Puhala ke Moua e Fiafia Moli

KO E takitaki lotu Puta, ko e Dalai Lama, ne pehe: “Kua talitonu au ko e kakano moli he tau momoui ha tautolu ke moua e fiafia.” Ti fakamaama mogoia e ia nukua talitonu a ia kua maeke ke moua e fiafia he fakamahani, po ke akonaki e manamanatuaga mo e loto. “Ko e manamanatuaga,” he talahau e ia, “ko e kanavaakau aoga kua lata ke moua e tautolu ke fakakatoatoa e fiafia.” Ko e talitonu ke he Atua kua nakai lata, he manatu e ia. *

Kehe ai, manamanatu ki a Iesu, nukua ha ha ai e tua malolo ke he Atua mo e tau fakaakoaga kua lauia e tau tagata totou teau miliona ke he tau senetenari loga kua mole. Ne matamua a Iesu ke he fiafia he tau tagata. Ne kamata e ia hana Lauga he Mouga kua talahaua ke he hiva e fiafia lahi—hiva e talahauaga ne kamata aki: “Uhoaki a . . . ” (Mataio 5:1-12) He lauga taha ia, ne fakaako e ia hana tau tagata fanogonogo ke kumikumi, fakamea, mo e akonaki e tau manamanatuaga mo e tau loto ha lautolu—hukui e favale, mahani kelea, mo e tau manatu lotokai aki e mafola, mea, mo e tau manatu fakaalofa. (Mataio 5:21, 22, 27, 28; 6:19-21) He fakamafana he taha tutaki hana fakamui, kua lata ia tautolu ke ‘manamanatu tumau’ ke he tau mena kua ‘moli, gali, tonu, mea, fulufuluola, talahaua mitaki mo e mahani mitaki.’—Filipi 4:8.

Ne iloa e Iesu ko e fiafia moli kua putoia e tau fakafetuiaga mo e falu. Kua aga feoaki pauaki a tautolu ko e tau tagata, ti nakai fiafia moli a tautolu ka vevehe kehe a tautolu po ke ka taufetoko tumau a tautolu mo lautolu ne viko takai ia tautolu. Maeke ni ia tautolu ke fiafia ka logona e tautolu e fakaalofa mai mo e ka fakaalofa a tautolu ke he falu. Ko e matapatu fakaalofa pihia, ne fakaako e Iesu, ko e fakafetuiaga ha tautolu mo e Atua. Kua kehe pauaki e fakaako ha Iesu mai he Dalai Lama, ha kua fakaako e Iesu kua nakai maeke he tau tagata ke fiafia moli ka tu kehe mai he Atua. Ko e ha ne pihia ai?—Mataio 4:4; 22:37-39.

Manamanatu ke he Hau a Tau Manako Fakaagaga

Taha he tau fiafia ko e: “Uhoaki a lautolu ne [“manamanatu ke he tau mena fakaagaga kua lata ma lautolu,” NW].” (Mataio 5:3) Ko e ha ne talahau e Iesu e mena nei? Ha kua kehe mai he tau manu, kua fai manako fakaagaga a tautolu. He taute ke he fakatai he Atua, kua maeke ia tautolu ke feaki fakalahi e tau fua faka-Atua, tuga e fakaalofa, fakafili tonu, fakaalofa hofihofi, mo e pulotu. (Kenese 1:27; Mika 6:8; 1 Ioane 4:8) Kua putoia he tau manako fakaagaga ha tautolu e manako ke fai kakano e tau momoui ha tautolu.

Fakamakona fefe e tautolu e tau manako fakaagaga pihia? Nakai he manamanatu fakamana po ke kumikumi noa fakatagata. Ka e, pehe a Iesu: “Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” (Mataio 4:4) Mailoga, ne pehe a Iesu ko e Atua e punaaga he “tau kupu oti” kua aoga ma e tau momoui ha tautolu. Ko e Atua ni kua maeke ke lagomatai a tautolu ke tali falu huhu. Ko e maama ia kua latatonu pauaki he vaha nei, he foaki e tupu lahi he tau fakaakoaga hagaao ke he amaamanakiaga he moui mo e puhala ke he fiafia. Ha ha i ai he tau fale tohi e tau fahi katoa he tau tohi kua mavehe e malolo tino, muhu koloa, mo e fiafia ke he tau tagata totou. Kua fakatu e tau fahi Internet nukua fehagai pauaki mo e fiafia.

Moha ia, fa mahani e manamanatuaga he tagata he tau fahi nei ke fakahehe. Tuga kua feaki atu ke he tau manako lotokai po ke fakaikaluga. Ko e fakave ke he iloilo mo e mena iloa tote, kua fa mahani ke moua e tau fetokoaga fakavai.  Tuga anei, ko e hagahaga tupu ki mua he tau tagata tohia he tau tohi lagomatai nukua fakave e tau manatu ha lautolu ke he fakaakoaga he “gahuahua e manamanatuaga tupu noa,” nukua tali noa ko e tau logonaaga he tagata kua vakavaka tuga e tupuna he manu ha tautolu. Ko e moli, ko e ha laliaga ke moua e fiafia nukua fakave ke he fakaakoaga kua fakaheu e matagahua he ha tautolu a Tufuga kua nakai aoga mo e to takitaki katoatoa atu ke he fakaita. Ne talahau he perofeta i tuai: “Kua fakamā ai e tau tagata iloilo . . . kitiala, kua tiaki e lautolu e kupu a Iehova; ti heigoa kia e iloilo ha ha ia lautolu?”—Ieremia 8:9.

Iloa e Iehova ko e Atua e tauteaga ha tautolu mo e mena ka fakafiafia moli a tautolu. Iloa e ia e kakano ne tuku e ia e tagata he lalolagi mo e mena ka fakatoka mai he vaha anoiha, ti talahau e ia e vala tala ia ki a tautolu i loto he Tohi Tapu. Ko e mena kua fakakite e ia he tohi omoomoi he agaga ne kua fakalagalaga e taliaaga ha lautolu kua manako moli mo e omoomoi e fiafia. (Luka 10:21; Ioane 8:32) Ko e mena anei ne tupu ke he ua e tutaki ha Iesu. Ne mamahi lahi a laua he hoko hana mate. Ka e he mole e ako fakamua mai ia Iesu e liu tu mai hagaao ke he hana matagahua he finagalo he Atua ma e fakamouiaga he tagata, ne pehe a laua: “Nakai kia velagia ha taua a tau loto ki loto ia taua he vagavagahau a ia mo taua ke he puhala, he fakamatala mai foki e ia e tau Tohi kia taua?”—Luka 24:32.

Kua fakamalolo e olioli pihia ka fakaata e tautolu e kupu moli he Tohi Tapu ke takitaki aki e tau momoui ha tautolu. Hagaao ke he mena nei, kua fakatatai e fiafia ke he tagaloa. Kua kitia ai ka mitaki e tau tutuaga, ka kua mahomo atu e kikila—maeke foki ke ua e tagaloa—ka mitaki ue atu e tau tutuaga. Kia o mai la tautolu mogonei ke onoono ke he falu fakafifitakiaga gahoa ke he puhala kua maeke he fakagahuahua e tau fakaakoaga he Tohi Tapu ke fakalahi atu e fiafia.

Fakamukamuka e Moui Hau

Fakamua, kia ono ke he tomatomaaga ha Iesu ke he manatu he muhu koloa. He mole e tomatoma he taute e tutuliaga ke muhu koloa mo mena mua he moui, ne taute e ia e talahauaga kehe lahi. Ne pehe a ia: “Kaeke foki ke mitaki hau a tau mata, ti maama ai hau a tino oti.” (Mataio 6:19-22) Aoga ai, ne pehe a ia kaeke ke tutuli eketaha a tautolu ke he muhu koloa, malolo, po ke ha foliaga kua fakatoka he tau tagata ma lautolu, to galo e tautolu e tau mena ne mua atu e aoga. Ha kua pehe a Iesu he taha magaaho, “ko e mena nakai moui taha he loga hana tau mena ha i ai.” (Luka 12:15) Ka tuku fakamua e tautolu e tau mena kua aoga moli, tuga e fakafetuiaga ha tautolu mo e Atua, tau kapeletu he magafaoa, mo e falu mena foki, to “mitaki” ai e “mata” ha tautolu he nakai pulefu.

Mailoga, ne nakai fakamalolo e Iesu ke kikili lahi po ke pule taha. Ha ko ia ko Iesu na nakai kikili lahi. (Mataio 11:19; Ioane 2:1-11) Ka e, ne  fakaako e ia ko lautolu kua onoono ke he moui ko e magaaho na ia ke moua e muhu koloa nukua galo e lautolu e aoga he moui.

He talahau ai falu ne muhu koloa lahi tuai he moui, ko e tagata fakamaulu manamanatu i San Francisco, U.S.A., ne pehe ma lautolu ko e tupe ko e “vaka he tupetupe mo e fakagoagoa.” Ko e tau tagata nei, he lafi e ia, “ne fakatau ua po ke tolu e fale, motoka, mo e fakaaoga noa ni e tupe. Ti ka nakai la fakamakona he mena ia a lautolu [he, taute a lautolu ke fiafia], kua fakaatukehe a lautolu, ai fai tapikiaga mo e fakauaua ke he mena ka taute e lautolu ma e tau momoui ha lautolu.” Kehe ai, ko lautolu kua omaoma ke he hatakiaga ha Iesu ke moui fakalatalata ke he tau koloa he tino mo e toka taha magaaho ma e tau mena fakaagaga kua liga mahomo atu e fiafia moli ka moua.

Ko Tom, ko e tagata ta fale ne nofo i Hauai ne foaki noa e ia a ia ke lagomatai ke ta e tau fale he tapuakiaga he tau aelani he Pasifika nukua nakai muhu koloa lahi e tau tagata ke he tino. Mailoga e Tom e taha mena hagaao ke he tau tagata mahani molu nei. Ne pehe a ia: “Ko e tau matakainaga Kerisiano haku he tau aelani nei ne fiafia moli. Ne lagomatai e lautolu au ke kitia maali ko e tupe mo e tau koloa nakai ko e mena galo ke moua e fiafia.” Ne kitekite foki a ia ke he tau tagata foaki noa kua gahua mo ia he tau aelani mo e mailoga e puhala kua mahani fakalatalata a lautolu. “Nukua maeke ia lautolu ke muhu tupe,” he talahau e Tom. “Ka e, fifili a lautolu ke tuku fakamua e tau mena fakaagaga mo e fakatumau e puhala moui mukamuka.” Omoi he tau fakafifitakiaga nei, ne fakamukamuka e Tom hana moui ke maeke ia ia ke foaki katoatoa e tau magaaho loga ke he hana magafaoa mo e tau mena fakaagaga—ko e hikiaga ne nakai tokihala a ia ke taute.

Fiafia mo e Lilifu Fakatagata

Ko e aoga ke he fiafia ko e logonaaga he lilifu fakatagata. Ha ko e nakai mitaki katoatoa he tagata mo e fua he tau lolelole, ha ha he falu e onoonoaga kelea hagaao ki a lautolu ni, ma e tokologa, ko e tau logonaaga pihia kua kamata mai ni he vaha tote. Liga uka ke kautu mai he tau logonaaga totoko, ka e maeke ke taute. Ko e vailakau kua fakave he fakagahua e Kupu he Atua.

Kua fakamaama he Tohi Tapu e puhala he logonaaga he Tufuga ki a tautolu. Nakai kia mua e aoga he onoonoaga hana mai he ha tagata—pihia foki ha tautolu? Ko e fakakiteaga lahi he fakaalofa, kua ono e Atua ki a tautolu mo e nakai fili po ke fakavihia. Kitia e ia a tautolu ke he tufugaaga ha tautolu, ti pihia foki mo e mena kua fahia a tautolu. (1 Samuela 16:7; 1 Ioane 4:8) Moli, kua onoono a ia ki a lautolu kua loto ke fakafiafia a ia kua uho, e, kua manako ki ai, pete ni e tau agahala ha lautolu.—Tanielu 9:23; Hakai 2:7.

Moli, nakai fakaheu he Atua ha tautolu a tau lolelole mo e ha agahala kua taute e tautolu. Kua amanaki a ia ki a tautolu ke lali fakalahi ke taute e mena kua hako, ti lalago e ia a tautolu ka taute pihia e tautolu. (Luka 13:24) Ka e, kua pehe e Tohi Tapu: “Tuga ne hofihofi e fakaalofa  he matua ke he hana fanau, kua hofihofi pihia e fakaalofa a Iehova kia lautolu kua matakutaku kia ia.” Kua talahau foki: “Ioha na e, ane mai tokaloto e koe e tau mahani hepehepe, po ko hai, ma Iki na e, ke maeke ke tu atu? Ka e ha ha ia koe ke fakamagalo e tau hala, kia matakutakuina ai a koe.”—Salamo 103:13; 130:3, 4.

Ti lali ke kitia e koe a koe ke he fofoga he Atua. He iloa na onoono a ia ki a lautolu kua ofania a ia mo tau mena manako ki ai ti ha ha ia ia e mauokafua ia lautolu—pete ni e onoono a lautolu ki a lautolu kua kelea—nukua lahi atu e mena ka taute ke fakaholo ki mua e fiafia he tagata.—1 Ioane 3:19, 20.

Amaamanakiaga—Aoga ke he Fiafia

Ko e manatu talahaua fou ne fakahigoa ko e gahuahuaaga manamanatu kua taofi e moli he mena ia, ne feaki e manamanatu mauokafua mo e he hagaaki ke he tau malolo fakatagata he taha, ka takitaki ke he fiafia. To tokogahoa ka fakatikai ko e onoonoaga mitaki he moui mo e he vaha anoiha to lafi ke he fiafia ha tautolu. Pete ia, ko e onoonoaga mitaki ia kua lata ke fakave ke he mena moli, nakai ni he amaamanaki noa. Ti ko e onoonoaga mitaki po ke manamanatu mitaki ka utakehe e felakutaki, hoge, tatalu, kiva, fuakau, gagao, po ke mate—ko e tau mena ka utakehe aki e fiafia he tokologa. Moha ia, ha ha i ai e tuaga he onoonoaga mitaki.

Fuluola ai, nakai fakaaoga he Tohi Tapu e kupu onoonoaga mitaki; kua fakaaoga ai e kupu malolo lahi—ko e amaamanakiaga. Kua fakamaama he Vine’s Complete Expository Dictionary e “amaamanakiaga” ne fakaaoga he Tohi Tapu ko e “manako mo e amaamanaki mauokafua, . . . ko e amaamanakiaga fiafia ke he mitaki.” He fakaaoga e Tohi Tapu, kua mua atu e amaamanakiaga ke he onoonoaga mitaki he tuaga. Kua hagaao foki ke he mena kua tokamau e amaamanakiaga he taha i ai. (Efeso 4:4; 1 Peteru 1:3) Ko e amaamanakiaga faka-Kerisiano, tuga anei, ko e tau mena kelea oti ne talahau he paratafa fakamua to nakai leva ti uta kehe. (Salamo 37:9-11, 29) Ka e lahi atu e ofania.

Kua amaamanaki atu e tau Kerisiano ke he magaaho ka moua he tau tagata tua fakamoli e moui tukulagi he lalolagi parataiso. (Luka 23:42, 43) Fakalaulahi atu e amaamanakiaga ia, kua pehe mai e Fakakiteaga 21:3, 4: “Kitiala, kua fakalataha mo e tau tagata e fale uta fano he Atua, to nofo a ia mo lautolu; to eke a lautolu mo motu hana, to ha ia lautolu e Atua ni, ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”

Ko e ha tagata kua amanaki ke moua e vaha anoiha pihia kua ha ha i ai e tau kakano oti ke fiafia, pete ni e nakai mitaki e tuaga mogonei. (Iakopo 1:12) Ti ko e ha he nakai kumikumi e Tohi Tapu mo e kumi e kakano kua talitonu ai a koe. Fakamalolo e amaamanakiaga hau he fakatoka e magaaho he tau aho takitaha ke totou e Tohi Tapu. Ko e taute pihia ka fakamonuina fakaagaga a koe, he lagomatai a koe ke kalo kehe mai he tau mena ne fofo e fiafia he tau tagata mo e atihake e mahani fakalatalata hau. E, ko e mena galo lahi mahaki ke he fiafia moli ko e taute e finagalo he Atua. (Fakamatalaaga 12:13) Ko e moui ne ati hake he omaoma e tau puhala he Tohi Tapu ko e moui fiafia, ha kua pehe a Iesu: “Mua e monuina he tau tagata ka fanogonogo ke he kupu he Atua mo e omaoma ki ai.”—Luka 11:28.

[Matahui Tala]

[Tau Fakatino he lau 4]

Nakai moua e fiafia he muhu koloa, tu kehe, po ke falanaki ke he iloilo tote he tagata

[Fakatino he lau 5]

Ko e amaamanakiaga he Kerisiano kua fakafiafia e tagata

[Fakatino he lau 6]

Ko e moui fakave he omaoma ke he Kupu he Atua kua moui fiafia