Maeke ia Koe ke Fehagai mo e Fakalolelole!

NE TOHIA he tagata pulotu: “Kaeke ke fakalolelole a koe ke he aho matematekelea, kua tote ni hāu a malolo.” (Tau Fakatai 24:10) Kaeke kua fakalolelole a koe, liga talitonu a koe mo e talahauaga ia.

Kua nakai fai tagata ne hao mai he tau hufiaaga he fakalolelole. Liga taha po ke ua e aho ka logona e koe e fakalolelole ati hiku ni ke galo kehe. Ka e ka lafi ki ai e tau logonaaga mamahi po ke ita, liga to hololoa e lekua ia. Ko e falu Kerisiano ne tua fakamoli ke he tau tau loga kua fakalolelole ati fakaoti foki e o ha lautolu ke he tau feleveiaaga he fakapotopotoaga mo e ke fakalataha ke he fekafekauaga he fonua.

Kaeke ke logona e koe e lolelole, kia fakamalolo! Kua kautu e tau fekafekau tua fakamoli he tau vaha kua mole he fehagai mo e fakalolelole, ti mo e lagomatai he Atua, maeke foki ia koe.

Ka Fakahukia he Falu e Tau Logonaaga Hau

Kia nakai amanaki a koe ke puipui mai he tau kupu fakahanoa po ke tau gahua fakateaga oti. Ka kua maeke ia koe ke nakai toka e tau nakai mitaki katoatoa he falu ke fakalavelave aki e fekafekauaga hau ki a Iehova. Kaeke fakahukia he falu e tau logonaaga hau, liga to lagomatai a koe ke mailoga e puhala ne fehagai ai a Hana, ko e matua fifine ha Samuela, ke he fakaloleloleaga.

Kua matemate a Hana he manako ke fai tama, ka kua tufua a ia. Ko e hoana ke ua aki he tane hana, ko Penina, kua fita he fanafanau ki a ia e tau tama tane mo e tau tama fifine. He nakai fakaalofa ke he tuaga ha Hana, ne kitia e Penina a ia ko e fi mo e fakakite e aga ia ki a Hana ati “tagi ai a ia, mo e nakai kai a ia.”—1 Samuela 1:2, 4-7.

He taha aho ne hake a Hana ke he faituga ke liogi. Ne kitia e Eli, ekepoa ne mua i Isaraela, ko e tau laugutu ni hana ne gahuahua. He nakai fioia kua liogi a Hana, ne piko a ia kua konahia a Hana. “To konahia a koe ato a fe?” he tala age e ia. “Kia tiaki ā hāu a konahia ke he uaina.” (1 Samuela 1:12-14) Iloa nakai e koe e mena ne logona hifo e Hana he mogoia? Kua hau tukua a ia ke he faituga ke moua e fakamaloloaga. Kua nakai amanaki a ia ke tukupau he taha he tau tagata mahuiaga i Isaraela!

Kua lata pauaki e magaaho ia ke fakalolelole aki a Hana. Kua maeke ia ia ke fano kehe mai he faituga, mo e mavehe to nakai liu ka tumau a Eli ke fekafekau i ai mo ekepoa ne mua. Pete he pihia, ne tokiofa lahi e Hana e fakafetuiaga hana mo Iehova. Iloa e ia to nakai fiafia a Iehova ka taute e ia e gahua ia. Ko e faituga ko e matapatu a ia he tapuakiaga mea. Nukua toka e Iehova hana higoa i ai. Mo e pete ni he nakai mitaki katoatoa a ia, ko Eli ko e hukui fifili e Iehova.

Ko e tali fakalilifu ha Hana ke he tukupau ha Eli kua foaki mai e fakafifitakiaga ne mua ma tautolu he vaha nei. Ne nakai fakaata e ia a ia ke tukupau, ka kua tali age a ia ke he puhala lilifu lahi. “Ko e iki na e, nakai,” he tala age e ia. “Ko au ko e fifine ne mamahi e loto, nakai inu ai e au e uaina po ke kava, ka kua liligi atu e au hoku loto kia Iehova. Aua neke totou e koe hau a fekafekau fifine fakalataha mo e tau fifine matahavala; ha ko e lahi he haku a manamanatu mo e haku a matematekelea kua liogi ai au ke hoko mai ke he magaaho nai.”—1 Samuela 1:15, 16.

Fakakite nakai e Hana e manatu hana? E, fakakite. Pete ia, ne vagahau fakalilifu a ia ki a Eli, nakai fakaohooho ke tuhituhi a ia ha ko e tukupau hepe hana. Ne tali age a ia ki a Hana, he pehe age: “Kia fano ā koe mo e monuina;  kia foaki mai foki he Atua a Isaraela e tau mena kua ole e koe kia ia.” Kua totoka ai e lekua ia, ne “fano ai [a Hana], ti kai a ia ti nakai tuai mata momoko a ia.”—1 Samuela 1:17, 18.

Ko e heigoa ne ako e tautolu mai he fakamauaga nei? Ne mafiti a Hana ke fakahako e tama lekua nei, ka kua taute e ia mo e lilifu lahi. Ko e fua, ne fakatumau e ia e fakafetuiaga mitaki mo Iehova mo Eli foki. Kua fa mahani e matutaki mitaki fakalataha mo e lilifu ke uta kehe e tau lekua ikiiki neke lalahi hake!

Kua lata ai ke mailoga, ke matutaki e tau kehekeheaga mo e falu kua lata ke mahani fakatokolalo mo e lilifu he tau fahi ne ua. Ka mahala e katofia talitonu ke tali ke he tau laliaga hau ke fakahako e kehekeheaga, kua lata ia koe ke toka e matalekua ia ki a Iehova, he falanaki to fakahako e ia he magaaho ni hana mo e he puhala ni hana.

Kua Galo Kia e Kotofaaga Hau he Fekafekauaga?

Kua fakaatukehe falu ha kua toka hifo e kotofaaga uho he fekafekauaga he Atua. Kua fiafia lahi a lautolu ke fekafekau ke he tau matakainaga ha lautolu, ka e he magaaho ne galo e kotofaaga, ne logona hifo e lautolu kua nakai tuai aoga a lautolu ki a Iehova po ke he fakatokatokaaga hana. Ka pihia a koe, kia moua e koe e lotomatala he manamanatu ke he fakafifitakiaga he tagata tohia Tohi Tapu ko Mareko, ne iloa foki ko Ioane Mareko.—Gahua 12:12.

Ne faihoani e Mareko a Paulo mo Panapa he fenoga misionare fakamua ha laua, ka e he taha vala he fenoga, ne tiaki e ia a laua mo e liu ki Ierusalema. (Gahua 13:13) He magaaho fakamui, ne manako a Panapa ke uta a Mareko mo laua he taha o fenoga. Ka kua pehe mai e Tohi Tapu: “Ka kua manatu a Paulo, nakai lata he o a lautolu mo ia ne tiaki a laua i Pafulia, mo e nakai o mo laua ke he gahua.” Ne nakai talia e Panapa. “Ti kua,” he matutaki he fakamauaga, “hukia lahi ai e tau loto, kua mavehe kehekehe ai a [Paulo mo Panapa]; ati o ai a Panapa mo Mareko, kua o he foulua a laua ki Kuperu. Ka kua fifili e Paulo a Sila, mo e fina atu.”—Gahua 15:36-40.

Liga kua tupetupe lahi a Mareko he logona kua nakai manako e aposetolo talahaua ko Paulo ke gahua mo ia, ti kua takitaki atu e taufetoko hagaao ki a ia ke fai veha a Paulo mo Mareko. Ka kua nakai koenaia e mena ne tupu.

Kua manako agaia a Paulo mo Sila ke fai foki ke fenoga mo laua. He hohoko atu a laua ki Luseta, ne moua e laua taha tagata ke hukui a Mareko, ko e fuata tane ne higoa ko Timoteo. Ti kua liga ua po ke tolu laia e tau he papatiso a Timoteo he magaaho ne fifili a ia. He taha fahi, kua fakalataha a Mareko mo e fakapotopotoaga Kerisiano tali mai he kamataaga—ti leva atu ia Paulo. Ka kua moua e Timoteo e kotofaaga uho.—Gahua 16:1-3.

Ka e fefe a Mareko he magaaho ne iloa e ia kua hukui he tagata fuata mo e tote e iloilo a ia? Kua nakai talahau he Tohi Tapu. Ka kua fakakite mai ai, ne fakatumau a Mareko ke gahua he fekafekauaga a Iehova. Ne fakaaoga e ia e tau kotofaaga ne foaki ki a ia. Pete ni kua nakai fekafekau auloa mo Paulo mo Sila, kua maeke ia ia ke fakatauo mo Panapa ki Kuperu, ko e maga nofo ha Panapa. Ne fekafekau foki a Mareko mo Peteru i Papelonia. Fakahiku ni, ne fai magaaho a ia ke gahua fakalataha mo Paulo—mo Timoteo—i Roma. (Kolose 1:1; 4:10; 1 Peteru 5:13) He mogo fakamui ne omoi he agaga foki a Mareko ke tohia taha he tau Evagelia ne fa!

Ha ha he tau mena nei e fakaakoaga uho. Kua nakai tupetupe a Mareko ha kua galo e kotofaaga ti mahala a ia ke olioli e tau kotofaaga foki ne moua e ia. Ne nakai faihoania a Mareko ke he fekafekauaga ha Iehova, ti fakamonuina e Iehova a ia.

Ti ka galo ia koe e kotofaaga, kia nakai fakalolelole. Kaeke fakatumau e koe e aga mitaki mo e nakai faihoania, to fai kotofaaga foki ka foaki ki a koe. Kua loga lahi e tau mena ke taute he gahua ke he Iki.—1 Korinito 15:58.

Kua Fakalolelole e Fekafekau Tua Fakamoli

Kua nakai mukamuka ke tau ma e tua. He falu magaaho, liga moua e koe e lolelole. Ti liga  hala foki e logonaaga hau ha kua fakalolelole, mo e manatu kua nakai lata e fekafekau tua fakamoli he Atua ke pihia e logonaaga. Manatu a Elia, taha he tau perofeta talahaua ha Isaraela.

He magaaho ne iloa he patuiki fifine ha Isaraela ko Iesepela, ko e tagata tapuaki malolo ki a Paala, kua kelipopo e Elia e tau perofeta ha Paala, ne omonuo a ia ke kelipopo a Elia. Kua fita he fakafehagai a Elia mo e tau fi ne mua atu ki a Iesepela, ka kua amanaki a ia ti fakalolelole ati manako a ia ke mate. (1 Tau Patuiki 19:1-4) Ka e tupu fefe e mena ia? Ne fai mena ne nimo e ia.

Ne nimo e Elia ke haga ki a Iehova ko e Punaaga he hana malolo. Ko hai ne age ki a Elia e malolo ke fakatu hake a lautolu ne mamate mo e ke fehagai mo e tau perofeta ha Paala? Ko Iehova. Ti ko Iehova foki ni ka foaki ki a ia e malolo ke fehagai mo e ita he Patuiki Fifine ko Iesepela.—1 Tau Patuiki 17:17-24; 18:21-40; 2 Korinito 4:7.

Kua maeke he ha tagata ni ke maueue fakaku mai he falanaki hana ki a Iehova. Ke tuga a Elia, liga to ono fakatagata a koe he falu magaaho ke he falu lekua ka e nakai fakaaoga e “iloilo mai luga” ke fehagai ki ai. (Iakopo 3:17) Pete he pihia, ne nakai tiaki e Iehova a Elia ha ko e mahala fakaku nei.

Ne hola a Elia ki Pere-sepa ti finatu ke he tutakale, ati manatu a ia to nakai moua he taha a ia i ai. Ka e moua e Iehova a ia. Ne fakafano e ia e agelu ke fakamafana a ia. Ne foaki he agelu ki a Elia e tau falaoa fou ke kai mo e vala vai ke inu. He mole e okioki a Elia, ne fekau he agelu a ia ke fenoga ke kavi 300 kilomita ke he Mouga ko Horepa, ke fakamalolo atu foki e Iehova a ia.—1 Tau Patuiki 19:5-8.

I luga he Mouga ko Horepa, ne kitia mata e Elia e fakatataaga fakamalolo tua he malolo ha Iehova. Ti, he leo totonu, ne fakamafana e Iehova a ia kua nakai tokotaha a ia. Ko Iehova haia mo ia, katoa mo e 7,000 he tau matakainaga hana, pete ni kua nakai iloa e Elia. Fakahiku, ne kotofa age e Iehova e gahua ki a ia ke taute. Ne nakai tiaki e ia a Elia ko e perofeta hana!—1 Tau Patuiki 19:11-18.

Ha i ai e Lagomataiaga

Kaeke matematekelea fakatote a koe he falu magaaho he fakalolelole, liga moua e koe e malolo ka lahi e okioki hau po ke kai fakamitaki. Ko Nathan H. Knorr, ne fekafekau mo taha he Kau Fakatufono he Tau Fakamoli a Iehova ato hoko e mate hana he 1977, ne mailoga ko e tau lekua lalahi kua ikiiki tuai he mole e mohe mitaki he po. Ka e, kaeke kua fakatumau ni e lekua, kua nakai lata mo e puhala ia—to manako lagomatai a koe ke tau ke he fakaloleloleaga.

Ne fakafano e Iehova e agelu ke fakamalolo a Elia. He vaha nei, ne foaki he Atua e fakamaloloaga he puhala he tau motua mo e he falu Kerisiano motua. Kua maeke moli e tau motua ke “tuga ne fakamumuliaga mai he matagi.” (Isaia 32:1, 2) Ka ke moua e fakamaloloaga mai ia lautolu, kua lata ia koe ke fakaaoga e manamanatuaga. Pete he fakalolelole a Elia, ne fenoga a ia ke he Mouga ko Horepa ke moua e tau fakaakoaga mai ia Iehova. Kua moua e tautolu e tau fakaakoaga fakamalolo he puhala mai he fakapotopotoaga Kerisiano.

Ka talia e tautolu e lagomatai mo e fakamalolo ke fehagai atu ke he tau kamatamata, tuga e tau logonaaga hukia po ke galo he tau kotofaaga, kua fakatokoluga e tautolu e matakupu aoga he fahi ha Iehova. Ko e heigoa e matakupu ia? Ne talahau e Satani kua fekafekau noa e tau tagata ki a Iehova ha kua fai mena ne manako. Ne nakai fakatikai e Satani to fekafekau a tautolu ke he Atua ka tutu mitaki e tau momoui ha tautolu, ka e talahau e ia to fakaoti e fekafekau ha tautolu ke he Atua he magaaho ka moua e tautolu e tau lekua. (Iopu, tau veveheaga 1 mo e 2) He nakai maueue he taute e fekafekauaga ha Iehova pete ko e fakaloleloleaga, kua maeke ia tautolu ke foaki e tali ke he pikopiko he Tiapolo.—Tau Fakatai 27:11.

Kua fai lekua oti a Hana, Mareko, mo Elia ne kaiha fakaku e fiafia ia lautolu. Pete kua pihia, ne fehagai a lautolu mo e tau lekua ha lautolu mo e takitaki e tau momoui tupuolaola. Mo e lagomatai ha Iehova, maeke foki ia koe ke fehagai ke he fakaloleloleaga!