Omaoma Ko e Fakaakoaga Aoga Kia he Vaha Tote?

“KUA Manako e Tau Matua ke he Tau Tama Fai Mahani, Nakai ke he Tau Tama ne Omaoma Hokoia.” Kua totou pihia e mataulu he tohitala. Ko e tama valatala nei he hokotaki kua fakave ke he tau fua he kumikumiaga ne taute i Niu Silani, ne fakakite ko e “22 [ni] e pasene he tau tagata ne talahau kua lata ke fakaako e omaoma ke he fanau he loto kaina.” Fakakite foki he kumikumiaga, ne talitonu e tau matua he vaha nei kua aoga lahi ke fakaako e fanau ke he tau puhala pihia tuga e mahani mitaki, tu tokotaha, mo e fakalagoaga.

He vaha manako tu tokotaha mo e lotokai nei, nakai ko e mena ke ofo ai ha kua tokologa e tau tagata ne pulefu e onoonoaga ke he omaoma mo e ke fakaako ai ke he fanau. Kua lata kia e omaoma mai he vaha tote ke fakaheu kehe ke eke mo mena tuai? Po kua haia e omaoma he tau fakaakoaga aoga lahi ne kua lata he fanau ke fakaako mo e aoga mai ai? Mua atu e aoga, fefe e onoonoaga ha Iehova ko e Atua, ko e Kamataaga he fakatokatokaaga fakamagafaoa, ke he omaoma ke he tau matua, mo e heigoa e falu he tau mena aoga ne tafe mai he omaoma pihia?—Gahua 17:28; Efeso 3:14, 15.

“Ko e Mena Tonu Ni Haia”

Ke he fakapotopotoaga Kerisiano he senetenari fakamua i Efeso, ne tohia e aposetolo ko Paulo: “Ko mutolu na, ko e tau fanau, kia omaoma ke he tau matua ha mutolu ke he Iki, ha ko e mena tonu ni haia.” (Efeso 6:1) Ti, ko e kakano ne mua ma e omaoma pihia, ha kua fakatatai atu ke he tau tutuaga faka-Atua ke he mena kua tonu. Tuga he talahau e Paulo, “ko e mena tonu ni haia.”

Tatai mo e mena nei, ne kitia e tautolu kua fakamaama he Kupu he Atua e akonaki fakaalofa fakamatua ke eke mo mena fulufuluola, ko e “foufou fulufuluola ke he ulu hāu, mo kahoa foki ke he ua hāu,” mo e eke foki mo “mena mitaki ia ha ha he Iki.” (Tau Fakatai 1:8, 9; Kolose 3:20) Ke he taha fahi, ke faliuliu ke he tau matua ka ta mai e ita he Atua.—Roma 1:30, 32.

“Kia Mitaki Ai a Koe”

Ne tuhi a Paulo ke he taha fua mitaki foki he omaoma he magaaho ne tohia e ia: “Kia fakalilifu a koe ke he hau a matua tane, mo e hau a matua fifine, (ha ko e fakatufono fakamua haia ha ha i ai e talahauaga.) Kia mitaki ai a koe, kia fakatuleva e tau aho hau ke nofo ai a koe ki luga he kelekele.” (Efeso 6:2, 3; Esoto 20:12) Ko e heigoa e tau puhala ka fua mai e tino malolo ka omaoma ke he tau matua?

Ke kamata aki, nakai kia moli kua mua atu e vaha moui mo e mena iloa he tau matua? Pete kua nakai mafiti lahi a lautolu ke he tau komopiuta po ke falu he tau puhala fakaako he aoga, kua lahi e mena ha lautolu ne iloa hagaao ke he mouiaga mo e fehagai mo e tau mena vihi he moui. Ko e tau tagata fuata, ke he taha fahi, kua nakai lautatai e tau manamanatuaga ne moua ha ko e tau tau motua. Ati hagahaga ai a lautolu ke mafiti e tau fifiliaga, ti fa mahani ke taute e tau mena hehe ha ko e tau kapitiga, ke matematekelea ai a lautolu ni. Kua moli ai he talahau he Tohi Tapu: “Kua lili ai e goagoa ke he loto he tama.” Ko e heigoa e tuluiaga? “Ka e vega mamao atu a ia ia ia he akau ne akonaki aki a ia.”—Tau Fakatai 22:15.

Kua mahomo atu e tau fua aoga he omaoma ke he  fakafetuiaga he matua mo e tama. Ma e kaufakalatahaaga he tagata ke gahuahua mo e fua mitaki, kua lata ke kaufakalataha, ne kua lata ke fai omaoma. Ke fakatai ki ai, he fakamauaga, ko e mautali ke foaki, nakai pule lahi po ke nakai manamanatu ke he tau tonu mo e tau logonaaga he falu, ka fua mai e mafola, lagotatai, mo e fiafia. He gahuaaga, kua latatonu ke fakalilifu e tagata gahua ke maeke he ha pisinisi po ke ha foliaga ke kautu. He hagaao atu ke he tau matafakatufono mo e tau fakaholoaga he fakatufono, kua nakai ni tokanoa he mahani omaoma taha tagata mai he fakahala ka kua ta mai foki taha magaaho haohao mitaki mo e puipuiaga.—Roma 13:1-7; Efeso 5:21-25; 6:5-8.

Ko e tau tagata fuata ne faliuliu ke he fakatufono kua mahani ke eke mo tau tagata matahavala he kaufakalatahaaga. Kehe mai ai, ko e fakaako ke omaoma he vaha tote kua fakatolomaki atu ke he moui katoa he tagata. Kua mitaki lahi ha ke ako e mena nei he vaha tote!

Ko e Palepale Mua Ue Atu he Omaoma

Kua nakai ni ta mai he omaoma e tau fakafetuiaga fiafia ke he magafaoa mo e falu a aoga tuleva, ka kua foaki foki e fakaveaga ka ati hake e fakafetuiaga ne mua atu—he vahaloto he tagata mo e hana Tufuga. Ko e “Lilifu Lahi ue Atu” ne ha ha ai e “puna he moui,” kua lata lahi a Iehova ko e Atua ke moua e omaoma katoatoa ha tautolu.—Fakamatalaaga 12:1, fakatatai NW; Salamo 36:9.

Ko e kupu “omaoma” kua kitia lagaloga ai ke he tau puhala kehekehe i loto he Tohi Tapu. Lafi ki ai, ha ha ai e totou teau he tau fakamoliaga ke he tau fakatufono he Atua, tau fakaholoaga, tau poakiaga, tau fakafiliaga, mo e tau tutuaga, ne kua lata oti ke fakalilifu. Nakai fakauaua ai a tautolu kua kitia he Atua e omaoma mo mena ke olioli ai e fiafia hana. Haia, ko e omaoma ko e mena kua lata lahi ke ati hake e fakafetuiaga mo Iehova. (1 Samuela 15:22) Momoko ai, ko e agaga pauaki he tagata nakai ko e omaoma ka ko e liuliu. “Kua kelea e tau fatuakiloto he tau loto he tau tagata kua kamata mai he vaha tote,” kua talahau mai he Tohi Tapu. (Kenese 8:21) Ko e mena ia, ko e fakaakoaga he omaoma kua nakai ni lata ke ako mai he vaha tote ka ke he moui katoa. Ke taute pihia ka ta mai e palepale mua ue atu.

Kia manatu, tuga he talahau he aposetolo ko Paulo, ko e poakiaga ke omaoma ke he tau matua nukua ua e maveheaga, ke, “kia mitaki ai a koe [mo e] fakatuleva e tau aho hau ke nofo ai a koe ki luga he kelekele.” Ko e fakamoliaga he maveheaga nei kua moua he Tau Fakatai 3:1, 2: “Haku tama na e, aua neke nimo ia koe haku a tau fakatufono; ka kia omaoma e loto hāu ke he haku a tau fakatufono. Ha ko e mena to lafilafi atu ia kia koe e tau aho loga, mo e tau tau ke moui ai, katoa mo e monuina.” Ko e palepale mua ue atu ma lautolu ne omaoma ko e fakafetuiaga fakatagata mo Iehova he mogonei mo e moui tukulagi he lalolagi parataiso fou.—Fakakiteaga 21:3, 4.

[Tau Fakatino he lau 30, 31]

Ta mai he omaoma e tau fakafetuiaga fiafia ke he magafaoa, ke he gahuaaga, fakalataha mo Iehova