Fakalataha ke he Olioli he Foaki!
Fakalataha ke he Olioli he Foaki!
“Kua lahi e fiafia he foaki atu ke he talia mai.”—GAHUA 20:35, NW.
1. Fakatata fefe e Iehova e olioli he foaki?
KO E olioli he iloa e kupu moli mo e fua aoga mai ai ko e tau mena fakaalofa uho mai he Atua. Ko lautolu nukua iloa a Iehova kua loga e tau kakano ke olioli. Ka e pete he ha ha i ai e olioli he moua e mena fakaalofa, ti ha ha i ai foki e olioli he foaki atu. Ko Iehova e Foaki he “tau mena mitaki oti . . . katoa mo e tau mena fakaalofa oti kua katoatoa ai e mitaki,” ti ko ia ko e “Atua fiafia.” (Iakopo 1:17; 1 Timoteo 1:11, NW) Ne foaki e ia e tau fakaakoaga mitaki ki a lautolu nukua fanogonogo, mo e fiafia a ia ke he omaoma ha lautolu kua fakaako e ia, tuga ni e tau mamatua kua olioli ka talia he tau fanau e fakaakoaga fakaalofa.—Tau Fakatai 27:11.
2. (a) Ko e heigoa ne talahau e Iesu hagaao ke he foaki? (e) Ko e heigoa e fiafia kua moua e tautolu ka fakaako e tautolu e falu hagaao ke he kupu moli he Tohi Tapu?
2 Pihia foki, ne fiafia a Iesu he magaaho ne nofo he lalolagi ke kitia e tau tagata nukua tali fiafia ke he fakaakoaga hana. Ne fatiaki he aposetolo ko Paulo e talahauaga ha Iesu: “Kua lahi e fiafia he foaki atu ke he talia mai.” (Gahua 20:35) Ko e fiafia ne moua e tautolu ka fakaako e tautolu falu ke he kupu moli he Tohi Tapu kua nakai ni makona he moua taha tagata kua talia e tau taofiaga fakalotu ha tautolu. Mua atu ke he mena ia, ko e olioli he iloa kua foaki e tautolu e taha mena uho mo e tukulagi moli. He foaki fakaagaga, maeke ia tautolu ke lagomatai e tau tagata ke aoga ni ma lautolu he magaaho nei mo e ke he tukulagi.—1 Timoteo 4:8.
Ta Mai he Foaki e Olioli
3. (a) Fakakite fefe he aposetolo ko Paulo mo Ioane e olioli ha laua he lagomatai fakaagaga e falu? (e) Ko e ha e talahau he kupu moli he Tohi Tapu ke he tau fanau ha tautolu ko e fakakiteaga he fakaalofa?
3 E, tuga ni he olioli a Iehova mo Iesu he foaki e tau mena fakaalofa fakaagaga, ti pihia foki e tau Kerisiano. Ne olioli he aposetolo ko Paulo e iloilo ha kua lagomatai e ia e falu ke ako e kupu moli he Kupu he Atua. Ke he fakapotopotoaga i Tesalonia, ne tohi e ia: “Ko e heinoa kia ha mautolu a amaamanaki, mo e hula, mo e foufou ke olioli ai? Nakai kia ko mutolu ki mua he Iki ha tautolu ko Iesu Keriso ke he hana haele mai? Ha ko mutolu, ko e fakahekeaga ha mautolu ia, mo e ha mautolu a [“olioli,” NW].” (1 Tesalonia 2:19, 20) Tuga e aposetolo ko Ioane, ne tohi hagaao ke he tau fanau fakaagaga hana: “Nakai fai fiafia au ke mua ke he mena nai, ka fanogonogo au, kua mahani e fanau haku kua lata mo e kupu moli.” (3 Ioane 4) Manamanatu foki, ke he olioli he lagomatai e tau fanau ni ha tautolu ke eke mo tau fanau fakaagaga ha tautolu! Ko e feaki e tau fanau ke he “tau kupu akonaki mo e tau kupu fakamafana he Iki” ko e fakakiteaga he fakaalofa he vala he tau mamatua. (Efeso 6:4) Ti ko e mena ia kua fakakite he tau mamatua kua manamanatu a lautolu ke he fiafia tukulagi he fanau ha lautolu. Ka tali mitaki a lautolu nei, to moua he tau mamatua e olioli lahi mo e makona.
4. Ko e heigoa e mena tupu kua fakatata e olioli he foaki fakaagaga?
4 Ko Dell ko e fekafekau paionia mau mo e matua fifine lima e tama. Kua pehe a ia: “Ne maama mitaki e au e tau kupu he aposetolo ko Paulo ha kua fakaaue lahi au he tokofa e tama haku ne ‘fakalataha mo e kupu moli.’ Kua iloa e au na ta mai e lilifu mo e fakaheke ki a Iehova ka fakalataha e tau magafaoa ke he tapuakiaga moli, ti logona e au e makona hokulo he kitia hana fakamonuinaaga ke he tau laliaga haku he to e kupu moli i loto he tau fanau haku. Ko e amaamanakiaga fuluola he moui nakai fai fakaotiaga he Parataiso fakalataha mo e magafaoa haku kua fakapuke au aki e amaamanakiaga mo e fakalagalaga au ke fakauka pete ne tau mena uka mo e tau fakalavelave.” Momoko ai, taha e tama fifine ha Dell ne tuku ki tua he fakapotopotoaga ha kua tutuli e mahani nakai faka-Kerisiano. Ka e gahua fakamalolo agaia a Dell ke fakatumau e aga mitaki. “Amanaki au ke he taha aho to fakatokolalo mo e liu fakamoli mai e tama fifine haku ki a Iehova,” he talahau e ia. “Ka e fakaaue au ke he Atua ha kua laulahi he fanau haku ne fekafekau fakamoli ki a ia. Ko e olioli ne logona hifo e au ko e punaaga moli he fakamaloloaga ki a au.”—Nehemia 8:10.
Taute e Tau Kapitiga Tukulagi
5. He foaki e tautolu a tautolu ke he gahua taute tutaki, ko e heigoa e iloilo kua foaki ki a tautolu e makona?
5 Ne hataki e Iesu hana tau tutaki ke taute tutaki Kerisiano ti fakaako a lautolu hagaao ki a Iehova mo e hana tau poakiaga. (Mataio 28:19, 20) Ko Iehova mo Iesu ne lagomatai nakai lotokai e tau tagata ke ako e puhala he kupu moli. He foaki ni e tautolu a tautolu he gahua taute tutaki, ha ha ia tautolu e makona he iloa kua muitua e tautolu e fakafifitakiaga ha Iehova mo Iesu, tuga e tau Kerisiano fakamua. (1 Korinito 11:1) Ka kau auloa a tautolu mo e Atua Mua ue Atu mo e hana Tama fakahele, kua fai kakano moli e tau momoui ha tautolu. Ko e monuina moli ha a ia ke fakalataha mo “tau ekegahua” he Atua! (1 Korinito 3:9) Ti nakai kia fulufuluola ha kua fai vala foki e tau agelu he gahua nei he fakamatala e tala mitaki?—Fakakiteaga 14:6, 7.
6. He fakalataha a tautolu ke he foaki fakaagaga, ko hai ne eke mo tau kapitiga ha tautolu?
6 Moli, he fakalataha ke he gahua nei he foaki e puhala fakaagaga, kua nakai ni eke a tautolu mo tau ekegahua he Atua—ka e moua e tautolu e tuaga kapitiga tukulagi mo ia. Ha ko e tua hana, ne ui a Aperahamo ko e kapitiga ha Iehova. (Iakopo 2:23) He lali a tautolu ke taute e finagalo he Atua, maeke foki a tautolu mo tau kapitiga he Atua. Ka taute e tautolu e mena ia, kua maeke foki a tautolu mo tau kapitiga ha Iesu. Ne tala age a ia ke he tau tutaki hana: “[Kua] totoku atu e au a mutolu ko e tau kapitiga; ha kua fakailoa atu e au kia mutolu e tau mena oti ne fanogonogo ai au ke he haku a Matua.” (Ioane 15:15) Tokologa ne olioli he eke mo tau kapitiga he tau tagata mahuiga po ke tau tagata gahua tokoluga, ka ko tautolu ko e tau kapitiga he tau tagata tokoua mua ue atu he lalolagi mo e lagi katoatoa!
7. (a) Maeke fefe taha fifine ke moua e kapitiga moli? (e) Kua pihia nakai e mena ne tupu ki a koe?
7 Fakalaulahi atu, he lagomatai e tautolu e tau tagata ke iloa e Atua, ne eke foki a lautolu mo tau kapitiga ha tautolu, ti ta mai e fiafia pauaki ki a tautolu. Ko Joan, ne nofo he Fahi Kau Fakalataha, ne kamata fakaako e Tohi Tapu mo e fifine ne higoa ko Thelma. Pete ne fehagai a Thelma mo e tau totokoaga he magafaoa ke he fakaako hana, ne fakauka a ia mo e papatiso he tau hake. Ne tohi e Joan: “Nakai mamutu e feoaki ha maua he naia; ka e feaki ai ke he kapitiga ne tumau ke kavi ke he 35 e tau mogonei. Kua fa mahani a maua ke o tokoua he fekafekauaga mo e ke he tau fonoaga. Fakahiku, ne hiki au ke he kaina fou haku 800 kilomita he mamao. Ka e fakatumau a Thelma ke fakafano mai ki a au e tau tohi fakaalofa lahi mo e mafanatia, he talahau ki a au kua manamanatu lahi a ia ki a au mo e fakaaue ki a au he eke mo kapitiga mo e fakafifitakiaga mo e he fakaako a ia ke he kupu moli mai he Tohi Tapu. He moua e kapitiga tata mo e hofihofi ko e palepale homo ue atu ma e laliaga ne taute e au ke lagomatai a ia ke ako hagaao ki a Iehova.”
8. Ko e heigoa e aga mitaki ka lagomatai a tautolu ke he fekafekauaga?
8 Ko e amaamanaki ke moua taha tagata kua manako ke ako e kupu moli nukua lagomatai a tautolu ke fakauka pete ne tokologa e tau tagata ne feleveia mo tautolu kua tote po ke nakai fiafia ke he Kupu ha Iehova. Ko e fakateaga pihia kua paleko ke he tua mo e fakauka ha tautolu. Ka ko e aga mitaki ka lagomatai a tautolu. Ko Fausto, ne hau i Kuatemala, ne pehe: “Ka fakamatala au ke he falu, ne manamanatu au ke he puhala to maeke la nakai he tagata ia ke eke mo matakainaga tane po ke fifine fakaagaga. Ne manamanatu e au ka taha e tagata ka feleveia mo au to hoko ki mui ti ofania e kupu moli he Kupu he Atua. Kua fakatumau he manatu ia au mo e ta mai ki a au e olioli moli.”
Tanaki e Tau Koloa he Lagi
9. Ko e heigoa ne talahau e Iesu ke he tau koloa he lagi, ti ko e heigoa ne ako e tautolu mai he mena nei?
9 He taute tutaki, he tau fanau ha tautolu po ke he falu tagata, kua nakai mukamuka tumau. Liga ke fai magaaho, fakauka, mo e tumau. Manatu, na tokologa kua fakamakai ke gahua malolo ke tanaki e loga he tau koloa fakatino, ko e tau mena ne fa nakai ta mai e olioli ki a lautolu ti nakai tumau tukulagi. Ne tala age a Iesu ke he tau tagata fanogonogo hana kua mitaki ke gahua ma e tau mena fakaagaga. Ne pehe a ia: “Aua neke tanaki e mutolu e tau koloa ma mutolu ke he lalolagi, ha ha i ai e moko mo e pala ke fakaoti ai, ha ha i ai foki e tau tagata kaiha ke keli atu mo e kaiha ai. Ka kia tanaki e mutolu e tau koloa ma mutolu ke he lagi, nakai ha ha i ai e moko mo e pala ke fakaoti ai, nakai ha ha i ai foki e tau tagata kaiha ke keli atu mo e kaiha ai.” (Mataio 6:19, 20) He tutuli e tau foliaga fakaagaga—ne putoia ai e fai vala ke he gahua aoga he taute tutaki—maeke ia tautolu ke makona he iloa kua taute e tautolu e finagalo he Atua mo e to palepale e ia a tautolu. Ne tohi he aposetolo ko Paulo: “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.”—Heperu 6:10.
10. (a) Ko e ha ne fai koloa fakaagaga a Iesu? (e) Foaki fefe e Iesu a ia, ti ko e heigoa e aoga lahi ke he falu?
10 Ka gahua fakamakai a tautolu ke taute tutaki, kua tanaki e tautolu ma tautolu ni e “tau koloa . . . ke he lagi,” lagotatai mo e mena ne talahau e Iesu. Ta mai he mena nei ki a tautolu e olioli he talia mai. Ka foaki nakai lotokai e tautolu, to fakahiku a tautolu ke monuina. Ne fekafekau fakamoli a Iesu ki a Iehova ke piliona e tau tau. Manamanatu ke he tau koloa ne tanaki e ia he lagi! Moha ia, ne nakai kumi ni a Iesu ke he hana ni a tau manako. Ne tohi he aposetolo ko Paulo: “Ne foaki mai e [Iesu] a ia ha ko e tau hala ha tautolu, kia laveaki mai ai e ia a tautolu he mouiaga kelea ha i ai nai, kua lata mo e finagalo he Atua, ha tautolu a Matua haia.” (Kalatia 1:4) Nakai ni foaki fiafia e Iesu a ia ke he fekafekauaga hana ka e foaki foki e ia hana moui mo lukutoto ke maeke he falu ke liga moua e magaaho ke tanaki e tau koloa he lagi.
11. Ko e mitaki he ha e tau mena fakaalofa mai he tau koloa fakatino?
11 He fakaako e tau tagata hagaao ke he Atua, kua lagomatai e tautolu a lautolu ke kitia foki ke liga tanaki e tau koloa fakaagaga nakai malona. Ko e heigoa e mena fakaalofa mua atu ka foaki e koe? Ka age e koe ke he kapitiga hau e uasi, motoka, po ke kaina tauuka, to liga fakaaue lahi mo e fiafia e kapitiga ia, mo e to moua e koe e olioli he foaki. Ka ko e heigoa la e tuaga he mena fakaalofa ia he 20 tau? He 200 tau? He 2,000 tau? He taha fahi, ka foaki e koe a koe ke lagomatai e tagata ke fekafekau ki a Iehova, kua aoga a ia mai he mena fakaalofa ia tukulagi.
Kumi a Lautolu kua Manako ke he Kupu Moli
12. Maeke fefe he tokologa ke foaki e lautolu a lautolu ke lagomatai fakaagaga e falu?
12 Ke fakalataha ke he olioli he foaki fakaagaga, kua hokotia atu e tau tagata ha Iehova ke he tau kalakala he lalolagi. Totou afe kua toka e tau kaina mo e magafaoa ke taute e gahua misionare he falu motu nukua maeke ia lautolu ke hiki ke he tau vagahau mo e tau aga fakamotu fou. Kua hiki falu ke he tau matakavi he tau motu ni ha lautolu nukua lahi e manako ma e tau tagata fakapuloa he Kautu. Ako agaia he falu e vagahau kehe, hafagi e tau puhala fou ke fakamatala he tau matakavi ni ha lautolu ke he tau tagata o mai ke he motu. Ma e fakatai, he mole e feaki he tokoua e fanau hane gahua mogonei ke he matapatu he lalolagi katoa he Tau Fakamoli a Iehova, ne taha e hoa mau i New Jersey, U.S.A., ne kamata paionia mo e ako e vagahau Saina. Tolu e tau he mole, ne taute e laua 74 e fakaako Tohi Tapu mo e tau tagata vagahau Saina ne o atu ke he aoga tata mai. Maeke nakai a koe ke fakalahi atu e fekafekauaga hau ke he falu puhala ke maeke ke moua foki e olioli he gahua taute tutaki?
13. Liga ko e heigoa hau ka taute ka manako a koe ke fua loga e fekafekauga hau?
13 Liga ke manako a koe ke taute e fakaakoaga Tohi Tapu ka e nakai maeke ke taute. Kua uka lahi ke moua e tau tagata fiafia he falu motu. Liga ko e tau tagata ne feleveia mo koe kua nakai fiafia ke he Tohi Tapu. Ka pihia, liga ke talahau tumau e koe e manako hau ke he liogi, he iloa na fiafia lahi a Iehova mo Iesu ke he gahua mo e liga takitaki a koe ke he tagata tuga e mamoe. Kumi lagomatai mai he falu he fakapotopotoaga nukua maama e puhala po ke fua mitaki e fekafekauaga. Kia fakaaoga e tau fakamahaniaga mo e tau lagomataiaga ne foaki he tau feleveiaaga Kerisiano. Kia aoga mai he fakatonuaga he tau leveki faifano mo e tau hoana ha lautolu. Mua atu, aua neke mahala. Ne tohi he tagata pulotu: “Kia gana e koe hāu a tau fua saito ke he magaaho pogipogi, ti aua neke okioki ai hāu a lima ke he afiafi; he nakai iloa po ke mena fe ke monuina.” (Fakamatalaaga 11:6) Ato hoko ki ai, kia manatu e tau tagata tua fakamoli tuga a Noa mo Ieremia. Pete ni e tokogahoa ne tali fiafia ke he fakamatalaaga ha lautolu, falu ne talia, ti monuina ai e fekafekauaga ha lautolu. Mua atu, ne fiafia a Iehova ki ai.
Taute e Mena kua Fahia a Koe
14. Fefe e onoonoaga ha Iehova ki a lautolu ne momotua he hana fekafekauaga?
14 Liga kua nakai fakaata he tau tutuaga hau a koe ke taute fakalahi e mena kua manako a koe he fekafekauaga. Ma e fakatai, kua fakakaupa he vaha motua e mena kua maeke ia koe ke taute he fekafekauaga ha Iehova. Pete ia, ki a liu ke manatu e mena ne tohi he tagata pulotu: “Ko e foufou fulufuluola e ulu hina, kaeke ke moua ai ke he puhala he tututonu.” (Tau Fakatai 16:31) Ki a Iehova, ko e moui ne fakaaoga he hana fekafekauaga kua mitaki lahi. Fakaholo atu, kua pehe e tau Tohiaga Tapu: “Ke hoko ni ke he vaha ke motua ai, ko au [ko Iehova] ni a ia, ke hoko foki ke he uluhina, ko au ni to uta ai e au a koe, ko au, ne eke e au to toto foki e au, to uta ai e au, mo e laveaki e au a koe.” (Isaia 46:4) Ko e Matua fakaalofa ha tautolu he lagi kua mavehe ke fakatumau mo e lalago hana tau tagata mahani fakamoli.
15. Talitonu nakai a koe kua maama e Iehova e tau tutuaga hau? Ko e ha?
15 Liga kua fakauka a koe ke he gagao, totokoaga mai he hoa nakai tua, mamafa e tau matagahua fakamagafaoa, po ke falu mena lekua uka foki. Mailoga e Iehova e tau kuku mo e tau tutuaga ha tautolu, ti fakaalofa a ia ki a tautolu ma e tau laliaga fakamakamaka ha tautolu ke fekafekau ki a ia. Moli e mena ia pete ni he liga tote e mena kua taute e tautolu mai he falu. (Kalatia 6:4) Iloa e Iehova na nakai mitaki katoatoa a tautolu, ti mailoga e ia e mena kua amanaki a ia mai ia tautolu. (Salamo 147:11) Kaeke ko e fahia na ia ha tautolu, to iloa moli e tautolu kua uho a tautolu ke he fofoga he Atua to nakai nimo e ia e tau gahua ha tautolu he tua.—Luka 21:1-4.
16. Ke he puhala fe kua fai vala e fakapotopotoaga katoa he taute tutaki?
16 Manatu foki, ko e gahua taute tutaki ko e laliaga auloa. Nakai maeke he tagata tokotaha ke taute tutaki, tuga ni e taha e hihina uha ke fakamoui aki e akau. Moli, taha e Fakamoli ne moua e tagata fiafia mo e taute e fakaakoaga Tohi Tapu. Ka hau agataha e tagata fou ia ke he Fale he Kautu, to lagomatai he fakapotopotoaga katoa a ia ke mailoga e kupu moli. Ko e mafanatia he tau matakainaga kua fakakite e fakaohoohoaga he agaga he Atua. (1 Korinito 14:24, 25) Ko e tau fanau mo e tau fuata mui kua foaki e tau tali fakalagalaga, ti fakakite ke he tagata fou kua kehe e tau fuata ha tautolu mai he tau fuata he lalolagi. Ko lautolu ne gagao, lolelole, mo e momotua he fakapotopotoaga nukua fakaako a lautolu kua fou ke he putoiaaga he fakauka. Pete ni kua hoko ki fe e tau tau moui po ke tau kuku ha tautolu, kua igatia a tautolu mo e vala aoga he lagomatai a lautolu ne fou ha ko e ha lautolu a fakaalofa hokulo ke he kupu moli he Tohi Tapu ti hokotia atu a lautolu ke he papatisoaga. Ko e tau matahola oti kua fakaaoga he fekafekauaga, tau liu ahi atu takitaha, tau fakatutalaaga takitaha mo e tagata fiafia he Fale he Kautu, kua liga aoga tote, ka ko e vala he gahua mua ue atu hane fakakatoatoa e Iehova.
17, 18. (a) He lafi ke he gahua taute tutaki, fakalataha fefe a tautolu ke he olioli he foaki? (e) He fakalataha ke he olioli he foaki, ko hai kua fifitaki e tautolu?
17 Moli, he nakai ni fakalataha ke he gahua aoga nei he taute tutaki, kua fai vala foki a tautolu ko e tau Kerisiano he olioli he foaki ke he falu puhala foki. Fakatoka e tautolu taha fatifatiaga tupe ke lagomatai e tapuakiaga moli mo e ke lagomatai a lautolu kua lata. (Luka 16:9; 1 Korinito 16:1, 2) Kumi puhala a tautolu ke fakakite e mahani fakaalofa ke he falu. (Roma 12:13) Maeke ia tautolu ke lali ke “mahani mitaki a tautolu . . . ke he tau tagata oti kana, ka e au atu ke he faoa ne tua.” (Kalatia 6:10) Ti ko e tau puhala mukamuka ka e aoga, maeke ia tautolu ke age ke he falu—e tohi, hea telefoni, mena fakaalofa, lagomatai aoga mo e kupu fakamalolo.
18 He foaki, kua fakakite e tautolu kua fifitaki e tautolu e Matua he lagi ha tautolu. Kua fakatata foki e tautolu e fakaalofa fakamatakainaga ha tautolu, ko e fakakiteaga he fakamailoga he tau Kerisiano moli. (Ioane 13:35) He manatu e tau mena nei kua lagomatai a tautolu ke fakalataha he olioli he foaki.
Maeke Nakai a Koe ke Fakamaama?
• Fakatoka fefe e Iehova mo Iesu e fakafifitakiaga he foaki fakaagaga?
• Liga maeke fefe ia tautolu ke taute e tau kapitiga tukulagi?
• Liga ko e tau lakaaga fe ka taute e tautolu ke monuina ai e tau gahua ha tautolu?
• Maeke fefe he tau fakapotopotoaga oti ke fakalataha ke he olioli he foaki?
[Tau Huhu he Fakaakoaga]
[Tau Fakatino he lau 25]
Ka talia he tau fanau e fakaakoaga, kua olioli lahi mo e makona e tau mamatua
[Fakatino he lau 26]
To lagomatai e Iehova a tautolu he vaha fuakau
[Fakatino he lau 27]
He taute tutaki, maeke ia tautolu ke moua e tau kapitiga moli