Fakatauo mo e Fakatokatokaaga ha Iehova
Fakatauo mo e Fakatokatokaaga ha Iehova
“Kia fakakatoatoa a mutolu he Atua hana monuina . . . mo e tau gahua mitaki oti kana, kia eke e mutolu hana finagalo.”—HEPERU 13:20, 21.
1. Ko e heigoa e puke tagata he lalolagi, ti tokofiha ne totou ko e tau tagata he falu lotu?
HE TAU 1999, kua hokotia e puke tagata ke he ono e piliona! Kua fakakite he The World Almanac e numera nei ke 1,165,000,000 e tau Musilimi; 1,030,000,000 e tau Katolika Roma; 762,000,000 e tau Hinitu; 354,000,000 e tau Puta; 316,000,000 e tau Porotesano; mo e 214,000,000 e tau Ofotoko.
2. Ko e heigoa nukua talahau hagaao ke he tuaga fakalotu he vaha nei?
2 He mailoga e mavehevehe mo e fakahakuhaku fakalotu he vaha nei, kua gahua fakatatau kia e tau tagata miliona nei mo e finagalo he Atua? Nakai, “ha ko e Atua nakai ko e Atua ha i ai e fakaagitau, ka ko e mafola.” (1 Korinito 14:33) He taha fahi, ka e kua e fakamatakainaga he tau fekafekau ha Iehova he lalolagi katoa? (1 Peteru 2:17) Ko e kumikumiaga fakamatafeiga kua fakamoli ai ko e ‘Atua hana monuina mo e tau gahua mitaki oti kana, kia eke e lautolu hana finagalo.’—Heperu 13:20, 21.
3. Ko e heigoa ne tupu i Ierusalema he Penetekoso 33 V.N., mo e ko e ha?
3 Moli, ko e tokologa ha lautolu ne fakalataha mo e Tau Fakamoli a Iehova kua nakai eke mo fakaveaga ke filifilia kaeke kua olioli e lautolu e taliaaga faka-Atua; po ke fakafiafia he tau numera tupu ki mua e Atua. Nakai fifili e ia e tau Isaraela ha ko e tau tagata kua ‘mua e tokologa’ ha lautolu. Kua “mua he tokogaogao” ni a lautolu. (Teutaronome 7:7) Ha ko e nakai mahani fakamoli a Isaraela, he Penetekoso 33 V.N., ne hiki e Iehova hana taliaaga ke he fakapotopotoaga fou ne ha ha i ai e tau tutaki ha Iesu Keriso. Kua fakauku aki e agaga tapu ha Iehova a lautolu mo e fakamakai he o atu ke fakapuloa e kupu moli hagaao ke he Atua mo Keriso ke he falu.—Gahua 2:41, 42.
Fakatumau e Holo ki Mua
4. Ko e ha kua talahau a koe na fakatumau e fakapotopotoaga Kerisiano fakamua ke holo ki mua?
4 He senetenari fakamua, ne fakatumau e fakapotopotoaga Kerisiano ke holo ki mua, he hafagi e tau matakavi fou, taute tutaki, mo e moua e maama lahi ke he tau finagalo he Atua. Kua fakatumau e tau Kerisiano fakamua ke he tau maamaaga fakaagaga ne foaki mai he tau tohi omoomoi faka-Atua. Fakalagalaga he tau ahiahi atu he tau aposetolo mo e falu, ne fakakatoatoa ai e lautolu e fekafekauaga ha lautolu. Kua tohi fakamitaki mai e tau mena nei he tau Tohiaga Tapu Heleni Kerisiano.—Gahua 10:21, 22; 13:46, 47; 2 Timoteo 1:13; 4:5; Heperu 6:1-3; 2 Peteru 3:17, 18.
5. Ko e ha ne holo ki mua e fakatokatokaaga he Atua he vaha nei, ti kua lata he ha ke fakatumau a tautolu ke fakatatau atu ki ai?
5 Tuga e tau Kerisiano fakamua, ne tupu e Tau Fakamoli a Iehova he vaha fou nei mai he tamataaga tote. (Sakaria 4:8-10) Tali mai he matahiku he senetenari ke 19 aki, ke he fakamoliaga mahino kua ha ha i ai e agaga he Atua ki luga he fakatokatokaaga hana. Ha kua falanaki a tautolu, nakai ke he malolo he tagata, ka ke he takitakiaga he agaga tapu, kua fakatumau a tautolu ke holo ki mua e maamaaga ke he tau Tohiaga Tapu mo e he taute e finagalo he Atua. (Sakaria 4:6) Ha ko tautolu he magaaho nei ke he “tau aho fakamui,” kua lata ke fakatumau a tautolu ke fakatauo mo e fakatokatokaaga holo ki mua ha Iehova. (2 Timoteo 3:1-5) Ko e taute pihia ka fakatumau a tautolu ke fakagahua e amaamanakiaga ha tautolu mo e fakalataha ke fakamatala hagaao ke he Kautu he Atua nukua fakatu ato hoko e moumouaga fakahiku ke he fakatokaaga nei.—Mataio 24:3-14.
6, 7. Ko e heigoa e tau fahi tolu ka kitekite a tautolu ki ai nukua holo ki mua e fakatokatokaaga ha Iehova?
6 I loto he fakatokatokaaga ha tautolu a lautolu ne kamata feoaki a lautolu mo e fakatokatokaaga ha Iehova he tau atu tau 1920, 30, mo e 40. Ke he tau tau fakamua ia, ko hai ia tautolu ka manamanatu ke he tupuaga mua ue atu mo e holo ki mua he fakatokatokaaga ke hoko mai mogonei? Manamanatu ke he tau lakaaga aoga nukua hokotia ki ai he fakamauaga tala he vaha fou nei ha tautolu! Ko e palepale fakaagaga, moli, ke fakaata e mena ne taute e Iehova he puhala mai he hana tau tagata fakatokatoka fakateokarasi.
7 Ne hokulo e nava ha Tavita i tuai he magaaho ne manamanatu a ia ke he tau gahua homo ue atu ha Iehova. “Kua fia fakailoa atu e au mo e vagahau ki ai,” he talahau e ia, “ka e loga ni, ai maeke he totou.” (Salamo 40:5) Kua fehagai a tautolu mo e tau kukuaga pihia, he nakai maeke ia tautolu ke talahau e tau gahua loga mo e lilifu lahi ha Iehova he vaha ha tautolu. Pete ia, kia kitekite la tautolu ke he tolu e fahi he fakatokatokaaga ha Iehova ne tupu ki mua: (1) holo ki mua he maamaaga fakaagaga, (2) holo ki mua mo e laulahi he fekafekauaga, mo e (3) tau hikihikiaga magaaho tonu mo e tau puhala he fakatokatokaaga.
Fakaaue ma e Maamaaga Fakaagaga
8. He lagotatai mo e Tau Fakatai 4:18, ko e heigoa he tau maamaaga fakaagaga kua fakamalolo a tautolu ke fifili hagaao ke he Kautu?
8 Hagaao ke he holo ki mua he maamaaga fakaagaga, nukua moli ai e Tau Fakatai 4:18. Kua talahau: “Ko e puhala he tau tagata tututonu, kua lata ia mo e maama he aho, kua tupu tolomaki atu hana maama ke hoko ke he tupoula.” Ko e fakaaue ha ia ha tautolu ke he holo ki mua he maamaaga fakaagaga nukua iloa e tautolu! He fonoaga i Cedar Point, Ohio, he 1919, ne peehi ai ke he Kautu he Atua. Ne fakaaoga e Iehova e Kautu ke fakatapu aki hana higoa mo e fakatokoluga aki hana pule katoatoa. Ka kua fakamalolo he maamaaga fakaagaga a tautolu ke mailoga e mena ia he tohi a Kenese ke hoko ki a Fakakiteaga, kua fakamoli he Tohi Tapu e finagalo ha Iehova ke fakatapu hana higoa he puhala he Kautu ne pule he Tama hana. Ko e mena ia kua fakave e amaamanakiaga ue atu he tau tagata ofania he tututonu.—Mataio 12:18, 21.
9, 10. He atu tau 1920, ko e heigoa ne ako hagaao ke he Kautu mo e fetoko he ua e fakatokatokaaga, ti kua lagomatai fefe e mena nei?
9 He fonoaga i Cedar Point, he 1922, ko e tagata lauga fakamua, ko J. F. Rutherford, ne fakamalolo e tau tagata he Atua ke “fakamatala, fakamatala, fakamatala, e Patuiki mo e hana kautu.” He vala tala “Fanauaga he Motu,” ne lomi fakailoa he Watch Tower ia Mati 1, 1925, kua hagaaki ai ke he iloilo fakaagaga hagaao ke he tau perofetaaga ne tuhi atu ke he fakatuaga he Kautu he Atua he 1914. Kua mailoga foki ke he atu tau 1920 ko e ua la e fakatokatokaaga fetoko—ha Iehova mo e ha Satani. Kua felatauaki a laua, ka to tutu a tautolu he fahi ka kautu kaeke ke fakatauo a tautolu mo e fakatokatokaaga ha Iehova.
10 Kua lagomatai fefe he maamaaga fakaagaga pihia a tautolu? Ha ko e Kautu he Atua mo e Patuiki ko Iesu Keriso kua nakai fai vala he lalolagi, ti pihia foki a tautolu. He nakai fai vala he lalolagi kua fakakite e tautolu a tautolu ha ha he fahi he kupu moli. (Ioane 17:16; 18:37) Ka kitekite a tautolu ke he tau lekua lalahi hane fakamalaia aki e fakatokaaga kelea nei, ko e fakaaue ha ia ha tautolu ha kua nakai fai vala he fakatokatokaaga ha Satani! Mo e uhoaki ha ia ha tautolu ke moua e haohao mitaki fakaagaga i loto he fakatokatokaaga ha Iehova!
11. Ko e heigoa e higoa faka-Tohiaga Tapu ne hiki he tau tagata he Atua he 1931?
11 He fonoaga i Columbus, Ohio, he 1931, ko e hagaaoaga latatonu ne moua mai ia Isaia 43:10-12. Ne hiki he tau Tagata Fakaako Tohi Tapu e higoa kehe lahi ko e Tau Fakamoli a Iehova. Ko e fakamonuina ue atu ha ia ke fakailoa e higoa he Atua ke maeke he falu ke momoui ka ui ki ai!—Salamo 83:18; Roma 10:13.
12. Ko e heigoa e maamaaga fakaagaga hagaao ke he moto tagata tokologa ne foaki he 1935?
12 Ato hoko ke he atu tau 1930, tokologa e tau tagata he Atua ne nakai iloa mitaki e amaamanakiaga ha lautolu ma e moui anoiha. Kua manamanatu e falu hagaao ke he moui he lagi ka e futiaki lahi ha ko e tau fakaakoaga he Tohi Tapu kua hagaao ke he lalolagi parataiso. He fonoaga i Washington, D.C., he 1935, ko e fiafia ha ia ke iloa ko e toloaga lahi, po ke moto tagata tokologa, he Fakakiteaga veveheaga 7 ko e vahega he amaamanakiaga ke he lalolagi. Tali mai ai, ko e fakapotopotoaga he moto tagata tokologa ne mafiti lahi mahaki e tolomaki ki mua. Nakai kia fakaaue a tautolu he nakai ko e mena galo e maamaaga he moto tagata tokologa ki a tautolu? Ko e kitia moli he fakapotopoto e tau tagata ke he numera lahi mai he tau motu, tau magafaoa, mo e tau vagahau oti nukua fakalagalaga ai a tautolu ke fakamafiti e fakatauo ha tautolu mo e fakatokatokaaga ha Iehova.
13. Ko e heigoa e matakupu lahi ne talahau he fonoaga i St. Louis he 1941?
13 Ko e matakupu lahi kua lata ke kapeletu e fakalatahaaga tagata ne talahau he fonoaga i St. Louis, Missouri, he 1941. Ko e pule he lalolagi katoatoa, po ke pule katoatoa. Ko e matakupu hanei ka nakai leva ti fakakatoatoa ai, ti ko e aho lahi mo e matakutakuina ke fakakatoatoa e mena ia kua mafiti lahi mai! Kua ta mai foki he 1941 e matakupu pihia he mahani fakamoli, nukua fakaata a tautolu ke fakakite e mena ka tutu takitokotaha a tautolu hagaao ke he pule katoatoa he Atua.
14. He fonoaga he lalolagi katoa he 1950, ko e heigoa ne ako hagaao ke he tau iki ne totoku ia Isaia 32:1, 2?
14 He fonoaga he lalolagi katoa i New York City he 1950, ko e tau iki ia Isaia 32:1, 2 ne fakakite fakamahino ai. Ko e magaaho uhila ia he tutala ai e Matakainaga Frederick Franz ke he mataulu tala nei mo e fakamaama kua ha ha i ai e tau iki he lalolagi fou mo tautolu. He fonoaga ia mo e tau fonoaga ne mumui mai ai, kua ha ha i ai e tau lupa loga he maama fakaagaga. (Salamo 97:11) Ko e fakaaue ha ia ha tautolu ha ko e puhala ha tautolu kua “lata ia mo e maama he aho, kua tupu tolomaki atu hana maama”!
Holo ki Mua he Fekafekauaga ha Tautolu
15, 16. (a) Holo atu ki mua fefe a tautolu he fekafekauaga ha tautolu he atu tau 1920 mo e atu tau 1930? (e) Ko e heigoa e tau tohi ne foaki e fakamaloloaga ke he fekafekauaga Kerisiano he tau hogofulu tau fou nei?
15 Ko e puhala ke ua aki nukua holo ki mua e fakatokatokaaga ha Iehova ko e matapatu gahua ha tautolu—ko e fakamatala he Kautu mo e taute tutaki. (Mataio 28:19, 20; Mareko 13:10) Ke fakakatoatoa e gahua nei, kua fakatumau e fakatokatokaaga ke peehi ki a tautolu e aoga he fakalaulahi e fekafekauaga ha tautolu. He 1922 ne fakamalolo oti ke he tau Kerisiano ke fakalataha ke he gahua fakamatala. Kua fakalago ke he tau tagata takitokotaha ke fakakikila hana maama mo e fai vala fakatagata he fakamatala e kupu moli. (Mataio 5:14-16) He 1927 ne taute e tau lakaaga ke fakatoka e Aho Tapu ko e aho ma e fekafekauaga he fonua. Kamata ia Fepuari 1940, kua fa mahani ke kitia e Tau Fakamoli ke he tau puhalatu he tau matakavi pisinisi hane foaki The Watchtower mo e Consolation (Awake! mogonei).
16 Ne kitia ai he tau 1937 e kamataaga he tohi tote Model Study, peehi ai e manako ke taute e tau liu ahi atu ke maeke ke fakaako e kupu moli he Tohi Tapu ke he falu. Ke he tau tau fakamui, ne peehi fakalahi ai e gahua fakaako Tohi Tapu. Kua foaki e fakamaloloaga ke he fahi nei he fekafekauaga mo e tohi “Let God Be True” he 1946 mo e Ko e Kupu Mooli ke Takitaki Atu ai ke he Moui Tukulagi he 1968. Fou nei, ne fakaaoga e tautolu e tohi Iloilo ne Takitaki Atu ke he Moui Tukulagi. Ko e moua he tau tohi ia kua fakatoka e fakaveaga faka-Tohiaga Tapu mitaki ma e taute tutaki.
Holo ki Mua mo e Tau Hikihikiaga he Fakatokatokaaga
17. He fakatumau ke he Isaia 60:17, holo ki mua fefe e fakatokatokaaga ha Iehova?
17 Ko e puhala ke tolu aki nukua holo ki mua e fakatokatokaaga ha Iehova ko e tau hikihikiaga he fakatokatokaaga. Hagaao ki a Isaia 60:17, ne mavehe a Iehova: “To tamai e au e auro ke totogi aki e a[p]a kula; ti tamai e au e ario ke totogi aki e lapatoa; mo e apa kula ke totogi aki e tau akau, mo e lapatoa ke totogi aki e tau maka; to eke foki e au hau a tau iki ke mafola, mo e hau a tau pule ke tututonu.” He fakatumau mo e perofetaaga nei, kua taute e tau lakaaga ke fakatolomaki e levekiaga he gahua fakamatala he Kautu mo e leveki e fuifui mamoe.
18, 19. Ko e heigoa e tau hikihikiaga he fakatokatokaaga nukua taute he tau tau loga?
18 He 1919 ko e takitaki fekafekau ne kotofa he tau fakapotopotoaga takitaha ke taute e fakatokatokaaga ma e fekafekau he fonua. Kua fakamalolo he mena nei e fekafekauaga ha tautolu ke he fonua. Ko e vili he tau motua mo e tau tiakono ne motuhia ai he 1932, kua fakamailoga e o kehe mai ha tautolu he tau puhala fakatemokarasi. Ko e taha lakaaga foki ne hokotia ki ai he 1938 he magaaho ne kamata e tau fekafekau oti he fakapotopotoaga ke kotofa fakalahi atu ke he tau fakatokatokaaga ma e gahua fakateokarasi he fakapotopotoaga Kerisiano fakamua. (Gahua 14:23; 1 Timoteo 4:14) He 1972 ko e tau leveki mo e tau fekafekau lagomatai kua kotofa ke leveki, tuga ne taute he tau patu he tau Kerisiano fakamua. He nakai ni taha e tagata tane ke leveki e fakapotopotoaga, kua fakakite mai ia Filipi 1:1 mo e falu kupu tohi ko lautolu ne hokotia ke he tau poakiaga faka-Tohi Tapu ma e tau leveki ne fakatu e kau he tau motua.—Gahua 20:28; Efeso 4:11, 12.
19 He 1975 ne fakagahua ai e fakatokaaga ma e tau komiti he Kau Fakatufono he Tau Fakamoli a Iehova ke takitaki e tau gahua he lalolagi katoa he fakatokatokaaga he Atua. Ne kotofa e tau Komiti he La ke leveki e gahua he tau matakavi kehekehe. Tali mai ai, kua hagaaki ai ke he fakatote hifo e gahua he tau matapatu mo e tau la he Watch Tower Society ke maeke ke “taute tonu e tau mena ne mua atu e aoga lahi.” (Filipi 1:9, 10, NW) Ko e matagahua kua fakave ke he tau ua he tau leveki i lalo hifo ha Keriso kua putoia ai e takitaki he gahua evagelia, fakaako e fakapotopotoaga, mo e leveki fakamitaki e fuifui mamoe he Atua.—1 Timoteo 4:16; Heperu 13:7, 17; 1 Peteru 5:2, 3.
Takitakiaga Malolo ha Iesu
20. He fakatumau e fakatauo mo e fakatokatokaaga ha Iehova ko e heigoa kua manako ke mailoga e tautolu ke he tuaga ha Iesu?
20 He fakatumau ke fakatauo mo e fakatokatokaaga holo ki mua ha Iehova kua manako ke mailoga e tautolu e matagahua ne kotofa he Atua ki a Iesu Keriso ko e “ulu he ekalesia haia.” (Efeso 5:22, 23) Mailoga foki e Isaia 55:4, ne talahau mai ki a tautolu: “Kitiala, kua ta age e au [Iehova] a ia mo tagata fakamoli mena ke he tau motu, ko e takitaki mo e pule ke he tau motu.” Iloa moli e Iesu e puhala ke takitaki. Kua iloa foki e ia hana tau mamoe mo e ha lautolu a tau gahua. Ka e, he magaaho ne ahiahi a ia ke he tau fakapotopotoaga ne fitu i Asia Tote, laga lima ne talahau e ia: “Kua iloa e au hau a tau gahua.” (Fakakiteaga 2:2, 19; 3:1, 8, 15) Kua iloa foki e Iesu e tau manako ha tautolu, tuga ni hana Matua, ko Iehova. Ato talahau e Liogi Fakatai, ne pehe a Iesu: “Ko e mena kua fioia ha mutolu a Matua e tau mena kua nonofogati ai a mutolu, ka e nakaila ole atu a mutolu kia ia.”—Mataio 6:8-13.
21. Kitia fefe e takitakiaga ha Iesu he fakapotopotoaga Kerisiano?
21 Kitia fefe e takitakiaga ha Iesu? Taha puhala mai ia he tau leveki Kerisiano, ko e “tau mena fakaalofa ke he tau tagata.” (Efeso 4:8) Kua fakatino mai he Fakakiteaga 1:16 e tau leveki fakauku ha he fahi matau ha Keriso, i lalo hifo he pule hana. He vaha nei, ne takitaki e Iesu e fakatokaaga ma e tau motua, ko e tau tagata tane kua moua e amaamanakiaga ke he lagi po ke he lalolagi. He fakamaama he vala tala fakamua, kua fifili he agaga tapu a lautolu he lagotatai ke he tau poakiaga faka-Tohiaga Tapu. (1 Timoteo 3:1-7; Tito 1:5-9) He senetenari fakamua, ko e matakau he tau patu i Ierusalema ne moua mai e kau fakatufono ne leveki e tau fakapotopotoaga mo e tau gahua fakamatala oti he Kautu. Ko e puhala taha ia ni ne muitua he fakatokatokaaga ha Iehova he vaha nei.
Fakatauo Tumau!
22. Ko e heigoa e lagomatai kua foaki he Kau Fakatufono?
22 Kua foaki age e tau koloa he Kautu he lalolagi ke he “fekafekau fakamoli mo e loto matala,” nukua hukui ai he Kau Fakatufono he Tau Fakamoli a Iehova. (Mataio 24:45-47) Kua matapatu e kapaletu he Kau Fakatufono ke he foaki e fakaakoaga mo e hatakiaga fakaagaga ma e fakapotopotoaga Kerisiano. (Gahua 6:1-6) He putoia e tau matakainaga tapuaki ke he tau matematekelea tutupu pauaki, kua ole e Kau Fakatufono ke he taha po ke loga e kaufakalatahaaga ke foaki e tau koloa mo e ke liu talaga po ke fakafou e tau kaina mo e tau Fale he Kautu ne malona. Ka fai Kerisiano ne taute fakakelea po ke favale ki ai, ha ha i ai e tau lakaaga kua taute ke ati hake fakaagaga a lautolu. Mo e “aho kua kelea,” kua taute e tau laliaga oti ke fakatumau e gahua fakamatala ke holo ki mua.—2 Timoteo 4:1, 2.
23, 24. Ha mena ni ne hoko ke he tau tagata hana, ko e heigoa kua fakatumau a Iehova ke foaki, ti ko e heigoa kua lata ke eke mo fifiliaga ha tautolu?
23 Ha mena ni nukua hoko ke he tau tagata ha Iehova, to foaki tumau e ia e tau mena kai fakaagaga mo e puhala kua lata. Kua foaki foki he Atua e loto manamanatu mo e pulotu ke he tau matakainaga tane makaukau ke tauteute e tau fakalaulahiaga mo e tau hikihikiaga he fakatokatokaaga fakateokarasi. (Teutaronome 34:9; Efeso 1:16, 17) Nakai kaumahala, kua foaki e Iehova e tau mena kua lata mo tautolu ke fakamoli e poakiaga taute tutaki ha tautolu mo e ke fakakatoatoa e fekafekauaga ha tautolu he lalolagi katoa.—2 Timoteo 4:5.
24 Ha ha ia tautolu e mauokafua katoatoa to nakai tiaki e Iehova hana tau tagata tua fakamoli; to fakahao e ia a lautolu mai he “matematekelea lahi” hane hau. (Fakakiteaga 7:9-14; Salamo 94:14; 2 Peteru 2:9) Ha ha ia tautolu e kakano ke fakatumau e mauokafua fakamua ha tautolu ke mauniva ke hoko ke he fakaotiaga. (Heperu 3:14) Ko e mena ia, kia fifili a tautolu he fakatumau ke fakatauo mo e fakatokatokaaga ha Iehova.
To Tali Fefe e Koe?
• Ko e ha kua talahau a tautolu kua fakatumau e fakatokatokaaga ha Iehova ke tupu ki mua?
• Ko e heigoa e fakamoliaga i ai kua olioli he tau tagata he Atua e maamaaga fakaagaga holo ki mua?
• Fefe e tau holo ki mua he fekafekauaga Kerisiano?
• Ko e heigoa e tau hikihikiaga magaaho tonu ne taute he tau puhala he fakatokatokaaga he tau fekafekau ha Iehova?
[Tau Huhu he Fakaakoaga]
[Fakatino he lau 13]
Tuga a Tavita, nakai maeke ia tautolu ke totou oti e tau gahua homo ue atu ha Iehova
[Fakatino he lau 14]
Ne aoga e fuifui mamoe he Atua mai he tau hikihikiaga magaaho tonu he tau puhala he fakatokatokaaga