Ko e Kaufakalatahaaga he Lalolagi Katoa Hane Leveki he Taha e Taha

KE HE mena ne kitia he tau mata, kua ha ha ai e tau tagata. Tokologa ne momotua, falu nukua kokoho e tau tino ti o fakatolotolo ni a lautolu. Ha ha ai e tau fifine fatu mo e tau hoa fuata mo e fanau ikiiki i tua. Ko e tau tagata fakapaea oti a lautolu—tau tane, tau fifine, mo e fanau—ne fehola mai he tau kaina ha lautolu ke moua e haohao mitaki he motu ne katofia mai, ha ko e felakutaki fakamatakau, tau matematekelea tutupu fakalutukia, po ke falu a tutuaga. Ko e falu kua lagaloga e fehola he tau nonofoaga ha lautolu. Ko e kitia ni e matematekelea he motu po ke tau mena tutupu fakalutukia, ne hapini e lautolu falu koloa, fakapotopoto e fanau, mo e o atu ke he matakavi haohao mitaki. Ti, he magaaho ne liu mitaki e tau tutuaga, tokologa e tau tagata fakapaea ne liliu ke ta e tau fale ha lautolu mo e liu kamata foki.

He tau tau ne mole, ne hafagi he Central African Republic e tau gutuhala ha lautolu ke he tau tagata fakapaea ne o mai he tau motu kehekehe. Nakai la leva ia, toko afe e tau tagata, fakalataha ai e tokologa he Tau Fakamoli a Iehova, kua fehola he Democratic Republic fa tau i Congo ke he haohaoaga mitaki i Central African Republic.

O Mai e Tau Matakainaga ke Lagomatai

Kua fiafia e Tau Fakamoli i Central African Republic ke fakatokatoka e tau lagomataiaga. Kua fita e tau nonofoaga he moua ma e tau matakainaga Kerisiano ne o mai. He magaaho fakapa, ne moua e tau poko he tau loto kaina, ka kua tokologa atu foki e tau tagata fakapaea, ti kua latatonu ai ke taute e falu fakaholoaga foki. Kua taute ai falu Fale he Kautu ke momohe ai. Ne tali gahua lahi e Tau Fakamoli he matakavi, he tautau e tau moli fou, taute e tau paipa vai fou, mo e vali simeni e foloa ma e hagahaga mitaki ha lautolu ka nonofo ai. Ne gahua auloa e tau tagata fakapaea mo e tau matakainaga he matakavi ke fakatu e tau nonofoaga nei. Kua fakatokatoka e tau polokalama oti he tau feleveiaaga faka-Kerisiano he vagahau Lingala, ke moua e lautolu ne o mai e kai malolo tino fakaagaga. Ne fakakite he kaufakalataha tata he vahaloto he Tau Fakamoli he matakavi mo e tau kapitiga o mai ha lautolu e moli lahi he fefakamatakainagaaki he lalolagi katoa.

Kua nakai hohoko oti tumau he magaaho taha e tau magafaoa fakapaea. He falu magaaho, ko lautolu he magafaoa ne mavehevehe  kua liu fakalataha he kavi ne o ki ai a lautolu. Ko e tohi ne fakamau hifo a lautolu ne hohoko mitaki mai kua toka he Fale he Kautu. Ti taute ai e tau fakaholoaga ke moua a lautolu ne galo agaia. Ko e la ofisa ne takitaki e gahua he Tau Fakamoli a Iehova he motu, ne fakafano tolu e peleoafi he aho ke lagomatai a lautolu ne o mai agaia mo e ke kumi a lautolu ka liga galo. Ko e tau peleoafi nei kua kitia ai he fakamailoga lahi, ne totou “WATCH TOWER—Jehovah’s Witnesses.”

Manamanatu la e fiafia he magaaho ne kitia he fanau fakapaea tokofitu, ne mavehevehe mai he tau matua ha lautolu e vene he Tau Fakamoli a Iehova. Ne tafepoi atu a lautolu ke he peleoafi mo e fakakite a lautolu ko e Tau Fakamoli. Ne lagomatai he tau matakainaga a lautolu ki loto he vene mo e uta a lautolu ke he Fale he Kautu, nukua liu fakalataha ai a lautolu mo e tau magafaoa ha lautolu.

Ko e heigoa ati maeke e tau Kerisiano loto fakamoli nei ke fahia ke he tau tutuaga pihia, nakai ni lagataha, ka e lagaloga? Kua mauokafua katoatoa a lautolu hane nonofo a tautolu he tau aho fakamui tuga ne talahau tuai mai he tau Tohiaga Tapu.—2 Timoteo 3:1-5; Fakakiteaga 6:3-8.

Kua iloa ai e lautolu nakai leva to fakaotioti e Iehova ko e Atua e tau felakutaki, fakavihia, favale, mo e taufetului. To eke ni e lekua fakapaea mo mena kua mole. He magaaho taha, he fakatatai atu ke he tomatomaaga he aposetolo ko Paulo he 1 Korinito 12:14-26, kua ukufakina e Tau Fakamoli a Iehova ke leveki e taha mo e taha. Pete kua vevehe he tau vailele, tau katofia, tau vagahau, mo e mamao, kua tupetupe ni a lautolu ke he taha mo e taha, ti mafiti a lautolu ke taute taha mena ka manako fakalutukia taha tagata.—Iakopo 1:22-27.

[Mepe he lau 30]

(Ma e puhala katoa ne tohi aki, kikite e tohi)

AFERIKA

Central African Republic

Democratic Republic i Congo

[Credit Line]

Mountain High Maps® Copyright © 1997 Digital Wisdom, Inc.

[Tau Faktino he lau 30]

Tolu e Fale he Kautu ne eke mo tau matapatu levekiaga

[Faktino he lau 31]

Kua ta fakamafiti e tau mena ke kaitunu ai

[Faktino he lau 31]

Tokologa mo e tokologa ne hohoko mai

[Tau Faktino he lau 31]

Fanau mai laia ka kua fita ko e tau tagata fakapaea