Nonofo mo e Hagahagakelea

“Ai fai mena taha kua taute e koe he ha aho noa ni—he mohe foki—ne nakai hagahagakelea lahi mo mena fakahiku ke taute e koe.”—Mekasini Discover.

KUA fakatatai e moui ke he fano he fonua pomu, ha koe pakia po ke mate kua hoko he ha magaaho, nakai fai hatakiaga. Kua kehekehe e tau puhala hagahagakelea mai he taha motu ke he taha motu. Kua lauia ai e tau pakia he tau peleoafi, felatauaki, hoge, AIDS, kanesa, gagao atevili, mo e loga atu foki he falu a mena. He matakavi ha Sahara i Aferika, ma e fakatai, kua eke e AIDS mo kelipopo numera taha, ke he tau fou nei ne “kelipopo ai 2.2 e miliona he tau momoui, totou laga 10 e katoatoa ne mamate ha ko e tau latau i Aferika katoa,” he talahau he U.S.News & World Report.

He magaaho nei, kua fakaaoga ai he lalolagi e tau piliona ke fakaloa e moui mo e fakatote e hagahagakelea he gagao mo e kulikuli. Loga e tau manatu kua fakatupu ki mua, tuga e puhala kai mo e inu fakalatalata mo e faofao e tino, nukua moua mai falu fua aoga. Pete ia, ha ha i ai e punaaga he vala tala moli ke he tau fahi aoga oti he moui kua lagomatai a koe ke fiafia e moui haohao mitaki. Ko e punaaga ia ko e Tohi Tapu. Ha ha i ai e tau takitakiaga he taute e tau tupetupe kehekehe nukua lauia ai e malolo tino mo e moui ha tautolu. Moli, nakai fehagai e Tohi Tapu mo e tau mena vihi fakamatafeiga. Ka e, foaki i ai e tau matapatu fakaakoaga mitaki lahi mahaki ke takitaki a tautolu ke he tau mena tuga e tau puhala kai, faofao tino, aga he manamanatuaga, mahani fakatane mo e fifine, fakaaogaaga he kava, tapaka, mo e tau tulaki fakagoagoa, mo e loga atu falu mena.

Ko e moui ma e falu kua fakakavega he tuaha fakatupe. Hanei foki, kua lagomatai he Tohi Tapu a tautolu. Nakai ni fakamalolo e onoonoaga pulotu ke he tupe mo e fakatokatoka he tupe ka e fakakite foki e puhala ke eke mo tagata gahua mitaki po ke takitaki gahua mitaki. Fakamukamuka ai, ko e Tohi Tapu ko e takitakiaga mitaki, nakai ni haohao mitaki fakatupe mo e mitaki fakatino, ka e pihia foki mo e moui. Fia manako nakai a koe ke kitia e puhala aoga he Tohi Tapu he vaha nei? Ti fakamolemole totou atu.