Ko e Ha ne Fakaako e Tohi Tapu?

KO BILL ko e fuata, ne pele sipote, fakaako tokoluga, mo e muhu tupe. Ka kua nakai fiafia a ia. Kua nakai fai takitakiaga e moui hana, mo e tupetupe lahi a ia he mena ia. He lali ke moua e kakano he moui, ne kumikumi atu a ia ke he tau lotu kehekehe, ka e nakai moua e ia e mena ne kumi a ia ki ai. He 1991 ne feleveia a ia mo e taha he Tau Fakamoli a Iehova ne toka mo ia e tohi ne tala ke he mena ne talahau he Tohi Tapu hagaao ke he moui. Kua fakatokatoka ai ke fakaako Tohi Tapu ke maeke foki ia Bill ke fakailoa e matakupu nei ke tuga e falu.

Ne manatu e Bill: “He kamata e fakaakoaga ha maua, mo e ha kua hagaaki tumau a maua ke he Tohi Tapu, ne iloa ai e au ko e mena hanei ne kumi au ki ai. Kua olioli lahi e tau tali he Tohi Tapu. He oti e fakaakoaga ia, ne fakaholo hake au ke he mouga, hopo ki fafo he tulaki haku, mo e kalaga fakalahi he fiafia. Kua fiafia lahi au ha kua moua tuai e au e tau tali ke he tau huhu haku.”

Ka e moli, nakai kalaga fiafia e tau tagata oti ne moua e kupu moli he Tohi Tapu. Ka ke iloa e tau  tali ke he tau huhu aoga he moui ko e mena fiafia lahi ma e tokologa. Kua tatai e logonaaga ha lautolu mo e tagata tane he fakatai ha Iesu ne moua e koloa uho ne fufu he fonua. Ne pehe a Iesu: “Ko e hana fiafia foki kua fano ai a ia, kua fakafua atu hana tau mena oti, ti fakafua aki mai e fonua ia.”—Mataio 13:44.

Ko e Kei ke he Moui Kakano

Kua manamanatu a Bill ke he matapatu huhu, Ko e heigoa e kakano he moui? Ko e tau tagata kumikumi ke he lagi, tau fioloti, mo e tau saienetisi kua leva tigahau e taufetului ke he huhu ia. Loga mo e loga e tau volume ne tohia he tau tagata takitokotaha he lali ke moua e tali ki ai. Kua kaumahala ni e tau laliaga ha lautolu, ati tokologa ne talahau kua nakai maeke ke tali e huhu ia. Pete ia, na fai tali agaia. Pete he hokulo, kua nakai uka. Kua fakamaama mai i loto he Tohi Tapu. Ko e kei ke he moui fiafia, fai kakano hanei: Kua lata ia tautolu ke moua e fakafetuiaga mitaki mo Iehova, ko e Tufuga mo e Matua he lagi ha tautolu. To moua fefe e tautolu e mena ia?

Ha ha ai ua e puhala kehekehe ke fakatata atu ke he Atua. Ko lautolu ne taute pihia kua matakutaku mo e fakaalofa ki a ia. Kia kikite a tautolu ke he tau kupu Tohi Tapu ne lalago e talahauaga ia. He vaha tuai tigahau, ne taute he Patuiki ko Solomona e kumikumiaga ke he tau tagata mo e fakamau e tau mena ne moua e ia he tohi Tohi Tapu ha Fakamatalaaga. He fakakatoatoa e tau mena hana ne moua, ne tohia e ia: “Kia fanogonogo a a tautolu ke he fakahikuaga he tau mena oti ia, Kia matakutaku a ke he Atua, mo e omaoma ke he hana tau fakatufono; ha ko e mena ia kua lata ke eke he tau tagata oti kana.” (Fakamatalaaga 12:13) Fai senetenari ne mole, he magaaho ne huhu ko e heigoa e poakiaga i loto he Fakatufono ne age ki a Mose, ne tali age a Iesu: “Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa.” (Mataio 22:37) Kua kehe kia ki a koe he kua lata a tautolu ke matakutaku ke he Atua mo e fakaalofa ki a ia? Kia kumikumi a tautolu ke he aoga he matakutaku mo e fakaalofa mo e puhala ne maeke ia laua ke fakatupu e fakafetuiaga mauokafua mo e Atua.

Kakano he Matakutaku ke he Atua

Kua lata lahi e matakutaku lilifu kaeke ke talia e tapuakiaga ha tautolu ke he Atua. Ne pehe e Tohi Tapu: “Ko e matakutaku kia Iehova, ko e kamataaga ia he iloilo.” (Salamo 111:10) Ne tohia he aposetolo ko Paulo: “Kia fakaaue ai a tautolu, kia fekafekau ai a tautolu ke he Atua mo e fakafiafia kia ia, mo e maimaina, mo e matakutaku.” (Heperu 12:28) Kua tatai ni mo e agelu he lagi ne kitia he aposetolo ko Ioane he fakakiteaga ne kamata e fakapuloaaga hana he tala mitaki aki e tau kupu: “Kia matakutaku a mutolu ke he Atua, mo e ta age kia ia e fakahekeaga.”—Fakakiteaga 14:6, 7.

Ko e matakutaku nei ke he Atua, ne aoga lahi ke he moui, kua nakai tatai mo e matakutaku hopoate. Liga matakutaku hopoate a tautolu ka fakamatakutaku mai e tagata holifono kelea lahi. Ka ko e matakutaku ke he Atua—po ke matakutaku mahani Atua—ko e ofogia lilifu a ia ke he Tufuga. Kua putoia ai foki e matakutaku malolo mitaki neke nakai fiafia e Atua ha ko ia ko e Fakafili Tokoluga ue Atu mo e Mua ue Atu, ne ha ha ia ia e malolo mo e pule ke fakahala a lautolu ne nakai omaoma.

Gahua Fakalataha e Matakutaku mo e Fakaalofa

Pete he pihia, kua nakai manako a Iehova ke fekafekau e tau tagata ki a ia ha kua ofogia a lautolu ki a ia. Ko Iehova ko e Atua ne mua ue atu he fakaalofa. Ne omoi e aposetolo ko Ioane ke tohia: “Ko e Atua ko e fakaalofa a ia.” (1 Ioane 4:8) Nukua fehagai fakamitaki a Iehova ko e Atua mo e tau tagata, mo e manako a ia ke fakaalofa foki e tau tagata ki a ia. Ka e, maeke fefe e fakaalofa pihia ke fakatatai atu ke he matakutaku mahani Atua? Na matutaki ua e tau fua ia. Ne tohia  he salamo: “Kua fakafetui a Iehova mo lautolu kua matakutaku kia ia.”—Salamo 25:14.

Manamanatu la ke he logonaaga fakalilifu mo e ofogia ne ha ha he tama ma e matua tane pulotu. He magaaho taha, to fakaalofa foki e tama pihia ke he matua tane. To falanaki e tama ke he matua tane mo e kumi takitakiaga ki a ia, he talitonu to tamai he takitakiaga hana e tau fua mitaki. Pihia foki ka fakaalofa mo e matakutaku a tautolu ki a Iehova, to omaoma a tautolu ke he takitakiaga hana, mo e to aoga ai a tautolu he mena ia. Mailoga e mena ne talahau e Iehova hagaao ke he tau Isaraela: “Ane mai ke ha ha ia lautolu na e tau loto ke matakutaku kia au, mo e omaoma ai ke he haku a tau poaki oti ke he tau aho oti, po kua monuina ai a lautolu, katoa mo e ha lautolu a fanau tukulagi ni.”—Teutaronome 5:29.

E, kua takitaki atu e matakutaku mahani Atua nakai ke he tupaaga ka ke he tokanoaaga, nakai ke he momoko ka ke he fiafia. Ne perofeta a Isaia hagaao ki a Iesu: “To fiafia foki a ia ke he matakutaku kia Iehova.” (Isaia 11:3) Mo e tohia he salamo: “Uhoaki e tagata kua matakutaku kia Iehova, kua fiafia lahi ke he hana tau poaki.”—Salamo 112:1.

Maali ai, kua nakai maeke a tautolu ke matakutaku ke he Atua po ke fakaalofa ki a ia kaeke nakai iloa e tautolu a ia. Ko e kakano haia ne aoga lahi ai e fakaakoaga he Tohi Tapu. Kua lagomatai he fakaakoaga pihia a tautolu ke maama e aga he Atua mo e mailoga e pulotu he muitua ke he takitakiaga hana. He fakatata fakalahi atu a tautolu ke he Atua, ne manako a tautolu ke taute e finagalo hana mo e omoomoi ai a tautolu ke taofi mau e tau poakiaga hana, he iloa to aoga ai ki a lautolu.—1 Ioane 5:3.

Ko e fiafia lahi a ia ke iloa kua fano e tagata he puhala hako he moui. Kua moli e mena nei hagaao ki a Bill, ne totoku fakamua. Ne talahau fou e ia: “He tau tau hiva ne mole he fakaako Tohi Tapu haku, kua tupu e fakafetuiaga haku mo Iehova. Ko e kalaga fiafia fakamua ne logona hifo e au kua tupu ke he puhala fiafia moli he moui. Ha ha ia au e onoonoaga mitaki tumau ke he moui. Kua pukeina e tau aho haku ke he tau gahua fai kakano, nakai ke he kumikumiaga teao ma e fakafiafiaaga. Kua moli a Iehova ki a au, ti iloa e au kua fiafia moli a ia ke he levekiaga haku.”

He vala tala ne mui mai, to kikite atu a tautolu ke he puhala ka tamai he iloilo ki a Iehova e fiafia mo e tau aoga ki a lautolu ne fakagahuahua ai ke he tau momoui ha lautolu.

[Blurb he lau 5]

Fakatatatata atu ke he Atua ko e kakano kua fakaalofa mo e matakutaku a tautolu ki a ia

[Fakatino he lau 6]

Ne fiafia a Iesu he matakutaku ki a Iehova