Taute Nakai e Koe Kupu Moli ma Hau Ni?

“Kia faliu a mutolu ke he liu foki fakafou he tau loto ha mutolu, kia kumikumi e mutolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.”—ROMA 12:2.

1, 2. Ko e uka he ha ke eke mo Kerisiano moli he vaha nei?

KE EKE mo Kerisiano moli he tau aho fakamui nei—ko e “tau aho uka”—kua nakai mukamuka. (2 Timoteo 3:1) Moli ke muitua e fifitakiaga he Keriso, kua lata e tagata ke kautu mai he lalolagi. (1 Ioane 5:4) Manatu e mena ne talahau e Iesu hagaao ke he puhala faka-Kerisiano: “Kia huhū atu a mutolu ke he gutuhala pukilu; ha ko e mena pulahi e gutuhala, ti laulahi foki e hala ke pu atu ke he malaia, kua tokologa foki a lautolu kua huhū atu ki ai. Ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua.” Ne pehe foki a ia: “Ka fia mui mai taha kia au, ua omaoma a ia kia ia, ka e nikiti e ia hana satauro ke he tau aho oti, ti mui mai kia au.”—Mataio 7:13, 14; Luka 9:23.

² He moua e puhala pukilu ke he moui, ko e taha paleko he Kerisiano ke nofo mau i ai. Ko e paleko he ha e mena ia? Ha ko e tukuleleaga mo e papatisoaga ha tautolu kua taute a tautolu mo matahele he tau gahua fakavaia, po ke tau lagatau fakagalogalo ha Satani. (Efeso 6:11, matahui tala NW) Ne mailoga e ia e tau lolelole ha tautolu mo e kumi ke fakaaoga ai he lali ke moumou e malolo fakaagaga ha tautolu. Ka e, na lali foki a ia ke moumou a Iesu, ti toka fakaeneene e ia he ha a tautolu?—Mataio 4:1-11.

Tau Matahele Halahu ha Satani

3. To fefe e Satani e tau tuaha he manamanatuaga ha Eva?

³ Ko e taha lagatau ne fakaaoga e Satani ko e to e loto tuaha he tau manamanatuaga ha tautolu. Ne ono a ia ke he tau lolelole he tapulu tau fakaagaga ha tautolu. He kamataaga, ne fakaaoga e ia e lagatau ia ki a Eva, he huhu: “Ko e moli kia kua pehe mai e Atua, aua neke kai e mua ke he tau akau oti he kaina?” (Kenese 3:1) He falu kupu, ne pehe a Satani, ‘Moli kia kua tuku he Atua e fakatufono ia kia koe? To taofi kia e ia taha mena mitaki pihia mai ia koe? Na iloa he Atua ko e aho ka kai mai a koe he akau ia to fakaala ai e tau mata hau mo e to eke a koe ke tuga e Atua, he iloa e mitaki mo e kelea!’ Ne to e Satani e tega he tuaha mo e fakatali ai ke gotogoto.—Kenese 3:5.

4. Ko e heigoa e tau tuaha kua liga lauia e falu he vaha nei?

⁴ Fakaaoga fefe e Satani e matahele nei he vaha nei? Ka fakaheu e tautolu e totou Tohi Tapu, fakaako fakatagata ha tautolu, tau liogi ha tautolu, mo e fekafekauaga faka-Kerisiano mo e tau feleveiaaga, kua hafagi e tautolu a tautolu ke he tau tuaha ne fakatu he falu. Ma e fakatai: “Iloa fefe e tautolu ko e kupu moli anei ne fakaako e Iesu?” “Ko e tau aho fakahiku moli kia anei? Ha kua fita a tautolu he hoko ke he senetenari ke 21 aki.” “Kua tata lahi kia a tautolu ki Amaketo, po ke loa agaia e hala?” Kaeke ke tutupu mai e tau tuaha pihia, ko e heigoa ka taute e tautolu ke taaki kehe aki a lautolu?

5, 6. Ko e heigoa kua lata ke taute e tautolu kaeke ke tutupu e tau tuaha?

⁵ Kua foaki e Iakopo e tomatomaaga aoga he magaaho ne tohi e ia: “Kaeke ha ha ia mutolu taha kua nakai fai iloilo, kia ole atu a ia ke he Atua, ko ia kua foaki mai mo e totonu ke he tau tagata oti mo e nakai tauage; ti foaki mai ai kia ia. Ka kia ole atu a ia mo e tua, aua neke mahalohalo ha ko ia kua mahalohalo kua lata a ia mo e peau he tahi kua fafati mai he matagi mo e fepokaki. Aua neke manatu e tagata ia ke moua e ia ha mena mai he Iki. Ko e tagata loto fakauaua a ia,  kua hikihikifano ke he hana tau mahani oti.”—Iakopo 1:5-8.

⁶ Ko e heigoa mogoia ha tautolu ka taute? Kua lata ia tautolu ke ‘ole atu ke he Atua’ he liogi ma e tua mo e maama mo e fakamalolo e tau laliaga ha tautolu he fakaako fakatagata hagaao ke he tau huhu po ke tau tuaha. Maeke foki ia tautolu ke ole lagomatai mai he falu ne malolo ke he tua, aua neke tuaha to foaki mai e Iehova ki a tautolu e lagomatai kua lata mo tautolu. Kua tohi foki e Iakopo: “Ko e mena ia kia omaoma ai a mutolu ke he Atua; kia totoko atu a mutolu ke he tiapolo, ti hola kehe ai a ia ia mutolu. Kia fakatata atu a mutolu ke he Atua, ti fakatata mai ai a ia kia mutolu.” E, ko e tau tuaha ha tautolu to galo he fakatata atu a tautolu ke he Atua he puhala he fakaako mo e liogi.—Iakopo 4:7, 8.

7, 8. Ko e heigoa falu tuaga aoga he fifili e puhala tapuaki nukua fakaako e Iesu, mo e ko hai kua hokotia ke he tau tuaga nei?

⁷ Tuga ka fakatai, ko e huhu: Iloa fefe e tautolu kua fakagahua e tautolu e puhala tapuaki ne fakaako e Iesu? Ke tali e mena nei, ko e heigoa e tuaga kua lata ke manamanatu ki ai? Kua fakakite mai he Tohi Tapu kua lata he tau Kerisiano fakamoli ke ha ha i ai e feofanaki moli he vahaloto ha lautolu. (Ioane 13:34, 35) Kua lata ke fakatokoluga e lautolu e higoa he Atua, ko Iehova. (Isaia 12:4, 5; Mataio 6:9) Ti kua lata ia lautolu ke fakailoa e higoa ia.—Esoto 3:15; Ioane 17:26.

⁸ Ko e taha puhala ke kitia aki e tapuaki moli ko e fakalilifu ma e Kupu he Atua, ko e Tohi Tapu. Ko e tohi kehe ue atu nukua fakakite e aga he Atua mo e hana tau finagalo. (Ioane 17:17; 2 Timoteo 3:16, 17) Lafi ki ai, kua fakapuloa he tau Kerisiano moli e Kautu he Atua ko e amaamanakiaga naia he tagata ma e moui tukulagi he lalolagi parataiso. (Mareko 13:10; Fakakiteaga 21:1-4) Kua vevehe kehe a lautolu mai he tau politika kolokolovao he lalolagi nei mo e hana puhala matahavala he moui. (Ioane 15:19; Iakopo 1:27; 4:4) Ko hai he vaha nei kua hokotia moli ke he tuaga nei? Kua fakave ai e tau fakamoliaga ke he taha ni e tali—ko e Tau Fakamoli a Iehova.

Ka e Kua ka Tafeliuaki e Tuaha?

9, 10. Ko e heigoa ka taute e tautolu ke kautu mai he tau tuaha tafeliuaki?

⁹ Ka e kua kaeke ko tautolu hane lali ke kautu mai he tau tuaha? Ko e heigoa kua lata ke taute e tautolu? Ne foaki he patuiki pulotu ko Solomona e tali: “Haku tama na e, kaeke ke talia e koe haku a tau kupu, mo e toka ai e koe ke he loto hāu haku a tau poaki. Kua fakateliga hāu a tau teliga ke he iloilo, kua haga atu ai hāu a loto ke he manamanatu; Kaeke kua ui atu a koe ke he loto matala, mo e fakaleo lahi atu ke he loto manamanatu. Kaeke ke kumi e koe a ia, tuga he kumi ario; kaeke ke kumi fakamakutu ki ai, tuga he kumi e koloa galo; Ti iloa ai e koe e matakutaku kia Iehova, mo e moua ai e koe e iloilo ke he Atua.”—Tau Fakatai 2:1-5.

¹⁰ Nakai kia ko e manatu ofoofogia a ia? Ka makai a tautolu ke hagaaki fanogonogo ke he pulotu he Atua, to ‘moua e tautolu e iloilo ke he Atua.’ E, to moua e tautolu e iloilo he Iki Pule Katoatoa he lalolagi mo e lagi katoatoa kaeke ke makai a tautolu ke moua mo e ofania hana tau talahauaga. Ko e kakano a ia ke fuluhi atu ki a Iehova he liogi mo e puhala he fakaako fakatagata. Ko e tau koloa galo he Kupu hana kua maeke ke utakehe e tau tuaha mo e lagomatai a tautolu ke kitia e maama he kupu moli.

11. Lauia fefe e fuata ha Elisaio he tuaha?

¹¹ Ko e fakataiaga maaliali he puhala ka lagomatai he liogi e fekafekau matakutaku mo e tuaha he Atua nukua moua he 2 Tau Patuiki 6:11-18. Ne nakai ha ha he fuata ha Elisaio e onoonoaga fakaagaga. Nakai mailoga e ia ko e tau kau he lagi hane lalago atu ke he perofeta he Atua, ne patakai he matakautau Suria. He matakutaku, ne tagi atu e fuata: “Oi te fakaalofa! Ko e iki na e, ko e heigoa kia e mena ke eke ai e tautolu?” Tali atu fefe a Elisaio? “Ua matakutaku a koe, ha kua mua he tokologa ha ha ia tautolu, kia lautolu ha ha ia lautolu.” Ka e taute fefe e fuata ke talitonu? Nakai maeke ia ia ke kitia e tau kau he lagi.

12. (a) Fakamafola fefe e tau tuaha he fekafekau? (e) Fakamafola fefe e tautolu ha tuaha ne liga ha ha ia tautolu?

¹² “Ti liogi e Elisaio, kua pehe atu, Iehova na e, kia fakaala e koe hana tau mata ke kitia ai e ia. Ti fakaala ai e Iehova e tau mata he fuata, ti kitia e ia, kitiala, kua puke e mouga ke he tau solofanua mo e tau kariota afi, kua agaagai a lautolu kia Elisaio.” Ne fakatupu e Iehova e fuata ke kitia e tau kautau he lagi hane puipui a Elisaio. Nakai lata  ia tautolu ke amanaki ke he lagomatai faka-Atua pihia he vaha nei ke he ha puhala. Manatu, nakai ha ha he fuata he perofeta e Tohi Tapu katoa ke fakaako ki ai ke maeke ke fakamalolo aki hana tua. Ha ha ia tautolu e Tohi Tapu. Ka fakaaoga fakamitaki e tautolu, to fakamalolo foki e tua ha tautolu. Ma e fakatai, liga ke manamanatu a tautolu ke he falu fakamauaga ne fakamaama e Iehova ke he hana lotopa he lagi. Nakai fakaata he mena nei ha tuaha ko e mena fai fakatokatokaaga a Iehova he lagi kua lalago hana tau fekafekau he gahua fakaako he lalolagi katoa he vaha nei.—Isaia 6:1-4; Esekielu 1:4-28; Tanielu 7:9, 10; Fakakiteaga 4:1-11; 14:6, 7.

Mataala ke he Tau Lagatau ha Satani!

13. Ko e heigoa e kakano ne lali a Satani ke fakalolelole e taofi ha tautolu ke he kupu moli?

¹³ Ko e heigoa falu puhala fakalolelole ha Satani ke he tuaga fakaagaga ha tautolu mo e ha tautolu a taofi ke he kupu moli? Ko e taha ha lautolu ko e mahani feuaki, ke he tau puhala kehekehe. He lalolagi velagia ke he mahani fakatane mo e fifine he vaha nei, ne fakahigoa ko e femomoheaki (nakai fakamoli ke he fakamauaga) po ke mahani fakatane mo e fifine ke he taha ni e po (mahani feuaki fakahanoa) kua eke mo mena tupu he tau aho oti ma e atuhau kumi fakafiafia tumau pete ko e tau fua kelea ka moua mai ai. Kua fakatolomaki he tau kifaga, tivi, mo e tau vitio e puhala moui nei. Kua holofa e tau talahauaga telefua he tau tohi tala, mua atu ke he Internet. Kua tatali noa e kamatamata ki a lautolu ne tuaha noa.—1 Tesalonia 4:3-5; Iakopo 1:13-15.

14. Ko e ha falu he tau Kerisiano ne mokulu ai ke he tau lagatau ha Satani?

¹⁴ Kua fakaata he falu Kerisiano e tuaha noa ha lautolu ke kautu ki a lautolu ti takiva ai ha lautolu a tau manamanatuaga mo e tau loto he onoono ke he tau fakatino telefua kehekehe. Kua fakaata ne lautolu a lautolu ke mokulu ke he tau matahele futiaki ha Satani. Ko e taute pihia kua fa takitaki atu ke he tukia moumou fakaagaga. Ko lautolu pihia ne kaumahala ke fakatumau “mo tau tama mukemuke ke he kelea.” Nakai la hokotia a lautolu ke eke “mo tau tagata lalahi ke he manamanatu.” (1 Korinito 14:20) He tau tau takitaha, totou afe ne matematekelea he nakai mumuitua ke he tau matapatu fakaakoaga mo e tau poakiaga he Kupu he Atua. Ne fakaheu e lautolu ke tui mo e toka mau ha lautolu a “tapulu tau katoa he Atua.”—Efeso 6:10-13; Kolose 3:5-10; 1 Timoteo 1:18, 19.

Tokiofa e Mena kua Moua e Tautolu

15. Ko e liga uka he ha e falu ke loto fakaaue ke he tufaaga fakaagaga ha lautolu?

¹⁵ “To iloa foki e mutolu e mena moli, ko e mena moli foki ke toka noa ai a mutolu,” he talahau e Iesu. (Ioane 8:32) Tokologa e Tau Fakamoli ne o mai kehe he puhala moui tuai mo e tau feoakiaga fakalotu ha lautolu. Ko e mena ia, kua mautali a lautolu he loto fakaaue ke he tokanoaaga  kua ta mai he kupu moli. He taha fahi, ko e falu fuata ne feaki hake he tau mamatua i loto he kupu moli kua liga uka ke loto fakaaue ke he tufaaga fakaagaga ha lautolu. Ne nakai la fakalataha ia a lautolu ke he lotu fakavai po ke vala he lalolagi nei nukua peehi malolo e kumi-fiafia, hufia he tulaki, mo e mahani feuaki. Ko e fua, liga kaumahala a lautolu ke kitia e kehekeheaga malolo he ha tautolu a parataiso fakaagaga mo e lalolagi kolokolovao ha Satani. Ko e falu kua mokulu ke he kamatamata ke kamata e kona he lalolagi ke kitia e mena ne tonoa a lautolu i ai!—1 Ioane 2:15-17; Fakakiteaga 18:1-5.

16. (a) Ko e heigoa e tau huhu ka liga huhu hifo e tautolu ki a tautolu ni? (e) Ko e heigoa ha tautolu ne fakaako mo e fakamalolo ke taute?

¹⁶ Manako moli kia a tautolu ke vela e tau matalima ha tautolu ke iloa e mamahi mo e matematekelea? Nakai kia ako a tautolu mai he tau mena kelea ne tutupu ke he falu? Kua lata kia ia tautolu ke fuluhi atu ke he “pelapela” he lalolagi nei ke kitia kua tonoa a tautolu ke he falu mena? (2 Peteru 2:20-22) Ne fakamanatu e Peteru ke he tau Kerisiano he senetenari fakamua ne ko e vala he lalolagi ha Satani fakamua: “Ko e mena fakahiku ke he tau aho kua mole atu he mouiaga nai he eke ai e tautolu e manako he tau motu kehe, ne mahani ai a tautolu ke he tau mahani matahavala, mo e tau manako lahi, mo e inu lahi ke he uaina, mo e tau tafeaufi, mo e tau inuaga he kava, mo e hufeilo ke he tau tupua ke holifono ai.” Kua nakai lata moli ke iloa e tautolu e “matahavala ia ni kua mua ue atu” he lalolagi ke kitia e kelea muikau he puhala moui. (1 Peteru 4:3, 4) Kehe ai, ne fakaako e tautolu e tau mahani mitaki lilifu he tau Fale he Kautu ha tautolu, he tau matakavi ma e fakaakoaga Tohi Tapu. Ti kua fakamalolo a tautolu ke fakaaoga e manamanatuaga iloilo ha tautolu ke fakamoli kua ha ha ia tautolu e kupu moli ti taute e kupu moli ma ha tautolu ni.—Iosua 1:8; Roma 12:1, 2; 2 Timoteo 3:14-17.

Nakai ko e Fakamailoga Noa Ni e Higoa ha Tautolu

17. Eke fefe a tautolu mo Tau Fakamoli a Iehova kua lauia mitaki?

¹⁷ Ka taute e tautolu e kupu moli ma ha tautolu ni, to kumi a tautolu ke talahau atu ke he falu he tau magaaho kua latatonu. Nakai kakano e mena nei ke lali a tautolu ke ta omoi ki a lautolu kua nakai fakakite ha fiafia. (Mataio 7:6) Kehe ai, to nakai liutua a tautolu he fakakite a tautolu ko e Tau Fakamoli a Iehova. Ka fakakite he tagata e fiafia he talahau e huhu moli po ke he talia e tohi faka-Tohi Tapu, to mautali a tautolu mo e tauteute ke talahau e amaamanakiaga ha tautolu.  Moli, to fakamalolo he mena nei he uta tumau e tautolu mo tautolu e tau tohi pete ni ko e mena fe kua ha ha i ai a tautolu—i kaina, he gahua, he aoga, he fale koloa, po ke he tau matakavi fakafiafia.—1 Peteru 3:15.

18. Fakakite fakamahino fefe e tautolu a tautolu ko e tau Kerisiano kua aoga lahi ke he tau momoui ha tautolu?

¹⁸ Ka fakakite fakamaali e tautolu a tautolu ko e tau Kerisiano, kua totoko e tautolu e tau totokoaga halahu ha Satani. Ka ha ha ai e tu tau po ke fiafia Kirisimasi po ke lafolo, to maeke he tau tagata gahua ke pehe, “Ua tupetupe ki ai. Ko e taha he Tau Fakamoli a Iehova a ia.” He kakano taha, to nakai vaiga fakakelea he tau tagata a tautolu he fakalataha mo lautolu. Ti, ko e fakailoa he tuaga Kerisiano ha tautolu ko e mena aoga lahi ke he tau momoui ha tautolu, tuga foki he fakakite mai he aposetolo ko Peteru: “Ko hai foki ke favale kia mutolu kaeke ke fifitaki a mutolu ke he mahani mitaki? Kaeke foki ke fakamamahi a mutolu ha ko e tututonu, uhoaki a mutolu.”—1 Peteru 3:13, 14.

19. Iloa fefe e tautolu kua nonofo a tautolu ke he tau aho fakahiku?

¹⁹ Ko e taha aoga he taute e kupu moli ma ha tautolu ni to maeke ke mailoga e tautolu ko e tau vaha fakahiku moli anei he fakatokaaga nei. To iloa e tautolu ko e loga he tau perofetaaga he Tohi Tapu hane hokotia ke he tapunu he vaha ha tautolu. * Ko e hatakiaga ha Paulo “ko e tau aho fakamui to hohoko mai ai e tau aho uka” kua fakamoli lahi he tau mena tutupu matakutakuina he tau senetenari kua mole. (2 Timoteo 3:1-5; Mareko 13:3-37) Ko e vala tala he nusipepa fou ke he senetenari 20 aki ne mataulu “To Manatu Ai ko e Vaha Keli Tagata.” Ne talahau he vala tala: “Ne mailoga ai kua eke e 1999 mo tau kua mua atu e kelipopo he vala ke ua aki he senetenari kua mua atu e kelipopo.”

20. Ko e magaaho ni anei ma e gahua fe?

²⁰ Nakai ko e magaaho anei ke havilia fano. Kua mahino moli e monuina ha Iehova ke he gahua fakaako Tohi Tapu lahi mahaki nukua taute la ia ke he lalolagi katoa ko e fakamatala ke he tau motu. (Mataio 24:14) Kia eke e kupu moli ma hau ni, mo e folafola atu ke he falu. Kua falanaki e vaha anoiha tukumalagi hau ke he mena kua iloa e koe mogonei. He fakalolelole to nakai moua e monuina ha Iehova. (Luka 9:62) Ka e, ko e magaaho ke “tumau . . . mo e nakai fagahuatia, kia fakamakai nakai noa ke he gahua he Iki, he iloa e mutolu nakai noa mo e fua ha mutolu a fakafita ke he gahua he Iki.”—1 Korinito 15:58.

[Matahui Tala]

Manatu Nakai e Koe?

• Aaki kehe fefe e tautolu e tau tuaha?

• Ko e heigoa ka ako mai e tautolu he fakafifitakiaga he fuata ha Elisaio?

• Totoko ke he tau kamatamata fe kua lata ke mataala tumau a tautolu ki ai?

• Kua lata he ha ia tautolu ke fakakite fakamahino e tautolu a tautolu ko e Tau Fakamoli a Iehova?

[Tau Huhu he Fakaakoaga]

[Tau Fakatino he lau 20]

Kua lagomatai he fakaako Tohi Tapu mo e liogi tumau a tautolu ke aaki kehe e tau tuaha

[Fakatino he lau 21]

Ne totoka e tau tuaha he fuata ha Elisaio ha ko e fakakiteaga

[Fakatino he lau 22]

Kua fakaako a tautolu ke he tau mahani mea tokoluga ha Iehova he tau Fale he Kautu tuga anei Benin