“Kua Tupu e Kupu he Atua”
“Kua Tupu e Kupu he Atua”
“Kua fakafano e ia hana poaki ke he lalolagi, ne mafiti lahi hana tau kupu ne poi atu.”—SALAMO 147:15.
1, 2. Ko e heigoa e matagahua ne foaki e Iesu ke he hana tau tutaki, ti ko e heigoa ne putoia i ai?
TAHA he tau perofetaaga ofoofogia he Tohi Tapu kua moua ia Gahua 1:8. Nakai leva ti hake a ia ke he lagi, ne tala age a Iesu ke he tau tutaki tua fakamoli hana: “To moua e mutolu e malolo, ka haele hifo e Agaga Tapu ki luga ia mutolu; to eke foki a mutolu mo tau talahau haku . . . ke hoko ni ke he fakaotiaga he lalolagi.” Ko e matagahua lahi mahaki ha ia anei ke fakamoli!
2 Ke fakapuloa e kupu he Atua ke he lalolagi katoa ko e matagahua kua liga paleko ke he tau tutaki gahoa ne moua ai. Mailoga e mena kua putoia foki. To maeke ia lautolu ke lagomatai e tau tagata ke maama e tala mitaki he Kautu he Atua. (Mataio 24:14) Ko e fakamatala ki a Iesu kua lata ke fakalataha ke he tau fakaakoaga malolo mo e falu ti fakamaama e gahua hana he finagalo ha Iehova. Mua atu ia, kua putoia foki ke he gahua taute tutaki he tau tagata ti papatiso a lautolu. Ti to taute e mena nei ke he lalolagi katoa!—Mataio 28:19, 20.
3. Ko e heigoa ne fakamafana e Iesu ke he hana tau tutaki, ti fefe e taliaaga ha lautolu ke he gahua ne foaki ki a lautolu?
3 Moha ia, ne fakamafana e Iesu hana tau tutaki to fakalataha e agaga tapu mo lautolu he taute e gahua nukua tuku age e ia ki a lautolu. Pete ni e lahi e matagahua mo e tau laliaga favale mo e peehiaga he tau tagata totoko ke fakamate a lautolu, ne kautu e tau tutaki fakamua ha Iesu he taute e mena ne fekau e ia. Ko e fakamoliaga he fakamauaga tala ne nakai maeke ke fakatikai.
4. Kitia fefe e fakaalofa he Atua ke he poakiaga ke fakamatala mo e fakaako e falu?
4 Ko e matagahua fakamatala mo e fakaako he lalolagi katoa ko e fakakiteaga he fakaalofa he Atua ma lautolu ne nakai iloa a ia. Ne foaki ki a lautolu e magaaho ke fakatata atu ki a Iehova mo e moua e fakamagaloaga he tau hala. (Gahua 26:18) Ko e poakiaga ke fakamatala mo e fakaako foki ne kitia ke he fakaalofa he Atua ma lautolu kua fua e fekau, ha kua fakaata ai a lautolu ke fakakite e mahani fakamoli ha lautolu ki a Iehova mo e fakatata ha lautolu a fakaalofa ma e tau tagata fakahelehele. (Mataio 22:37-39) Ne uho lahi ke he aposetolo ko Paulo e fekafekauaga Kerisiano ati hagaao a ia ki ai ko e “koloa.”—2 Korinito 4:7.
5. (a) Moua e tautolu i fe e fakamauaga tala falanaki lahi he tau Kerisiano fakamua, ti ko e heigoa e tupu ne fakamaama mai i ai? (e) Ko e kakano lahi he ha e tohi ha Gahua ke he tau fekafekau he Atua he vaha nei?
5 Ko e fakamauaga tala falanaki lahi ke he gahua fakamatala he tau Kerisiano fakamua ne moua he tohi omoomoi he agaga ha Gahua, na tohi he tutaki ko Luka. Ko e fakamauaga he tupu ofoofogia mo e mafiti. Ko e tupu nei he iloilo he Kupu he Atua kua liu manatu e tautolu a Salamo 147:15, nukua pehe: “Kua fakafano e [Iehova] hana poaki ke he lalolagi, ne mafiti lahi hana tau kupu ne poi atu.” Ko e talahauaga he tau Kerisiano fakamua, ne fakamalolo he agaga tapu, kua fiafia lahi mo e fai kakano lahi ki a tautolu he vaha nei. Kua fakalataha e Tau Fakamoli a Iehova he gahua taha ia he fakamatala mo e taute tutaki ke kaputia oti ai. Kua fehagai foki a tautolu mo e tau mena vihi pihia tuga ne fehagai he tau Kerisiano he senetenari fakamua. He mailoga e tautolu e puhala ne fakamonuina mo e fakamalolo e Iehova e tau Kerisiano fakamua, kua malolo e tua ha tautolu ha ko e hana lagomataiaga.
Tupu e Numera he Tau Tutaki
6. Ko e heigoa e talahauaga hagaao ke he tupu kua lagatolu e kitia he tohi ha Gahua, ti hagaao ke he heigoa?
6 Taha puhala ke kumikumi e tautolu e fakamoliaga he Gahua 1:8 he kitekite ke he talahauaga “kua tupu e kupu he Atua,” ko e talahauaga na lagatolu ni e kitia i loto he Tohi Tapu, ti kehekehe fakatote, mo e tutu oti ni he tohi ha Gahua. (Gahua 6:7; 12:24; 19:20) Ko e “kupu he Atua,” po ke “kupu he Iki,” he tau talahauaga nei kua hagaao ke he tala mitaki—ko e fekau fakalagalaga he kupu moli faka-Atua, ko e fekau malolo mo e moui ne hiki e tau momoui ha lautolu kua talia ai.—Heperu 4:12.
7. Ko e heigoa e tupu he kupu he Atua ne matutaki he Gahua 6:7, ti ko e heigoa e mena ne tupu he aho he Penetekoso 33 V.N.?
7 Ko e fakamoliaga fakamua ke he tupu he kupu he Atua kua moua ia Gahua 6:7. Ne totou e tautolu i ai: “Kua tupu foki e kupu he Atua; ti kua au atu ai he tokologa e tau tutaki i Ierusalema; kua omaoma foki e tokologa he tau ekepoa ke he tua.” Kua matutaki e tupuaga nei ke he malikiti he numera he tau tutaki. Fakamua atu, he aho Penetekoso 33 V.N., ne liligi hifo e agaga tapu ki luga he kau ke he 120 e tutaki ne fakapotopoto he poko tapa ki luga. Ne taute he aposetolo ko Peteru e lauga fakalagalaga, mo e mai ia lautolu ne fanogonogo, ko e 3,000 ne tua he aho ia. Ko e ofoofogia ha ia he o atu e tau afe tagata ke he vai po ke pokolili mo e takai viko i Ierusalema ke papatiso ke he higoa ha Iesu, ko e tagata ne fakahala ha ko e kolokolovao ke he tau aho 50 fakamua!—Gahua 2:41.
8. Malikiti fefe e numera he tau tutaki he tau tau fakamui he Penetekoso 33 V.N.?
8 Moli, ko e mena ia, ko e kamataaga laia. Ko e tau laliaga fakatumau he tau takitaki lotu Iutaia ke fakahiku e gahua fakamatala kua kaumahala. Ke he fakaita he tau takitaki ia, “kua lafilafi he Iki ke he [tau tutaki] ke he taha aho mo e taha aho a lautolu kua fakamomoui.” (Gahua 2:47) Nakai leva, “ko e katoa foki he tau tagata, na ko e lima e afe ka totou.” He mole e mena ia, “kua au atu ai he lafilafi ke he Iki a lautolu ne tua, tokologa e tau tane katoa mo e tau fifine.” (Gahua 4:4; 5:14) He magahala fakamui, kua totou e tautolu: “Ati mafola ai e tau ekalesia oti kana i Iutaia, mo Kalilaia, mo Samaria, kua fakamafanatia a lautolu; kua feoaki foki a lautolu mo e matakutaku ke he Iki, ti kua fakatokologa he lagomatai mai he Agaga Tapu.” (Gahua 9:31) Fai tau he mole, liga ke he 58 V.N., ne hagaao e fakamoliaga ke he “tokologa afe mo afe he tau tagata Iutaia kua tua.” (Gahua 21:20) Mogoia, ne tokologa foki e tau Tagata Motu Kehe kua tua.
9. To fakamaama fefe e koe e tau Kerisiano fakamua?
9 Ko e tupu mahaki he numera nei kua fua mai he liliuina. Kua fou e lotu—ka e gahuahua malolo. He nakai ko e tau tagata lotu noa ni, ne mahani fakamoli katoatoa e tau tutaki ki a Iehova mo e hana Kupu, he fai magaaho ne ako e kupu moli mai ia lautolu ne favale vevela. (Gahua 16:23, 26-33) Kua taute pihia e lautolu ne talia e faka-Kerisiano ha ko e fua mai he fifiliaga manamanatu hako. (Roma 12:1) Ne fakaako a lautolu ke he tau puhala he Atua; kua toka e kupu moli he tau manamanatuaga mo e tau loto ha lautolu. (Heperu 8:10, 11) Kua mautali a lautolu ke mamate ma e mena ne tua a lautolu ki ai.—Gahua 7:51-60.
10. Ko e heigoa e matagahua ne talia he tau Kerisiano fakamua, ti ko e heigoa e tataiaga kua moua e tautolu he vaha nei?
10 Ko lautolu ne ofania e fakaakoaga faka-Kerisiano ne mailoga e matagahua ha lautolu ke folafola e kupu moli ke he falu. Ne lafi fakatonu e mena nei ke he tupu lahi atu he numera. Taha e pulotu Tohi Tapu ne pehe: “He matutaki ke he tua kua nakai hagaao ke he toka kehe he fakamakutu lahi po ke tagata evagelia kotofa pauaki. Ko e fakaevagelia e kotofaaga uho mo e matagahua he tau tagata oti he Tapu. . . . Ko e mouaaga tumau he maaga Kerisiano oti ne foaki e malolo lahi ke he gahuahuaaga mai he kamataaga.” Ne tohi atu foki e ia: “Ko e fakaevagelia ko e malolo moui he tau Kerisiano fakamua.” Ko e mena taha ia foki he tau Kerisiano moli he vaha nei.
Tupuaga he Numera he Tau Matakavi
11. Ko e heigoa e faga tupu ne fakamaama he Gahua 12:24, ti hoko fefe e mena nei?
11 Ko e fakamoliaga ke uaaki ke he tupu he kupu he Atua kua moua ia Gahua 12:24: “Kua tupu e kupu he Atua, mo e tupu lahi.” Ko e talahauaga anei ne matutaki mo e tupuaga he numera he tau matakavi. Pete ni e totokoaga fakatufono, ne matutaki e gahua ke tupu lahi. Ne liligi hifo fakamua e agaga tapu ki Ierusalema, ti holofa mafiti mai i ai e kupu. Ne vehevehe fano he favaleaga i Ierusalema e tau tutaki ke he tau kalakala i Iutaia mo Samaria. Ko e fua? “Kua o fano foki a lautolu ne mavehevehe, mo e fakamatala atu e vagahau mitaki he kupu.” (Gahua 8:1, 4) Ne uta a Filipi ke fakamatala ke he tagata tane, nukua mole la ia e papatiso, kua uta e fekau ki Aitiope. (Gahua 8:26-28, 38, 39) Ne mafiti e vakavaka he kupu moli i Lita, ko e Matiketike ha Sarona, mo Iopa. (Gahua 9:35, 42) Fakamui, ne fenoga atu e aposetolo ko Paulo ke he afe he tau kilomita ke he tahi mo e fuga kelekele, he fakatu e tau fakapotopotoaga ke he tau motu loga he Metiteraneani. Ne fano e aposetolo ko Peteru ki Papelonia. (1 Peteru 5:13) He mole e 30 e tau he liligi hifo e agaga tapu he Penetekoso, ne tohi e Paulo kua “fakamatala atu [e tala mitaki] ke he tau tagata oti ke he lalolagi,” liga hagaao ke he fahi he lalolagi ne talahaua lahi he magahala ia.—Kolose 1:23.
12. Talahau fefe he tau tagata totoko he faka-Kerisiano e tupu he kupu he Atua he matakavi?
12 Talahau foki he tau tagata totoko he faka-Kerisiano kua tu hokohoko e kupu he Atua ke he Pule Atu Motu Roma katoa. Ma e fakatai, ne talahau he Gahua 17:6, ne tauhea atu e tau tagata totoko i Tesalonia, fahi tokelau ha Heleni: “Ko e tau tagata nai kua fakatupu e fakaagitau ni ke he lalolagi oti, ti kua hohoko mai foki a lautolu ki hinei.” Lafi ki ai, he kamataaga he senetenari ke uaaki, ko Pliny the Younger ne tohi ke he Pule Atu Motu Roma ko Trajan mai i Pitunia hagaao ke he faka-Kerisiano. Ne gugu a ia: “[Kua] nakai ni tupu ke he tau taone hokoia, ka kua holofa foki hana pikitia ke he tau maaga mo e motu tata mai.”
13. Ko e puhala fe kua fakaata he tupu he matakavi e fakaalofa he Atua ma e tau tagata?
13 Ko e tupu nei he matakavi ko e fakakiteaga he fakaalofa hokulo ha Iehova ma e tau tagata ne moua e fakahaoaga. He mailoga e Peteru e agaga tapu kua gahuahua ia Konelio ko e Tagata Motu Kehe, ne pehe a ia: “Ko e moli, kua iloa e au nakai fakamailoga tagata e Atua. Ka koe tau tagata he tau motu oti kana ne matakutaku kia ia mo e mahani tututonu, kua talia ai e ia.” (Gahua 10:34, 35) E, ko e tala mitaki fakamua mo e mogonei ko e fekau ma e tau tagata oti, mo e tupu he matakavi e kupu he Atua ne foaki ke he tau tagata oti kana e magaaho ke talia e fakaalofa he Atua. He senetenari 21 aki nei, ne holofa moli e kupu he Atua ke he tau kalakala oti he lalolagi.
Tupu kua Malolo
14. Ko e faga tupu fefe ne fakamaama mai he Gahua 19:20, ti ko e heigoa kua malolo atu e kupu he Atua i ai?
14 Ko e fakamoliaga ke toluaki ke he tupu he kupu he Atua kua moua ia Gahua 19:20: “Ko e mena ia kua tupu ue atu ai, mo e malolo e kupu he Iki.” Ko e kupu Heleni fakamua ne liliu “malolo” kua talahau e manatu he “ukufakina.” Ko e tau kupu tohi fakamua kua talahau ne tokologa i Efeso ne eke mo tau tagata tua, mo lautolu ne taute mana ne tugi e tau tohi ha lautolu i mua he toloaga tagata. Ti, malolo e kupu he Atua ke he tau taofiaga fakalotu fakavai. Ne kautu foki e tala mitaki ke he falu mena uka, tuga e favaleaga. Nakai fai mena ke taofi aki. He mena nei kua moua tuai e tautolu e tataiaga ue atu he faka-Kerisiano moli ke he vaha ha tautolu.
15. (a) Ko e heigoa ne tohi he tagata fakamau tala tuai he Tohi Tapu hagaao ke he tau Kerisiano fakamua (e) Kia hai ne foaki he tau tutaki e lilifu ma e kautuaga ha lautolu?
15 Ne fakapuloa he tau aposetolo mo e falu Kerisiano fakamua e kupu he Atua mo e fakamakai. Hagaao ki a lautolu, ne mailoga he taha tagata fakamau tuai he Tohi Tapu: “Ka ha ha he tau tagata e finagalo ke vagahau hagaao ke he Iki ha lautolu, ne loga lahi e tau puhala ha lautolu ke taute aki. Moli, ko e omoomoiaga he tau tagata tane mo e tau fifine nei ne fakamalolo fakalahi atu a tautolu mai he ha lautolu a tau puhala.” Ka e mailoga agaia he tau Kerisiano fakamua ia ko e kautuaga he fekafekauaga ha lautolu nakai falanaki ke he tau laliaga ni ha lautolu. Ha ha ia lautolu e poakiaga faka-Atua ke taute e gahua ha lautolu, ti ha ha ia lautolu e lagomataiaga faka-Atua ke fakakatoatoa ai. Ko e tupu fakaagaga hau ia he Atua. Ne talahau he aposetolo ko Paulo e mena nei he tohi hana ke he fakapotopotoaga i Korinito. Ne tohi e ia: “Ne to e au, ne fakamalū e Apolo, ka ko e Atua ni kua fakatutupu ai. Ha ko e tau ekegahua a mautolu fakalataha mo e Atua.”—1 Korinito 3:6, 9.
Gahuahua e Agaga Tapu
16. Ko e heigoa ne fakakite kua fakamalolo he agaga tapu e tau tutaki ke vagahau mo e malolo?
16 Liu manatu na fakamafana e Iesu hana tau tutaki to gahuahua e agaga tapu ke he tupu he kupu he Atua mo e to fakamalolo he agaga tapu ia e tau tutaki ke he gahua fakamatala ha lautolu. (Gahua 1:8) Tupu fefe e mena nei? Nakai leva he liligi hifo e agaga ke he tau tutaki he Penetekoso, ne tutu mai a Peteru mo Ioane ke vagavagahau ke he Saneheturini Iutaia, ko e hopoaga lahi he motu, nukua ha ha he tau iki fakafili e matagahua ke fakahala a Iesu Keriso. To vivivivi kia e tau aposetolo he matakutaku i mua he tau toloaga kelea mo e favale ia? Nakai pihia! Ne fakamalolo he agaga tapu a Peteru mo Ioane ke vagavagahau mo e malolo ati puke ai e tau tagata totoko ha laua ke he ofomate, ti “ofo ai a lautolu; kua iloa mitaki ai e lautolu, ko laua ne fakalataha mo Iesu.” (Gahua 4:8, 13) Ne fakatupu foki he agaga tapu a Setefano ke fakamatala fakamalolo ke he Saneheturini. (Gahua 6:12; 7:55, 56) Fakamua, ne omoi he agaga tapu e tau tutaki ke fakamatala mo e malolo. Ne talahau e Luka: “Kua mole atu ha lautolu a liogi, ati luelue ai e mena ne fakapotopoto ai a lautolu; kua puke foki a lautolu oti ke he Agaga Tapu, kua talahau atu e kupu he Atua mo e fakamalolo.”—Gahua 4:31.
17. Ko e heigoa falu puhala ne lagomatai he agaga tapu e tau tutaki ke he fekafekauaga ha lautolu?
17 Puhala mai he agaga tapu malolo hana, ko Iehova, fakalataha mo Iesu ne liu tu mai, kua takitaki e gahua fakamatala. (Ioane 14:28; 15:26) He magaaho ne liligi hifo e agaga ki a Konelio, hana tau magafaoa, mo e tau kapitiga tata, ne mailoga he aposetolo ko Peteru kua maeke he tau Tagata Motu Kehe nakai pelitome ke lata ke papatiso ke he higoa ha Iesu Keriso. (Gahua 10:24, 44-48) Fakamui, ne gahuahua e agaga ke fifili a Panapa mo Saulo (ko e aposetolo ko Paulo) ma e gahua misionare mo e he takitaki a laua ke he mena kua lata mo e nakai lata ke o ki ai. (Gahua 13:2, 4; 16:6, 7) Kua takitaki ai e puhala taute fifiliaga he tau aposetolo mo e tau patu i Ierusalema. (Gahua 15:23, 28, 29) Ne takitaki foki he agaga tapu e tau leveki kotofa he fakapotopotoaga Kerisiano.—Gahua 20:28.
18. Fakakite fefe he tau Kerisiano fakamua e fakaalofa?
18 Lafi ki ai, kua kitia e agaga tapu ke he tau Kerisiano, he taute e tau fua mahani Atua, tuga e fakaalofa. (Kalatia 5:22, 23) Ne omoi he fakaalofa e tau tutaki ke gahua auloa. Ma e fakatai, mui mai he Penetekoso he 33 V.N., ko e tanakiaga tupe mahani mau ne fakatu ke lagomatai aki e tau manako fakatino he tau tutaki i Ierusalema. Kua talahau mai he fakamauaga Tohi Tapu: “Kua nakai nofogati foki taha ia lautolu; ha ko lautolu kua fai fonua, po ke tau fale; kua fakatau ai e lautolu, ti ta mai e taui he tau mena ne fakatau. Kua tuku atu ai ke he tau aposetolo ke pule; ti tufatufa ni kia lautolu takitokotaha ke fakalata ke he mena kua nofogati ai.” (Gahua 4:34, 35) Ne fakalahi atu e fakaalofa nei nakai ni ke he tau matakainaga talitonu ka e pihia foki ke he falu, he fakalataha ke he tala mitaki mo e falu gahua he mahani totonu. (Gahua 28:8, 9) Ne pehe a Iesu ko e foaki noa e fakaalofa ka fakakite aki hana tau tutaki. (Ioane 13:34, 35) Moli ko e fua aoga he fakaalofa ne fakatata mai e tau tagata ke he Atua mo e lafi ke he tupuaga he senetenari fakamua tuga ni he vaha nei.—Mataio 5:14, 16.
19. (a) Ko e heigoa e tau puhala tolu nukua tupu e kupu ha Iehova ke he senetenari fakamua? (e) Ko e heigoa ka kumikumi e tautolu he vala tala ka mui mai?
19 Ko e talahauaga katoa he “Agaga Tapu” kua kitia ai laga 41 he tohi ha Gahua. Maaliali ai, ko e tupuaga he Kerisiano moli he senetenari fakamua ne matutaki tata ke he malolo mo e takitakiaga he agaga tapu. Ko e tupu e numera he tau tutaki, ko e holofa he kupu he Atua ke he tau kalakala oti, mo e malolo ke he tau lotu mo e tau pulotu he magahala ia. Ko e tupu he senetenari fakamua nei kua tatai ai ke he gahua he Tau Fakamoli a Iehova he vaha nei. He vala tala ka mui mai, to kumikumi e tautolu e tupu ofoofogia pihia he kupu he Atua he vaha fou nei.
Manatu Nakai e Koe?
• Tupu fefe e numera he tau tutaki fakamua?
• Ke he puhala fe ne holofa e kupu he Atua ke he tau matakavi?
• Malolo fefe e kupu he Atua he senetenari fakamua?
• Ko e heigoa e gahuahuaaga he agaga tapu ke he tupu he kupu he Atua?
[Tau Huhu he Fakaakoaga]
[Fakatino he lau 20]
Ne fakamatala a Filipi ke he Aitiope, he fakaholofa e tala mitaki ke he tau matakavi
[Fakatino he lau 21]
Ne takitaki he agaga tapu e tau aposetolo mo e tau patu i Ierusalema