Fekafekau ke he Atua Katoa mo e Agaga Fakamakai
Fekafekau ke he Atua Katoa mo e Agaga Fakamakai
“KUA lahi haku a fiafia ke fakaoti au mo e fakaotioti au ha ko e tau [“solu,” NW] mutolu,” ha he tohia he aposetolo ko Paulo. (2 Korinito 12:15) Ko e heigoa ne talahau he tau kupu nei ki a koe hagaao ke he onoonoaga mo e aga ne kua lata he tau fekafekau ha Iehova ke feaki? Hagaao ke he taha tagata fakaako tokoluga he Tohi Tapu, he magaaho ne tohia e Paulo e tau kupu ia ke he tau Kerisiano i Korinito, ne pehe a ia: “Kua fakamakai au ke fakaaoga haku a malolo, mo e magaaho, mo e moui, mo e tau mena oti haku ma e levekiaga hau, tuga ne taute fiafia he matua tane ke he fanau hana.” Kua mautali a Paulo ke “fakaotioti,” po ke “ke fakamakamaka mo e mategugu,” kaeke ko e mena ni haia ke fakamoli aki e fekafekauaga Kerisiano hana.
Mua atu, ne taute e Paulo e tau mena oti nei mo e ‘lahi e fiafia.’ Kua “fakamakai katoatoa” a ia ke taute pihia, he talahau he The Jerusalem Bible. Ka e kua a koe? Kua fakamakai nakai a koe ke fakaaoga hau magaaho, malolo, tau taleni, mo e tau koloa ke fekafekau ki a Iehova ko e Atua mo e levekiaga he falu, pete ni kua “fakamakamaka mo e mategugu” he taute ai he falu magaaho? Mo e taute nakai e koe e mena nei mo e ‘lahi e fiafia’?
Nakai Ni Mahalo a Lautolu ke Fekafekau
Laulahi e tau tagata ne nakai ni fakauaua ke fekafekau ke he Atua ka e nakai ni mahalo foki. Ko e agaga ha lautolu kua nakai fakaaue, fulukovi, mo e fakafualoto foki. Ne fakahehe e Satani a Atamu mo Eva ke he puhala manatu pihia. Ne talahau hehe e ia to “tuga ne tau atua [a laua] ke iloa ai e mitaki mo e kelea”—maeke ke fifili ma laua ni e mena hako mo e hepe. (Kenese 3:1-5) Ko lautolu ne tatai pihia e agaga he vaha nei nukua manatu kua lata ia lautolu ke moua e tokanoaaga katoatoa ke taute ni e lautolu e mena ne manako e lautolu mo e nakai gahua ke he Atua po ke fakalavelave mai ia ia. (Salamo 81:11, 12) Kua manako a lautolu ke fakaaoga e tau koloa ha lautolu he tutuli e fiafia fakatagata ni ha lautolu.—Tau Fakatai 18:1.
Liga kua nakai tatai e onoonoaga tokoluga nei mo e hau. Tuga ni kua fakaaue moli a koe ke he mena foaki fakaalofa noa he moui ne olioli e koe mogonei, mo e amaamanakiaga homo ue atu foki he moui tukulagi he lalolagi parataiso. (Salamo 37:10, 11; Fakakiteaga 21:1-4) Liga kua hokulo e fakaaue hau ki a Iehova ma e mitaki hana ki a koe. Ka kua lata ia tautolu oti ke mataala ke he hagahagakelea na maeke ia Satani ke fakahehe e tau manamanatuaga ha tautolu ti nakai talia e fekafekauaga ha tautolu ke he Atua. (2 Korinito 11:3) Liga tupu fefe e mena nei?
Lata ma e Fekafekauaga Fakamakai
Kua manako a Iehova ke he fekafekauaga fakamakai mo e loto katoa. Kua nakai toho e ia a tautolu ke taute e finagalo hana. To fakatumau a Satani ke taute ha mena ke peehi po ke kamatamata e tau tagata ke taute e finagalo hana. Ke matutaki mo e fekafekau ke he Atua, ne vagahau e Tohi Tapu hagaao ke he matagahua, tau poakiaga, tau fakatufono, mo e falu mena foki. (Fakamatalaaga 12:13; Luka 1:6) Ka ko e manatu ne mua ha tautolu ke fekafekau ke he Atua ha kua fakaalofa a tautolu ki a ia.—Esoto 35:21; Teutaronome 11:1.
1 Korinito 13:1-3) He hagaao atu e tagata tohia Tohi Tapu ke he tau Kerisiano ko e tau fekafekau he Atua, kua nakai hagaao a lautolu ke he tuaga fakatupa ne fakaohooho. (Roma 12:11; Kolose 3:24) Ko e kakano ke omaoma fakamakai ne fakave ke he fakaalofa hokulo ne mai he loto ma e Atua mo e hana Tama, ko Iesu Keriso.—Mataio 22:37; 2 Korinito 5:14; 1 Ioane 4:10, 11.
Pete ni he lahi e magaaho ne fakaaoga e Paulo he fekafekauaga he Atua, ne iloa e ia kua nakai aoga ‘ka nakai fai fakaalofa a ia.’ (Kua lata foki e fekafekauaga ha tautolu ke fakakite e fakaalofa hokulo ma e tau tagata. “Kua mahani molu a mautolu he nofo ai a mautolu ia mutolu, tuga ne fifine fakahuhu tama kua leveki fakamitaki hana ni a fanau,” he tohia e Paulo ke he fakapotopotoaga i Tesalonia. (1 Tesalonia 2:7) He tau motu loga he vaha nei, kua poaki he matafakatufono e matagahua ke he tau matua fifine ke leveki e fanau ha lautolu. Ka kua nakai omaoma noa e laulahi he tau matua fifine ke he matafakatufono, pihia nakai? Nakai. Kua oma ai e lautolu, kakano kua ofania e lautolu e fanau ha lautolu. Ti kua taute fiafia he matua fifine leveki tama e foakiaga lahi ma e fanau hana! Ha kua “hofihofi” pihia a Paulo ki a lautolu ne fekafekau a ia ki ai, kua “fiafia” a ia (“fakamakai,” King James Version;) ke fakaaoga hana moui katoa ke lagomatai a lautolu. (1 Tesalonia 2:8) Kua omoi he fakaalofa a tautolu ke fifitaki e puhala ha Paulo.—Mataio 22:39.
Ka e Kua e Fekafekauaga Fakauaua?
Moli, kua nakai lata ia tautolu ke toka e fakaalofa ki a koe ni ke mua ke he fakaalofa he Atua mo e tau tagata. Neke tupu mai e hagahagakelea ke fekafekau lotoua mo e fakauaua ni a tautolu. Liga to kamata ai a tautolu ke fakatupu e aga kelea, ke ita he nakai maeke a tautolu ke moui hagaao ke he tau manako ni ha tautolu. Ne tupu e mena nei ke he falu Isaraela ne galo e fakaalofa ha lautolu ke he Atua ka e foaki agaia falu fekafekauaga ki a ia ha ko e matagahua. Ko e heigoa e fua? Ne eke e fekafekauaga ke he Atua ke “matematekelea lahi” ki a lautolu.—Malaki 1:13.
Ko e tau poakiaga ne foaki ke he Atua kua lata tumau ke “katoatoa e mitaki,” nakai fai kelea, ko e mena [“mitaki lahi,” NW] ni hokoia. (Levitika 22:17-20; Esoto 23:19) He nakai foaki ki a Iehova e tau manu mitaki lahi ha lautolu, ko e tau tagata he vaha a Malaki ne foaki e tau manu ne tiaki e lautolu. Ti fefe mogoia a Iehova? Ne tala age a ia ke he tau ekepoa: “Ka ta mai e mutolu e mena matapouli ke eke mo poa [pehe a mutolu], nakai kia kelea? Ka ta mai e mutolu e mena kulikuli mo e mena gagao nakai kia kelea? Kia ta age a ke he iki kua pule kia koe; po ke fiafia mai nakai a ia kia koe? po ke talia mai nakai e ia a koe? . . . Kua ta mai foki e mutolu e mena ne fofo, mo e mena kulikuli, mo e mena gagao; kua ta mai ai e mutolu mo tau poa? Kia talia kia e au e tau mena ia mai he tau lima ha mutolu?”—Malaki 1:8, 13.
Liga tupu fefe e mena nei ke he taha ia tautolu? Liga to eke e tau foakiaga ha tautolu ke “matematekelea lahi” ki a tautolu kaeke nakai ha ha ia tautolu e loto mo e agaga fakamakai. (Esoto 35:5, 21, 22; Levitika 1:3; Salamo 54:6; Heperu 13:15, 16) Ke fakatai ki ai, age ka ki a Iehova e tau toetoe magaaho ha tautolu?
Kua manatu hokulo ki a taha to talia he Atua kaeke fakaohooho he taha he magafaoa po ke taha tagata Levi fakamoli e tagata Isaraela nakai fakamakai ke fifili e manu mitaki lahi hana ke foaki ka e nakai manako a ia ke foaki ai? (Isaia 29:13; Mataio 15:7, 8) Ne fakaheu e Iehova e tau poa pihia mo e fakahiku fakaheu e tau tagata ne poaki e tau mena pihia.—Hosea 4:6; Mataio 21:43.
Fiafia Lahi ke Taute e Finagalo he Atua
Ke foaki ke he Atua e fekafekauaga ka talia e ia, kua lata ia tautolu ke muitua ke he fakafifitakiaga ha Iesu Keriso. “Ko e mena nakai fifitaki au ke he haku a loto ni,” he talahau e ia, “ka ko e finagalo he Matua ne fakafano mai au.” (Ioane 5:30) Ne moua e Iesu e fiafia ne mua he fekafekau fakamakai ke he Atua. Ne fakamoli e Iesu e tau kupu fakaperofeta ha Tavita: “Haku Atua na e, kua fiafia au ke eke hāu a finagalo.”—Salamo 40:8.
Pete ni kua fiafia a Iesu ke taute e finagalo ha Iehova, kua nakai mukamuka tumau e mena nei. Manamanatu ke he mena ne tupu ato tapaki, kamatamata, mo e fakatautau a ia. Kua haia a Iesu he katene ko Ketesemane, ne “momoko lahi” a ia ti hoko ke he “matematekelea.” Kua mao lahi e peehiaga he loto, ti he liogi a ia, “kua kavakava foki a ia tuga he tau fatufatuoka toto kua to hifo ke he kelekele.”—Ko e ha ne matematekelea pihia ai a Iesu? Nakai matematekelea ha kua manatu na ia ki ia ni po kua fakauaua ke taute e finagalo he Atua. Kua mautali a ia ke mate, mo e totoko lahi a ia ke he tau kupu ha Peteru: “Ko e Iki na e, kia mamao ia koe e mena ia; nakai ni hoko e mena ia kia koe.” (Mataio 16:21-23) Ko e mena ne tupetupe ai a Iesu ko e puhala ka lauia ai a Iehova mo e higoa tapu Hana ha ko e mate hana. Iloa e Iesu to mamahi lahi e Matua hana ke kitia e Tama fakahele hana ne fakakikiveka ke he puhala fakalialia pihia.
Maama foki e Iesu kua hokotia tuai a ia ke he magaaho uka lahi he taute e finagalo ha Iehova. He pipiki fakamoli tumau ke he tau matafakatufono he Atua kua fakakite maaliali kua maeke foki ia Atamu ke taute e fifiliaga pihia. Kua fakakite he tua fakamoli ha Iesu e pikopiko lahi he talahauaga ha Satani to nakai fekafekau fakamakai mo e mahani fakamoli e tau tagata ke he Atua ka moua a lautolu he kamatamataaga. He puhala ia Iesu, to fakaotioti tukulagi e Iehova a Satani mo e uta kehe e tau hufiaaga he fakafualoto hana.—Kenese 3:15.
Ko e matagahua lahi ha ia ne toka he ua ha Iesu! Ko e higoa he Matua hana, mafola he lalolagi mo e lagi katoatoa, mo e fakamouiaga he magafaoa tagata kua falanaki oti ke he tua fakamoli ha Iesu. He mailoga e mena nei, ne liogi a ia: “Hoku Matua na e, kaeke kua maeke, kia uta kehe e kapiniu nai ia au, ka e aua neke eke hoku loto, ka ko e hau a finagalo.” (Mataio 26:39) Pete ni kua haia ke he fakaatukehe velagia, kua nakai maueue a Iesu he hana fakamakai ke omaoma ke he finagalo he hana Matua.
‘Kua Makai e Loto, Ka ko e Tino Kua Lolelole’
He matematekelea vevela a Iesu ke he fakaatukehe lahi he loto he fekafekau a ia ki a Iehova, kua amanaki foki a tautolu ke peehi fakalahi mai a Satani ki a tautolu ko e tau fekafekau he Atua. (Ioane 15:20; 1 Peteru 5:8) Ha ko e mena nakai mitaki katoatoa a tautolu. Ti pete ni kua fekafekau fakamakai a tautolu ke he Atua, kua nakai mukamuka ia tautolu ke taute ai. Ne kitia e Iesu e tau aposetolo hana ne taufetului ke taute e tau mena oti ne tala age e ia ke taute. Ko e kakano haia ne pehe a ia: “Kua makai ni e loto, ka ko e tino kua lolelole.” (Mataio 26:41) Kua nakai fai mena lolelole he tino tagata mitaki katoatoa hana. Ka kua tokaloto e ia e lolelole he tau tino he tau tutaki hana, ko e nakai mitaki katoatoa ne moua mai e lautolu ia Atamu nakai mitaki katoatoa. Iloa e Iesu ha ko e nakai mitaki katoatoa ne moua mo e tau kukuaga ne moua he tagata, to taufetului a lautolu ke taute e tau mena oti ne manako a lautolu ke taute he fekafekauaga ha Iehova.
Ti liga, tuga e aposetolo ko Paulo a tautolu, ne fakaatukehe lahi he taofi he nakai mitaki katoatoa e malolo hana ke fekafekau katoatoa ke he Atua. “Ko e mena ha ha ia au e loto atu,” he tohia e Paulo, “ka e nakai iloa e au ke eke e mena mitaki.” (Roma 7:18) Kua mailoga foki e tautolu nukua nakai taute katoatoa e tautolu e tau mena mitaki ne manako a tautolu ke taute. (Roma 7:19) Nakai ha kua fakauaua a tautolu. Ka e ha kua fakalavelave he lolelole he tino e tau laliaga ha tautolu.
Kia nakai tupetupe a tautolu. Ka haia ia tautolu e loto mautali ke taute e mena kua maeke ia tautolu, to talia he Atua e fekafekauaga ha tautolu. (2 Korinito 8:12) ‘Kia lalilali a tautolu’ ke fifitaki e agaga omaoma katoatoa he Keriso ke he finagalo he Atua. (2 Timoteo 2:15; Filipi 2:5-7; 1 Peteru 4:1, 2) To palepale mo e lagomatai e Iehova e agaga fakamakai pihia. To foaki mai e ia ki a tautolu e ‘malolo lahi ue atu’ ke lagomatai aki e tau lolelole ha tautolu. (2 Korinito 4:7-10) Mo e lagomatai ha Iehova, ke tuga a Paulo, to ‘fiafia lahi a tautolu ke fakaoti mo e fakaotioti’ he fekafekauaga uho Hana.
[Fakatino he lau 30]
Ne fekafekau fakamakai a Paulo ke he Atua ke he malolo hana
[Fakatino he lau 31]
Pete kua haia i lalo he fakaatukehe velagia, ne taute e Iesu e finagalo he Matua hana