Kua Malolo Hifo e Aoga he Tau Mahani Mitaki

“KO E faga mena pihia na ai fa mahani ke tupu,” he talahau e Helmut Schmidt, ko e tohikupu fakamua ha Sihamani. Ne nakai fiafia a ia ke he tau mena tutupu fou he mahani nakai fakamoli he tau takitaki gahua ne taute e mataulu tala ia. “Ko e tau tutuaga he mahani mitaki kua galo he mahani lotokai,” he talahau e ia.

To tokologa ne talia ki a ia. Ko e aoga he tau mahani ne to i loto he Kupu he Atua, ko e Tohi Tapu, kua leva tigahau e talia lahi nukua aoga ai mo takitakiaga ke he mena kua hako mo e hepe. Ko e mena anei ne tupu foki ke he tau motu ne talahau kua faka-Kerisiano.

Aoga Kia e Mahani he Tohi Tapu?

Ko e tau mahani ne fakave ke he tau fakaakoaga he Tohi Tapu kua putoia foki e mahani fakamoli. Ka ko e kaiha, kolokolovao, mo e fakavaia kua holofa fano. Kua talahau he The Times ha London ko e falu leoleo gahua fakagalogalo “ne tuaha ke kaiha ke hokotia ke he £100,000 he magaaho ka fakafua e tau tulaki po ke fakagalo e tau fakamoliaga ke he tau numera matahavala lalahi he lalolagi.” I Auseturia ko e fakavaia inisua ne talahau ko e aga mahani mau. I Sihamani ko e maaga fakasaiene ne ofomate ha kua moua fou he tau tagata kumikumi e “taha he tau mena

 tutupu matakutakuina lahi he fakavaia he saiene a Sihamani.” Ko e porofesa, ne “iloilo he tau tagata kumikumi ke he tau vala he tino i Sihamani,” ne tukumale he pikopiko po kua moua e talahauaga he tapunu lahi.

Ko e mahani fakave ke he Tohi Tapu kua putoia foki e mahani tua fakamoli he fakamauaga, nukua kakano ko e fakafetuiaga tukulagi. Ka ko e numera malikiti he tau hoa tokoua ne hokotia ke he hopoaga tau vevehe. Ne hokotaki he nusipepa Katolika Christ in der Gegenwart (The Contemporary Christian) “nukua pihia foki a Suisalani ‘mahani maimaina’ kua loga lahi mahaki e tau fakamauaga ne mavehevehe.” I Netelani, 33 e pasene he tau fakamauaga oti ne fakahiku ke he tau vevehe. Kua mailoga he fifine e tau hikihikiaga he fakalatahaaga a Sihamani he tau tau gahoa kua mole ne tohi hana kapeletu: “Kua hagaao e fakamauaga mogonei ko e mena tuai mo e kua mole tuai e vaha. Kua nakai mau he tau tagata e hoa ke nonofo tukulagi.”

He taha fahi, totou miliona ne onoono ke he tau tutuaga he mahani ne fakaako he Tohi Tapu ke fai falanakiaga mo e aoga ke he moui he lalolagi vaha fou nei ha tautolu. Ko e hoa mau ne nonofo he hoe i Suetene-Sihamani ne iloa ko e ako ke nonofo fakatatau ke he tau mahani he Tohi Tapu nukua taute a laua ke fiafia lahi. Ko e ha laua ni a manamanatuaga, “ko e taha ni e takitakiaga ma e tau fahi oti he moui. Ko e takitakiaga ia ko e Tohi Tapu.”

Fefe e manatu hau? Kua eke kia e Tohi Tapu mo takitakiaga aoga? Aoga nakai e mahani ne fakave ke he Tohi Tapu he vaha nei?