Puhala ne Lauia e Tau Fifine Tokoua he Fakatakape

KO SANDRA ko e takape ne nofo i Ausetalia. He mate e tane hana he falu tau kua mole, ne oho lahi e manamanatuaga katoa ha Sandra. “Ko e mailogaaga he galo fakaofo e hoa mo e kapitiga uho haku kua fakamamahi lahi au. Nakai manatu e au ko e hoko mai fefe au ki kaina he fale gagao po ke mena ne taute e au he vala aho ia ne toe. Ke he tau fahitapu gahoa mai mua, ko e tau matakutaku haku kua liliu ai ke he mamahi tumau he tino.”

Na ko e kapitiga tuai ha Sandra a Elaine, nukua takape ke kavi ke ono e tau. Ne leveki e Elaine e tane hana, ko David, ke ono e mahina ato mate a ia he kanesa. Kua lahi mahaki e maanu hana ti nakai leva e mate hana tane ti mata pouli fakaku a ia. Ua e tau he mole ne matefua a ia he toloaga. Kua nakai moua he ekekafo ha fakamailoga he gagao. Pete ia, ne kitia e ia kua maanu ni a Elaine ke he loto hana, ti fakamafana ai e ia a ia ke fano ki kaina mo e lali fakalahi ke tagi. “Fai magaaho ke fahia mai he maanu haku,” he talahau e Elaine, lafi ki ai ka matimati, “ti fa fano foki au ke he poko mohe mo e kofu e ulu haku ke he tau mena tui ha David.”

E, ko e mate e hoa fakahele kua fakatupu e tau taliaga kehekehe, ha ko e tuaga takape kua lahi atu moli e mena ne putoia, mai he moui nakai fai tane. Tuga a Sandra, ne fai magaaho ne logona kua hiki tuai a ia. Tuga ni e tokologa he tau takape maanu fou, ne tupetupe, mo e nakai haohao mitaki a ia. Ne manatu e Sandra: “Nukua mahani he maeke he tane haku ke taute e tau fifiliaga fakahiku, kua toka fakalutukia au ke taute e tau fifiliaga ia. Ne fakalavelave e mohe haku. Kua lolelole mo e mategugu au. Kua uka lahi ke iloa e mena ke taute.”

Ne fatiaki tumau e tau tala tuga ki a Sandra mo Elaine he tau aho takitaha he lalolagi. Ko e gagao, tau pakia, tau felakutaki, tau kelipopo fakamatakau, mo e favale kua lafi ke he holo ki mua he numera he tau takape. * Ne mamahi fakatekiteki e tokologa he tau fifine nei, he nakai iloa e mena ke taute. Ko e heigoa he tau kapitiga mo e tau magafaoa ka taute ke lagomatai aki a lautolu ke hiki ke he tuaga takape? Kua fai lagomatai e vala tala ne mui mai nukua eke moli mo lagomataiaga.

[Matahui Tala]