Ko e Fakailoaaga Pauaki

HE MATAHIKU he feleveiaaga he Sosaiete Tohi Tapu mo e Pepa Lotu he Kolo Toko ha Pennsylvania ia Oketopa 7, 2000, ne talahau he tagata nofoa, ko John E. Barr, e fakailoaaga pauaki he Kau Fakatufono. Kua fakave e fakailoaaga nei ha Theodore Jaracz mo Daniel Sydlik ke he tau lauga fakamua he aho ia.—Kikite tau lau 8-12 he mekasini nei.

He talahau e manatu aoga lahi, ne pehe e Matakainaga Barr: “Kua tuku age he ‘fekafekau fakamoli mo e loto matala’ mo e hana Kau Fakatufono ki a lautolu e mena tokoluga mo e mua atu e putoia ke he tau mena ne foaki ke he tau kaufakalatahaaga matafakatufono. Ti fakatokatoka mai he tau fakamauaga he tau kaufakalatahaaga pihia ko e tau mena ne nakai maama katoa e lautolu. Ka kua kotofa he Iki ha tautolu, ko Iesu Keriso, e vahega fekafekau fakamoli ke he ‘tau mena oti’ hana, po ke tau mena he Kautu he lalolagi nei.”—Mataio 24:45-47.

Hagaao ke he kaufakalatahaaga i Pennsylvania, ne lafi he Matakainaga Barr: “Tali mai he fakatu ai he 1884, ne fakagahua he Sosaiete Tohi Tapu mo e Pepa Lotu he Kolo Toko ha Pennsylvania e matagahua aoga lahi he fakamauaga tala ha tautolu he vaha nei. Ka ko e kanavaakau matafakatufono agaia ni ne ha ha ai ke fakaaoga he ‘fekafekau fakamoli mo e loto matala’ he magaaho ka lata ai.”

He tau lauga ha laua, ne fakamaama e Matakainaga Sydlik mo Jaracz ko e pete ni he foaki ke he “fekafekau fakamoli mo e loto matala” e tau mena oti he Iki, kua nakai taofi e vahega fekafekau he fakaata e tau tagata tane fakamoli mai he ‘tau mamoe kehe’ ke leveki falu fakaholoaga mau he tau matagahuaaga. (Ioane 10:16) Mo e nakai fai kakano he Tohi Tapu ne fakamakamaka mai ko e tau tagata oti po ke ha tagata takitaki he tau kaufakalatahaaga matafakatufono ne fakaaoga he Tau Fakamoli a Iehova kua lata ke eke mo tau Kerisiano fakauku.

Ne tala age e Matakainaga Barr ke he toloaga tagata kua ha ha ai falu he Kau Fakatufono he Tau Fakamoli a Iehova ne eke mo tau takitaki mo e tau ekegahua ne kua fifili ne lautolu ke lalaka hifo mai he kau he tau takitaki he tau kaufakalatahaaga oti ne fakaaoga he “fekafekau fakamoli mo e loto matala” he Tau Fahi Kaufakalataha. Ati fifili ai e tau matakainaga tane he vahega he tau mamoe kehe ke hukui aki.

Ko e fifiliaga nei kua aoga moli. Kua toka a lautolu e Kau Fakatufono ke fai magaaho ke tauteute e tau mena kai fakaagaga mo e ke leveki e tau manako fakaagaga he tau matakainaga he lalolagi katoa.

He fakahikuaga, ne tala age e tagata nofoa ke he toloaga tagata fiafia: “Pete kua kotofa e tau matagahua matafakatufono mo e fakatokatoka ke he tau leveki fakamoli, . . . kua fekafekau oti a lautolu i lalo he takitakiaga fakaagaga he Kau Fakatufono. . . . Kia liogi oti a a tautolu ki a Iehova ma e fakamonuina hana ke he tau gahua kau fakalataha ha tautolu he taute e finagalo hana, ke he lilifu mo e fakaheke he higoa mua ue atu hana.”