Moua Nakai e Koe e Mafola he Loto?

He 1854, ne tohi he tagata tohia i Amerika ko Henry Thoreau: “Kua takitaki he tau tagata tokologa e tau momoui fakaatukehe.”

Kitia maali ai, kua nakai olioli he laulahi he tau tagata he vaha hana e mafola he loto. Ka kua teitei a ia ke 150 e tau tau he mole. Kua kehe kia e tau tutuaga he vaha nei? Po kua moli agaia e tau kupu ha Thoreau? Ka e kua mogoia a koe? Kua mauokafua, loto mafola nakai a koe? Po kua tuaha lahi a koe, nakai mauoka ke he vaha anoiha, kua “fakaatukehe,” ke liu fatiaki e tau kupu ha Thoreau?

NAKAI fiafia, kua loga e tau mena he lalolagi ne fofo e mafola he loto he tau tagata. Kia totoku ni e tautolu falu. He tau motu loga kua fakatupu he nakai fai gahua mo e tote e tupe e mativa mo e lafi ki ai ko e fakaatukehe he ekonomiki. He falu motu kua fakaaoga he tokologa e lahi he magaaho ha lautolu ke tutuli tupe mo e tau koloa loga. Ka e, fa mahani ni ke lafi ke he moui fetoko ko e loto fakaatukehe, nakai ko e mafola. Kua fofo foki he tau gagao, felakutaki, holifono, nakai fakamoli, mo e ekefakakelea e tau tagata mai he mafola.

Kumi e Lautolu e Mafola i Loto

Kua tokologa ne nakai manako ke fakauka ke he lalolagi pehenei. Ko Antônio * ko e takitaki gahua he fale gahua mahaki i São Paulo, i Parasili. He amanaki ke fakalaukauka e tau tutuaga nonofo, ne fakalataha a ia ke he tau fakaholoaga mo e tau fakatataaga totoko, ka kua nakai ta mai he mena nei e mafola he loto.

Ka kua amanaki falu to ta mai he fakamauaga taha mafola ke he moui ha lautolu, ka e liga ni ke fakaatukehe. Ko Marcos ko e tagata pisinisi monuina. Ne matutaki atu a ia ke he tau mena fakapolitika mo e eke a ia mo tupule he taone fakatu gahua. Pete ni ia, kua matematekelea lahi e moui hana i kaina. He magaaho ne o kehe mai e fanau i kaina, ne vevehe a ia mo e hana hoana ha ko e tau fekehekeheaki lalahi.

Ko Gerson, ko e tama nofo puhala tu i Salvador, i Parasili, ne lahi e makaka. Ne fenoga atu a ia he taha taone ke he taha taone mo e tau tagata fakaholo tulaki. Nakai leva ne hufia lahi a ia ke he tau vai tulaki, ti  kaiha mai he tau tagata ke totogi aki e hufia hana. Lagaloga e magaaho ne tapaki he tau leoleo a ia. Ka e pete ni ko e mahani ita mo e vale, ne manako lahi a Gerson ma e mafola he loto. Ka to moua nakai e ia?

Ko e matua fifine fuata agaia a Vania he mogo ne mate e matua fifine hana, ti kua hili ki a Vania e levekiaga he kaina, fakalataha mo e mahakitaga gagao hana. Ne fano a Vania he tapu ka e logona hifo kua tiaki he Atua a ia. Kua nakai ni fai mafola a ia he loto.

Ha ha ai foki a Marcelo. Kua manako ni a Marcelo ke fiafia tumau. Ne manako a ia ke fiafia mo e falu a fuata—ke koli, inu kava, mo e fakaaoga kelea a tau tulaki. Taha mogo ne tau a ia ti fakapakia e ia taha fuata. He mole atu, ne logona hifo e ia e agahala ke he mena ne taute e ia mo e liogi ke he Atua ma e lagomatai. Kua manako foki a ia ma e mafola he loto.

Ko e tau mena tutupu nei kua fakakite mai falu a tutuaga ka fakakelea aki e mafola he loto. Ha ha ai nakai ha puhala ke moua he takitaki gahua, he tagata politika, he tama he puhala tu, he tama fifine gahua lahi, mo e tagata manako fiafia tumau, e mafola he loto ne kumi e lautolu? Fai mena nakai ne ako e tautolu ha ko e tau mena ne tutupu ki a lautolu? Ko e tali ke he tau huhu ua ia ko e e, tuga ka kitia e tautolu he vala tala ka mui mai.

[Matahui Tala]

[Fakatino he lau 3]

Manako nakai a koe ma e mafola he loto?