Tau Mauhoana Fiafia ne Fakalilifu a Iehova

Ko Welsh Mo elthea Ne mau I soweto, Aferika Toga, He 1985. Fa Mahani A laua Mo e ha laua Tama Fifine Ko zinzi Ke liu Kitekite E tau ata Mau Ha laua, Mo e liu Fakaalaala E aho Fiafia Ia. Ne fiafia Lahi A zinzi Ke talahau A lautolu Ne o ke he mauhoana Mo e fiafia Lahi Ke he tau ata He matua Fifine Hana Ne tui Tapulu Fulufuluola.

KUA kamata e mauhoana aki e lauga he fakamauaga ne taute he fale fono i Soweto. Ti uhu he matakau Kerisiano fuata e tau lologo fakaheke ke he Atua ne fa e fatiaga. Oti mogoia, ne kai e tau tagata uiina ka e fakatagi fakaeneene noa e tepi he tau leo kofe he Kautu. Kua nakai inu kava, mo e nakai fai leo kofe taogoogo po ke koli. Ka kua fiafia e tau tagata uiina ke feoaki auloa mo e nava age ke he hoa. Kua kavi ke tolu e matahola he fakaholoaga ia. “Ko e mauhoana ka manatu fakahele e au,” he talahau e Raymond, ko e motua Kerisiano.

He mogo ne mau a laua, ko Welsh mo Althea kua gahua he la he Watch Tower Bible and Tract Society i Aferika Toga. Kua fahia ni a laua ke taute e mauhoana tote. Ko e falu Kerisiano kua fifili ke toka hifo e fekafekauaga mau ke gahua tupe ke totogi aki e mauhoana mahuiga. Ka ko Welsh mo Elthea, kua nakai tokihala a laua he fifili e laua ke mau tote ha kua fakaata a laua ke fakatumau e fekafekauaga ke he Atua mo tau fekafekau gahua mau ato fanau a Zinzi.

Ka e, kua mogoia, ka manako e hoa ke fakatagi ha leo kofe ni mo e ke koli he mauhoana ha laua? Ka e kua ka manako a laua ke fai uaina po ke falu faga kava foki? Ka e kua ka fahia a laua ke totogi e mauhoana lahi mo e mahuiga? Maeke fefe ia laua ke iloa tonu to eke ai mo magaaho fiafia ne lata mo e tau tagata tapuaki ke he Atua? Ko e tau huhu ia kua lata ke manamanatu fakamitaki ki ai, ha kua poaki he Tohi Tapu: “Po ke kai mena a mutolu, po ke inu a mutolu, po ke eke e mutolu taha mena, kia eke e mutolu e tau mena oti kana ke fakaheke ai ke he Atua.”—1 Korinito 10:31.

Tiaki e Tafeauhi

Kua uka ke fakatino noa e mauhoana nakai fiafia. Kua ha ai e hagahaga kelea lahi he taute e tau mena muikau mo e he lahi mahaki e tafeauhi. He tau mauhoana loga ne nakai he Tau Fakamoli, kua taute ai e tau mena ne nakai fakalilifu ke he Atua. Ke fakatai ki ai, ko e mena fa mahani ke inu kava ato konahia ai. Momoko ni, ha kua tupu foki e mena nei ke he falu mauhoana he tau Kerisiano.

Ne hataki he Tohi Tapu ko e “kava, kua tuga e tagata tapāā haia.” (Tau Fakatai 20:1) Ko e kakano he kupu Heperu ne fakaliliu “tapāā” ko e “go lahi.” Ka taute he kava taha tagata ke miha, manatu la ka taute pihia ke he toloaga lahi ne feoaki auloa mo e inu lahi! Kitia maali ai, ko e tau magaaho pihia kua mukamuka ke hokotia atu ke he “konahia, ko e tafeauhi, mo e tau mena pihia,” ne kua tohi i loto he Tohi Tapu ko e “tau gahua he tino.” Kua fakatikai he tau gahua pihia a lautolu ne nakai tokihala ke moua e moui tukulagi i lalo he pule he Kautu he Atua.—Kalatia 5:19-21.

Ko e kupu Heleni ma e “tafeauhi” kua fakaaoga ke fakamaama aki e foleni go he tau fuata kona he puhala tu ne uhu lologo, koli, mo e ta e tau leo kofe. Ka nakai tau taofi e kava he mauhoana, mo e ka taogo lahi e leo kofe mo e  koli fakahanoa, kua ha ha ai e hagahaga kelea ti eke e magaaho ia ke tuga e mena tafeauhi. He takatakaiaga pihia, to liga mukamuka a lautolu ne lolelole ke mokulu ke he kamatamata mo e taute falu gahua he tino tuga e “feuaki, ko e mahani kelea, ko e matahavala, [po ke hokotia ke he] vale.” Ko e heigoa ka taute ke puipui mai he tau gahua pihia he tino neke fakakelea e fiafia he mauhoana Kerisiano? Ke tali e huhu ia, kia kikite atu a tautolu ke he mena ne talahau he Tohi Tapu hagaao ke he taha mauhoana.

Ko e Mauhoana ne Fano a Iesu ki Ai

Kua uiina a Iesu mo e tau tutaki hana ke he mauhoana i Kana i Kalilaia. Ne talia e lautolu e uiina, mo e foaki foki e Iesu taha mena ke he fiafia he mauhoana. He magaaho ne ku e uaina, ne taute e ia e mana ke foaki fakalahi mai e uaina kua mitaki lahi. He mole e mauhoana, ko e vala ne toe kua uta ni ke he kitofaihoana loto fakaaue mo e hana magafaoa ke fakaaoga.—Ioane 2:3-11.

Ha ha ai loga e fakaakoaga ka mailoga e tautolu mai he mauhoana ne fano a Iesu ki ai. Fakamua, kua nakai o noa a Iesu mo e hana tau tutaki ke he taonaga. Ne talahau fakatonu he Tohi Tapu na uiina a lautolu. (Ioane 2:1, 2) Tuga foki he tau fakataiaga ua he taonaga, ne vagahau tumau a Iesu hagaao ke he tau tagata i ai he kua uiina a lautolu.—Mataio 22:2-4, 8, 9; Luka 14:8-10.

He falu motu ko e aga mahani mau ma e tau tagata oti he maaga ke o ke he taonaga pete kua uiina po ke nakai. Pete ia, to tataki atu e mena nei ke he matematekelea fakatupe. Ko e hoa nakai muhu tupe ka liga lahi e kaitalofa he fakatau e tau kai mo e tau inu ma e toloaga lahi mahaki. Ti ka manako e hoa Kerisiano ke fakatote e galue mo e tokofiha ni ka uiina, kua lata e mena nei ke maama mo e fakalilifu he tau katofia Kerisiano kua nakai uiina. Ko e tagata tane ne mau i Cape Town, Aferika Toga, ne talahau ke 200 tagata ne uiina ke he mauhoana hana. Ko e mena ne tupu, 600 ne o, ti oti vave e tau mena kai. Ia lautolu ne nakai uiina ko e tau tagata ahiahi ne o mai he pasi ke kitekite ki Cape Town he matahiku he fahitapu ne mauhoana ai. Ko e takitaki he tau tagata kitekite nei ko e faoa mamao he kitofaitane mo e piko ko e hako hana ia ke uta oti e matakau ka e nakai tala age ke he kitofaitane po ke kitofaihoana!

Ka e to talahau la kua fakaata e taonaga ke he tau tagata oti, ko e tutaki moli ha Iesu kua kalo mai he fano ke he taonaga ka e nakai uiina mo e kai ti inu ke he tau mena ne fakalata ma lautolu ni ne uiina. Ko lautolu ne manako lahi ke o ka e nakai uiina kua lata ke huhu hifo ki a lautolu ni, ‘To fakakite nakai he haku a fano ke he taonaga e nakai fakaalofa ki a laua ne mau fou? Nakai kia to fakatupu e au e fuafua kelea mo e uta kehe e fiafia he magaaho?’ He nakai ita he ai uiina, liga fakafano he Kerisiano manamanatu e ualesi ke fakahoko e fiafia ki a laua mo e foaki ki a laua e monuina a Iehova. Liga manatu foki a ia ke foaki taha mena fakaalofa ke lafi ke he fiafia he aho mauhoana ha laua.​—Fakamatalaaga 7:9; Efeso 4; 28.

Ko e Fakalagoaga Ha Hai?

He falu fahi i Aferika, ko e aga mau ma e magafaoa momotua ke taute e tau fakaholoaga he mauhoana. Liga fakaaue lahi e tau hoa ma e mena nei, ha kua fakatokanoa mai a lautolu he matagahua fakatupe. Liga logona hifo foki e lautolu kua tokanoa mai a lautolu he fakalagoaga ke he ha mena ka liga tupu. Pete he pihia, fakamua to talia ha lagomataiaga mai he tau magafaoa loto mitaki, kua lata he hoa ke iloa moli to fakalilifu e tau manako ha laua.

Pete ko e Tama he Atua a Iesu ne “hifo mai he lagi,” kua nakai fai talahauaga kua uta mo e takitaki e ia e laulahi he tau mena tutupu he mauhoana i Kana. (Ioane 6:41) Ka kua tala mai he fakamauaga he Tohi Tapu ki a tautolu kua kotofa taha tagata ke eke mo “tagata ne pule ke he taonaga.” (Ioane 2:8) Ko e tagata nei, kua fakalago atu ke he ulu magafaoa fou, ko e kitofaihoana.—Ioane 2:9, 10.

Kua lata he tau magafaoa Kerisiano ke fakalilifu e ulu kotofa he Atua he magafaoa fou. (Kolose 3:18-20) Ko ia ne kua lata ke uta e fakalagoaga he tau mena he hana mauhoana. Kua lata ni he kitofaihoana ke manatu fakamitaki mo e, ka maeke, fakapuke e tau manako he hana kitofaitane,  hana tau matua, mo e hana tau matua fugavai. Ka e ka fakamakamaka e magafaoa ke taute e tau fakaholoaga ne nakai lau mo e manako he hoa, mogoia ka nakai talia he hoa e lagomatai ha lautolu mo e totogi ni e laua ha laua a mauhoana tote. He puhala nei to nakai fai mena ka fakaleua ai e tau manamanatuaga he hoa he mogo fakamui. Ke fakatai ki ai, he mauhoana Kerisiano i Aferika, ko e taha he faoa tino ne eke mo iki he taonaga, ne fakafepa e tau kapiniu kalase ke he tau matua tupuna kua mamate!

Falu magaaho ne o tuai e hoa mau ke he ha laua a okioki fakamauaga ato oti e fakafiafiaaga. Ka pihia, kua lata he kitofaihoana ke pulega mo e falu ke leveki ke lautaki e tau tutuaga he Tohi Tapu mo e fakaoti e taonaga he matahola kua lata.

Fakatokatoka mo e Fakalagotatai Mitaki

Kua nakai taumaleku, nukua loga e mena kai mitaki he mauhoana ne fano a Iesu ki ai, ha kua fakamaama ai he Tohi Tapu ko e taonaga. Tuga kua mailoga, kua lahi foki e uaina. Moli foki, kua ha i ai e tau leo kofe kua lata mo e tau koli lilifu ha ko e taha vala mau ainei he moui fakafiafia he tau Iutaia. Ne fakakite e Iesu e mena nei he fakataiaga talahaua hana ke he tama tane moumou koloa. Ko e matua tane mautu he tala ia kua fiafia lahi he liu mai e tama tokihala hana ti pehe a ia: “Ke kai ai a tautolu mo e fiafia.” Hagaao ki a Iesu, kua putoia ke he fiafia e “leo mitaki, mo e koli.”—Luka 15:23, 25.

Ka kia mailoga, kua nakai talahau fakamahino he Tohi Tapu e leo kofe mo e koli he mauhoana i Kana. Moli foki, kua nakai hagaao ha fakamauaga he Tohi Tapu ke he koli he tau mauhoana. Tuga kua kitia ke he tau fekafekau tua fakamoli he Atua he vaha Tohi Tapu, ko e vala noa e koli nakai ko e vala ne mua he mauhoana ha lautolu. Fai mena nakai ne ako e tautolu mai he mena nei?

He falu mauhoana Kerisiano i Aferika, kua fakaaoga e tau fakatokaaga kofe eleketono taogoogo lahi. Kua taogo lahi mogoia e leo kofe ti nakai maeke e tau tagata uiina ke tutala fakamitaki. Falu magaaho kua ku e tau mena kai ka e nakai ku e koli ne kua mukamuka ke miha. Ti kua nakai ko e taonaga, ka kua eke e tau magaaho pihia mo fakaholoaga koli. Taha mena foki, kua fa mahani e taogo lahi he leo kofe ke futiaki mai a lautolu ne fakatupu lekua, tau tagata kehe ne o mai ka e nakai uiina.

Ha kua nakai peehi he fakamauaga he Tohi Tapu hagaao ke he tau mauhoana e tau leo kofe mo e koli, nakai kia lata he mena nei ke takitaki e hoa ne taute e mauhoana ke fakalilifu a Iehova? Ka e, he tauteute ma e tau mauhoana loga ne nakala leva ia he fahi toga i Aferika, ko e tau Kerisiano fuata ne fifili ke fai vala he fakamauaga kua loga e tau matahola ne fakamole ke fakamahani e tau lakaaga vihu he koli. Ke he tau mahina loga kua to lahi mahaki e magaaho ne fakamole e lautolu ke he puhala nei. Ka kua lata e tau Kerisiano ke ‘fakaaoga e tau aho he mouiaga nai’ ma e “tau mena kehekehe,” tuga e gahua evagelia, fakaako fakatagata, mo e o ke he tau feleveiaaga Kerisiano.—Efeso 5:16; Filipi 1:10.

Ha ko e lahi he uaina ne foaki e Iesu, kua tuga ko e mauhoana mahuiga lahi a ia i Kana. Pete ia, kia mauokafua a tautolu kua nakai miha e magaaho ia mo e nakai fakaaoga kelea he tau tagata e kava tuga ne taute he falu a mauhoana Iutaia. (Ioane 2:10) Iloa moli fefe e tautolu e mena nei? Ha kua fano e Iki ko Iesu Keriso ki ai. Mai he tau tagata oti, ko Iesu ni ne mua e fakaeneene ke omaoma ke he poakiaga he Atua hagaao ke he feoaki kelea: “Ua eke a koe mo taha ia lautolu kua inu lahi ke he uaina.”—Tau Fakatai 23:20.

Ha ko e mena ia, ka manako e hoa ke fai uaina po ke ha kava foki he mauhoana ha laua, kua lata ia laua ke taute taha fakaholoaga ke fai tagata pulotu ke leveki fakamitaki e fahi ia. Mo e ka manako a laua ke fai leo kofe, lata ia laua ke fifili e tau leo fakatagitagi kua lata mo e fekau taha tagata pulotu ke leveki e taogo he leo. Kua nakai lata he taha tagata uiina ke hau ke pule mo e ta fakahanoa e tau leo kofe po ke vivilo hake ki luga e taogo he kofe ke he leo kua nakai lata. Kaeke ke fai koli, kua lata ke taute ke he puhala lilifu mo e fai taofiaga. Kaeke fakaaoga he tau magafaoa tino nakai talitonu  po ke he tau Kerisiano nakai motua fakaagaga e tau lakaaga koli ne teteki po ke kalahi, liga lata he kitofaihoana ke hiki e leo kofe ia po ke tala age fakamitaki ke fakaoti e koli. Neke hokotia e mauhoana ke he miha mo e tupu ai e fakaloleloleaga.—Roma 14:21.

Ha kua foliga kelea falu he tau koli he vaha fou nei, taogo lahi e tau leo kofe, mo e tokanoa e inu kava, kua tokologa e tau kitofaihoana Kerisiano ne fifili ke tiaki e tau vala ia he mauhoana ha lautolu. Falu kua tuhituhi ki ai ha ko e mena nei, ka kua lata ke nava ki a lautolu he manako ke kalo mai he ha mena ka ekefakakelea aki e higoa tapu he Atua. He taha fahi, ne taute he falu kitofaihoana e fakaholoaga ma e leo kofe kua lata, taha magaaho ke koli ai, mo e ke inu fakalatalata e kava. Ke he ha mena ni kua fakalago ke he kitofaihoana e mena ka fakaata e ia ke taute he hana mauhoana.

I Aferika ne fakavihia he falu Kerisiano nakai motua fakaagaga e tau mauhoana Kerisiano lilifu mo e talahau kua tuga e o ke he mauku. Ka e nakai ko e onoonoaga mitaki a ia. Liga ta mai he tau gahua agahala he tino e fiafia ku, ka e foaki he tau mena ia e loto manamanatu fuafua kelea ke he Kerisiano mo e fakakelea e higoa he Atua. (Roma 2:24) Ke he taha fahi, na fakatupu he agaga tapu he Atua e fiafia moli. (Kalatia 5:22) Tokologa e tau hoa Kerisiano kua fiafia ke liu nava ke he aho mauhoana ha lautolu, he iloa ko e magaaho fiafia a ia mo e nakai ko e “mena ke tupetupe ai.”—2 Korinito 6:3.

Kua manatu agaia e Welsh mo Elthea e tau navaaga he tau faoa tino nakai talitonu ne o atu ke he mauhoana ha laua. Ne talahau he taha: “Kua fiu tei a maua he tau mauhoana miha he vaha nei. Ko e mitaki ha ia ke o ke he mauhoana lilifu.”

Mua atu e aoga, ko e tau mauhoana Kerisiano fiafia mo e lilifu kua fakalilifu atu ke he Kamataaga he fakamauaga, ko Iehova ko e Atua.

[Puha/Fakatino he lau 22]

TAU MENA TOHI MA E TAONAGA

• Kaeke uiina e koe taha he faoa nakai talitonu ke lauga, kua pulega nakai e koe ke nakai talahau e ia falu aga fakamotu nakai Kerisiano?

• Ka ta e tau leo kofe, kua fifili nakai e koe e tau lologo kua lata?

• To fakalatalata nakai e taogo he tau leo kofe hau?

• Kaeke fai koli, to taute nakai ke he puhala lilifu?

• To inu fakalatalata nakai e kava?

• To tau taofi nakai e lautolu ne pulotu e inu he kava?

• Kua fakatoka nakai e koe e magaaho mitaki ke oti ai e taonaga?

• To ha ha ai nakai a lautolu ne pulotu ke leveki e mafola ato fakahiku ai?