
Ko e Heigoa ne Fakaako e Tautolu?
• Maeke fefe he pulotu fakalalolagi ke fakalaga e fakamatakutaku ke he tuaga fakaagaga ha tautolu?
• Ko e heigoa ka taute e tautolu ke puipui a tautolu ni mai he tau fakailoaaga he tau tagata tiaki taofiaga?
• Ko e heigoa e tau vagavagahau kua nakai lata i loto he fakapotopotoaga?
• Kua fakakite fefe e lagotatai faka-Kerisiano he magaaho ka fehagai mo e tau fakailoaaga loga he vaha nei?
[Tau Huhu he Fakaakoaga]
[Fakatino he lau 21]
Loga e tau mekasini mo e tau tohi mahuiga ne totoko ke he tau mahani mitaki he faka-Kerisiano
[Fakatino he lau 22]
Maeke he tau Kerisiano ke feutaaki e tau manatu mo e nakai ulupulega