Fiafia Tukulagi—He Lagi po ke Lalolagi?

FALANAKI katoatoa kia e fiafia hau ke he matakavi ne nofo ai a koe? Tokologa e tau tagata ka talahau fakamakai na falanaki lahi e fiafia ke he tau mena tuga e malolo tino mitaki, ko e kakano he moui, mo e tau fakafetuiaga mitaki mo e falu. Ko e fakatai he Tohi Tapu kua tuku pehenei: “Kua mua e mitaki e tufaaga he tau lakau kai, ne age mo e fakaalofa, ke he povi mai he fale povi ne age mo e fakavihia.”—Tau Fakatai 15:17.

Momoko ai, ko e kaina ha tautolu he lalolagi kua tali mai he fakamauaga tuai ke fakavihia, favale, mo e falu mahani kelea foki. Ka e kua e lagi, po ke takeleaga fakaagaga, nukua tokologa e tau tagata ne amaamanaki ke o ki ai ka mole e mamate ha lautolu? Ko e matakavi fiafia moli tumau mo e fulufuluola kia, nakai fai fakalavelave ke he ha mena taha, tuga ni he fa iloa ki ai?

Kua fakaako he Tohi Tapu kua nofo e Atua he lagi fakalataha mo e tau mena momoui fakaagaga ne totou miliona ne fakahigoa ko e tau agelu. (Mataio 18:10; Fakakiteaga 5:11) Ne fakamaama a lautolu nei ko e “tau tama tane [fakaagaga] oti he Atua.” (Iopu 38:4, 7) Tuga e tau tagata, kua ataina foki e fifiliaga he tau agelu; nakai ko e tau ropoto a lautolu. Mui mai mogoia, ko lautolu foki kua fifili ke taute e tau mena hako po ke taute e tau mena hepe. Fifili kia e tau agelu ke taute e tau mena hepe? Liga na fakaofo e falu ke iloa kua totou afe e tau he mole, ko e numera lahi he tau agelu ne agahala ke he Atua—he totoko a lautolu ki a ia!—Iuta 6.

Tau Momoui Totoko he Lagi

Kua hu mai e agahala ke he takeleaga fakaagaga ha kua totoko e agelu, ne ui ai ko Satani (Totoko) mo e Tiapolo (Fatipiko). Ko e agelu nei ne omaoma ke he taha magahala ne fifili ke taute e mena hepe he hana ni a fifiliaga tokanoa. Fakamui ne eke a ia mo fakaohoohoaga kolokolovao ke he falu mena momoui fakaagaga, ti ko e magaaho ia Noa, ato hoko e Fakapuke, ko e numera mahaki ha lautolu ne fakalataha mo Satani ke totoko ke he Atua.—Kenese 6:2, matahui tala, NW; 2 Peteru 2:4.

Ko e tau agelu liuliu nei ne nakai uta kehe fakamafiti mai he lagi he mogoia ni. Ka kua lili ai e nonofoaga ha lautolu—aki falu matafakatufono—ke he afe he tau tau. * Pete ia, he magaaho ne oti e fakauka he Atua ke he tau agelu mahani kelea nei, kua “liti hifo” a lautolu mai he lagi, nukua fakahiku ai ke moumou. Ti logona ai e leo ke he lagi kua pehe: “Ko e mena ia kia fiafia ai a koe ko e lagi, mo mutolu kua nonofo ai.” (Fakakiteaga 12:7-12) Maaliali ai, ne fiafia lahi e tau agelu tua fakamoli, ha kua fakamea tuai e lagi ia lautolu ko e tau tagata taute matahavala!

Mailoga ai e tau vala tala nakai iloa nei, ne mailoga ai kua nakai fai mafola moli he ha magaaho ka moumou he tau mena momoui lotomatala e tau fakatufono mo e tau matapatu fakaakoaga he Atua. (Isaia 57:20, 21; Ieremia 14:19, 20) He taha fahi, ka omaoma he tau tagata oti e fakatufono he Atua, to moua ai e mafola mo e ataina. (Salamo 119:165; Isaia 48:17, 18) Ti ka ofania mo e omaoma e tau tagata oti ke he Atua mo e fefakaalofaaki, nakai kia ko e nofoaga fiafia moli mogoia e lalolagi? Ne tali he Tohi Tapu, e!

 Ka e kua a lautolu ne nakai manako pauaki ke hiki ha lautolu a tau puhala kelea? To fakalavelave tumau kia e lautolu e mafola ha lautolu kua manako moli ke taute e finagalo he Atua? Nakai, na fehagai e Atua mo e tau agelu mahani kelea he lagi, to fehagai pihia foki a ia mo e tau tagata mahani kelea he lalolagi nei.

Tatafi Fakamea e Lalolagi

“Ko e lagi ko e haku a nofoaiki haia, ko e lalolagi ko e haku a fakatuaga hui haia,” he talahau he Atua. (Isaia 66:1) Ha ko e tapunu he tapuina, to nakai fakaata he Atua hana “fakatuaga hui” ke takiva tukulagi he mahani kelea. (Isaia 6:1-3; Fakakiteaga 4:8) Tuga ni he tafitafi kehe e ia e tau agaga kelea he lagi, to tafitafi kehe e ia e tau tagata kelea he lalolagi, tuga he fakakite mai he tau kupu Tohi Tapu nai:

“Ha ko e mena fakaotioti a lautolu kua mahani kelea; ka ko lautolu kua talifaki kia Iehova, to eke ma lautolu e motu.”—Salamo 37:9.

“Ha ko lautolu ne mahani hakohako to nonofo a lautolu ke he motu; mo lautolu ne katoatoa e mitaki ha lautolu a mahani to toe ai a lautolu; ka to vevehe kehe mai he motu a lautolu ne mahani kelea, to taaki ai foki a lautolu ne mahani fakavai.”—Tau Fakatai 2:21, 22.

“Kaeke ko e mena tonu ke he Atua ke taui atu e matematekelea kia lautolu kua matematekelea ai a mutolu. Kia mutolu foki kua matematekelea, e okiokihaga fakalataha mo mautolu, ka fakakite mai e Iki ko Iesu mai he lagi, fakalataha mo e tau agelu he hana malolo, ke he afi puhopuho, ke taui atu kia lautolu kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu Keriso. Ko lautolu ni ke fakahala ke he mahaikava tukulagi kia o kehe mo e Iki, mo e lilifu he hana malolo.”—2 Tesalonia 1:6-9.

“Ha ne mole atu foki e lalolagi [he tau tagata mahani kelea] katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.”—1 Ioane 2:17.

To Tumau Nakai e Mafola he Lalolagi?

Pete kua fakakite fakamaali mai he tau Tohiaga Tapu nukua fai fakakaupaaga e fakauka he Atua ke he tau mahani kelea, to iloa moli fefe e tautolu, ka utakehe e mahani kelea, to nakai liu foki ke tupu? He mole atu ai e Fakapuke he vaha ha Noa, ne nakai leva ti liu mafuta hake ti maeke he Atua ke totoko e tau lagatau kelea he tagata he fakakehekehe e tau vagahau ha lautolu.—Kenese 11:1-8.

Ko e matapatu kakano ma e mauokafua ha tautolu to nakai liu mafuta mai e mahani kelea ha kua nakai liu e lalolagi ke pule he tau tagata tuga he mole e Fakapuke. Ka to pule ai he Kautu he Atua. Ko e pule mai he lagi, to eke e Kautu nei mo matapatu fakatufono he lalolagi. (Tanielu 2:44; 7:13, 14) To totoko mafiti ai ke he ha tagata kua lali ke fakamata e mahani kelea. (Isaia 65:20) Moli, to fakahiku ke moumou e kamataaga he mahani kelea—ko Satani ko e Tiapolo—fakalataha mo e tau temoni, ko e tau agelu kelea ne mumui ki a ia.—Roma 16:20.

Lafi ki ai, to nakai liu ha tagata ke fai tupetupe ke he tau mena kai, tau mena tui, nonofoaga, mo e tau gahua—ko e kakano haia kua takitaki atu e falu he vaha nei ke he moui matahavala. E, ko e lalolagi katoa to fakafou ai ke he parataiso fua loga mo e monuina ma e tau tagata oti—Isaia 65:21-23; Luka 23:43.

Aoga lahi ai, to fakaako he Kautu e tau tagata ke he puhala mafola he moui ka e he magaaho taha feaki a lautolu ke he ute he mitaki katoatoa he tagata. (Ioane 17:3; Roma 8:21) Ka mole ia, to nakai liliu e tau tagata ke taufetului mo e tau lolelole mo e tau mahani agahala, kua taute ai e omaoma mitaki katoatoa ke he Atua ke he tokanoaaga mo e fiafia, ke tuga e mena ne tupu ke he tagata mitaki katoatoa ko Iesu. (Isaia 11:3) Kua moli, ne fakatumau e mahani fakamoli ha Iesu ke he Atua  pete ni he fehagai mo e kamatamata lahi mo e fakakikiveka—ko e tau mena kehe mamao ke he moui he Parataiso.—Heperu 7:26.

Kakano kua O Falu ke he Lagi

Kua tokologa e tagata totou he Tohi Tapu, kua mataala ke he tau kupu ha Iesu: “Ne loga e tau mena ke nonofo ai ke he fale he haku a Matua . . . ke fano au ke taute taha mena ke nonofo ai a mutolu.” (Ioane 14:2, 3) Nakai kia kehe e manatu nei ke he moui tukulagi he lalolagi parataiso?

Nakai kehekehe e tau fakaakoaga nei. Kua lalago he taha manatu taha manatu. Ke kamata aki, kua fakakite he Tohi Tapu e numera katoa he tau Kerisiano tua fakamoli—ko e 144,000 a lautolu—ne fakatu ko e tau mena momoui ke nonofo he lagi. Ko e ha kua foaki ai ki a lautolu e palepale homo ue atu nei? Ha kua fakakatoatoa e lautolu e vahega ne kitia e Ioane he fakakiteaga ne “momoui foki a lautolu ti eke mo tau patuiki fakalataha mo Keriso ke he tau tau ne taha e afe.” (Fakakiteaga 14:1, 3; 20:4-6) Fakatatai mo e tau piliona he lalolagi, ko e 144,000 moli e “fuifui mamoe gahoa.” (Luka 12:32) Lafi ki ai, he moua e tau mena vihi kua aga mau ke he tau tagata, tuga a Iesu to maeke ia lautolu ke “mamahi fakaalofa fakalataha mo tautolu ke he tau mena kua lolelole ai a tautolu” he leveki e lautolu e fakafouaga he tau tagata mo e he lalolagi.—Heperu 4:15.

Lalolagi—Ko e Kaina Tukulagi he Tagata

He foaki e poa lukutoto ha Iesu Keriso, ne kamata fakapotopoto he Atua e 144,000 teitei 2,000 he tau tau kua mole, mo e fakakiteaga kua katoatoa tuai e matakau nei he magaaho nei. (Gahua 2:1-4; Kalatia 4:4-7) Pete ia, ko e poa ha Iesu ne nakai ma e tau agahala ni he 144,000, “ka e katoa mo e lalolagi oti kana.” (1 Ioane 2:2) Ti ko e tau tagata oti ke fakagahuahua e tua ia Iesu kua ha i ai e amaamanakiaga he moui tukulagi. (Ioane 3:16) Ko lautolu kua momohe ke he tukuaga ka e ha ha he manamanatuaga he Atua ka fakaliu tutu mai, nakai ke he lagi, ka ke he moui he lalolagi mea. (Fakamatalaaga 9:5; Ioane 11:11-13, 25; Gahua 24:15) Ko e heigoa ne fakatali ki a lautolu i ai?

Kua tali he Fakakiteaga 21:1-4, he pehe: “Kitiala, kua fakalataha mo e tau tagata e fale uta fano he Atua . . . To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” Manamanatu la—ko e tau tagata ne fakatoka mai he mate, mo e mamahi mo e tagi kua mole atu tukulagi! Fakahiku aki, ko e finagalo fakamua a Iehova ma e lalolagi mo e tau tagata ka hokotia ke he fakamoliaga mua ue atu.—Kenese 1:27, 28.

Fifiliaga ha Tautolu—Moui po ke Mate

Nakai age ki a Atamu mo Eva e fifiliaga ke o ke he lagi. Ko e fifiliaga ha laua ke omaoma ke he Atua mo e momoui tukulagi ke he lalolagi parataiso po ke nakai omaoma ki a ia ti mamate. Momoko ai, ne fifili a laua ke nakai omaoma mo e ko e mena ia ne liliu atu ke he “efuefu” he kelekele. (Kenese 2:16, 17; 3:2-5, 19) Nakai ko e finagalo he Atua ma e magafaoa he tagata ke mamate mo e ke nonofo he lagi he o atu hala tukuaga. Ne tufuga he Atua e tau agelu totou hogofulu afe ke momoui ke he lagi; ko e tau mena momoui fakaagaga nei nakai ko e tau tagata ne mamate mo e ne fakaliu tutu mai ke he momoui he lagi—Salamo 104:1, 4; Tanielu 7:10.

Ko e heigoa ha tautolu kua lata ke taute ke moua e fakamonuinaaga he moui tukulagi ke he Parataiso he lalolagi? Ko e lakaaga fakamua ke fakaako e Kupu he Atua, ko e Tohi Tapu. “Ko e moui tukulagi foki hanai,” he liogi e Iesu, “kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.”—Ioane 17:3.

He fakagahua e iloilo ia ko e taha lakaaga ke he fiafia tukulagi he Parataiso. (Iakopo 1:22-24) Ko lautolu ne momoui ke he Kupu he Atua kua ha i ai e amaamanakiaga ke kitia mata e fakamoliaga he tau perofetaaga fulufuluola pihia tuga e taha ne fakamau he Isaia 11:9, ne pehe: “Nakai mahani kelea a lautolu [tau tagata], to nakai moumou mena ai e lautolu ke he haku a mouga tapu oti; ha ko e mena to puke e lalolagi ke he maama kia Iehova, tuga ne toka kua ūfia ke he puke tahi.”

[Matahui Tala]