Fakaheke ki a Iehova ma e Tau Gahua Homo Atu Hana!
Fakaheke ki a Iehova ma e Tau Gahua Homo Atu Hana!
“Kua fakaheke atu haku a loto ke he Iki . . . ha ko ia ne malolo kua eke e ia e tau mena homo atu maku.”—LUKA 1:46-49.
1. Ko e heigoa e tau gahua homo atu ne lata ai ia tautolu ke fakaheke ki a Iehova?
KUA lata tonu ni a Iehova ke fakaheke ma e tau gahua homo atu hana. He magaaho ne talahau he perofeta ko Mose e laveakiaga ha Isaraela mai i Aikupito, ne pehe a ia: “Ko e mena kitekite atu ni ha mutolu a tau mata ke he tau mena lalahi oti ne eke e Iehova.” (Teutaronome 11:1-7) Tuga foki, he fakapuloa he agelu ko Kaperielu e fanauaga ha Iesu ke he tama fifine ko Maria, ne pehe a ia: “Kua fakaheke atu haku a loto ke he Iki . . . ha ko ia ne malolo kua eke e ia e tau mena homo atu maku.” (Luka 1:46-49) Ko e Tau Fakamoli a Iehova, kua fakaheke e tautolu a ia ma e tau gahua homo atu pihia tuga he fakatokanoa e tau Isaraela mai he pipiaga i Aikupito mo e fanauaga mana he Tama fakahele hana.
2. (a) Ko e heigoa e kakano he “finagalo i tuai tigahau” he Atua ma e tau tagata omaoma? (e) Ko e heigoa ne tupu ki a Ioane he motu ko Patamo?
2 Loga e tau gahua homo atu ha Iehova kua matutaki atu ke he “finagalo i tuai tigahau” hana ke fakamonuina e tau tagata he puhala he Mesia mo e pule faka-Kautu hana. (Efeso 3:8-13) Ko e finagalo ia kua tupu fakahaga he magaaho ne fakaata e aposetolo motua ko Ioane ke fakakia atu ki loto he pahala he fakakiteaga ne mahafagi i luga he lagi. Ne logona e ia e leo lahi tuga ne pu, ne talahau: “Kia hake mai a koe ke he mena nai, ti fakakite atu ai e au kia koe e tau mena kua lata ke tutupu mai a mui.” (Fakakiteaga 4:1) He fakapaea he fakatufono Roma ke he motu ko Patamo “ha ko e kupu he Atua, mo e talahauaga kia Iesu Keriso,” ne kitia e Ioane e “fakakiteaga a Iesu Keriso.” Ko e mena ne kitia mo e logona he aposetolo kua fakakite fakalahi e finagalo i tuai tigahau he Atua, ti foaki ai e maama fakaagaga mo e fakamaloloaga he magaaho tonu ma e tau Kerisiano moli oti.—Fakakiteaga 1:1, 9, 10.
3. Ko hai ne fakakite he tau patu 24 ne kitia he fakakiteaga ne kitia e Ioane?
3 He puhala he pahala mahafagi ia i luga he lagi, ne kitia e Ioane 24 e patu, kua nonofo mo e foufou tuga e tau patuiki. Ne fakafeilo hifo a lautolu ki mua he Atua mo e talahau: “Ko e Iki na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu, mo e eke ai a lautolu.” (Fakakiteaga 4:11) Ko e tau patu ia ko e tau Kerisiano fakauku oti ne liu fakatutu mai ke he tuaga tokoluga ne mavehe he Atua ma lautolu. Kua omoi a lautolu ke fakaheke ki a Iehova ha ko e tau gahua homo atu hana ne matutaki atu ke he tufugatiaaga. Kua ofogia foki a tautolu ke he fakamoliaga he ‘mana tukulagi mo e Atua’ ha Iehova. (Roma 1:20) Ti ka lahi e iloa e tautolu a Iehova, to au atu a tautolu ke fakaheke a ia ma e tau gahua homo atu hana.
Fakapuloa e Tau Gahua Lilifu ha Iehova!
4, 5. Talahau e tau fakafifitakiaga ke he puhala ne fakaheke e Tavita a Iehova.
4 Ne fakaheke he salamo ko Tavita e Atua ma e tau gahua homo atu Hana. Ke fakatai ki ai, ne lologo a Tavita: “Kia lologo atu ā mutolu kia Iehova, ko ia kua nofo i Siona; kia fakailoa atu ke he tau motu hana tau mena ne eke. Iehova na e, fakaalofa mai kia au, kia fofoga mai ke he haku a matematekelea ne tupu mai ia lautolu ne fakavihia mai kia au, ko koe na kua ta hake au mai he tau gutuhala he mate. Kia talahau atu ai e au hāu e fakahekeaga oti kana ke he tau gutuhala he tama fifine a Siona.” (Salamo 9:11, 13, 14) He mole e age ke he tama hana ko Solomona e palana tafale ma e faituga, ne fakamonuina mo e fakaheke e Tavita e Atua, he talahau: “Iehova na e, ko e hau ni e mua ue atu mo e malolo, mo e fulufuluola, mo e lilifu, mo e fakahekeaga . . . hau ni e kautu, kua tokoluga ue atu a koe kua mua ue atu ni a koe he tau mena oti kana. . . . Hanai, ha mautolu a Atua na e, kua fakaaue atu a mautolu kia koe, mo e fakaheke atu ke he hau a higoa lilifu.”—1 Nofoaga he Tau Patuiki 29:10-13.
5 Kua uiina tumau e tau Tohiaga Tapu—e, fakamakamaka mai—ki a tautolu ke fakaheke e Atua, tuga ne taute e Tavita. Ko e tohi he tau Salamo kua tokai e tau talahauaga loga he fakahekeaga ke he Atua, mo e liga hafa he tau talahauaga nei ne mai ia Tavita. Kua fakaheke mo e fakaaue tumau a ia ki a Iehova. (Salamo 69:30) Mua atu, tali mai he tau vaha fakamua atu, ko e tau fatiaga faka-Atua ha Tavita mo e falu kua fakaaoga ke fakaheke aki a Iehova.
6. Aoga fefe e tau Salamo omoi he agaga ki a tautolu?
6 Kua aoga ha e tau Salamo ke he tau tagata tapuaki ha Iehova! He magaaho ka manako a tautolu ke fakaaue ke he Atua ma e tau gahua homo atu oti hana ma tautolu, kua lata ke fuluhi atu e tau manamanatuaga ha tautolu ke he tau kupu fulufuluola ne moua he tau Salamo. He aala hake ke he aho fou, tuga anei, liga kua omoi a tautolu ke talahau e tau talahauaga pehenei: “Kua mitaki ke fakaheke atu kia Iehova, mo e uhu lologo ke he hāu a higoa, ko koe kua Mua ue atu. Kia talahau atu foki ke he mogoho pogipogi hāu a fakaalofa, kia talahau atu foki ke he tau po hāu a fakamoli. . . . Ha kua fakafiafia mai e koe au ke he hāu a gahua, Iehova na e; to kalaga fiafia na au ha ko e tau mena ne eke he hāu a tau lima.” (Salamo 92:1-4) He magaaho ka kautu a tautolu mai he fakalavelaveaga ke holo ki mua fakaagaga a tautolu, liga manako a tautolu ke fakakite e fiafia mo e fakaaue tulou he liogi, tuga ne taute he salamo he magaaho ne lologo a ia: “O mai ā, kia kalaga fiafia a tautolu kia Iehova; kia kalaga ke he maka tumau he fakamouiaga ha tautolu. Kia o atu a tautolu ki mua hana mo e fakahekeaga; kia kalaga a tautolu kia ia ke he lologo.”—Salamo 95:1, 2.
7. (a) Ko e heigoa e mena aoga lahi hagaao ke he tau lologo loga ne uhu he tau Kerisiano? (e) Ko e heigoa taha kakano ke o mai tuai ke he tau feleveiaaga mo e nonofo ke oti ai?
7 Kua fa mahani a tautolu ke fakatutu e tau leo he lologo fakaheke ki a Iehova he tau feleveiaaga he fakapotopotoaga, tau toloaga, mo e tau fonoaga. Kua mailoga lahi ai ko e loga he tau lologo nei kua fakave ke he tau leo kofe omoi he agaga mai he tohi he tau Salamo. Kua fiafia ha tautolu ke moua e tau lologo fakamafana loga he vaha fou nei ne fakaheke ki a Iehova! He lologo e tau fakahekeaga ke he Atua ko e taha kakano mitaki lahi a ia ke o atu tuai ke he tau feleveiaaga ha tautolu mo e nonofo ke oti ai, ti fakalataha mogoia mo e tau matakainaga tapuaki he fakaheke a Iehova aki e lologo mo e liogi.
“Kia Fakaheke Atu ki a Ioha, a Mutolu!”
8. Ko e heigoa ne toka ai he kupu “Haleluia,” mo e fa fakaliliu fefe?
8 Ke fakaheke a Iehova kua toka i loto he kupu “Haleluia,” ko e fakaliliuaga he kupu Heperu ne kakano “Kia fakaheke atu a mutolu ke he higoa a Iehova.” Ke fakatai ki ai, he Salamo 135:1-3, ne moua e tautolu e uiina mafanatia mo e malolo nei: “Haleluia. Kia fakaheke atu a mutolu ke he higoa a Iehova; kia fakaheke atu a mutolu ko e tau fekafekau a Iehova. Ko mutolu kua tutu ke he fale a Iehova, ke he tau lotopā he fale he Atua ha tautolu. Haleluia, ha kua mitaki ni a Iehova; kia uhu lologo ke he hana higoa, ha ko e mena fulufu[lu]ola ia.”
9. Ko e heigoa ne omoomoi a tautolu ke fakaheke ki a Iehova?
9 He manamanatu a tautolu ke he tau gahua tufugatia homo atu he Atua mo e tau gahua mua ue atu oti hana ma tautolu, ne omoi he loto fakaaue a tautolu ke fakaheke a ia. He manamanatu atu a tautolu ke he tau mana ne taute e Iehova ma e tau tagata hana he tau vaha kua mole, ne fakalagalaga he tau loto ha tautolu a tautolu ke fakaheke ki a ia. Mo e he manamanatu fakahokulo atu a tautolu ke he tau maveheaga he tau mena mua ue atu ka taute e Iehova, kua kumikumi e tautolu e tau puhala ke fakakite e fakahekeaga mo e loto fakaaue.
10, 11. Puhala fe ne foaki he moui ha tautolu e kakano ke fakaheke e Atua?
10 Kua foaki mai he moui ha tautolu ki a tautolu e kakano mitaki ke fakaheke ki a Ioha. Ne lologo a Tavita: “Kua fakaaue au kia koe [Iehova], ha ko e mena eke au kia matakutakuina mo e ofo ki ai; ko e tau mena ne eke e koe ko e tau mena ke ofomate ki ai haia; kua iloa tonuhia e au e tau mena ia.” (Salamo 139:14) E, kua ‘eke a tautolu mo e ofo ki ai’ mo e moua e tau mena fakaalofa tuga e kitia, logona, mo e manamanatuaga. Ti nakai kia lata ia tautolu ke moui ke he puhala kua fakaheke e Taute ha tautolu? Kua pihia e manatu ha Paulo he tohi e ia: “Hanai, po ke kai mena a mutolu, po ke inu a mutolu, po ke eke e mutolu taha mena, kia eke e mutolu e tau mena oti kana ke fakaheke ai ke he Atua.”—1 Korinito 10:31.
11 To taute e tautolu e tau mena oti ma e lilifu a Iehova kaeke fakaalofa moli a tautolu ki a ia. Ne talahau e Iesu ko e poakiaga fakamua ke: “Kia fakaalofa atu foki a koe ke he Iki hāu a loto katoa, mo e hāu a agaga katoa, mo e hāu a manatu katoa, mo e hāu a malolo katoa.” (Mareko 12:30; Teutaronome 6:5) Kua lata moli ia tautolu ke fakaalofa ki a Iehova mo e fakaheke ki a ia ko e ha tautolu a Taute mo e Foaki he “tau mena mitaki oti kua foaki noa mai.” (Iakopo 1:17; Isaia 51:13; Gahua 17:28) Ha ko e ha tautolu a puhala fakakakano, ha tautolu a tuaga fakaagaga, mo e malolo ha tautolu—tau mahani mo e tau lotomatala oti ha tautolu—kua mai ia Iehova. Ko e Tufuga ha tautolu, kua lata moli a ia mo e fakaalofa mo e fakahekeaga ha tautolu.
12. Fefe e logonaaga hau hagaao ke he tau gahua homo atu ha Iehova mo e tau kupu he Salamo 40:5?
12 Ko e tau gahua homo atu ha Iehova kua foaki ki a tautolu e tau kakano loga ke fakaalofa mo e fakaheke a ia! “Iehova na e, haku Atua, kua loga e tau mena kua eke e koe, ko e hau a tau mana mo e hau a tau manatu kia mautolu,” he lologo e Tavita. “Nakai maeke ke talahau atu kia koe; kua fia fakailoa atu e au mo e vagahau ki ai, ka e loga ni, ai maeke he totou.” (Salamo 40:5) Kua nakai maeke ia Tavita ke talahau e tau gahua mua ue atu ha Iehova, mo e nakai maeke foki ia tautolu. Ka e kia fakaheke tumau e tautolu e Atua he magaaho ka mailoga e tautolu ha gahua homo atu hana.
Tau Gahua ne Matutaki ke he Finagalo i Tuai Tigahau he Atua
13. Lili fefe e amaamanakiaga ha tautolu ke he tau gahua homo atu he Atua?
13 Ko e amaamanakiaga ha tautolu ma anoiha kua lili ke he tau gahua mua ue atu mo e fakaheke ne matutaki ke he finagalo i tuai tigahau he Atua. He mole e totoko i Etena, ne foaki e Iehova e perofetaaga fakamua ma e amaamanakiaga. He fakahala e gata, ne talahau e Atua: “To fakatupu e au e faitaua kia mua mo e fifine, ko e hau a [tega] foki mo e hana [tega]; to tatuki e ia hau a ulu, ka e tatuki ni e koe hana muihui.” (Kenese 3:15, fakatatai NW) Kua mauoka e amaamanakiaga ke he Tega ne mavehe mai he fifine he tau loto he tau tagata tua fakamoli he mole e taute e Iehova e gahua homo atu he fakamoui a Noa mo e magafaoa hana mai he Fakapuke he lalolagi katoa ne tatafi kehe e lalolagi mahani kelea. (2 Peteru 2:5) Tau maveheaga fakaperofeta ke he tau tagata tua tuga a Aperahamo mo Tavita ne fakamaama fakalahi mai e mena ka taute e Iehova he puhala he Tega ia.—Kenese 22:15-18; 2 Samuela 7:12.
14. Ko e heigoa e puhala ne mua he tau gahua homo atu ha Iehova ma e tau tagata?
14 Ko e fakakiteaga ne mua ha Iehova ko ia ne taute e tau gahua homo atu ma e tau tagata kua kitia ai he magaaho ne foaki e ia e Tama fuataha hana—ko e Tega he maveheaga, ko Iesu Keriso—mo poa lukutoto. (Ioane 3:16; Gahua 2:29-36) Ne foaki he lukutoto e fakaveaga ma e fakafeiloaga mo e Atua. (Mataio 20:28; Roma 5:11) Ne fakapotopoto auloa fakamua e Iehova a lautolu ne fakafeilo ke he fakapotopotoaga Kerisiano, ne fakatu he Penetekoso 33 V.N. Fakalataha mo e lagomatai he agaga tapu, ne fakamatala e lautolu e tala mitaki ke he matakavi mamao, he fakakite e puhala ne hafagi he matulei mo e liu fakatu mai ha Iesu e puhala ma e tau tagata omaoma ke moua e tau fakamonuinaaga tukulagi i lalo he pule he Kautu he lagi he Atua.
15. Gahua fefe a Iehova he puhala homo atu he vaha ha tautolu?
15 He vaha ha tautolu, ne taute e Iehova he puhala mua ue atu ke fakapotopoto e tau Kerisiano fakauku fakahiku. Ko e tau matagi he moumouaga kua tau taofi ke fakaata ma e fakamauaga ha lautolu ne toe he 144,000, ka pule mo Keriso i luga he lagi. (Fakakiteaga 7:1-4; 20:6) Kua taute moli he Atua ke laveaki e tau Kerisiano fakauku mai he liliaga fakaagaga ki a “Papelonia, ko e Maga Lahi,” ko e kautu he tau lotu pikopiko. (Fakakiteaga 17:1-5) Ko e laveakiaga he 1919 mo e puipuiaga faka-Atua ne mailoga e lautolu tali mai he magaaho ia, kua fakaata e tau tagata fakauku ne toe ke taute e heigoa? Ke fakakikila atu he foaki e fakamatalaaga fakahiku ato tamai e Iehova e fakaotiaga ke he fakatokaaga kelea ha Satani he “matematekela lahi” ne mafiti mai.—Mataio 24:21; Tanielu 12:3; Fakakiteaga 7:14.
16. Ko e heigoa ne tupu ha ko e fua he gahua fakamatala he Kautu ke he lalolagi katoa he vaha fou nei?
16 Kua takitaki fakamakai he Tau Fakamoli fakauku ha Iehova e gahua fakamatala he Kautu he Atua he lalolagi katoa. Ko e fua, ko e numera tupu ki mua he “mamoe kehe” kua eke mogonei mo tau tagata tapuaki ha Iehova. (Ioane 10:16) Kua fiafia a tautolu kua hafagi agaia e magaaho ma lautolu ne totonu he lalolagi ke fakalataha mai ki a tautolu ke fakaheke ki a Iehova. Ko lautolu ne tali ke he uiina ke ‘o mai a’ kua ha he laini ma e laveakiaga mai he matematekelea lahi, mo e amaamanakiaga ke fakaheke tukumalagi ki a Iehova.—Fakakiteaga 22:17.
Totou Afe kua Fuhi Mai ke he Tapuakiaga Moli
17. (a) Taute fefe e Iehova e tau gahua homo atu he hagaao ke he tau gahua fakamatala ha tautolu? (e) Kua fakamoli fefe a Sakaria 8:23?
17 Kua taute e Iehova he mogonei e tau gahua homo atu mo e fakaheke he matutaki ke he gahua fakamatala ha tautolu. (Mareko 13:10) He tau tau ne mole laia, kua ‘hafagi e ia e pa gutuhala kua lahi mo e aoga lahi.’ (1 Korinito 16:9) Ati maeke ai e tala mitaki ke fakapuloa ke he tau matakavi kehekehe ne fakalavelave mai e tau fi he kupu moli he magaaho fakamua. Tokologa ne momoui he pouligia fakaagaga kua talia mogonei e uiina ke tapuaki ki a Iehova. Kua fakamoli e lautolu e tau kupu fakaperofeta nei: “Kua pehe mai e vagahau a Iehova Sapaota, Ko e tau aho ia to toto atu ai he tau tagata tokohogofulu he tau vagahau oti he tau motu kehe; to toto atu ai e lautolu e kala tapulu he tagata Iuta mo e pehe atu, To o a tautolu mo mutolu; ha kua logona e mautolu ha ia mutolu e Atua.” (Sakaria 8:23) Ko “mutolu” nei ko e tau Iutaia fakaagaga, ko e tau Kerisiano fakauku ne toe he vaha fou nei. Ha kua fakakite he numera hogofulu e katoatoaaga he vahega fakalalolagi, ko e “tau tagata tokohogofulu” ko e “moto tagata tokologa” a ia, ne fakalataha mo “Isaraela he Atua,” ne taute ai e lautolu ke ‘taha e fuifui mamoe.’ (Fakakiteaga 7:9, 10; Kalatia 6:16) Ko e fiafia ha a ia ke kitia e tokologa he mogonei ha ne foaki auloa e fekafekauaga tapu he eke mo tau tagata tapuaki ha Iehova ko e Atua!
18, 19. Ko e heigoa e fakamoliaga kua fakamonuina e Iehova e gahua fakamatala?
18 Kua fiafia a tautolu ha kua totou hogofulu e tau afe—haia, totou teau e tau afe—ha ne kuku mau e tapuaki moli he tau motu ne pule he lotu pikopiko ki ai he vaha fakamua ne tuga kua nakai fakai e tau tagata ke talia e tala mitaki. Kikite ke he Yearbook of Jehovah’s Witnesses fou, mo e mailoga e tau motu ha ne hokotaki mai 10,000 ke tetei 1,000,000 e tau tagata fakailoa he Kautu. Ko e fakamoliaga malolo lahi anei ko e gahua fakamatala he Kautu kua fakamonuina e Iehova.—Tau Fakatai 10:22.
19 Ko e tau tagata ha Iehova, kua fakaheke mo e fakaaue a tautolu ke he Matua ha tautolu he lagi he foaki mai ki a tautolu e amaamanakiaga moli he moui, gahua palepale mitaki he fekafekauaga hana, mo e onoonoaga mitaki lahi ma anoiha. Kua nonofo amaamanaki a tautolu ma e fakamoliaga he tau maveheaga faka-Atua oti mo e kua fakamalolo ke ‘fakatumau a tautolu ke he fakaalofa he Atua, kia hoko atu ke he moui tukulagi.’ (Iuta 20, 21) Ko e fiafia ha ia ha tautolu he mogonei ke kitia kua hokotia e numera he moto tagata tokologa ne fae fakaheke e Atua ke kavi 6,000,000! Fakalataha mo e fakamonuina moli ha Iehova, ko lautolu ne fakauku ne toe mo e tau kapitiga mamoe kehe ha lautolu kua fakatokatoka ke he 91,000 e fakapotopotoaga he 235 e tau motu. Ko tautolu oti kua fagai fakaagaga mitaki he puhala he tau gahua makaukau he “fekafekau fakamoli mo e loto matala.” (Mataio 24:45) Ko e fakatokatokaaga fakateokarasi mo e levekiaga fakaalofa kua foaki e tau gahua he Kautu he puhala he 110 e la ofisa he Tau Fakamoli a Iehova. Kua loto fakaaue a tautolu he omoi e Iehova e tau loto he hana tau tagata ke ‘fakalilifu a ia mo e ha lautolu a tau koloa.’ (Tau Fakatai 3:9, 10) Ko e fua, kua fakatumau e gahua fakamatala ha tautolu he lalolagi katoa, mo e tau matini lomi tohi, tau kaina Peteli mo e misionare, tau Fale he Kautu, mo e tau Fale he Toloaga ha ne ta ka lata ai.
20. Lata ke lauia fefe a tautolu he manamanatu hifo ke he tau gahua homo atu mo e fakaheke ki a Iehova?
20 Kua nakai fakai ia tautolu ke totoku oti e tau gahua homo atu mo e fakaheke he Matua ha tautolu he lagi. Ka e maeke nakai he ha tagata loto tututonu ke kalo mai he fakamatutaki atu ke he tau tagata fakaheke tokologa ha Iehova? Nakai pihia! Ko e mena ia, kia kalaga fiafia a lautolu ne fakaalofa ke he Atua: “Haleluia. Kia fakaheke atu ā mutolu kia Iehova mai he lagi; kia fakaheke a mutolu kia ia ke he tau mena tokoluga. Kia fakaheke atu kia ia a mutolu ko e hana tau agelu oti kana . . . ko e tau fuata katoa mo e tau tamāfine, ko e tau fuakau katoa mo e tau tama. Kia fakaheke a lautolu ke he higoa a Iehova; ha ko e hana higoa hokoia kua lilifu; ko e hana fakahekeaga kua homo ia ke he lalolagi katoa mo e lagi.” (Salamo 148:1, 2, 12, 13) E, he mogonei mo e tukumalagi tukumuitea, kia fakaheke a tautolu ki a Iehova ma e tau gahua homo atu hana!
Tali Fefe e Koe?
• Ko e heigoa falu he tau gahua homo atu ha Iehova?
• Ko e ha ne logona e koe e omoiaga ke fakaheke ki a Iehova?
• Matutaki fefe e amaamanakiaga ha tautolu mo e tau gahua homo atu he Atua?
• Matutaki fefe e tau gahua homo atu ne taute e Iehova mo e gahua fakamatala he Kautu?
[Tau Huhu he Fakaakoaga]
[Fakatino he lau 8]
Fakalataha nakai a koe mo e loto katoa ke he tau lologo fakaheke ki a Iehova?
[Tau Fakatino he lau 9]
Fiafia a tautolu kua fai magaaho agaia ma lautolu ne totonu ke fakalataha mo tautolu he fakaheke ki a Iehova