Ko Hai e Tau Fekafekau he Atua he Vaha Nei?
Ko Hai e Tau Fekafekau he Atua he Vaha Nei?
“Ka ko e Atua kua maeke ai a mautolu; ko ia kua taute a mautolu kia lata a mautolu ke eke mo tau fekafekau kehe maveheaga fou.”—2 KORINITO 3:5, 6.
1, 2. Ko e heigoa e matagahua ne kau auloa e tau Kerisiano he senetenari fakamua ki ai, ka e hiki fefe e tau mena ia?
HE SENETENARI fakamua he Vaha Nei, ne kau auloa e tau Kerisiano ke he matagahua aoga lahi—ko e fakamatalaaga he tala mitaki. Kua fakauku oti a lautolu mo e ko e tau fekafekau he maveheaga fou. Kua ha ha he falu e tau matagahua lafi ki luga, tuga e fakaako i loto he fakapotopotoaga. (1 Korinito 12:27-29; Efeso 4:11) Ha ha he tau matua e tau matagahua mamafa i loto he magafaoa. (Kolose 3:18-21) Ka kua fakalataha oti ke he matapatu gahua aoga lahi he fakamatalaaga. He vagahau Heleni fakamua he tau Tohiaga Tapu Kerisiano, ko e matagahua nei ko e di·a·ko·niʹa—ko e fekafekauaga.—Kolose 4:17.
2 He fai magaaho ne mole atu, ne hikihiki e tau mena. Ko e vahega fakatu, ne iloa ko e tau akoako, ne toka ni ki a lautolu e kotofaaga ke fakamatala. (Gahua 20:30) Ko e tau akoako kua tokofiha mai ia lautolu ne ui a lautolu ko e tau Kerisiano. Ko e laulahi kua iloa ko e tau lalo tagata. He tala age ke he tau lalo tagata na fai matagahua foki a lautolu, pihia foki ke foaki e tau mena fakaalofa ke leveki aki e tau akoako, kua tokologa ne fanogonogo teao ke he fakamatalaaga ia.
3, 4. (a) Kua taute fefe e tau tagata i Kerisitenitome ke eke mo tau fekafekau? (e) Ko hai kua eke mo fekafekau ha Kerisitenitome, mo e kehe he ha e tau mena he Tau Fakamoli a Iehova?
3 Kua talahau teao e tau akoako ko e tau fekafekau (mai he fekafekauaga, ko e liliuaga faka-Latini he di·aʹko·nos, “fekafekau”). * Ke moua ai, ne paase mai a lautolu he tau koliti po ke tau fakaakoaga tokoluga ti fakauku ai foki. Ne talahau he The International Standard Bible Encyclopedia: “Ko e ‘Fakauku’ mo e ‘fakaukuaga’ kua hagaao ke he tuaga uho ne foaki ni ke he tau fekafekau po ke tau ekepoa he puhala ne pule he tau vahega fakamoli, ne peehi atu ke he pule malolo ke fakapuloa e Kupu po ke foaki e tau gahua fakalotu, po ke taute ua ai.” Ko hai ne fakauku e tau fekafekau? Ne talahau he The New Encyclopædia Britannica: “I loto he tau tapu ne haia agaia e tuaga tuai he epikopo, ko e fekafekau fakauku kua tumau ni ke eke mo epikopo. He tau tapu Peresipateria, kua foaki he tau fekafekau he lotu e fakaukuaga.”
4 Ti, he tau tapu ha Kerisitenitome, ko e kotofaaga ke eke mo fekafekau kua fakakaupa lahi. Ka kua nakai pihia e puhala he Tau Fakamoli a Iehova. Ko e ha ne nakai pihia ai? Ha kua nakai taute pihia he fakapotopotoaga Kerisiano he senetenari fakamua.
Ko Hai Moli e Tau Fekafekau he Atua?
5. Hagaao ke he Tohi Tapu, ko hai ka fakalataha ki a lautolu ne eke mo tau fekafekau?
5 Hagaao ke he Tohi Tapu, ko e tau tagata tapuaki oti ha Iehova—he lagi mo e lalolagi—ko e tau fekafekau. Ne fekafekau e tau agelu ki a Iesu. (Mataio 4:11; 26:53; Luka 22:43) Ko e tau agelu foki kua “fekafekau ma lautolu ke moua ai e moui.” (Heperu 1:14; Mataio 18:10) Ko e fekafekau a Iesu. Ne pehe a ia: “[Ko e] Tama he tagata nakai hau a ia kia fekafekau mai e tau tagata kia ia, ka kia fekafekau atu a ia.” (Mataio 20:28; Roma 15:8) Ti, ha kua lata e tau tutaki ha Iesu ke ‘mumui atu ke he hana tau tuagahui,’ kua nakai ofo ha kua lata foki ia lautolu ke eke mo tau fekafekau.—1 Peteru 2:21.
6. Fakakite fefe e Iesu kua lata e tau tutaki hana mo tau fekafekau?
6 Nakai leva ato haele hake a ia ke he lagi, ne pehe a Iesu ke he tau tutaki hana: “Kia o . . . ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu; ti fakaako atu a mautolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) Ko e tau tutaki ha Iesu kua lata ke eke tutaki—tau fekafekau. Ko e tau tutaki ne taute e lautolu ka fakaako ke omaoma e tau mena oti ne poaki e Iesu, fakalataha mo e poakiaga ke o ke eke e tau tutaki. Ko e tane po ke fifine, tagata lahi po ke tama, ko e tutaki moli ha Iesu Keriso kua lata ke eke mo fekafekau.—Ioelu 2:28, 29.
7, 8. (a) Fakakite he tau kupu Tohi Tapu fe ko e tau fekafekau e tau Kerisiano moli oti? (e) Ko e heigoa e tau huhu ne fakatu hagaao ke he fakaukuaga?
7 Ke fakatatai mo e mena nei, he aho Penetekoso 33 V.N., ko e tau tutaki oti ha Iesu ne ha ha i ai, tau tane mo e tau fifine, ne matutaki atu ke talahau e “tau mana he Atua.” (Gahua 2:1-11) Mua atu, ne tohia he aposetolo ko Paulo: “Ko e loto ke talia ai, ke hoko mai ai e tututonu; ka ko e gutu ke talahau ai, ke hoko mai ai e fakamouiaga.” (Roma 10:10) Ne talahau e Paulo e tau kupu nei, nakai ke he vahega akoako hokoia, ka “kia mutolu oti ha ha i Roma, ko mutolu kua ofania he Atua.” (Roma 1:1, 7) Pihia foki, ko e ‘tau tagata tapu oti i Efeso, mo lautolu foki kua tua ha ia Keriso Iesu’ nukua “afi foki ha [lautolu] a tau aloalohui ke he tauteaga he vagahau mitaki ke mafola ai.” (Efeso 1:1; 6:15) Ti ko lautolu oti ne logona e tohi ne totou ke he tau Heperu kua lata ke “taofi mau e tautolu ha tautolu a amaamanaki kua talahau atu e tautolu mo e nakai hikihikifano.”—Heperu 10:23.
8 Ka he magaaho fe ka eke e tagata mo tagata fekafekau? Ke he falu kupu, fakauku a ia he magaaho fe? Mo e fakauku e hai a ia?
Fakauku mo Tau Fekafekau—A Fe?
9. I ne fe ne fakauku ai a Iesu, mo e fakauku e hai?
9 Ke he magaaho fe mo e taute e hai e fakauku, kikite la ke he fakafifitakiaga ha Iesu Keriso. Kua nakai fai tohi fakauku po ke mataulu tokoluga a ia mai he falu aoga ke fakakite ko e fekafekau a ia, mo e kua nakai fakauku he taha tagata a ia. Ko e ha mogoia, kua talahau e tautolu ko e fekafekau a ia? Kakano kua fakamoli e tau kupu omoi he agaga ha Isaia ia ia: “Ha ha i luga ia au e Agaga he Iki, ha kua fakauku e ia au ke fakamatala e vagahau mitaki.” (Luka 4:17-19; Isaia 61:1) Kua nakai fakauaua nukua poaki ki a Iesu ke fakamatala e tala mitaki. E hai? Ha kua fakauku he agaga ha Iehova a ia ke gahua, kitia maali ai ko Iehova ko e Atua ne fakauku a Iesu. Taute i ne fe e mena nei? Ne haele hifo e agaga ha Iehova ki a Iesu he magaaho ne papatiso a ia. (Luka 3:21, 22) Ti, kua fakauku a ia he papatisoaga hana.
10. Fifili e hai ke “maeke ai” e fekafekau Kerisiano?
10 Ka e kua e tau tutaki ha Iesu he senetenari fakamua? Ko e tuaga fekafekau ha lautolu kua mai foki ia Iehova. Ne pehe a Paulo: “Ko e Atua kua maeke ai e mautolu, ko ia foki kua taute a mautolu kia lata a mautolu ke eke mo tau fekafekau ke he maveheaga fou.” (2 Korinito 3:5, 6) Fakamailoga fefe e Iehova e tau tagata tapuaki hana ke eke mo tau fekafekau? Manamanatu ke he fakafifitakiaga ha Timoteo, ne ui e Paulo “ko e fekafekau he Atua, mo e ha mautolu a lagomatai ke he vagahau mitaki a Keriso.”—1 Tesalonia 3:2.
11, 12. Tupu fefe a Timoteo ke eke mo fekafekau?
11 Ko e tau kupu ne mui mai, ne vagahau ki a Timoteo kua lagomatai a tautolu ke maama e puhala ne eke a ia mo fekafekau: “Ka ko koe, kia tumau a koe ke he tau mena kua ako ai e koe, mo e iloa tonuhia e koe, ha kua iloa e koe a ia ne fakaako au ai kia koe. Tali mai foki he vaha tote kua iloa e koe e tau Tohi Tapu, kua maeke ke fakailoilo a koe ke moua ai e moui ke he tua ha ha ia Keriso Iesu.” (2 Timoteo 3:14, 15) Ko e fakaveaga he tua ha Timoteo, ne omoi a ia ke taute e fakamatalaaga, ko e iloilo ke he tau Tohiaga Tapu. Ko e totou fakatagata ni kia hokoia ke lata mo e mena nei? Nakai. Kua manako lagomatai a Timoteo ke moua e iloilo tonuhia mo e maama fakaagaga he mena ne totou e ia. (Kolose 1:9) Ati “iloa tonuhia” ai e Timoteo. Ha kua iloa e ia e tau Tohiaga Tapu tali mai “he vaha tote,” liga ni ko e tau faiaoga fakamua hana ko e hana matua fifine mo e tupuna fifine, ha kua nakai ko e tagata talitonu e matua tane hana.—2 Timoteo 1:5.
12 Ka kua mua atu e mena ne taute e Timoteo ke eke mo fekafekau. Taha mena, kua fakamalolo e tua hana he feoaki mo e tau Kerisiano he tau fakapotopotoaga ne tata mai. Iloa fefe e tautolu? Ha ko e magaaho ne feleveia fakamua a Paulo mo Timoteo, ko e fuata ia ‘kua talahaua he tau matakainaga i Luseta mo Ikonio.’ (Gahua 16:2) Ke lafi ki ai, he tau aho ia ne tohi he falu matakainaga e tau tohi ke he tau fakapotopotoaga ke fakamalolo aki a lautolu. Mo e aahi atu e tau leveki ki a lautolu ke ati hake a lautolu. Ko e tau foakiaga pihia ne lagomatai e tau Kerisiano tuga a Timoteo ke tupu fakaagaga.—Gahua 15:22-32; 1 Peteru 1:1.
13. He magaaho fe ne fakauku a Timoteo mo fekafekau, mo e talahau he ha e koe kua nakai oti e tupu fakaagaga hana he mena ia?
13 Ha ko e poakiaga ha Iesu ne fakamau ia Mataio 28:19, 20, kua mauokafua a tautolu kua omoi he tua ha Timoteo a ia ke fifitaki a Iesu mo e papatiso ai. (Mataio 3:15-17; Heperu 10:5-9) Ko e fakamailoga anei he tukuleleaga solu katoa ha Timoteo ke he Atua. He papatisoaga hana ne eke a Timoteo mo fekafekau. Mai he magaaho ia, ne pule a Iehova ke he moui, malolo mo e tau mena oti ne ha ia ia. Ko e vala uho anei he tapuakiaga hana, ko e ‘fekafekauaga tapu.’ Pete ia, ne nakai fakaoti he naia e fekafekauaga hana. Ne tumau a ia ke tupu fakaagaga, eke ai mo fekafekau Kerisiano motua fakaagaga. Kua pehenei ai ha ko e feoakiaga tata ha Timoteo mo e tau Kerisiano motua fakaagaga tuga a Paulo, hana a fakaako fakatagata, mo e fakamakai hana ke he gahua fakamatala.—1 Timoteo 4:14; 2 Timoteo 2:2; Heperu 6:1.
14. He vaha nei, kua maeke fefe taha tagata ne “kotofa ke he moui tukulagi” ke tolomaki ke eke mo fekafekau?
14 He vaha nei, kua tatai foki mo e fakaukuaga ma e fekafekauaga he Kerisiano. Ko ia ne “kotofa ke he moui tukulagi” kua lagomatai ke ako hagaao ke he Atua mo e tau finagalo hana he kakano he fakaako Tohi Tapu. (Gahua 13:48) Kua fakaako e tagata ke fakagahuahua e tau matapatu fakaakoaga ke he moui hana mo e ke liogi mo e fai kakano ke he Atua. (Salamo 1:1-3; Tau Fakatai 2:1-9; 1 Tesalonia 5:17, 18) Kua feoaki a ia mo e falu foki ne talitonu mo e fakaaoga e tau foakiaga mo e tau fakaholoaga ne taute he “fekafekau fakamoli mo e loto matala.” (Mataio 24:45-47; Tau Fakatai 13:20; Heperu 10:23-25) Ati tolomaki atu a ia ke he talagaaga pauaki he fakaakoaga.
15. Ko e heigoa ka tupu he magaaho ka papatiso e tagata? (Kikite foki e matahui tala.)
15 Fakahiku ai, ko e tau tagata fakaako Tohi Tapu, ne feaki e fakaalofa ki a Iehova ko e Atua mo e tua malolo ke he poa lukutoto, kua manako ke tukulele katoatoa a ia ke he hana Matua he lagi. (Ioane 14:1) Ne taute e ia e tukuleleaga ia he liogi, oti ti papatiso ke eke mo fakamailoga ke he toloaga tagata e manako ia. Ko e papatisoaga hana ko e fakaukuaga hana a ia ha ko e magaaho a ia ne mailoga ai a ia ko e fekafekau tukulele katoatoa, ko e di·aʹko·nos, he Atua. Kua lata ia ia ke tumau ke vevehe mai he lalolagi. (Ioane 17:16; Iakopo 4:4) Nukua foaki e ia a ia katoatoa “ke he Atua, ko e poa moui, mo e tapu ke talia mo e fiafia.” (Roma 12:1) * Ko ia ko e fekafekau he Atua, he fifitaki ke he Keriso.
Ko e Heigoa e Fekafekauaga Faka-Kerisiano?
16. Ko e heigoa falu matagahua ha Timoteo ko e fekafekau?
16 Ko e heigoa ne putoia ke he fekafekauaga ha Timoteo? Kua ha ia ia e tau matagahua ko e hoa fano fenoga ha Paulo. Mo e he eke a ia mo motua, ne gahua lahi a Timoteo ke fakaako mo e fakamalolo e tau matakainaga Kerisiano. Ka ko e vala uho he fekafekauaga hana, tuga ha Iesu mo Paulo, ko e fakamatala he tala mitaki mo e taute tutaki. (Mataio 4:23; 1 Korinito 3:5) Ne tala age a Paulo ki a Timoteo: “Ka ko koe, kia nofo fakalatalata a koe ke he tau mena oti, kia fakauka ke he tau mena ke mamahi ai, kia eke e gahua he tagata fakamatala vagahau mitaki, kia fakakatoatoa ni hāu a feua.”—2 Timoteo 4:5.
17, 18. (a) Ko e heigoa e fekafekauaga ka taute he Kerisiano? (e) Aoga fefe e gahua fakamatala ke he fekafekau Kerisiano?
17 Kua tatai foki mo e tau fekafekau Kerisiano he vaha nei. Kua lavelave a lautolu ke he fekafekauaga, ko e gahua fakamatala, lagomatai falu ke he moui ne fakave ke he poa ha Iesu mo e fakaako a lautolu ne loto molu ke ui ke he higoa a Iehova. (Gahua 2:21; 4:10-12; Roma 10:13) Ne fakakite moli e lautolu mai he Tohi Tapu ko e Kautu hokoia e amaamanakiaga ma e tau tagata matematekelea mo e fakakite kua mitaki foki e tau mena he mogonei kaeke moui a tautolu ke he tau matapatu fakaakoaga he mahani Atua. (Salamo 15:1-5; Mareko 13:10) Ka kua nakai fakamatala he fekafekau Kerisiano e evagelia he kaufakalatahaaga. Ka kua fakaako e ia ‘ko e mahani Atua kua talahaua mai ke he mouiaga ne katoa mo ia kua tatali.’—1 Timoteo 4:8.
18 Moli, laulahi e tau fekafekau ke fai puhala foki he fekafekauaga, ne liga kehe mai he taha Kerisiano. Tokologa ne fai matagahua fakamagafaoa. (Efeso 5:21–6:4) Kua fai matagahua e tau motua mo e tau fekafekau lagomatai he fakapotopotoaga. (1 Timoteo 3:1, 12, 13; Tito 1:5; Heperu 13:7) Tokologa e tau Kerisiano ne lagomatai ke ta e tau Fale he Kautu. Kua moua he falu e kotofaaga homo ue atu he gahua noa he taha he tau kaina Peteli he Sosaiete he Kolo Toko. Ka e, fakalataha e tau fekafekau Kerisiano oti ke fakamatala e tala mitaki. Kua nakai fai fifiliaga foki. Ko e fakalataha ke he gahua nei ne fakakite a koe ke he tau tagata ko e fekafekau Kerisiano moli.
Ko e Aga he Fekafekau Kerisiano
19, 20. Ko e heigoa e aga kua lata he tau fekafekau Kerisiano ke feaki?
19 Laulahi he tau fekafekau ha Kerisitenitome ne manako ke moua e lilifu pauaki, mo e ha ha ia lautolu e tau matahigoa tuga e “faifeau” mo e “matua.” Ka kua iloa he fekafekau Kerisiano ko Iehova tokotaha kua lata mo e fakahekeaga. (1 Timoteo 2:9, 10) Nakai fai fekafekau Kerisiano ne manako ke he lilifu tokoluga pihia po ke foli ke he tau matahigoa pauaki. (Mataio 23:8-12) Iloa e ia ko e matapatu kakano he di·a·ko·niʹa ko e “fekafekauaga.” Ko e vepi ne matutaki ki ai kua fakaaoga he falu magaaho i loto he Tohi Tapu ke hagaao ke he tau fekafekauaga fakatagata, tuga e waiter. (Luka 4:39; 17:8; Ioane 2:5) Pete ni kua tokoluga hake e fakaaogaaga hagaao ke he fekafekauaga faka-Kerisiano, kua eke agaia e di·aʹko·nos mo fekafekau.
20 Ti kua nakai fai kakano e fekafekau Kerisiano ke manatu kua aoga lahi a ia. Ko e tau fekafekau Kerisiano moli—pihia foki a lautolu ne fai matagahua pauaki i loto he fakapotopotoaga—ko e tau tupa loto fakatokolalo. Ne pehe a Iesu: “Ka fia tagata lahi e taha ia mutolu, kia eke a ia mo fekafekau ha mutolu; ka manako foki taha ia mutolu ke mua a ia, kia eke a ia mo tupa ha mutolu.” (Mataio 20:26, 27) He fakakite ke he tau tutaki hana e aga hako ke feaki, ne holoholo e Iesu e tau hui ha lautolu, kua taute e gahua he tupa. (Ioane 13:1-15) Ko e matafekau loto fakatokolalo ha ia! Ko e mena ia, ne fekafekau fakatokolalo e tau fekafekau Kerisiano ki a Iehova ko e Atua mo Iesu Keriso. (2 Korinito 6:4; 11:23) Ne fakakite e lautolu e loto holoilalo he fefekafekauaki a lautolu. Ti he fakamatala e lautolu e tala mitaki, ne fekafekau fakamakai a lautolu ke he tau tuuta kaina nakai talitonu ha lautolu.—Roma 1:14, 15; Efeso 3:1-7.
Fakauka ke he Fekafekauaga
21. Kua palepale fefe a Paulo he fakauka ke he fekafekauaga?
21 Ko Paulo, kua fakauka ha ko e fekafekau. Ne tala age a ia ke he tau Kolose ne matematekelea lahi a ia ke fakamatala e tala mitaki ki a lautolu. (Kolose 1:24, 25) Ha kua fakauka a ia, kua tokologa ne talia e tala mitaki ti eke mo tau fekafekau. Kua fakauku a lautolu mo tau tama he Atua mo e tau matakainaga ha Iesu Keriso, katoa mo e amaamanakiaga ke eke mo tau mena momoui fakaagaga mo ia he lagi. Ko e palepale lilifu ha ia he fakauka!
22, 23. (a) Ko e ha kua lata e tau fekafekau Kerisiano he vaha nei ke fakauka? (e) Ko e heigoa e tau fua homo ue atu ne moua mai he fakauka faka-Kerisiano?
22 Kua lata tonu e fakauka he vaha nei ma lautolu ko e tau fekafekau moli he Atua. Tokologa ne taufetului he tau aho takitaha mo e tau gagao po ke tau mamahi he tau tau momotua. Kua gahua lahi e tau matua—tokologa ia lautolu ne nakai fai hoa—ke feaki hake e fanau ha lautolu. Kua fakamalolo ai, ne totoko he fanau e tau agaga hehe ne viko takai ia lautolu. Tokologa e tau Kerisiano ne fehagai mo e tau taufetului he levekiaga fakatupe. Mo e tokologa ne matematekelea he tau favaleaga po ke fehagai mo e tau mena uka ha kua “hohoko mai ai e tau aho uka”! (2 Timoteo 3:1) E, ko e tau fekafekau ne teitei ono miliona ha Iehova he vaha nei kua maeke ke talahau mo e aposetolo ko Paulo: “Kua fakakite e mautolu a mautolu ke he tau mena oti ko e tau fekafekau he Atua, ke he fakauka lahi.” (2 Korinito 6:4) Kua nakai mahala e tau fekafekau Kerisiano. Kua lata moli ke nava ki a lautolu ha ko e ha lautolu a fakauka.
23 Mua atu, tuga ne tupu ki a Paulo, ne ta mai he fakauka e tau fua homo ue atu. He fakauka, ne fakatumau e tautolu e fakafetuiaga tata ha tautolu mo Iehova mo e fakafiafia e loto hana. (Tau Fakatai 27:11) Kua fakamalolo ni e tautolu ha tautolu a tua mo e taute tutaki, he lafi atu ke he fakamatakainaga Kerisiano. (1 Timoteo 4:16) Ne fakamalolo e Iehova e tau fekafekau hana mo e fakamonuina e fekafekauaga ha lautolu he tau aho fakamui nei. Ko e fua, ko lautolu fakahiku he 144,000 kua fita he fakamaopoopo mai, mo e totou miliona foki ne mauokafua ke he amaamanakiaga ke moui tukulagi he lalolagi parataiso. (Luka 23:43; Fakakiteaga 14:1) Moli ni, ko e fekafekauaga Kerisiano ko e fakakiteaga he fakaalofa hofihofi noa ha Iehova. (2 Korinito 4:1) Kia tokiofa ai e tautolu oti mo e fakaaue to tumau tukulagi e tau fua ia.—1 Ioane 2:17.
[Tau Matahui Tala]
^ para. 3 Ko e kupu Heleni di·aʹko·nos ko e punaaga he kupu “tiakono,” ko e taha tagata lahi he lotu. He tau tapu ne eke e tau fifine mo tiakono, ne liga ui a lautolu ko e tau tiakono fifine.
^ para. 15 Pete ni kua hagaao tonu a Roma 12:1 ke he tau Kerisiano fakauku, kua hagaao foki e matapatu fakaakoaga ke he “mamoe kehe.” (Ioane 10:16) Ko lautolu nei ne “fakalataha mai kia Iehova, ke fekafekau kia ia, mo e fakaalofa ke he higoa a Iehova, ke eke mo tau fekafekau hana.”—Isaia 56:6.
Maeke Nakai a Koe ke Fakamaama?
• Ko e heigoa e matagahua ne kau auloa e tau fekafekau Kerisiano he senetenari fakamua ki ai?
• He magaaho fe mo e fakauku e hai e fekafekau Kerisiano?
• Ko e heigoa e aga ne kua lata ke feaki he fekafekau Kerisiano?
• Ko e ha kua lata e fekafekau Kerisiano ke fakauka ka fehagai mo e tau mena uka?
[Tau Huhu he Fakaakoaga]
[Tau Fakatino he lau 14, 15]
Kua fakaako e Kupu he Atua ki a Timoteo he vaha tote. Ne eke a ia mo fekafekau fakauku he magaaho ne papatiso a ia
[Fakatino he lau 16]
Kua fakatino he papatisoaga e tukuleleaga ke he Atua mo e fakamailoga e fakaukuaga he tagata ko e fekafekau
[Fakatino he lau 18]
Kua fakamakai e tau fekafekau Kerisiano ke fekafekau