Tau Fakafifitakiaga Mitaki—Aoga Nakai a Koe Mai ia Lautolu?

“KUA uta ai a mutolu mo fakafifitakiaga kia lautolu oti kua tua ha i Maketonia, katoa mo Akaia.” Ne tohi he aposetolo ko Paulo e tau kupu nei ke he tau Kerisiano tua fakamoli ne nonofo i Tesalonia. Ne nava moli e fakafifitakiaga ne fakatoka e lautolu ma e tau matakainaga talitonu. Ka e talia agaia ni e lautolu ko e tau Tesalonia e fakafifitakiaga ne fakatoka e Paulo mo e hana tau hoa. Ne pehe a Paulo: “Ko e mena nakai hoko atu ha mautolu a vagahau mitaki kia mutolu, ko e kupu hokoia, ka ko e malolo, mo e Agaga Tapu, katoa mo e maliali ni, ha kua iloa e mutolu ha mautolu a mahani ha ko mutolu, he nofo ai a mautolu mo mutolu; ne fifitaki mai foki a mutolu kia mautolu.”—1 Tesalonia 1:5-7.

E, ne nakai ni fakamatala e Paulo e tau lauga. Ko e moui katoa hana ko e tagata lauga—ko e fakafifitakiaga he tua, fakauka, mo e poa ne ia a ia. Ha ko e mena nei, ne eke ai a Paulo mo e tau hoa hana mo tau fakaohoohoaga malolo ke he tau momoui he tau tagata Tesalonia, he omoi a lautolu ke talia e kupu moli i lalo he “matematekelea lahi.” Ka e nakai ni ko Paulo mo e hana kau gahua e tau fakaohooho mitaki ke he tau tagata talitonu. Ko e fakafifitakiaga he falu ne fakauka ke he matematekelea kua fakamalolo foki. Ne tohi a Paulo ke he tau Tesalonia: “Ha ko e mena, ko e tau matakainaga na e, kua fifitaki a mutolu ke he tau ekalesia he Atua i Iutaia ha ha ia Keriso Iesu; ha kua mamahi foki a mutolu he tau mena ne eke he tau tagata he motu ha mutolu, tuga ne mamahi foki a lautolu he tau tagata Iutaia.”—1 Tesalonia 2:14.

Keriso Iesu—Ko e Fakafifitakiaga Mua Ue Atu

Pete ni na fakatoka e Paulo e fakafifitakiaga uho ke fifitaki, ne nakai kaumahala a ia ke fakakite ko e matapatu fakafifitakiaga a Iesu Keriso nukua lata he tau Kerisiano ke muitua. (1 Tesalonia 1:6) Ko e Fakafifitakiaga mua ue atu ha tautolu a Keriso. Ne tohi he aposetolo ko Peteru: “Ko e mena ia ni kua ui ai a mutolu; ha ko e mena ne mamahi a Keriso ni ma mutolu, ti toka ai e ia e fakafifitaki ma mutolu, kia mumui atu a mutolu ke he hana tau tuagahui.”—1 Peteru 2:21.

Pete ia, ne toka e Iesu e moui hana ko e tagata he teitei ke 2,000 e tau tau kua mole. Ko ia mogonei kua “haele ke he maama nakai fakatata ki ai” ko e moui fakaagaga nakai maeke ke mate. Tuga a ia, “kua nakai kitia a ia he taha tagata, ti nakai maeke foki ke kitia ai.” (1 Timoteo 6:16) Ti maeke fefe ia tautolu mogoia ke fifitaki a ia? Taha puhala he fakaako e tau fakamauaga ne fa he Tohi Tapu ke he moui a Iesu. Kua foaki he tau Evagelia e maamaaga ke he hana aga, puhala moui, mo e “manatu.” (Filipi 2:5-8) Ko e maama lafi ka moua foki he fakaako fakamitaki e tohi The Greatest Man Who Ever Lived, ne fakatutala fakamatafeiga mo e fakapapahi ai ke he tau mena tutupu he moui a Iesu. *

Ko e fakafifitakiaga ne foaki e Iesu a ia ni kua  malolo lahi e lauiaaga ke he aposetolo ko Paulo. Ne tala age a ia ke he tau Kerisiano Korinito: “Ka kua lahi haku a fiafia ke fakaoti au mo e fakaotioti au ha ko e tau agaga ha mutolu.” (2 Korinito 12:15) Ko e aga a ia tuga ha Keriso! He manamanatu a tautolu ke he fakafifitakiaga mitaki katoatoa ha Keriso, kua lata foki a tautolu ke fifitaki a ia ke he puhala moui ni ha tautolu.

Tuga anei, ne fakaako e Iesu a tautolu kua lata ia tautolu ke falanaki ke he maveheaga he Atua ke foaki e levekiaga tino. Ka e lahi atu e mena ne taute e ia ki ai. Ne fakatata e ia e tua mo e mauokafua pihia ia Iehova he tau aho takitaha. Ne pehe a ia: “Na fai ofaga e tau alope, ne fai mena foki ke momohe ai e tau manu lele, ka ko e Tama he tagata nakai fai mena a ia ke mohe ai.” (Mataio 6:25; 8:20) Tanumia kia he tau tupetupe he levekiaga tino hau a manamanatuaga mo e tau gahua? Po ke fakakite he moui hau kua hane kumi fakamua e koe e Kautu? Ka e kua e aga hau ke he fekafekauaga a Iehova? Pihia nakai ha tautolu a Fakafifitakiaga, ko Iesu? Kua fakakite he Tohi Tapu ne nakai fakamatala fakamalolo hokoia a Iesu ka e fakatata foki e fakamalolo makimaki ke he tau magaaho loga. (Ioane 2:14-17) Lafi atu ai, ko e fakafifitakiaga a ia ne fakatoka e Iesu he magaaho he fakaalofa! Ne poa ni e ia hana moui ma e tau tutaki hana! (Ioane 15:13) Fifitaki nakai e koe a Iesu he fakakite e fakaalofa ke he tau matakainaga Kerisiano hau? Po ke fakaata e koe e tau nakai mitaki katoatoa he falu ke fakatauhele aki hau a fakaalofa ma lautolu?

He lali a tautolu ke muitua e fakafifitakiaga he Keriso, to fa veveli fakaku a tautolu. Ka kua fakaaue moli a Iehova ke he tau laliaga ha tautolu ke “fakatapulu . . . ke he Iki, ko Iesu Keriso.”—Roma 13:14.

“Tau Fakafifitaki ke he Fuifui Mamoe”

Ha ha i ai nakai e tau tagata he fakapotopotoaga he vaha nei kua eke mo tau fakafifitakiaga ma tautolu? Moli ha ha i ai! Ko e tau matakainaga tane ne ha ha i ai ke he tau tutuaga fakauku he tau matagahua kua lata pauaki ke fakatoka e fakafifitakiaga. Ne tala age a Paulo ki a Tito, ne fekafekau ke he tau fakapotopotoaga i Kereta mo e kotofa he tau leveki, kia igatia e motua kua fakauku he lata mo “taha kua nakai talahaua kelea.” (Tito 1:5, 6) Ne fakamafana pihia he aposetolo ko Peteru e “tau patu” ke eke mo “tau fakafifitaki ke he fuifui mamoe.” (1 Peteru 5:1-3) Ka e kua a lautolu kua eke mo tau fekafekau lagomatai? Kua lata ke pihia foki a lautolu ko “lautolu kua eke fakamitaki e feua he tiakono.”—1 Timoteo 3:13.

Moli, nakai tonu ke amaamanaki ke he tau motua po ke fekafekau lagomatai takitaha ke mahomo atu e pulotu ke he tau fahi oti he fekafekauaga Kerisiano. Tala age a Paulo ke he tau Kerisiano i Roma: “Kua kehekehe foki e tau mena kua tufatufa mai kia tautolu he fakaalofa noa kua foaki mai kia tautolu.” (Roma 12:6) Igatia e tau matakainaga tane mo e mitaki lahi he tau fahi kehekehe. Nakai mitaki ke amanaki ke he tau motua ke taute mo e talahau e tau mena ke he puhala mitaki katoatoa. “Ko e tau mena loga kua hehe ai a tautolu oti,” he talahau he Tohi Tapu ia Iakopo 3:2. “Kaeke kua nakai hehe taha ke he kupu, ko e tagata mahani mitaki katoatoa a ia, to maeke foki ke taofi e tino oti.” Pete ni ha lautolu a tau nakai mitaki katoatoa, maeke agaia ni e tau motua ke tuga a Timoteo, “kia eke . . . mo fakafifitaki kia lautolu kua tua ke he kupu, mo e mahani, mo e fakaalofa, mo e loto mo e tua, katoa mo e loto mea.” (1 Timoteo 4:12) Ka taute pihia he tau motua, ko lautolu he fuifui to mautali ke fakagahua e fakamafanaaga he Heperu 13:7: “Kia manamanatu e tau takitaki ha mutolu, . . . kia  fifitaki a mutolu ha lautolu a tua, mo e manamanatu e fakahikuaga he tau mahani ha lautolu.”

Falu Fakafifitakiaga Foki he Vaha Fou Nei

He tau hogofulu tau gahoa kua mole, kua tokologa foki e falu ne fakakite a lautolu ke eke mo tau fakafifitakiaga mitaki. Ka e kua e tau misionare tokoafe ne foaki ne lautolu a lautolu he “toka e taha e tau fale, po ke tau matakainaga, po ke lafu mahakitaga, po ke matua tane, po ke matua fifine, po ke hoana, po ke tau fanau, po ke tau kaina” ke fakamoli e poakiaga Kerisiano he tau motu kehe? (Mataio 19:29) Manamanatu foki ke he tau leveki faifano mo e tau hoana ha lautolu, ko e tau tagata tane mo e tau fifine ne fekafekau ko e tau tagata gahua noa ke he tau ofisa he Sosaiete he Kolo Toko, mo e tau paionia kua fekafekau ke he tau fakapotopotoaga. Maeke nakai he tau fakafifitakiaga pihia ke omoomoi e falu? Taha e uta fekau Kerisiano i Asia ne manatu e misionare he vahega ke valu aki he Aoga Tohi Tapu he Kolo Toko a Kiliata. Ne pehe a ia ko e matakainaga tua fakamoli nei ne “makau ke fehagai mo e tau namu mo e matagi vevela. . . . Nava lahi agaia au ke he lotomatala hana ke taute e tau fakafeleveiaaga ke he tau vagahau Saina mo e Malau pete ni ko e tagata Igilani a ia.” Ko e fua he fakafifitakiaga mitaki nei? Ne pehe e matakainaga tane: “Ko e totoka mo e mauokafua hana ne omoi au ke manako ke eke au mo misionare ka lahi.” Nakai ofo ai, ne eke e matakainaga nei mo misionare.

Kua toka ai he Watch Tower Publications Index e tau tala loga he tau momoui he tau tagata i loto he tau mekasini Watchtower mo e Awake! Kua talahau he tau tala nei a lautolu kua toka e tau feua mo e tau foliaga fakalalolagi, kautu mai he tau lolelole, mo e taute e tau hikihikiaga fakatagata, fakatumau e tuaga mitaki ke he tau totokoaga, mo e fakatata e mahani gahua fakamakamaka, fakauka, mahani fakamoli, fakatokolalo, mo e aga foaki ne ia a ia. Taha e tagata totou ne tohi hagaao ke he tau fakamauaga nei: “Kua taute he tau mena ia au mo Kerisiano fakatokolalo mo e fakaaue he totou e au e tau mena ne fita he tutupu ke he falu, ti kua lagomatai e lautolu au ke nakai manamanatu lahi mahaki ki a au ni po ke mahani lotokai.”

Lafi atu ai, kia nakai nimo e tau fakafifitakiaga mitaki he fakapotopotoaga ni hau: ko e tau ulu magafaoa ne fakatumau ke leveki e tau manako fakatino mo e fakaagaga he tau magafaoa ha lautolu; ko e tau matakainaga fifine—putoia e tau matua fifine takitokotaha—ne felauaki ke he tau pehiaaga he feaki tama ka e gahua tumau agaia ke he fekafekauaga; ko lautolu ne momotua mo e kulikuli kua fakatumau ke tua fakamoli pete ni e holo ki mua e lolelole lahi mo e tino matematekelea. Nakai kia omoomoi a koe ha ko e tau fakafifitakiaga pihia?

Fakamoli ai, kua puke e lalolagi he tau fakafifitakiaga kelea. (2 Timoteo 3:13) Moha ia, manamanatu ke he fakamafanaaga a Paulo ke he tau Kerisiano ne nonofo i Iuta. He mole e talahau he aga fakafifitaki he tau tagata tane mo e tau fifine he tua, ne fakamafana he aposetolo ko Paulo a lautolu: “Ha ko tautolu foki kua agaagai a tautolu ke he fakapotopotoaga ha lautolu kua kitekite mai kua tokologa pihia, kia . . . tafepoi fakauka a tautolu ke he poitufi kua toka ki mua ha tautolu, mo e kikite atu kia Iesu, ko e kamataaga mo e katoatoaaga he tua.” (Heperu 12:1, 2) Kua takai viko foki e tau Kerisiano he vaha nei he “fakapotopotoaga” he tau fakafifitakiaga mitaki—i tuai mo e ke he vaha fou nei. Kua aoga moli kia a koe mai ia lautolu? Maeke ia koe ka fifili a koe ke “aua neke fifitaki a koe ke he kelea, ka ko e mitaki.”—3 Ioane 11.

[Matahui Tala]

[Blurb he lau 31]

Nakai tonu ke amaamanaki ke he tau motua po ke fekafekau lagomatai takitaha ke mahomo atu e pulotu ke he tau fahi oti he fekafekauaga Kerisiano