Lalolagi—Matakavi Kamatamata Noa Kia?

KO E totoka ha ia! Ne kautu a ia. Ko e tama aoga ne ua e fahi tapu mategugu he kamatamata ne fakahiku ai ke moua e hokotaki fiafia. Kua haga atu a ia mogonei ke he gahua ne manako tumau a ia ki ai.

Tokologa e tau tagata ne pihia e onoonoaga ke he moui he lalolagi. Ne manamanatu a lautolu ki ai ko e kamatamata fakamua ne kua lata e tau tagata oti ke moua. Ko lautolu ne “kautu” kua holo atu ke he taha mena mitaki he Vaha Ka Mole Atu. To momoko moli, kaeke ko e moui he magaaho nei—ko e moui noa ma e tokologa—ko e moui mitaki lahi ne amanaki e tau tagata ki ai. Pete malolo mitaki mo e monuina e moui katoa hana, ne talahau he tagata he Tohi Tapu ko Iopu: “Ko e tagata ne fanau ai he fifine, kua gahoa hana tau aho, ti puke ai ke he fakaatukehe.”—Iopu 14:1.

He fakaata ai e manamanatu he tokologa, kua talahau e New Catholic Encyclopedia: “Ko e lilifu he lagi ko e nofoaga kua fakatoka he Atua ma e tagata. . . . Ko e fiafia he tagata kua ha ha he hana mouaaga he fiafia he lagi.” Ne talahau ai he kumikumiaga nakai la leva ke he Church of Christ he Tau Fahi Kaufakalataha, ko e 87 e pasene he tau tagata ne talitonu kua liga o a lautolu ke he lagi ka mole e mate.

Tokologa foki a lautolu ne nakai ko e tau Kerisiano kua amaamanaki ke o kehe mai he lalolagi ke he taha matakavi mitaki ka mole e mate. Ma e fakatai, ko e tau Musilimi kua amanaki ke o ke he parataiso he lagi. Ko e tau tagata he tau vahega lotu Pure Land ha Puta i Saina mo Sapani kua talitonu ko e talahauaga nakai oti e “Amitabha,” ko e higoa he Puta he Unlimited Light, to liu fanau foki a lautolu he Pure Land, po ke Parataiso he Fahi Uta, he matakavi ka momoui ai a lautolu ke he fiafia lahi mahaki.

Fulufuluola ai, ko e Tohi Tapu, ko e tohi tapu ne fakaliliu mo e tufatufa lahi he lalolagi, ne nakai fakakite e lalolagi ko e matakavi ke fakahao mai ai, ko e taha lakaaga foki. Tuga anei, kua talahau: “To eke ni e motu ma e tau tagata tututonu, to nonofo muatua ai a lautolu.” (Salamo 37:29) Ne moua foki he Tohi Tapu e talahauaga talahaua ha Iesu: “Uhoaki a lautolu ne mahani molu; ha ko e mena to eke ma lautolu e motu.”—Mataio 5:5.

Ko e kitiaaga fa mahani ko e nonofo fakaku ha tautolu he lalolagi nukua hagaao ke he mate ko e gutuhala ke he fiafia lahi he moui ka mole atu. Ka pihia, ko e mate ko e fakamonuinaaga. Ka e pihia nakai e kitiaaga he tau tagata ke he mate, po ke lali a lautolu ke fakatumau e moui nei? Kua fakakite he mena ne tupu ka moua he tau tagata e malolo tino mo e haohao mitaki, kua nakai manako a lautolu ke mamate.

Moha ia, ha ko e moui he lalolagi kua puke he kelea mo e matematekelea, kua kitia agaia he tokologa e lagi ko e matakavi ni a ia ke moua e mafola mo e fiafia moli. Ko e lagi kia e matakavi he mafola fiafia hokoia, kua tokanoa katoatoa mai he kelea mo e fekehekeheaki? Ti ko e Vaha Ka Mole Atu kia kua haia ke he lagi? Liga ofo a koe ke he tali he Tohi Tapu. Totou atu fakamolemole.