Lagomatai ke Maama e Tohi Tapu

KO E tohi tu tokotaha e Tohi Tapu. Ne talahau he tau tagata tohia he Tohi Tapu ke omoi he agaga he Atua, ti fakamoli mai foki he tau fakamauaga i loto kua moli e talahauaga ia. (2 Timoteo 3:16) Mai he falu mena foki, ne fakakite he Tohi Tapu e mena ne o mai ai a tautolu, ko e ha ne ha ha ai a tautolu hinei, mo e o ki fe a tautolu. Moli ni ko e tohi kua latatonu ke manamanatu ki ai!

Liga kua lali tuai a koe ke totou e Tohi Tapu ka kua uka lahi ke maama. Liga nakai iloa e koe e mena ke kumi ai e tau tali ke he tau huhu hau. Ka pihia, nakai ko koe ni tokotaha. Kua tatai e tuaga hau ke he tagata tane ne moui he senetenari fakamua. Ne heke a ia he kariota, he fenoga mai i Ierusalema ke he motu fanau hana, ko Aitiope. Ne totou fakalahi e ofisa Aitiope nei mai he tohi fakaperofeta ha Isaia he Tohi Tapu, nukua molea e fitu teau he tau tau he tohia ai he vaha fakamua atu.

Amanaki ni, ne fakafeleveia age e tagata tane ne poi he tapa he kariota ki a ia. Ko Filipi e tagata ia, ko e tutaki ha Iesu, mo e huhu a ia ke he tagata Aitiope: “Kua maama nakai kia koe e tau mena kua totou ai e koe?” Ne tali age e tagata Aitiope: “To maeke fefe e au, ka nakai fakakite mai e taha kia au?” Ati uiina e ia a Filipi ke hu ki loto he kariota. Ne fakamaama e Filipi e kakano he vala tohi ne totou he tagata mo e fakamatala ki a ia e “tala mitaki kia Iesu.”—Gahua 8:30-35.

Tuga ni he lagomatai e Filipi e tagata Aitiope ke maama e Kupu  he Atua he vaha tuai, hane lagomatai he Tau Fakamoli a Iehova e tau tagata ke maama e Tohi Tapu he vaha nei. To fiafia a lautolu ke lagomatai foki a koe. Fa mahani, kua mitaki ke fakaako fakatautau e Tohi Tapu, kamata mo e tau matapatu fakaakoaga he Tohi Tapu. (Heperu 6:1) He tupu fakaagaga a koe, to maeke ia koe ke moua e mena ne talahau he aposetolo ko Paulo “ko e tau mena kakano”—pehe a ia, ko e hokulo he kupu moli. (Heperu 5:14) Pete ko e Tohi Tapu ne fa e fakaako e koe, ko e falu tohi foki—tau lagomatai he fakaakoaga Tohi Tapu—kua maeke ke lagomatai a koe ke moua mo e maama e tau vala tohi he Tohi Tapu ke he tau matapatu tala kehekehe.

Kua fa mahani e fakaakoaga ke fakatokatoka he magaaho mo e kavi nukua mitaki ki a koe. Ka e fakaako foki falu he telefoni. Kua nakai takitaki e fakaakoaga tuga ne taute he poko aoga; ko e fakaholoaga fakatagata ne taute ke lata mo e tau tutuaga hau, putoia ai e feakiaga mo e fakaakoaga hau. Kua nakai totogi e koe e fakaakoaga Tohi Tapu pihia. (Mataio 10:8) Kua nakai kamatamata, mo e to nakai fakama a koe. To tali e tau huhu hau, mo e to iloa e koe e puhala ke fakatata atu ke he Atua. Ko e ha, mogoia, nukua lata ia koe ke fakaako e Tohi Tapu? Kikite la ke he falu kakano ne kua maeke he fakaako he Tohi Tapu ke lafi e fiafia ke he moui hau.