Kotofa Fakateokarasi e Tau Leveki mo e Tau Fekafekau Lagomatai
Kotofa Fakateokarasi e Tau Leveki mo e Tau Fekafekau Lagomatai
“Hanai, a mutolu kia mutolu, katoa mo e fuifui mamoe oti kana kua kotofa a mutolu he Agaga Tapu ke eke ai mo [“tau leveki,” NW].”—GAHUA 20:28.
1, 2. Puhala fe ne fa e fakamoli ai e Isaia 60:22?
KUA leva tigahau he talahau tuai e Iehova taha mena aoga lahi ka tupu he vaha he fakahikuaga. He puhala he perofeta ko Isaia, ne pehe mai: “Ko e tokogahoa to eke ia mo tokoafe, mo e maga fakateaga to eke ia mo motu malolo; ko au ko Iehova to fakaave au ke eke ke he hana ni a aho.”—Isaia 60:22.
2 Ha i ai nakai ha fakamoliaga ha ne fakamoli e perofetaaga nei he vaha nei? E, moli! He magahala he atu tau 1870, taha e fakapotopotoaga he tau tagata ha Iehova ne fakatu i Allegheny, Pennsylvania, U.S.A. Mai he kamataaga tote pihia, kua hogofulu e tau afe he tau fakapotopotoaga ne kua fakatutu hake mo e ha ne tupuolaola ke he lalolagi katoa. Kua totou miliona e tau tagata fakapuloa Kautu—ko e motu malolo—ha ne fakalataha mogonei ke molea e 91,000 he tau fakapotopotoaga he tau motu ne 230 he lalolagi katoa. Kua fakamoli ai he mena nei ha ne fakaave e Iehova e fakapotopotoaga he tau tagata tapuaki moli ato hoko mai e ‘matematekela lahi,’ ne tata lahi mai.—Mataio 24:21; Fakakiteaga 7:9-14.
3. Ko e heigoa e kakano ke papatiso “ke he higoa he Matua, mo e Tama, mo e Agaga Tapu”?
3 He mole e tukulele fakatagata ki a Iehova, mo e fakatatau atu ke he tau fakaakoaga ha Iesu, ko e totou miliona nei kua papatiso “ke he higoa he Matua, mo Tama, mo e Agaga Tapu.” (Mataio 28:19) Ko e kakano he papatiso “ke he higoa he Matua” kua mailoga he tau tagata takitokotaha nei a Iehova mo ha lautolu a Matua mo e Foaki Moui he lagi mo e omaoma ke he pule katoatoa hana. Ne fakakite he papatiso ‘ke he higoa he Tama’ kua fakailoa e lautolu a Iesu Keriso ko e Lukutoto, Takitaki, mo e Patuiki ha lautolu. Fakailoa foki e lautolu e matagahua he agaga tapu, po ke gahuahua malolo he Atua, ne takitaki e tau momoui ha lautolu. Fakakite he mena nei kua papatiso a lautolu ‘ke he higoa he Agaga Tapu.’
4. Fakauku fefe e tau fekafekau Kerisiano?
4 He papatisoaga ha lautolu, ne fakauku e tau tutaki fou mo tau fekafekau ha Iehova ko e Atua. Ko hai ne fakauku a lautolu? Ke he matapatuaga, kua hagaao e tau kupu he 2 Korinito 3:5 ki a lautolu: “Ko e Atua kua maeke ai a mautolu [mo tau fekafekau].” Kua nakai fai mena lahi foki ne manako a lautolu ki ai, ka ke fakauku e Iehova ko e Atua! He mole e papatisoaga ha lautolu, to fakatumau a lautolu ke tupu fakaagaga mo tau fekafekau he “vagahau mitaki” kaeke talia e lautolu e tau takitakiaga he agaga he Atua mo e fakatumau ke fakagahuahua e Kupu hana.—Mataio 24:14; Gahua 9:31.
Kotofaaga Fakateokarasi—Nakai Fakatemokarasi
5. Kua fifili fakatemokarasi kia e tau leveki mo e tau fekafekau lagomatai Kerisiano? Fakamaama.
5 Kua lata ke moua e leveki fakamitaki mai he tau leveki kotofa mo e lagomatai he tau fekafekau lagomatai ke leveki aki e tau manako fakaagaga he numera holo ki mua he tau fekafekau fakamoli. (Filipi 1:1, fakatatai NW.) Kua kotofa fefe e tau tagata tane fakaagaga pihia? Nakai he puhala ne tuga ne taute e Kerisitenitome. Tuga anei, kua nakai fifili fakatemokarasi e tau leveki Kerisiano, pehe a ia, he moua e tau vili he tau tagata tokologa ne fakalataha mo e fakapotopotoaga. Nakai, nukua taute fakateokarasi e tau kotofaaga nei. Ko e heigoa e kakano he mena nei?
6. (a) Ko e heigoa e teokarasi moli? (e) Ko e ha ne kotofa fakateokarasi e tau leveki mo e tau fekafekau lagomatai?
6 Ke talahau fakalapalapa, ko e teokarasi moli ko e pule he Atua. Kua omaoma noa e Tau Fakamoli a Iehova ke he pule hana mo e kau fakalataha ke taute e finagalo faka-Atua. (Salamo 143:10; Mataio 6:9, 10) Ko e tau kotofaaga he tau leveki Kerisiano, po ke tau motua, mo e tau fekafekau lagomatai kua taute fakateokarasi ai, ha ko e fakaholoaga he fakailoa mo e kotofa e tau tagata tane gahua fakamoli pihia kua taute hagaao ke he fakatokatokaaga he Atua tuga ne toka i loto he tau Tohiaga Tapu. Ti ko e ‘mua ue atu he tau mena oti,’ kua tonuhia ia Iehova ke fifili e puhala ka gahuahua ai e fakatokatokaaga kitia mata hana.—1 Nofoaga he Tau Patuiki 29:11; Salamo 97:9.
7. Kua takitaki fefe e Tau Fakamoli a Iehova?
7 Kehe mai he tau matakau lotu ne loga i Kerisitenitome, kua nakai fifili he Tau Fakamoli a Iehova ha vahega fakatufono fakaagaga ka gahua ai a lautolu i lalo. Ko e tau Kerisiano loto moli nei kua fakamakamaka ke fakapiki mau ke he tau tutuaga ha Iehova. Ko e tau leveki ia lautolu kua nakai moua e gahua ha ko e ha fakatufono fakalotu he falu fakapotopotoaga, he tau takitaki i ai, po ke he ha kau fifili. Kaeke lali e tau mena he lalolagi nei ke fakalavelave mai ke he tau kotofaaga nei, ne nakai mahalo e tau tagata ha Iehova ke fakahui. Fakamalolo ai, ne kuku mau e lautolu e tuaga ne talahau he tau aposetolo he senetenari fakamua he magaaho ne pehe a lautolu: “Kua lata ni ke mua e omaoma ke he Atua ke he omaoma ke he tau tagata.” (Gahua 5:29) Ko e mena ia, ne omaoma ai e Tau Fakamoli ke he Atua ke he tau mena oti. (Heperu 12:9; Iakopo 4:7) He muitua ke he fakaholoaga fakateokarasi ka ta mai e fiafia faka-Atua.
8. Kehekehe fefe e tau fakaholoaga he fakatemokarasi mo e fakateokarasi?
8 Ko e tau fekafekau he Teokarasi Lahi ue Atu, ko Iehova, kua lata ia tautolu ke mailoga e kehekeheaga he vahaloto he tau fakaholoaga fakatemokarasi mo e fakateokarasi. Kua manako e tau fakaholoaga fakatemokarasi ke tatai e tutuaga he tau tagata mo e fa mahani ke kitia ai he foli ma e gahua mo e fifiliaga he vili he tokologa. Ko e tau fakaholoaga pihia kua nakai putoia ke he tau kotofaaga fakateokarasi. Kua nakai mai he tau tagata e tau mena nei; po ke mai he falu kaufakalatahaaga. He hagaaki ke he kotofaaga hana mai ia Iesu mo Iehova ke eke mo “aposetolo ke he tau tagata kehe,” ne tala age a Paulo ke he tau Kalatia kua kotofa “nakai mai he tau tagata, ti nakai kotofa foki he taha tagata, ka ko Iesu Keriso, mo e Atua e Matua, ko ia ne fakatu mai a ia mai ia lautolu kua mamate.”—Roma 11:13; Kalatia 1:1.
Kotofa he Agaga Tapu
9. Ko e heigoa ne talahau he Gahua 20:28 hagaao ke he kotofaaga he tau leveki Kerisiano?
9 Ne fakamanatu e Paulo ke he tau leveki ne nonofo i Efeso kua kotofa he Atua he puhala he agaga tapu a lautolu. Ne pehe a ia: “Hanai, a mutolu kia mutolu, katoa mo e fuifui mamoe oti kana kua kotofa a mutolu he Agaga Tapu ke eke ai mo [tau leveki], kia leveki e ekalesia he Atua ne fakafua e ia māna ke he [“toto he hana ni a Tama,” NW].” (Gahua 20:28) Ko e tau leveki Kerisiano ia kua lata ke fakatumau ke takitaki he agaga tapu he taute e lautolu e tau matagahua ha lautolu ko e tau leveki he fuifui mamoe he Atua. Kaeke nakai maeke e tagata ne kotofa ke fakatatai ke he tau tutuaga faka-Atua, nakai leva to gahuahua e agaga tapu ke uta kehe a ia mai he tuaga hana.
10. Putoia fefe e agaga tapu he matagahua lahi he tau kotofaaga fakateokarasi?
10 Ko e aoga lahi fefe e matagahua he agaga tapu? Ke fakamua aki, ko e fakamauaga ne fakatokatoka e tau poakiaga ma e leveki fakaagaga kua omoi he agaga tapu. I loto he tau tohi hana ki a Timoteo mo Tito, ne tohi hifo e Paulo e tau tutuaga ke fakatatai ki ai e tau leveki mo e tau fekafekau lagomatai. He katoa, ne totoku e ia kavi ke 16 e tau poakiaga kehekehe. Tuga anei, lata he tau leveki ke nakai talahaua kelea, kua mataala, kua mahani fakalatalata, kua gali, kua fakaalofa ke he tau tagata kehe, kua aga ke fakaako atu, mo e eke mo tau ulu mitaki he magafaoa. Kua lata ia lautolu ke lagotatai he fakaaogaaga he tau kava, nakai loto lahi ke he tupe, mo e ke nakai matagaoi. Kua fakatokatoka pihia foki e tau tutuaga tokoluga ma e tau tagata ne foli ma e kotofaaga ke eke mo tau fekafekau lagomatai.—1 Timoteo 3:1-10, 12, 13; Tito 1:5-9.
11. Ko e heigoa falu lakaaga ne kua lata ke moua he tau tagata tane ne manako matagahua he fakapotopotoaga?
11 Ko e liu futiaki e tau mena nei ne fakakite ko lautolu ne takitaki e tapuaki ha Iehova kua lata ke mitaki e mahani faka-Kerisiano. Ko e tau tagata tane ne manako ke moua e matagahua he fakapotopotoaga kua lata ke fakakite moli ha ne gahuahua e agaga tapu ia lautolu. (2 Timoteo 1:14) Kua lata ke kitia moli kua fakatupu he agaga he Atua i loto he tau tagata nei e tau fua he ‘fakaalofa, fiafia, mafola, fakauka, totonu, mahani mitaki, tua, mahani molu, mo e manako fakalatalata.’ (Kalatia 5:22, 23) Kua kitia ai e tau fua pihia he fehagaiaga ha lautolu mo e tau katofia talitonu mo e falu foki. Moli, liga mua atu falu he fakakite e falu fua he agaga, ka kua moua he falu foki e tau lataaga ma e tau leveki ke he puhala kua mua atu ki ai. Ka e he fakatokatokaaga katoa he tau momoui ha lautolu, ko lautolu oti ne amanaki ke kotofa mo tau leveki po ke tau fekafekau lagomatai kua lata ke fakatata ko e tau tagata tane fakaagaga a lautolu, kua fuafua atu ke he tau poakiaga he Kupu he Atua.
12. Ko hai ne talahau ka kotofa he agaga tapu?
12 He magaaho ne tomatoma a Paulo ke he falu ke eke mo tau tagata fifitaki ki a ia, kua ataina ai a ia ke vagahau fakatonu ha kua fifitaki e ia a Iesu Keriso, ne ‘toka e fakafifitaki ma tautolu, kia mumui atu a tautolu ke he hana tau tuagahui.’ (1 Peteru 2:21; 1 Korinito 11:1) Ko lautolu ne taute e tau poakiaga faka-Tohiaga Tapu he magaaho ne kotofa a lautolu mo tau leveki po ke tau fekafekau lagomatai kua talahau ai ke kotofa he agaga tapu.
13. Lagomatai fefe he agaga tapu a lautolu ne taute e tau fakailoaaga he tau tagata tane ke fekafekau he fakapotopotoaga?
13 Ha i ai taha mena ne fakakite e puhala ne gahuahua e agaga tapu ke fakailoa mo e kotofa e tau leveki. Ne talahau e Iesu kua ‘mua e Matua ha mutolu ha ha he lagi ke foaki mai e Agaga Tapu kia lautolu ka ole atu ai kia ia.’ (Luka 11:13) Ti he magaaho ka fakalataha e tau motua he fakapotopotoaga ke fakailoa e tau tagata tane ma e matagahua he fakapotopotoaga, ne liogi a lautolu ma e agaga he Atua ke takitaki a lautolu. Kua fakave e fakailoaaga ha lautolu ke he mena ne tohi he Kupu he Atua ne omoi he agaga, mo e lagomatai he agaga tapu a lautolu ke fifili kua mailoga nakai he tagata ne amanaki ke kotofa e tau poakiaga he Tohiaga Tapu. Ko lautolu ne taute e fakailoaaga kua nakai ke fakaohooho he tauteuteaga he tagata, tau iloilo ne moua he fakaakoaga, po ke tau iloilo pauaki. Kua lata ke onoono fakamahao ko e tagata fakaagaga nakai a ia, ko e tagata kua nakai fakauaua a lautolu he fakapotopotoaga ke o atu ki ai ma e fakatonutonuaga fakaagaga.
14. Ko e heigoa ne ako e tautolu mai he Gahua 6:1-3?
14 Pete kua kau fakalataha e tau motua mo e tau leveki o fano ke fakailoa e tau matakainaga tane ke fekafekau mo tau motua mo e tau fekafekau lagomatai, nukua taute moli ni e tau kotofaaga ke fakahagaao atu ke he fakatokatokaaga he senetenari fakamua. He taha magaaho, ne manako ai ma e tau tagata fakaagaga fakamoli ke leveki e kotofaaga aoga lahi. Ne foaki he kau fakatufono e hatakiaga ne mui mai: “Ati fifili a e tokofitu a tagata talahaua ha mutolu, kua puke ke he Agaga Tapu mo e iloilo, kia kotofa e mautolu a lautolu ke he feua nai.” (Gahua 6:1-3) Pete he taute he tau tagata talahaua e tau fakailoaaga, ka kua fifili he tau tagata kotofa pauaki i Ierusalema e tau kotofaaga. Ko e fakatokatokaaga pihia ne muitua ki ai he vaha nei.
15. Putoia fefe e Kau Fakatufono ke he kotofaaga he tau tagata?
15 Kua kotofa fakahako he Kau Fakatufono he Tau Fakamoli a Iehova e tau tagata oti he Komiti he La. He fifili ko hai kua maeke ke fua e tau matagahua mamafa pihia, ne tokaloto he Kau Fakatufono e talahauaga ha Iesu: “Ko ia kua foaki atu ki ai e tau mena loga, to kumi atu foki kia ia e tau mena loga; ko ia foki ne tuku atu ki ai he tau tagata e tau mena loga, to tala atu e lautolu kia ia ke fakalahi mai e tau mena.” (Luka 12:48) Ha kua kotofa e tau tagata he Komiti he La, ne kotofa foki he Kau Fakatufono e tau motua he Peteli mo e tau leveki o fano. Taha mena foki, ne poaki foki e lautolu e tau matakainaga fakamoli ke hukui a lautolu ke taute falu a kotofaaga. Ha ha ai foki e fakaholoaga he Tohi Tapu ma e mena nei.
‘Kia Kotofa, Tuga ne Tala Atu e Au kia Koe’
16. Ko e ha ne toka e Paulo a Tito i Kereta, mo e heigoa ne fakakite he mena nei hagaao ke he tau kotofaaga fakateokarasi he vaha nei?
16 Ne tala age a Paulo ke he ekegahua hana ko Tito: “Ko e mena hanai ne toka ai e au a koe i Kereta, kia fakahakohako e koe e tau mena ne toe, mo e kotofa e tau patu ke he taha māga mo e taha māga, tuga ne tala atu ai au kia koe.” (Tito 1:5) Kua tohi ai e Paulo e tau lataaga ka kumi e Tito he tau tagata tane ne kua lata mo e tau kotofaaga pihia. Ti he vaha nei, ne kotofa he Kau Fakatufono e tau matakainaga kua lata he tau la ke hukui ai he kotofa e tau motua mo e tau fekafekau lagomatai. Ko lautolu ne hukui e Kau Fakatufono kua fakaeneene lahi ke maama maaliali mo e muitua e tau takitakiaga he Tohi Tapu ke taute e tau kotofaaga pihia. Ha ko e mena ia, ko e i lalo he takitakiaga he Kau Fakatufono ne kotofa ai e tau tagata tane fakamoli ke fekafekau he tau fakapotopotoaga he Tau Fakamoli a Iehova he lalolagi katoa.
17. Taute fefe he tau la ofisa e tau fakailoaaga ma e kotofaaga he tau leveki mo e tau fekafekau lagomatai?
17 He magaaho ne uta ke he la ofisa he Sosaiete he Kolo Toko e tau fakailoaaga ke kotofa e tau leveki mo e tau fekafekau lagomatai, nukua falanaki e tau tagata tane iloilo ke he agaga he Atua ma e takitakiaga ke taute e tau kotofaaga. Kua logona he tau tagata nei e fakalagoaga, he mailoga kua nakai lata ia lautolu ke alumaki ke fakalago atu e tau lima ke he taha tagata, neke fakalataha a lautolu ke he tau hala hana.—1 Timoteo 5:22.
18, 19. (a) Fakafano fefe falu a kotofaaga? (e) Kua taute fefe e fakaholoaga katoa he fakailoaaga mo e kotofaaga?
18 Ko e falu kotofaaga kua fakahoko he tohi ne ha ha ai e ulu tohi pauaki mai he kaufakalatahaaga. Ko e tohi pihia ka fakaaoga ke kotofa foki falu matakainaga tane he fakapotopotoaga.
19 Kua mai e tau kotofaaga fakateokarasi ia Iehova he puhala he hana Tama mo e puhala kitia he Atua he lalolagi, ko e “fekafekau fakamoli mo e loto matala” mo e hana Kau Fakatufono. (Mataio 24:45-47) Ko e fakaholoaga katoa he fakailoaaga mo e kotofaaga pihia kua mai fakahako, po ke takitaki he agaga tapu. Kua pihia e mena nei ha kua fakatoka mai e tau lataaga he Kupu he Atua, ne omoi he agaga tapu, ti ko e tau tagata takitokotaha ne kotofa kua fakakite moli ke moua e tau fua he agaga ia. Ko e mena ia, kua lata ke mailoga e tau kotofaaga ke taute mai he agaga tapu. Tuga ni kua kotofa fakateokarasi e tau leveki mo e tau fekafekau lagomatai he senetenari fakamua, kua pihia foki he vaha nei.
Fakaaue Lahi ma e Takitaki ha Iehova
20. Ko e ha ne fakalataha a tautolu ke he tau manatu ha Tavita ne fakamau ia Salamo 133:1?
20 He vaha nei he tupuola fakaagaga mo e tolomaki fakateokarasi he tau gahua fakamatala he Kautu, kua fakaaue a tautolu ha kua lago ki a Iehova e kotofaaga he tau leveki mo e tau fekafekau lagomatai. Kua lagomatai he tau fakaholoaga he Tohi Tapu a tautolu ke taofi mau e tau tutuaga tututonu tokoluga he Atua ia tautolu ko e Tau Fakamoli a Iehova. Mua atu, ko e agaga faka-Kerisiano mo e tau gahua fakamakamaka he tau tagata tane nei kua lafi fakalahi mai ke he mafola homo ue atu mo e nonofo fakalataha ha tautolu ko e tau fekafekau ha Iehova. Ke tuga e salamo ko Tavita, kua omoi a tautolu ke talahau fakalahi: “Kitiala, ko e mena mitaki lahi mo e fulufuluola, ke nonofo fakalataha e tau matakainaga.”—Salamo 133:1.
21. Puhala fe ne fakamoli e Isaia 60:17 he vaha nei?
21 Kua fakaaue tulou ha a tautolu ke he fakahakoaga ha Iehova he kakano he hana Kupu mo e agaga tapu! Mo e kakano moli e tau kupu ne fakamau he Isaia 60:17: “To tamai e au e auro ke totogi aki e aga kula; ti tamai e au e ario ke totogi aki e lapatoa; mo e apa kula ke totogi aki e akau, mo e lapatoa ke totogi aki e tau maka; to eke foki e au hau a tau iki ke mafola, mo e hau a tau pule ke tututonu.” Ha kua holo ki mua he fakamoli katoatoa e tau fakaholoaga fakateokarasi ke he Tau Fakamoli a Iehova, ha ne olioli e tautolu e tau tutuaga monuina nei he fakatokatokaaga katoa he Atua he lalolagi.
22. Ko e heigoa kua lata ia tautolu ke fakaaue ki ai, mo e heigoa kua lata ia tautolu ke fakamalolo ke taute?
22 Kua hokulo e fakaaue ha tautolu ma e tau fakaholoaga fakateokarasi ne ha ha ai ia tautolu. Mo e fakaaue lahi a tautolu ke he tau gahua uka ka e mamakona ne taute he tau leveki mo e tau fekafekau lagomatai ne kotofa fakateokarasi. Kua fakaheke mo e loto katoatoa e tautolu e Matua fakaalofa he lagi, ko ia ne foaki ki a tautolu e amaamanakiaga fakaagaga mo e fakamonuina lahi a tautolu. (Tau Fakatai 10:22) Kia lata ai ia tautolu ke fakamalolo ke fakatatau mo e fakatokatokaaga ha Iehova. Ke he tau mena oti, kia fakatumau a tautolu ke fekafekau fakalataha ke he lilifu mo e fakahekeaga he higoa mua ue atu mo e tapu ha Iehova.
To Tali Fefe e Koe?
• Ko e ha ne kua maeke ia tautolu ke talahau ko e tau leveki mo e tau fekafekau lagomatai kua kotofa fakateokarasi nakai fakatemokarasi?
• Kotofa fefe he agaga tapu e tau tagata tane Kerisiano fakamoli?
• Putoia fefe e Kau Fakatufono he kotofaaga he tau leveki mo e tau fekafekau lagomatai?
• Hagaao ke he tau kotofaaga fakateokarasi, ko e ha ne kua lata ia tautolu ke fakaaue tulou ki a Iehova?
[Tau Huhu he Fakaakoaga]
[Tau Fakatino he lau 11]
Kua monuina e tau motua mo e tau fekafekau lagomatai ke fekafekau he kotofaaga fakateokarasi