Gana e Tau Tega he Kupu Moli he Kautu
Gana e Tau Tega he Kupu Moli he Kautu
“Kia gana e koe hāu a tau fua saito ke he magaaho pogipogi, ti aua neke okioki ai hāu a lima ke he afiafi.”—FAKAMATALAAGA 11:6.
1. Ko e puhala fe ne fa e gahua gana e tau Kerisiano he vaha nei?
KUA mahuiga e gahua fonua he kaufakalatahaaga Heperu i tuai. Ko e kakano haia ne fakaaoga e Iesu, ne nofo mau he Motu he Maveheaga ko e tagata, e tau mataulu tala hagaao ke he gahua fonua i loto he tau fakataitaiaga hana. Ke fakatai ki ai, ne fakatatai e ia e fakamatala he tala mitaki he Kautu he Atua ke he gana saito. (Mataio 13:1-9, 18-23; Luka 8:5-15) Ke hoko mai ke he vaha nei, pete he momoui a tautolu he kaufakalatahaaga gahua fonua po ke nakai, ke gana e tau tega fakaagaga he puhala nei ko e gahua aoga lahi a ia kua taute he tau Kerisiano.
2. Kua aoga fefe e gahua fakamatala ha tautolu, ti ko e heigoa falu mena ne kua taute hagaao ki ai he vaha nei?
2 Ko e kotofaaga ne mua a ia ke fakalataha ke gana e kupu moli he Tohi Tapu he vaha fakamui nei. Ne talahau fakamitaki ia Roma 10:14, 15 e aoga he gahua nei: “Ka e fanogonogo atu fefe a lautolu, ka nakai fai tagata ke fakamatala atu? Ka e fakamatala atu fefe e tau tagata, kaeke ke nakai fekau atu a lautolu ki ai? Tuga he tohi mai, Kua fulufuluola ni e tau hui ha lautolu kua ta mai e tala mitaki ke he monuina, ko lautolu kua ta mai e tala ke he tau mena mitaki.” Kua nakai la fai gahua pihia tali mai, ke peehi atu ki mua fakalataha mo e agaga mitaki ke fakamoli e poakiaga mai he Atua. Ko e kakano ia ati putoia lahi e Tau Fakamoli a Iehova ke lomi mo e tufatufa e tau Tohi Tapu mo e tau tohi lagomatai ke fakaako e Tohi Tapu ke he 340 e vagahau. Ke tauteute e tau tohi nei kua molea e 18,000 he tau tagata gahua noa he tau matapatu fale ha lautolu mo e he tau la ofisa he tau motu kehekehe. Mo e teitei ke totou ono miliona e Tau Fakamoli ne tufatufa e tau tohi faka-Tohi Tapu nei he lalolagi katoa.
3. Ko e heigoa kua fakakatoatoa ha kua gana e kupu moli he Kautu?
3 Ko e heigoa mogoia e fua he gahua lahi nei? Ke tuga he vaha fakapa he faka-Kerisiano, kua tokologa hane talia e kupu moli he vaha nei. (Gahua 2:41, 46, 47) Ka kua muatua e aoga ke he numera lahi he tau tagata fakailoa he Kautu ne papatiso fou laia, ko e mailogaaga he gahua fakamatala lahi nei ke he fakatapuaga he higoa a Iehova mo e ke he fakapuloaaga hana ko e Atua moli hokoia. (Mataio 6:9) Mua atu, kua fakatolomaki he iloilo ke he Kupu he Atua e tau momoui he tokologa mo e tataki atu ke he fakamouiaga ha lautolu.—Gahua 13:47.
4. Kua laulahi fefe e kapeletu he tau aposetolo hagaao ke he tau tagata ne fakamatala a lautolu ki ai?
4 Kua mua e mataala he tau aposetolo ke he foaki-moui he aoga he tala mitaki, ti lahi e fakaalofa ha lautolu ma e tau tagata ne fakamatala a lautolu ki ai. Kua kitia maali e mena nei mai he tau kupu he aposetolo ko Paulo, he magaaho ne tohia e ia: “Ne hofihofi pihia ha mautolu a fakaalofa kia mutolu, ne fiafia a mautolu ke ta atu kia mutolu, nakai kuenaia e vagahau mitaki he Atua, ka e katoa foki mo e moui ha mautolu, ha kua ofania e mautolu a mutolu.” (1 Tesalonia 2:8) He fakakite e kapeletu moli pihia ma e tau tagata, kua fifitaki e Paulo mo e falu aposetolo a Iesu mo e tau agelu he lagi, ne kua lahi foki e putoiaaga ke he gahua fakamoui nei. Kia liu a tautolu ke kikite atu ke he matagahua aoga lahi he tau fekafekau nei he lagi he Atua he gana e kupu moli he Kautu, mo e kia kitia ai e tautolu e puhala ne fakamalolo he tau fakafifitakiaga ha lautolu a tautolu ke fakamoli e matagahua ha tautolu.
Iesu—Ko e Tagata Gana he Kupu Moli he Kautu
5. Ko e gahua fe ne lavelave lahi a Iesu ki ai he magaaho ne nofo a ia he lalolagi?
5 Ko Iesu, ko e tagata mitaki katoatoa, kua ha ha ia ia e malolo ke foaki e tau mena mitaki he puhala fahitino ma e tau tagata he vaha hana. Ke fakatai ki ai, kua maeke ia ia ke foaki e tali ke he tau manatu hehe loga he fahi ekekafo he vaha hana, po kua maeke ia ia ke fakatolomaki ki mua e maamaaga he tagata ke he falu a puhala fakasaiene. Ka kua fakamaaliali mai e ia he mogo fakapa he fekafekauaga hana, ko e poakiaga hana ke fakamatala e tala mitaki. (Luka 4:17-21) Ti, ke he matahiku he fekafekauaga hana, ne fakamaama e ia: “Ko e mena hanai ne fanau mai ai au, mo e hau ai au ke he lalolagi, kia talahau e au e kupu moli.” (Ioane 18:37) Ati taute ai e ia e gahua ke gana e tau tega he kupu moli he Kautu. Ke fakaako e tau tagata hagaao ke he Atua mo e tau finagalo Hana kua mua atu e aoga ke he ha fakaakoaga foki kua maeke ia Iesu ke foaki ki a lautolu.—Roma 11:33-36.
6, 7. (a) Ko e heigoa e maveheaga ne mua ne taute e Iesu ato haele hake a ia ke he lagi, ti fakamoli fefe e ia? (e) Kua lauia fefe a koe he agaga ha Iesu ke he gahua fakamatala?
6 Ne hagaaki a Iesu ki a ia ni ko e Tagata Gana he kupu moli he Kautu. (Ioane 4:35-38) Ne fakaholofa e ia e tau tega he tala mitaki he tau magaaho oti. Pete ni kua teitei mate a ia ki luga he akau fakatautau, ne fakapuloa e ia e tala mitaki hagaao ke he parataiso he lalolagi he vaha anoiha. (Luka 23:43) Ka ko e tupetupe lahi hana, ke nakai fakaoti e fakamatala he tala mitaki mo e mate hana i luga he akau fakatautau. Fakamua to haele hake a ia ke he lagi, ne poaki a ia ke he tau tutaki hana ke fakatumau ke gana e tau tega he kupu moli he Kautu mo e ke taute tutaki. Mogoia ne taute e Iesu e maveheaga ne mua. Ne talahau e ia: “Kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.”—Mataio 28:19, 20.
7 Mo e tau kupu nei ne taute e Iesu e fakamoliaga ke lagomatai, takitaki, mo e puipui e gahua fakamatala he tala mitaki “ke he tau aho oti, ato hoko ni ke he fakaotiaga he lalolagi.” Ke hifo mai ke he vaha nei ha tautolu, ne fakatumau a Iesu ke fakakite e fiafia hana ke he gahua evagelia. Ko ia ko e Takitaki ha tautolu, he muamua ke gana e kupu moli he Kautu. (Mataio 23:10) Ko e Ulu he fakapotopotoaga Kerisiano, kua talatala atu a ia ki mua a Iehova ma e gahua he lalolagi katoa nei.—Efeso 1:22, 23; Kolose 1:18.
Kua Fakapuloa he Tau Agelu e Tala Mitaki
8, 9. (a) Kua fakakite fefe he tau agelu e fiafia moli ke he tau gahua he tau tagata? (e) Ko e puhala fe ne kua ui a tautolu ko e tau tagata ne kitekite ki ai e tau agelu?
8 He magaaho ne tufugatia e Iehova e lalolagi, ne “lologo fakalataha . . . mo e kalaga fiafia” e tau agelu. (Iopu 38:4-7) Tali mai he magaaho ia, kua fakakite he tau mena momoui nei he lagi e fiafia lahi ke he tau gahua he tagata. Ne fakaaoga e Iehova a lautolu ke talahau e tau fakailoaaga ke he tau tagata. (Salamo 103:20) Kua moli lahi e mena nei he hagaao atu ke he fakapuloa he tala mitaki he vaha ha tautolu. He fakakiteaga ne age ki a ia, ne kitia he aposetolo ko Ioane “taha agelu kua lele ke he pulagi” ne “ha ia ia e vagahau mitaki tukulagi ke fakamatala atu kia lautolu kua nonofo ke he lalolagi, mo e tau motu kehe oti, mo e tau magafaoa, mo e tau vagahau kehekehe mo e tau motu. Kua pehe atu mo e leo lahi, Kia matakutaku a mutolu ke he Atua, mo e ta age kia ia e fakahekeaga, ha kua hoko mai e magaaho he hana fakafiliaga.”—Fakakiteaga 14:6, 7.
9 Ne hagaaki e Tohi Tapu ke he tau agelu ko e “tau agaga ke fekafekau ai a lautolu oti, kua fakafano mai a lautolu ke fekafekau ma lautolu ke moua ai e moui.” (Heperu 1:14) He fakamakai e tau agelu ke he tau matagahua kotofa ha lautolu, kua tuku ki a lautolu e magaaho ke kitekite mai ki a tautolu mo e ha tautolu a tau gahua. Kua tuga haia hane taute tala i mua, ne taute e tautolu e tau gahua ha tautolu i mua he toloaga tagata he lagi. (1 Korinito 4:9) Kua fakatotoka mo e fiafia ha ia ke iloa nakai ni ko tautolu hokoia e tau tagata gana he kupu moli he Kautu!
Fakamakai a Tautolu ke Fakamoli ha Tautolu a Matagahua
10. Kua hagaao fefe e tomatomaaga ia Fakamatalaaga 11:6 ke he gahua evagelia ha tautolu?
10 Ko e ha ne fiafia lahi ai a Iesu mo e tau agelu ke he tau gahua ha tautolu? Ne mai e Iesu taha kakano he magaaho ne talahau e ia: “Kua tala atu e au kia mutolu, pihia ni e fiafia ha i ai ki mua he tau agelu he Atua, ha ko e tagata hala tokotaha kua tokihala.” (Luka 15:10) Kua olioli foki e tautolu e fiafia moli ia ke he tau tagata. Ko e mena ia, hane taute e tautolu e mena kua fahia a tautolu ke fakaholofa e tau tega he kupu moli he Kautu ke he tau matakavi oti. Kua maeke e tau kupu ia Fakamatalaaga 11:6 ke hagaao foki ke he tau gahua ha tautolu. Ne tomatoma mai e Tohi Tapu ki a tautolu: “Kia gana e koe hāu a tau fua saito ke he magaaho pogipogi, ti aua neke okioki ai hāu a lima ke he afiafi; he nakai iloa po ke mena fe ke monuina, po ke mena nai, po ke mena na, po ke fakatau mitaki ai e na mena ua ia.” Ka ko e moli hanei, ko e tau tagata oti ne talia e ogo ha tautolu liga kua ha ha ai e totou teau po ke totou afe foki ne fakaheu ai. Ka ke tuga e tau agelu, kua fiafia a tautolu ka ‘tokotaha ni e tagata hala’ ne talia e ogo he fakamouiaga.
11. Kua lauia fefe e fakaaogaaga he tau tohi fakave ke he Tohi Tapu?
11 Kua lahi mahaki e gahua ke he fakamatala he tala mitaki. Taha e lagomatai aoga lahi he gahua nei ko e tau tohi lomi ne fakave ke he Tohi Tapu kua fakaaoga he Tau Fakamoli a Iehova. Ke tuga ia, ko e tau tohi nei kua tuga e tau tega ne holofa ke he tau matakavi oti. Kua nakai iloa e tautolu ko e mena fe ke tomafola ai e tau tohi nei. He falu magaaho liga kua fakaholoholo e tohi mai he taha tagata ke he taha tagata ato fakahiku ke fai tagata ka totou ai. Liga kua fakatupu foki e Iesu mo e tau agelu he falu magaaho e tau mena nei ke aoga ai a lautolu ne loto tututonu. Kia onoono ke he falu mena tutupu ke fakakite e puhala ne maeke ia Iehova ke taute e tau fua homo ue atu mo e tau fua kua nakai amanaki ki ai he fakaaoga e tau tohi ne toka hifo mo e tau tagata.
Ko e Gahua he Atua Moli
12. Kua eke fefe taha mekasini tuai ke lagomatai taha magafaoa ke o mai ke iloa a Iehova?
12 He 1953, ko Robert, Lila, mo e fanau ha laua ne hiki mai he taone lahi ke he fale popo he faama he matakavi mamao i Pennsylvania, U.S.A. Nakai leva he hiki mai, ne manako a Robert ke ta e poko koukou i lalo he tau sitepe i loto he fale. He uta kehe falu lapa, ne kitia e ia i tua he kaupa e tau laupepa ne uta he tau kuma ki loto, tau gati kola, mo e falu a veve foki. I loto, ha ha ai e lagaki he mekasini The Golden Age. Kua fiafia lahi a Robert ke he vala tala hagaao ke he feakiaga he fanau. Kua nava lahi a ia ke he hatakiaga maaliali ne fakave ke he Tohi Tapu i loto he mekasini, ne tala age a ia ki a Lila kua matutaki ne fai a laua “ke he lotu he The Golden Age.” Gahoa ni e fahi tapu he mole, ne o mai e Tau Fakamoli a Iehova ke he gutuhala ha laua, ka e tala age a Robert kua fiafia ni e magafaoa “ke he lotu he The Golden Age.” Ne fakamaama age he Tau Fakamoli kua fakafou tuai e mataulu he The Golden Age he mogonei ke he Awake! Ne kamata a Robert mo Lila ke fakaako Tohi Tapu tumau mo e Tau Fakamoli, ti fakahiku a laua ke papatiso. Ati gana e laua e tau tega he kupu moli ke he fanau ha laua mo e lahi e monuina. He magaaho nei, kua molea 20 e tagata he magafaoa nei, katoa mo e fanau tokofitu ha Robert mo Lila, ko e tau fekafekau papatiso ha Iehova ko e Atua.
13. Ko e heigoa ne omoi aki e hoa i Pueto Riko ke feaki e fiafia ke he Tohi Tapu?
13 Kavi ke 40 e tau tau i tuai, ko William mo Ada, ko e hoa mau mai i Pueto Riko, kua nakai fiafia ke fakaako e Tohi Tapu. Ka nokonoko e Tau Fakamoli a Iehova he gutuhala ha laua, ne fakapikopiko a laua ke nakai nonofo i kaina. Taha aho ne finatu a William ke he taha mena ne fakape ai e tau koloa tuai ke fakatau taha mena ma e kaina. He amanaki a ia ke liu, ne kitia e ia e tohi lanu fua futi i loto he pa toka veve mahaki. Ko e tohi Religion, ne lomi fakailoa he Tau Fakamoli a Iehova he 1940. Ne uta e William e tohi ti fiafia lahi ke totou hagaao ke he kehekehe he vahaloto he lotu fakavai mo e lotu moli. He liliu e Tau Fakamoli a Iehova, kua fiafia a William mo Ada ke fanogonogo ke he ogo he Tau Fakamoli mo e kamata ke fakaako Tohi Tapu mo laua. Fai mahina he mole ne papatiso a laua he Toloaga he Lalolagi Katoa Finagalo Faka-Atua he 1958. Tali mai he magaaho ia, ne lagomatai e laua ke molea 50 e tagata ke eke mo vala he fakamatakainaga Kerisiano ha tautolu.
14. Tuga ne fakakite he mena ne tupu, ko e heigoa e amaamanakiaga ne tokai he tau tohi fakave ke he Tohi Tapu ha tautolu?
14 Ko Karl kua 11 laia e tau hana he moui mo e mahani matahavala. Ti mailoga e ia kua tuga kua fa taute lekua tumau a ia. Ko e matua tane hana, ko e faifeau he lotu Mefotisi Sihamani, ne tala age ki a ia na tugi e tau tagata kelea i helo ka mole e mate. Ti kua lahi e matakutaku ha Karl he helo. He taha aho he 1917, ne lagaki hake e Karl e lautohi he puhala tu. He totou ai e ia, ne fakahela mafiti e tau mata hana ke he huhu: “Ko e heigoa e helo?” Ko e lautohi ko e uiina ke he lauga ma e toloaga tagata hagaao ke he helo, ne foaki he Tau Tagata Fakaako Tohi Tapu, kua iloa he vaha nei ko e Tau Fakamoli a Iehova. Kavi ke taha e tau he mole, he lagaloga e fakaako ke he Tohi Tapu, ne papatiso a Karl, ati eke ai mo taha he Tau Tagata Fakaako Tohi Tapu. He 1925 ne uiina a ia ke gahua he tau matapatu fale he Tau Fakamoli a Iehova he lalolagi—ne fekafekau agaia ai a ia. Kua kamata ai e feua Kerisiano ke molea valu e tau hogofulu tau ha ko e lautohi he puhala tu.
15. Ko e heigoa kua maeke ia Iehova ke taute ke he puhala ne kitia e ia?
15 Moli, kua nakai fakai e tagata ke iloa ko e lahi fefe e putoiaaga he tau agelu ke he tau mena tutupu nei. Pete ia, kua nakai lata ia tautolu ke fakauaua kua gahua lahi a Iesu mo e tau agelu ke he gahua fakamatala mo e maeke ia Iehova ke fakataki e tau mena tutupu ke he puhala ne kitia e ia. Kua fakakite he tau mena nei mo e falu mena tutupu pihia foki e amaamanakiaga mitaki ma e tau tohi ha tautolu he magaaho ka toka ai e tautolu mo e falu.
Kua Foaki Mai ki a Tautolu e Koloa Uho
16. Ko e heigoa ka iloa e tautolu mai he tau kupu he 2 Korinito 4:7?
16 Ne vagahau e aposetolo ko Paulo hagaao ke he “koloa nai ke he tau kapiniu kelekele.” Ko e koloa ia ko e poakiaga mai he Atua ke fakamatala, mo e ko e tau kapiniu kelekele ko e tau tagata ne foaki age e Iehova e koloa nei. Ha kua nakai mitaki katoatoa mo e ukiuki e tau tagata ia, ne fakaholo atu a Paulo ke talahau ko e fua he foaki ki a lautolu e poakiaga ia ko e ‘malolo lahi ue atu he Atua nakai mai ia mautolu.’ (2 Korinito 4:7) E, kua lata ia tautolu ke falanaki ki a Iehova ke foaki mai e malolo kua lata ke maeke ia tautolu ke fakakatoatoa e gahua.
17. Ko e heigoa ka fehagai mo tautolu he gana e tautolu e tau tega he kupu moli he Kautu, mo e ko e ha kua lata ia tautolu ke tumau e agaga mitaki?
17 Fa mahani ke taute e tautolu e tau foaki noa. Liga foki kua nakai hagahaga mitaki po ke nakai lata ke gahua he falu a matakavi. Ko e tau matakavi anei ne kelea muikau e mahani he laulahi he tau tagata, mo e favale lahi foki. Lahi ai e gahua kua fakamole ke he tau matakavi pihia ka e nakai kitia ha monuina. Ka kua aoga lahi e tau gahua ha tautolu mahomo atu ka loga e tau mena fakahagahaga kelea ne ha ha ai. Kia manatu, kua maeke he tau tega ne gana e tautolu ke fakafiafia aki e tau tagata he mogonei pihia foki e moui tukulagi he vaha anoiha. Kua lagaloga e fakamoli he tau kupu ia Salamo 126:6: “Ko ia ke fina atu mo e tagi, kua uta e saito ke gana, to liu mai ni a ia mo e kalaga fiafia, kua fua mai hana tau pega saito.”
18. Ko e ha kua lata ia tautolu ke mailoga mitaki e fekafekauaga ha tautolu, mo e ko e ha kua lata ke pihia ai?
18 Kia kumi e tautolu e magaaho kua lata ke gana fakamokoi e tau tega he kupu moli he Kautu. Kia nakai nimo e tautolu e mena ia, ha kua pete ni hane to mo e fakamalu e tautolu e tau tega, ka ko Iehova ni kua fakatutupu ai. (1 Korinito 3:6, 7) Ka e tuga ni he fakakatoatoa e Iesu mo e tau agelu e gahua ha lautolu, kua amanaki mai a Iehova ki a tautolu ke fakakatoatoa e fekafekauaga ha tautolu. (2 Timoteo 4:5) Kia mailoga mitaki e tautolu ha tautolu a fakaakoaga, ha tautolu a agaga, mo e ha tautolu a fakamakai ke he fekafekauaga. Ko e ha? Ne tali e Paulo: “Ha ko e mena ka eke e koe e mena ia ti fakamoui ai e koe a koe, katoa mo lautolu kua fanogonogo kia koe.”—1 Timoteo 4:16.
Ko e Heigoa ne Ako e Tautolu?
• Ko e puhala fe kua tupu mitaki ai e gahua gana ha tautolu?
• Kua putoia fefe a Iesu Keriso mo e tau agelu ke he gahua evagelia he vaha nei?
• Ko e ha kua lata a tautolu ke fakamokoi ko e tau tagata gana he kupu moli he Kautu?
• He magaaho ka fehagai a tautolu mo e mahani kelea mania po ke favale he fekafekauaga ha tautolu, ko e heigoa ka omoi a tautolu ke fakauka?
[Tau Huhu he Fakaakoaga]
[Fakatino he lau 25]
Ke tuga e tau tagata gahua fonua i Isaraela i tuai, kua fakaholofa fakamokoi he tau Kerisiano e tau tega he kupu moli he Kautu he vaha nei
[Fakatino he lau 26, 27]
Kua lomi mo e tufatufa he Tau Fakamoli a Iehova e tau tohi loga ne fakave ke he Tohi Tapu ke he 340 e vagahau