Kia Olioli mo e Atua Fiafia

“Ke fakahikuaki, ma tau matakainaga, kia tumau ke he olioli lahi, . . . mo e ko e Atua he fakaalofa mo e he mafola ka fakalataha atu ki a mutolu.”—2 KORINITO 13:11, NW.

1, 2. (a) Ko e ha e tokologa kua nakai olioli e moui? (e) Ko e heigoa e olioli, ti feaki fefe e tautolu?

HE TAU aho tupetupe nei, tokologa e tau tagata kua tote e kitiaaga ma e olioli. Ka tu fakaofo e matematekelea ki a lautolu po ke taha nukua ofania e lautolu, kua liga logona hifo a lautolu tuga a Iopu i tuai, ne pehe: “Ko e tagata ne fanau ai he fifine, kua gahoa hana tau aho, ti puke ai ke he fakaatukehe.” (Iopu 14:1) Nakai ataina e tau Kerisiano mai he tau tupetupe mo e tau pehiaaga he “tau aho uka” nei, ti nakai ofo ai ko e tau fekafekau fakamoli ha Iehova he falu magaaho kua fakalolelole.—2 Timoteo 3:1.

² Ka e olioli agaia e tau Kerisiano, pete he ha ha i lalo he kamatamata. (Gahua 5:40, 41) Ke maama e puhala ne maeke ai, manamanatu fakamua la e kakano he olioli. Kua fakakakano e olioli ko e “logonaaga fakalagalaga he manako po ke amaamanakiaga he mitaki.” * Ko e fua, ka toka e tautolu taha magaaho ke totou e tau monuina ha tautolu mogonei ka e manamanatu ke he tau olioli kua tatali mai ki a tautolu he lalolagi fou he Atua, maeke ia tautolu ke olioli.

3. Ko e heigoa e kakano nukua talahau kua fai kakano e tau tagata oti ke olioli?

³ Igatia e tagata mo e monuina nukua lata ke loto fakaaue. Liga ke nakai fai gahua e ulu magafaoa. Kua tupetupe pauaki a ia. Kua manako a ia ke foaki ma e hana tau fakahelehele. Kaeke ke toafeka mo e malolo e tino hana, kua lata ia ia ke loto fakaaue ma e mena ia. Ka moua e ia e gahua, to maeke ia ia ke gahua malolo. Ke he taha fahi, kua liga mamahi fakaofo e fifine Kerisiano he gagao lahi. Ka kua fakaaue a ia ma e lagomataiaga he tau kapitiga fakahele mo e tau tagata he magafaoa ne lagomatai a ia ke fahia ke he hana gagao nukua lilifu mo e fakamalolo. Ko e tau Kerisiano moli oti, pete ne tau tutuaga ha lautolu, kua maeke ke olioli e kotofaaga he iloa a Iehova, ko e “Atua fiafia,” mo Iesu Keriso, “ko e Patuiki fiafia tokotaha maka.” (1 Timoteo 1:11, NW; 6:15, NW) E, ko Iehova ko e Atua mo Iesu Keriso kua fiafia lahi mahaki. Kua fakatumau e laua e olioli ha laua pete ne kehekehe lahi mahaki e tau tutuaga he lalolagi mai he mena ne finagalo a Iehova ki ai he kamataaga. Kua maeke he fakafifitakiaga ha lautolu ke fakaako fakalahi a tautolu ke he puhala ke fakatumau e olioli ha tautolu.

Nakai Galo e Olioli ha Laua

4, 5. (a) Tali atu fefe a Iehova he totoko e tau tagata fakamua? (e) Ke he puhala fe ne fakatumau e Iehova e aga mitaki ke he tau tagata?

⁴ He kaina i Etena, ne olioli e Atamu mo Eva e malolo tino tupuolaola mo e tau manamanatuaga mitaki katoatoa. Ha ha ia laua e gahua lahi ke taute mo e tau takatakaiaga fulufuluola ke gahua ai. Mua atu, ha ha ia laua e kotofaaga ke matutaki tumau mo Iehova. Ko e finagalo he Atua ke olioli e laua e vaha fiafia anoiha. Ka e nakai mamakona e tau mamatua fakamua ha tautolu ke he tau mena fakaalofa mitaki nei; ne fofo e laua e fua akau tapu mai he “akau ke iloa ai e mitaki mo e kelea.” Ko e mahani liuliu nei ne fakatoka e fakaveaga ma e tau nakai fiafia oti  nukua moua e tautolu, ko e tau ohi ha laua he vaha nei.—Kenese 2:15-17; 3:6; Roma 5:12.

⁵ Pete ia, ne nakai fakaata e Iehova e aga nakai fakaaue ha Atamu mo Eva ke utakehe a ia mai he hana olioli. Ne mauokafua a ia ko e tau loto he falu fanau ha laua to fakalagalaga ke fekafekau ki a ia. Kua mauokafua lahi a ia, ato fanau e Atamu mo Eva e tama fakamua ha laua, ne fakailoa e ia hana finagalo ke fakahao e tau ohi omaoma ha laua! (Kenese 1:31; 3:15) He tau senetenari fakamui, tokologa e tau tagata ne o he tau tuagahui ha Atamu mo Eva, ka e nakai tiaki e Iehova e magafaoa tagata ha ko e mahani liuliu ia ne tupu holofa. Ka e, hagaaki hana onoonoaga ke he tau tagata tane mo e tau fifine ne ‘fakafiafia hana loto,’ ko lautolu ne eketaha moli ke fakafiafia a ia ha kua fakaalofa a lautolu ki a ia.—Tau Fakatai 27:11; Heperu 6:10.

6, 7. Ko e heigoa e tau puhala ne lagomatai aki a Iesu ke tumau e olioli?

⁶ Ka e kua a Iesu—fakatumau fefe e ia hana olioli? Ko e moui fakaagaga malolo he lagi, ne ha ha ia Iesu e kotofaaga katoa ke kitekite e tau gahua he tau tagata tane mo e fifine he lalolagi. Kua kitia maali e tau nakai mitaki katoatoa ha lautolu, ka e ofania agaia e Iesu a lautolu. (Tau Fakatai 8:31) Fakamui, he hau a ia ke he lalolagi mo e ‘nofo fakalataha’ moli mo e tau tagata, ne nakai hiki e onoonoaga hana ke he tau tagata. (Ioane 1:14) Ko e heigoa e mena kua fakamalolo e Tama mitaki katoatoa he Atua ke fakatumau e onoonoaga mitaki pihia ke he magafaoa agahala he tagata?

⁷ Fakamua, kua mailoga mitaki e Iesu hana tau amaamanakiaga hagaao ki a ia mo e he falu. Iloa e ia nakai maeke ia ia ke liliuina e lalolagi. (Mataio 10:32-39) Ti olioli a ia he magaaho he taha tagata manako moli ne talia fiafia e fekau he Kautu. Pete ko e mahani mo e aga he hana tau tutaki he falu magaaho kua nakai mitaki, ne iloa e Iesu ko e tau loto ha lautolu kua manako moli ke taute e finagalo he Atua, ti ofania e ia a lautolu ha ko e mena ia. (Luka 9:46; 22:24, 28-32, 60-62) Aoga lahi ai, he liogi ke he hana Matua he lagi, ne talahau e Iesu e puhala mitaki nukua hokotia ki ai e tau tutaki hana ke he magaaho ia: “Kua oma foki e lautolu hau a kupu.”—Ioane 17:6.

8. Talahau falu puhala nukua maeke ia tautolu ke fifitaki a Iehova mo Iesu he magaaho ka fakatumau e olioli ha tautolu.

⁸ Nakai fakauaua ai, to aoga oti a tautolu mai he manamanatu ke he fakafifitakiaga kua fakatoka e Iehova ko e Atua mo Keriso Iesu he mena nei. Fifitaki katoatoa nakai e tautolu a Iehova he liga nakai kapeletu lahi ka nakai felauaki ai tuga he amanaki a tautolu ki ai? Muitua fakatata lahi nakai a tautolu ke he tau tuaga hui ha Iesu he fakatumau e onoonoaga mitaki ke he tau tutuaga ha tautolu mogonei, he mailoga mitaki e mena nukua amanaki a tautolu ki ai mo e falu? Kia o mai la tautolu ke kitia e falu matapatu fakaakoaga nukua liga ke fakagahua ke he puhala aoga he mena kua hofihofi ke he tau loto he tau Kerisiano fakamakai he tau matakavi oti—ko e fekafekauaga he fonua.

Fakatumau e Onoonoaga Mitaki he Fekafekauaga

9. Fakamalolo fefe e olioli ha Ieremia, ti maeke fefe e fakafifitakiaga hana ke lagomatai a tautolu?

⁹ Manako a Iehova ki a tautolu ke olioli he fekafekauaga hana. Ko e olioli ha tautolu kua nakai lata ke falanaki ke he tau fua kua moua e tautolu. (Luka 10:17, 20) Ne fakamatala e perofeta ko Ieremia ma e tau tau loga he matakavi taluē. He hagaaki a ia ke he tau tali fakalolelole he tau tagata, ne galo e ia hana olioli. (Ieremia 20:8) Ka e he manamanatu hokulo a ia ke he fulufuluola he fekau hokoia, ne fakamalolo ai hana olioli. Ne pehe a Ieremia ki a Iehova: “Ne moua hau a tau kupu, ti kai ai e au; ti eke hau a tau kupu kia au mo mena ke olioli ai mo e fiafia ia haku loto; ha kua ui au ke he hau higoa, Iehova na e, ko e Atua.” (Ieremia 15:16) E, ne olioli a Ieremia ke he hana kotofaaga he fakamatala e kupu he Atua. Maeke foki a tautolu.

10. Fakatumau fefe e tautolu e olioli ha tautolu he fekafekauaga pete ni kua taluē e matakavi ha tautolu mogonei?

¹⁰ Pete ni e matauka e tokologa ke talia e tala mitaki, ha ha ia tautolu e tau kakano oti ke olioli  he taute e tautolu e fekafekauaga he fonua. Manatu kua mauokafua moli a Iehova to fai tagata ka fakaolo atu ke fekafekau ki a ia. Tuga a Iehova, kua nakai lata ia tautolu ke fakalolelole e amaamanakiaga ha tautolu ha ko e mena to liga fakahiku falu ke kitia e matakupu mo e talia e fekau he Kautu. Aua neke nimo e tautolu na hikihiki e tau tutuaga he tau tagata. Ka fehagai mo e falu galo fakaofo po ke matematekelea, kua maeke foki ia ia kua monuina ke kamata manamanatu fakahokulo ke he kakano he moui. To maeke nakai ia koe ke lagomatai e tagata ia kaeke ke “manamanatu ke he tau mena fakaagaga”? (Mataio 5:3, NW) Liga fai tagata he matakavi hau ka liga mautali ke fanogonogo ke he tala mitaki he taha magaaho foki ka ahi atu a koe!

11, 12. Ko e heigoa e mena ne tupu he taha taone, ti ko e heigoa kua ako mai e tautolu i ai?

¹¹ Ko e tuaga he matakavi ha tautolu ne fa hiki foki. Manamanatu ke he fakataiaga. He taone tote, ne nonofo ai e tau hoa mau fuata tata lahi mo e tau fanau. He magaho ne ahi atu e Tau Fakamoli a Iehova, ne feleveia a lautolu mo e tali taha he tau gutuhala oti, “Nakai talia a mautolu!” Ka fai tagata ne fakakite e fiafia ke he fekau he Kautu, ne mafiti e tau katofia kaina ke fakalolelole e matutakiaga ia mo e Tau Fakamoli. Maaliali ai, ko e paleko ke fakamatala he matakavi ia. Pete ia, nakai fakalolelole e Tau Fakamoli; ne fakatumau ni a lautolu ke fakamatala. Ti ko e heigoa e fua?

¹² Fai magaaho, tokologa e tau fanau he taone ia ne lalahi hake, fai tokoua, mo e moua ni ha lautolu a tau kaina. He mailoga ai ko e puhala moui ha lautolu ne nakai fua ke he fiafia moli, ne kamata agataha e falu he tau fuata nei ke kumi e kupu moli. Ne moua ni e lautolu he talia fiafia ke he tala mitaki ne fakapuloa he Tau Fakamoli. Ti ko e mena ia he mole e tau tau loga, ne kamata e fakapotopotoaga tote ke tupu. Manamanatu la ke he olioli he tau tagata fakailoa he Kautu ne nakai fakalolelole! Kia ta mai he fakatumauaga he fakalataha ke he fekau mua ue atu he Kautu e olioli ki a tautolu foki!

To Lagomatai he Tau Matakainaga Talitonu a Koe

13. Ono ki fe a tautolu ka moua e tautolu e fakalolelole?

¹³ Ka tupu lahi e tau pehiaaga po ke tu fakaofo e matematekelea ke he moui hau, to fuluhi atu a koe ki fe ma e fakamafanaaga? Totou miliona e tau fekafekau tukulele ha Iehova ne fuluhi fakamua ki a Iehova he liogi, ato fuluhi ke he tau matakainaga Kerisiano ha lautolu. He nofo a Iesu he lalolagi, ne tokiofa e ia e lagomatai he tau tutaki hana. He po ato mate a ia, ne vagahau a ia hagaao ki a lautolu kua “tumau a mutolu kia au ke he tau mena ne kamatamata ai au.” (Luka 22:28) Moli, ko e tau tutaki ia ne nakai mitaki katoatoa, ka ko e ha lautolu a mahani fakamoli ne fakamafanatia e Tama he Atua. Maeke foki ia tautolu ke moua e malolo mai he tau matakainaga tapuaki fakalataha.

14, 15. Ko e heigoa ne lagomatai taha hoa mau ke fahia mai he mate ha laua a tama tane, ti ko e heigoa hau kua ako mai he mena ia ne tupu ki a laua?

 ¹⁴ Ne ako he hoa Kerisiano ne higoa ko Michel mo Diane e uho he lagomatai he tau matakainaga ha laua. Ko e tama tane ha laua ne 20 e tau tau he moui, ko Jonathan, ko e Kerisiano kua hakahakau mo e mitaki e amaamanakiaga nukua moua he tuma e ulu. Ne lali fakamalolo e tau ekekafo ke fakahao a ia, ka e holo ki mua ni e kelea he tuaga malolo tino ha Jonathan ato hoko ke he taha afiafi ti mohe a ia ke he mate. Ne maanu lahi a Michel mo Diane. Ne mailoga e laua ko e Feleveiaaga Fekafekau he afiafi ia kua teitei oti tuai. He manako lahi agaia ke he fakamafanaaga, ne ole a laua ke he motua ke fakalataha mo laua he o atu ke he Fale he Kautu. Ne hohoko tonu atu a lautolu he magaaho ne fakailoa ai e mate ha Jonathan. He oti e feleveiaaga, ne tutu viko e tau matakainaga he tau mamatua momoko, ne fa e peka ki a laua mo e talahau e tau kupu fakamafana. Ne manatu e Diane: “Ne maanu a maua he o mai ke he Fale he Kautu, ka ko e mafanatia ha ia ne moua e maua mai he tau matakainaga—kua fakamalagaki hake ai a maua! Pete ne nakai maeke ia lautolu ke utakehe e mamahi ha maua, ka e lagomatai e lautolu a maua ke fahia mai he pehiaaga!”—Roma 1:11, 12; 1 Korinito 12:21-26.

¹⁵ Ne fakatupu he matematekelea a Michel mo Diane ke fakatata lahi ke he tau matakainaga ha laua. Ne fakatupu foki a laua ke fefakatataaki lahi. He talahau e Michel: “Ne ako e au ke tokiofa fakalahi foki e loto fakavihi haku. He tau magaaho fakalolelole, ne fetutalaaki a maua ke he kupu moli he Tohi Tapu mo e puhala kua fakamalolo e Iehova a maua.” Ne lafi e Diane: “Ko e amaamanakiaga he Kautu kua fai kakano lahi mahaki ki a maua mogonei.”

16. Ko e aoga he ha ke fakailoilo he fakailoa ke he tau matakainaga e tau manako ha tautolu?

¹⁶ E, ko e tau matakainaga Kerisiano ha tautolu kua eke ai mo “fakamafanatia” ki a tautolu he tau magaaho uka he moui mo e lagomatai a tautolu ke fakamalolo e olioli ha tautolu. (Kolose 4:11) Moli, nakai maeke ia lautolu ke totou e tau manamanatuaga ha tautolu. Ko e mena ia ka manako lagomatai a tautolu, kua mitaki ke fakailoa ki a lautolu. Ti fakakite e tautolu e loto fakaaue moli ke he ha fakamafanaaga ni kua maeke he tau matakainaga ke foaki, he onoono ki ai kua hau ia Iehova.—Tau Fakatai 12:25; 17:17.

Onoono ke he Fakapotopotoaga Hau

17. Ko e heigoa e tau paleko he taha matua fifine tokotaha ne fehagai ki ai, ti fefe onoonoaga ha tautolu ke he tau tagata tuga ia?

¹⁷ Ko e onoono tata lahi hau ke he tau matakainaga talitonu, to ako e koe ke loto fakaaue ki a lautolu mo e moua e olioli he feoaki mo lautolu. Onoono ke he fakapotopotoaga hau. Ko e heigoa hau ne kitia? Fai matua tokotaha nakai ne taufetului ke feaki hana tau fanau ke he puhala he kupu moli? Kua manamanatu fakahokulo nakai a koe ke he fakafifitakiaga mitaki kua fakatoka e ia? Lali ke fakatino falu lekua kua fehagai mo ia. Ko e matua fifine tokotaha ko Jeanine kua talahau falu he tau mena nei: ko e matimati, matagaoi mahani fakatane mo e fifine he tau tagata tane he gahuaaga, ko e temotemoai e fatifatiaga tupe. Ka ko e mena ne uka lahi mahaki, he talahau e ia, kua putoia e levekiaga he tau manako he loto logona he tau tama hana, ha kua igatia e tama mo e kehe. Ne ta hake mai foki e Jeanine taha lekua: “Ko e paleko moli ke kalo kehe mai he aga ke taute e tama tane mo ulu he magafaoa ke hukui aki e galo he tane. Taha e tama fifine haku, ti uka lahi ia au ke manatu ke nakai tapeehi a ia aki e tau lekua fakafetuiaga haku.” Tuga ne totou afe he tau matua takitokotaha ne matakutaku Atua, ne gahua mau a Jeanine mo e leveki hana magafaoa. Ne fakaako Tohi Tapu foki a ia mo e fanau hana, fakamahani a lautolu ke he fekafekauaga, mo e uta a lautolu ke he tau feleveiaaga he fakapotopotoaga. (Efeso 6:4) Ko e fiafia ha ia ha Iehova he kitekite mai a ia he tau aho takitaha ke he tau laliaga he magafaoa nei he fakatumau e mahani fakamoli! Nakai kia olioli e tau loto ha tautolu ke fakalataha mo lautolu ia? E, moli.

18, 19. Fakatata e puhala ka fakahokulo e loto fakaaue ha tautolu ma e tau tagata he fakapotopotoaga.

 ¹⁸ Onoono foki ke he fakapotopotoaga hau. Liga kitia e koe e tau takape tua fakamoli kua “nakai fano kehe” mai he tau feleveiaaga. (Luka 2:37) Matimati kia a lautolu falu magaaho? E moli. Ne maanu lahi a lautolu he galo e tau hoa ha lautolu! Ka e fakalavelave tumau a lautolu ke he fekafekauaga ha Iehova mo e manamanatu atu ke he falu ne takitokotaha. Ko e aga mauokafua mitaki ha lautolu kua lafi ke he olioli he fakapotopotoaga! Ko e Kerisiano kua gahua ke he fekafekauaga mau ke molea e 30 e tau ne talahau: “Ko e taha he tau olioli ue atu haku he kitia e tau matakainaga momotua kua moua he tau kamatamata loga ka e fekafekau fakamoli agaia ki a Iehova!” E, ko e tau Kerisiano momotua ne fakalataha mo tautolu kua fakamalolo lahi ki a lautolu ne ikiiki.

¹⁹ Ka e kua foki a lautolu kua fou ne kamata laia ke fakalataha mo e fakapotopotoaga? Nakai kia fakalagalaga a tautolu he magaaho ne fakakite e lautolu e tua he tau feleveiaaga? Manamanatu ke he holo ki mua kua taute e lautolu tali mai he kamata fakaako e lautolu e Tohi Tapu. Kua liga fiafia lahi a Iehova ki a lautolu. Fiafia nakai a tautolu? Fakakite nakai e tautolu e taliaaga, he fakamalolo a lautolu ma e tau laliaga ha lautolu?

20. Ko e ha kua talahau ai kua igatia e tagata mo e taute e vala aoga he fakapotopotoaga?

 ²⁰ Kua fai hoa, nofo tokotaha, po ke matua tokotaha kia a koe? Ko e tama tane po ke tama fifine nakai fai matua tane (po ke matua fifine), ko e takape kia a koe? Ko koe kia taha kua feoaki mo e fakapotopotoaga ke he loga e tau tau po ke taha kua kamata fou laia ke fakalataha mai? Kia mafanatia ko e fakafifitakiaga fakamoli hau kua fakamalolo ki a mautolu oti. Ti ka fakalataha a koe ke uhu e lologo he Kautu, ka tali a koe po ke taute e kotofaaga he Aoga Fekafekau Fakateokarasi, to lafilafi atu a koe a ia ke he olioli ha tautolu. Mua atu, kua ta mai e olioli ke he loto a Iehova.

21. Ko e heigoa e tau kakano loga ke taute e tautolu, ka ko e heigoa e tau huhu ne laga mai ai?

²¹ E, pihia foki ke he tau magaaho kelea nei, maeke ia tautolu ke olioli he tapuaki e Atua fiafia ha tautolu. Loga e kakano ha tautolu ke tali e fakamaloloaga ha Paulo: “Kia tumau ke he olioli lahi, . . . mo e ko e Atua he fakaalofa mo e he mafola ka fakalataha atu ki a mutolu.” (2 Korinito 13:11, NW) Ka e kua mogoia ka fehagai a tautolu mo e tau mena tutupu pauaki, favaleaga, po ke tuaga uka fakatupe? Kua maeke nakai ke fakatumau e olioli ha tautolu ke he tau tuaga pihia foki? Hokotia ke he fakaotiaga ni hau he manamanatu a koe ke he vala tala ka mui mai.

[Matahui Tala]

Maeke Nakai a Koe ke Tali?

• Fakamaama fefe e olioli?

• Maeke fefe he fakatumau e aga mitaki ke lagomatai a tautolu ke tumau e olioli?

• Ko e heigoa ka lagomatai a tautolu ke moua e onoonoaga mitaki ma e matakavi he fakapotopotoaga ha tautolu?

• Ko e heigoa e tau puhala kua loto fakaaue a koe ke he tau matakainaga he fakapotopotoaga hau?

[Tau Huhu he Fakaakoaga]

[Tau Fakatino he lau 21]

Na hiki e tau tagata he matakavi ha tautolu

[Fakatino he lau 23]

Ko e heigoa e tau paleko kua fehagai e lautolu i loto he fakapotopotoaga hau?