Kumi Haohao Mitaki he Lalolagi Hagahagakelea

KE FANO he fonua pomu ko e mena ke mate ai. To kehe nakai kaeke ke fai mepe a koe ne fakakite e tau matakavi he tau kelekele pomu? Lafi ki ai, he fakatai, kua fakaako a koe ke kitia e tau matakavi pomu kehekehe. Maama ai, ko e iloilo ia to fakatote hifo e hagahagakelea hau neke pakia po ke kelipopo.

Fakatatai e Tohi Tapu ke he mepe ia fakalataha mo e fakaako ke kitia e pomu. Kua ha ha he Tohi Tapu e pulotu nukua mua ue atu ka eke ke puipui mai he tau hagahagakelea mo e taute e tau lekua kua tutupu he moui.

Mailoga e maveheaga moli nei ne moua he Tau Fakatai 2:10, 11: “Ha ko e mena hoko atu e iloilo ke he loto hāu; ti mitaki foki kia koe e pulotu. To leveki a koe he loto manamanatu; to leoleo a koe he pulotu.” Ko e pulotu mo e loto manamanatu ne talahau he mena nei nakai puna mai he tagata ka e mai he punaaga faka-Atua. “Ka ko ia kua fanogonogo mai [ke he pulotu mahani Atua] to nofo ai a ia mo e mouina; to nofo fakatekiteki a ia, ti nakai matakutaku a ia he tau mena kelea.” (Tau Fakatai 1:33) O mai la tautolu ke kitia e puhala kua fakaholo ki mua he Tohi Tapu e haohao mitaki ha tautolu mo e lagomatai a tautolu ke kalo kehe mai he tau lekua loga.

Kalo Kehe Mai he Tau Pakia Mamate

Ne tohia fou he Fakatokatokaaga he Fahi Malolo Tino he Lalolagi (WHO) e tau numera nukua fakakite e katoatoa ne mamate he tau tau takitaha ne fua mai he tau pakia peleoafi, kavi ke he 1,171,000. Teitei molea e 40 he falu miliona ne pakia, ti mole fakatote e miliona ne leva e kulikuli.

Pete ni e nakai maeke e haohao mitaki katoatoa he fakaholo peleoafi, kua holo ki mua e haohao mitaki fakatagata ha tautolu ka omaoma a tautolu ke he tau fakatufono peleoafi. Tutala ai ke he tau tui fakatufono, kua fakatoka mo e fakatumau ai e tau fakatufono peleoafi, kua pehe e Tohi Tapu: “Kia omaoma e tau tagata oti kana ke he tau tui ne mua.” (Roma 13:1) Ko e tau tagata fakaholo peleoafi ne omaoma ke he tomatomaaga nei kua fakatote hifo e hagahagakelea mo e tau pakia lalahi.

Ko e taha fakaohoohoaga ke fakaholo fakatekiteki ko e fakalilifu ma e moui. Kua pehe mai e Tohi Tapu hagaao ki a Iehova ko e Atua: “Ko e mena ha ha ia koe e puna he moui.” (Salamo 36:9) Ti ko e moui ko e mena fakaalofa faka-Atua. Fakahiku ai, nakai tonuhia a tautolu ke utakehe e mena fakaalofa ia mai he ha tagata po ke fakakite e nakai fakalilifu ma e moui, ne kua lauia ai foki mo e ha tautolu.—Kenese 9:5, 6.

Pauaki ai, ko e fakalilifu ma e moui he tagata kua putoia ai e mailoga moli ko e tau motoka mo e tau kaina ha tautolu kua haohao mitaki lahi. I Isaraela i tuai, ko e haohao mitaki ko e mena ne mua ke he tau fahi oti he moui. Ma e fakatai, ka ta ai e fale, ne manako e Fakatufono  he Atua ke he tua fale—ko e matakavi mitaki ma e tau gahua fakamagafaoa—ke fai pa ke puipui takai aki. “Ka ta ai e koe e fale fou, ti eke e koe e pa ke puipui aki takai hau a tua fale ki luga, neke fakamaligi ai e toto ha ko e fale hau, ka to hifo ai taha.” (Teutaronome 22:8) Ka to taha ha kua nakai muitua e fakatufono puipui nei, to fakalago he Atua e fakahala ia ke he tagata he fale. Nakai fakauaua, ko e fakagahua he matapatu fakaakoaga fakaalofa ne fakatu he fakatufono nei ka fakatote hifo e tau pakia he gahuaaga po ke he fakafiafiaaga.

Totoko ke he Tau Hufiaaga Mamate

Hagaao ke he WHO, ha ha i ai mogonei piliona e tau tagata ula tapaka he lalolagi, mo e fa e miliona ne mamate he taha e tau ha ko e ula tapaka. Ko e numera nei kua amanaki ai ke holo hake kavi ke he 10 e miliona he tau tau 20 ke he 30 i mua. Totou miliona e tau tagata ula tapaka, pihia foki mo e tau tagata fakaaoga he tau tulaki “fakagoagoa,” ka fakakelea e malolo tino mo e tuaga mitaki he moui ha ko e hufia ha lautolu i ai.

Pete nakai talahau fakamahino mai he Kupu he Atua e ula tapaka mo e fakaaoga hehe e tulaki, kua puipui he tau matapatu fakaakoaga i ai a tautolu mai he tau matagahua nei. Tuga anei, kua hataki mai he 2 Korinito 7:1: “Kia fakamea e tautolu a tautolu ke he tau mena oti ke kelea ai e tino katoa mo e agaga.” Nakai fakauaua ai, kua takiva mo e fakailaila he tapaka mo e tau tulaki e tino aki e tau vai kona fakahagahagakelea. Mua atu ai, kua manako e Atua ke “tapu” e tau tino ha tautolu, he kakano ke fakamea. (Roma 12:1) Nakai kia talia e koe, ko e fakagahua he tau matapatu fakaakoaga nei ka fakatote e hagahagakelea ke he moui he taha?

Kautu Mai he Tau Mahani Hagahagakelea

Nakai lagotatai e tau tagata tokologa ke he puhala kai mo e inu. Ko e fua he kai lahi kua putoia ai e gagao suka, kanesa, mo e gagao atevili. Ko e fakaaoga hehe he kava kua takitaki ke he falu mena vihi foki, tuga e hufia he kava, gagao atefua, mavehevehe e tau magafaoa, mo e tau pakia he peleoafi. Ko e kaka lahi foki ke he puhala fuafuaaga kai kua hagahaga kelea foki mo e maeke ke hafagi e tau puhala kai matakutakuina tuga e anorexia nervosa.

Pete ni ko e Tohi Tapu nakai ko e tohi fakaekekafo, nukua fakakite mai e tomatomaaga tonu ke lata mo e fakalatalata he kai mo e inu. “Kia fanogonogo mai a koe, haku tama na e, mo e iloilo a a koe; mo e takitaki tonu hāu a loto ke he puhala. Ua eke a koe mo taha ia lautolu kua inu lahi ke he uaina; mo lautolu kua kai loto kai ke he maga kakano he tau manu. Ha ko e tagata kua inu lahi ke he uaina, mo e tagata kai loto kai to nonofogati ai a laua.” (Tau Fakatai 23:19-21) Ka e, kua pehe e Tohi Tapu ko e kai mo e inu kua lata ke eke mo mena fakafiafia. “Kia takitaha e tagata mo e kai, mo e inu, mo e fiafia ai ke he tau mena mitaki he hana tau gahua oti; ko e mena kua foaki mai he Atua haia.”—Fakamatalaaga 3:13.

Kua fakamalolo foki he Tohi Tapu e aga lagotatai ke he faofao tino, he talahau “kua aoga fakatote e fakamahani ke he tau mena he tino.” Lafi ki ai: “Ko e mahani Atua kua aoga ia ke he tau mena oti kana, he toka ai e mena kua talahaua mai ke he mouiaga nai katoa mo ia kua tatali.” (1 Timoteo 4:8) ‘Fefe,’ he huhu e koe, ‘kua aoga kia e mahani Atua ke hoko ke he magaaho nei foki?’ Ke he loga he tau puhala. He lafi mai e puhala fakaagaga kua lata ke he moui he taha, ko e mahani Atua kua feaki e tau fua aoga tuga e fakaalofa, olioli, mafola, mo e manako fakalatalata—nukua lafi oti ke he amaamanakiaga mitaki mo e malolo tino mitaki.—Kalatia 5:22, 23.

Tau Fua Kona he Mahani Feuaki

He vaha nei, miliona ne tiaki e tau mahani mitaki oti. Ko e gagao AIDS ko e taha he tau fua ia. Hagaao ke he WHO, molea e 16 e miliona ne mamate tali mai he kamataaga he gagao AIDS, ti ko e mogonei, kavi ke he 34 e miliona ne pikitia ke he HIV, ko e moko ne fakatupu e gagao AIDS. Tokologa e tau tagata ne matematekelea he moua he AIDS ha ko e taute e mahani feuaki fakahanoa, huki kiva ne uta he tau tagata fakaaoga tulaki, po ke pikitia he tau fagai toto.

 Ko e falu fua he tau mahani feuaki fakahanoa kua putoia e tau herpe, maiafi, hepatitisi B mo e C, mo e syphilis. Pete ni e nakai fakaaoga he Tohi Tapu e tau kupu fakaekekafo pihia, ko e tau vala tino ne lauia he gagao pikitia he falu mahani feuaki kua talahaua ke he magaaho ia. Ma e fakatai, kua fakamaama mai he Tau Fakatai 7:23 ko e tau fua matakutakuina he mahani feuaki kua tuga e ‘tuina e ate ke he fana ti ati ni.’ Ko e syphilis kua mahani ke moumou aki e ate, tuga foki e hepatitisi. E, ko e latatonu ha ia mo e fakaalofa e tomatomaaga he Tohi Tapu ke lata he tau Kerisiano ke ‘fakamamao mo e toto mo e feuaki’!—Gahua 15:28, 29.

Ko e Matahele he Fakaalofa ke he Tupe

Ke lali ke muhu koloa mafiti, tokologa e tau tagata ne folau fakalahi ke he tau tupe ha lautolu. Momoko ai, ko e fetului pihia kua fa takitaki atu ke he tomo po ke moumou fakatupe. Ke he fekafekau he Atua, kua pehe e Tohi Tapu: “[Kia] fakamalolo a ia ke gahua ke he tau lima hana ke he mena mitaki, kia moua e ia e falu a mena ke age kia ia kua nofogati.” (Efeso 4:28) Moli, ko e tagata malolo he gahua kua nakai fa muhu koloa tumau. Ka e, ha ha ia ia e mafola he manamanatuaga, lilifu, mo e liga foaki e tau tupe ke he tau mena kua tupu mai e aoga.

Kua hataki e Tohi Tapu: “Ko lautolu kua manako ke maukoloa, kua moua a lautolu he kamatamata, mo e hele, mo e tau manako lahi ne loga kua goagoa ai mo e kelea ai, ko e tau mena ia kua fakatomo ai e tau tagata ke he mahaikava mo e malaia. Ha ko e loto lahi ke he tau tupe, ko e vaka haia he tau mena kelea oti kana; ko e falu foki kua manako lahi ki ai, . . .  kua hoka e lautolu a lautolu ti ati ni ke he tau mena matematekelea.” (1 Timoteo 6:9, 10) Nakai fakatikai ai na tokologa “kua manako ke maukoloa” nukua maukoloa. Ka ko e heigoa e fakahikuaga? Nakai kia moli kua matematekelea e tuaga he malolo tino, magafaoa, fakaagaga, ti momohe alafia foki a lautolu?—Fakamatalaaga 5:12.

Ne mailoga he tagata pulotu ko e “mena nakai moui taha he loga hana tau mena ha i ai.” (Luka 12:15) Kua aoga e tupe mo e falu koloa ke he laulahi he tau kaufakalatahaaga. Moli ni, kua fakakite mai he Tohi Tapu “kua eke foki e tau tupe mo mena ke malu ai,” ka e foaki ki ai foki e “aoga he iloilo kua moua, kua moui ai a ia ne toka ai.” (Fakamatalaaga 7:12) Nakai tuga e tupe, ko e iloilo tonu mo e pulotu kua lagomatai a tautolu ke he tau tutuaga oti, ka e mua atu ke he tau mena ne lauia e tau momoui ha tautolu.—Tau Fakatai 4:5-9.

Ka Puipui Ni Hokoia he Pulotu a Tautolu

Nakai leva to moua e ia ne ‘toka ai e pulotu’ e moui ke he puhala aoga—puipui mai he ‘matematekelea lahi,’ ka moumou he Atua e tau tagata mahani kelea. (Mataio 24:21) He magaaho ia to tolo he tau tagata e tau tupe ha lautolu ke he puhalatu tuga ko e “mena kelea,” hagaao ke he Tohi Tapu. Ko e ha? Ha ko e mena to ako e lautolu ke he puhala uka to nakai foaki he auro mo e ario ki a lautolu e moui “he aho he ita a Iehova.” (Esekielu 7:19) He taha fahi, kua fakailoilo e “moto tagata tokologa” he ‘tanaki e tau koloa ma lautolu ke he lagi’ he tuku fakamua e tau mena fakaagaga he tau momoui ha lautolu, ka aoga mai he tanakiaga moli mo e moui tukulagi he lalolagi parataiso.—Fakakiteaga 7:9, 14; 21:3, 4; Mataio 6:19, 20.

Moua fefe e tautolu e vaha anoiha kua haohao mitaki? Kua tali e Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Totou miliona ne moua e iloilo nei he Kupu he Atua, ko e Tohi Tapu. Nakai ni ko lautolu ia kua moua e amaamanakiaga homo ue atu ma e vaha anoiha ka e moua foki e lautolu e tuaga mafola mo e haohao mitaki mogonei. Tuga ni he talahau he salamo: “To takoto au, ti mohe foki au mo e mafola; ha ko koe, Iehova na e, hoko koe ni kua nofo ai au mo e nakai haofia.”—Salamo 4:8.

Iloa nakai e koe ha punaaga foki he vala tala kua maeke lagomatai ke fakatote hifo e tau hagahaga kelea ke he hau a malolo tino mo e moui tuga ne talahau mai he Tohi Tapu? Nakai fai tohi foki ne ha ha ai e pule he Tohi Tapu, ti nakai fai tohi foki kua lagomatai a koe ke moua e haohao mitaki he lalolagi nei ne puke he hagahagakelea. He ha he kumikumi fakalaulahi atu foki?

[Puha/Fakatino he lau 6]

Malolo Tino Mitaki mo e Haohao Mitaki—Fakaaue ke he Tohi Tapu

Ke hao mai he tau mena tutupu he moui, ne fakaaoga tumau he fifine fuata ne higoa ko Jane * e mariuana, tapaka, kokeni, tau amphetamine, LSD, mo e falu tulaki. Ti inu kava goagoa foki a ia. Hagaao ki a Jane, kua pihia foki e tane hana. Ne pouliuli e vaha anoiha ha laua. Ti feleveia a Jane mo e Tau Fakamoli a Iehova. Ne kamata fina atu a ia ke he tau feleveiaaga Kerisiano mo e totou ke he The Watchtower fakalataha mo e mekasini, Awake!, nukua age foki e ia ke he hana tane. Ne kamata tokoua a laua ke fakaako e Tohi Tapu mo e Tau Fakamoli. He feaki e laua e loto fakaaue ma e tau tutuaga tokoluga ha Iehova, ne tiaki oti e laua e tau vai lakau fakahehe. Ko e fua? “Ne ta mai he moui fou ha maua e olioli lahi ki a maua,” he tohi e Jane he tau tau fakamui. “Kua fakaaue lahi au ki a Iehova ma e malolo mea he hana Kupu mo e moui ataina mo e malolo tino kua maeke ia maua ke moua he mogonei.”

Ko e aoga he eke mo tagata gahua mahani fakamoli ne fakatata fakamitaki he mena ne tupu ki a Kurt, ne putoia ai e gahua he leveki e tau fakatokatokaaga komopiuta. He lata ke moua e tau masini fou, kua tuku age he takitaki gahua ha Kurt ki a ia e matagahua ke moua e totogi tau latalata. Ne moua e Kurt e tagata fakafua koloa mitaki, ti talia ke he totogi. Pete ia, ne taute he kalaka he tagata fakafua koloa e hepe he laupepa totogi, nukua tote hifo e totogi ke teitei $40,000 (U.S.). Mailoga ai e hepe, ne vilo atu a Kurt ke he kamupani, ti pehe e takitaki fakafua koloa ko e 25 e tau he gahua a ia, nakai la kitia a ia ha mahani fakamoli pihia. Ne fakamaama e Kurt na fakahakohako he Tohi Tapu e logonaaga hana. Ati ole ai e takitaki fakafua koloa ma e 300 he lagaki he fufuta Awake! nukua hagaao ke he mahani fakamoli he pisinisi ke maeke ia ia ke foaki ke he tau tagata gahua hana. Ke lata mo Kurt, ne takitaki he mahani fakamoli hana a ia ke holo hake ki luga.

[Matahui Tala]

[Fakatino he lau 7]

“Ko au ko Iehova, ko e hau a Atua, kua fakaako atu kia koe ke he tau mena ke aoga ai.”—ISAIA 48:17