Tala Mitaki he Kautu—Ko e Heigoa Ia?

He tau kua mole he 235 e motu he lalolagi katoa, 6,035,564 e tagata, fuata mo e fuakau, ne fakaaoga 1,171,270,425 e tula he tutala ke he falu hagaao ke he mena ia. He lafi ke he talahau gutu e kupu, ne foaki ai e lautolu ke he tau lima he tau tagata molea e 700 e miliona he tau tohi kehekehe ke fakamatala mo e fakamaama e mena ia. Ne foaki foki e lautolu totou afe e tau autiokasete mo e tau vitiokasete ke fakailoa e mena ia. Ko e heigoa “ia”?

KOE tala mitaki he Kautu he Atua a “ia.” Moli, nakai la pihia he fakamauaga tala he tagata kua fakamatala fakalaulahi e “tala mitaki nai he kautu” nukua kitia e tautolu he vaha nei.—Mataio 24:14.

Ko lautolu kua taute e gahua fakamatala mo e fakaako nei he lalolagi katoa ko e tau tagata foaki noa. Mai he tuaga fakalalolagi, kua tuga e nakai felauaki a lautolu ma e gahua. Ko e heigoa mogoia e tau mailogaaga ma e ha lautolu a malolo mo e ha lautolu a kautu? Ko e malolo he tala mitaki he Kautu ko e vala lahi, ha ko e tau tala hagaao ke he tau monuina ka liligi ke he tau tagata. Ko e tau monuina anei kua manako lahi e tau tagata oti ki ai—ko e fiafia, tokanoa mai he tau tuaga uka fakatupe, fakatufono mitaki, mafola mo e haohao mitaki, mo e taha mena foki kua manamanatu lahi e tokologa ki ai—ko e moui tukulagi! Ko e tala mitaki moli anei ke he tau tagata kua kumi ma e kakano mo e amaamanakiaga he moui. E, ko e tau monuina nei mo e loga atu ma hau kaeke ke talia mo e fiafia a koe ke he fakapuloaaga he tala mitaki he Kautu.

Ko e Heigoa e Kautu?

Ko e heigoa mogoia e Kautu kua fakapuloa ko e tala mitaki? Ko e Kautu kua fakaako e tau miliona ke liogi ki ai ke he tau kupu mahani nei: “Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—Mataio 6:9, 10.

Ko e Kautu ne vagahau ki ai e perofeta Heperu ko Tanielu he molea e 25 e senetenari i tuai he tohia e ia: “To fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.”—Tanielu 2:44.

Ti, ko e tala mitaki kua hagaao ke he Kautu, po ke fakatufono, ka utakehe he Atua e tau mahani kelea oti kana mo e tau tuaga kelea mo e pule katoa mogoia e mafola ke he lalolagi oti. To fakahoko moli e finagalo fakamua he Tufuga ma e tau tagata mo e lalolagi.—Kenese 1:28.

 “Kua Tata Mai Tuai e Kautu he Lagi”

Teitei 2,000 e tau i tuai, ne fakapuloa fakamua e tala mitaki he Kautu ke he tau tagata he tagata tane tukulele nukua futiaki lahi hana foliga mo e mahani. Ko e tagata tane ia ko Ioane Papatiso, ko e tama he ekepoa Iutaia ko Sakaria mo e hana hoana, ko Elisapeta. Ne tapulu a Ioane ke he ie fulufulu kamela, mo e pipi kili manu ke he hana tokupu, tatai ai ke he perofeta ko Elia, ne fakaata mai tuai a ia. Ka ko e fekau hana ne futiaki e onoonoaga he tokologa. “Kia tokihala,” he fakapuloa e ia, “ha ko e mena kua tata mai tuai e kautu he lagi.”—Mataio 3:1-6.

Ko e tau Iutaia e tau tagata fanogonogo ha Ioane, ne talahau ko e tau tagata tapuaki he Atua moli, ko Iehova. Ne moua e lautolu ko e motu, e maveheaga he Fakatufono ne puhala mai ia Mose kavi ke he 1,500 he tau tau fakamua atu. Kua tu agaia e faituga mua ue atu i Ierusalema, he mena ne foaki ai e tau poa lagotatai ke he Fakatufono. Ne iloa moli he tau Iutaia na hako e tapuakiaga ha lautolu ke he fofoga he Atua.

He fanogonogo ki a Ioane, kua kamata e falu tagata ke mailoga nakai ko e lotu ha lautolu kua tuga mo e manatu ha lautolu. Ko e tau aga fakamotu mo e pulotu Heleni ne fio ai mo e tau fakaakoaga fakalotu Iutaia. Na moua e fakatufono mai he Atua puhala ia Mose nukua fakakelea mogonei, ti nakai aoga foki, mai ni ha ko e tau taofiaga mo e tau aga ne taute he tagata. (Mataio 15:6) He fakahehe he tau loto mao ha lautolu mo e aga nakai fakaalofa hofihofi he tau takitaki lotu, tokologa ne nakai tapuaki talia ke he Atua. (Iakopo 1:27) Kua lata ia lautolu ke tokihala mai he ha lautolu a tau agahala ke he Atua mo e ke he maveheaga he Fakatufono.

He magaaho ia, tokologa e tau Iutaia ne amanaki ke he hauaga he Mesia ne mavehe, po ko Keriso, ti fai ne manamanatu hagaao ki a Ioane: “Po ke Keriso a ia.” Pete ia, ne fakatikai e Ioane mo e takitaki atu a lautolu ke he taha tagata kehe, nukua pehe a ia: “Nakai aoga au ke vevete e pipi he tau afialoalohui hana.” (Luka 3:15, 16) He talahau a Iesu ke he hana tau tutaki, ne fakapuloa e Ioane: “Kitiala, ko e Punua mamoe he Atua, ko ia ke uta kehe e hala he lalolagi.”—Ioane 1:29.

Ko e tala mitaki moli a ia, he tuhi atu e Ioane ke he tau tagata oti kana e puhala ke he moui mo e fiafia—ko Iesu haia ka “uta kehe e hala he lalolagi.” Ha ko e tau ohi ha Atamu mo Eva, ne fanau e tau tagata oti ki lalo he pule he agahala mo e mate. Kua fakamaama e Roma 5:19: “Ha ko e mena, tuga he uta mo tau tagata hala e tokologa ha ko e liuliu he tokotaha [Atamu], to uta pihia foki mo tau tagata tututonu e tokologa ha ko e omaoma he tokotaha [Iesu].” Ko Iesu, tuga e punua mamoe nukua poa, ke “uta kehe e hala” mo e ta mai e liliuina ke he tuaga momoko he tau puhala fakatagata. “Ko e mate ko e palepale ia he hala,” he fakamaama he Tohi Tapu, “ka ko e moui tukulagi ko e mena  foaki noa mai he Atua haia, ke he Iki ha tautolu ko Keriso Iesu.”—Roma 6:23.

Ko e tagata mitaki katoatoa—moli, ko e tagata ne leva e moui fakamua—nukua taute e Iesu e fakamatala he tala mitaki. Kua talahau he fakamauaga he Tohi Tapu ia Mareko 1:14, 15 ki a tautolu: “Kua tuku tuai a Ioane ke he fale puipui, ti haele ai a Iesu ki Kalilaia, kua fakamatala ai e vagahau mitaki he kautu he Atua, kua pehe atu, Kua hoko mai e vaha, kua tata mai tuai e kautu he Atua; ati tokihala a, mo e talia e vagahau mitaki.”

Ko lautolu ne talia e fekau ha Iesu mo e fakagahua e tua he tala mitaki kua monuina lahi. Kua talahau e Ioane 1:12: “Ko lautolu oti ne talia a [Iesu], mo e tua ke he hana higoa, ne age e ia ki ai e pule kia eke a lautolu mo fanau he Atua.” Ko e tau fanau, po ke tau tama tane, he Atua, ne fakatatau atu a lautolu ke moua e palepale he moui tukulagi.—1 Ioane 2:25.

Ka ko e kotofaaga ke moua e tau monuina he Kautu kua nakai ni fakakaupa ke he tau tagata he senetenari fakamua. He talahau fakamua, to fakapuloa mo e fakaako e Kautu he Atua ke he lalolagi katoa he vaha nei. Ti ataina agaia e tau monuina he Kautu. Ko e heigoa kua lata ia koe ke taute ke moua e tau monuina pihia? To fakamaama he vala tala ka mui mai.